ʻOku ʻi Fē ʻEku Koloá?
Ashlee Cornell
ʻOkalahoma, USA
Tā fakatātaaʻi ʻe Joshua Dennis
Hili hono ʻave ʻeku fānaú ki he akó, naʻá ku kamata fakakaukauʻi leva e toenga ʻo e ʻahó. Naʻe lahi ʻeku meʻa ke faí, ka naʻe pau ke u ngāue poʻuli ʻi he falemahakí, ko ia naʻe siʻisiʻi pē e taimi naʻá ku maʻú. Te u lava ʻo ngāue ʻi tuʻa, tuitui ha kiʻi kafu ki he ʻaho fāʻeleʻi ʻo hoku kiʻi fakafotú, pe fakamālohisino. Naʻá ku manatuʻi leva ha lea ʻa ʻEletā ‘Eselā Tafu Penisoni (1899–1994):
“ʻI heʻetau fakamuʻomuʻa ʻa e ʻOtuá, ʻe ʻi he tuʻunga totonú ʻa e meʻa kotoa pē” (“The Great Commandment—Love the Lord,” Ensign, May 1988, 4).
“Ta ko e folofolá!” Ko ʻeku fakakaukaú ia. Naʻá ku tangutu ʻi hoku tesí ʻo hoko atu ʻeku ako folofola mei he ʻaho kimuʻá:
“ʻOua ʻe fokotuʻu maʻamoutolu ʻa e koloa ʻi māmaní, ʻa ia ʻoku kai ai ʻe he ané mo e ʻumeʻumeá, pea ʻoku haeʻi ʻe he kau kaihaʻá ʻo kaihaʻasi:
“Kae fokotuʻu maʻamoutolu ʻa e koloa ʻi he langí … .
“He ko e potu ʻoku ʻi ai hoʻomou koloá, pea ʻe ʻi ai foki mo homou lotó” (Mātiu 6:19–21).
“ʻOku ʻi fē ʻeku koloá?” Ko ʻeku fakakaukaú ia. Naʻe tuku ʻi he tafaʻaki ʻo ʻeku folofolá ha ngaahi hingoa ʻe fā mei he fāmili ʻo hoku husepānití ʻa ia naʻá ku toki ʻave ki he temipalé. Ko e ongomātuʻa ʻa hoku husepānití naʻá na fuofua kau ʻi hona ongo fāmilí ki he Siasí. Kuó u ngāue ʻeni he taʻu ʻe ua kuo hilí ʻi he tafaʻaki ʻo ʻeku tangataʻeiki ʻi he fonó kuo mālōloó. Naʻá ku pehē ke u hū ki he FamilySearch ʻo sio pe naʻe lekooti e ngaahi ouaú kuo fakakakato.
Naʻá ku sio ki he ngaahi fakaʻilonga temipalé ʻi hono tafaʻakí. Naʻá ku ʻohovale ʻi he kei taʻekakato ha ngaahi hingoa lahi naʻá ku teuteu ki he ouau silá. Mahalo kuo pulia e ngaahi kātí ia, pea naʻe teʻeki fakahoko hono ngaahi silá! ʻI he ʻosi pē ʻeku toe paaki e ngaahi hingoá, naʻe haʻu ha fakakaukau mahino kiate au, “Te ke lava he taimí ni ʻo fai hoʻo ngaahi ngāué.”
Naʻá ku ongoʻi nonga ʻi heʻeku ʻilo kuó u fakamuʻomuʻa ʻa e ʻEikí. Naʻá Ne tokoni mai ke u fakamuʻomuʻa e meʻa naʻe mahuʻinga tahá. Ko e meʻa mahuʻinga taha kiate aú ʻa e fiefia ʻo hoku fāmilí ʻi he nofo taʻengatá. ʻOku ou ʻilo kapau te u fakamuʻomuʻa ʻa e ʻOtuá, ʻe sai e meʻa kotoa ki heʻeku lelei fakalaumālié mo e lelei ʻa e niʻihi kehé.