Naʻá Ku Muimui ʻi he ʻUluaki Ueʻi Fakalaumālié
Kenny Quispitupac
Lima, Pelū
Tā fakatātā ʻa Simone Shin
ʻI ha ʻaho Sāpate ʻe taha hili ʻeku foki mei he lotú, naʻá ku tō ʻo mohe he mei kotoa ʻo e houa efiafí.
Naʻe fakapoʻuli ʻi heʻeku ʻā haké. Naʻe kamata ʻaki ʻeku palani fakauiké ha lotu ke kole e founga te u tokoni lelei taha ai ki he ʻEikí. Naʻe ueʻi fakalaumālie au ke u ʻalu ʻo faiako fakaʻapi. Ne ʻosi hoko e 8 efiafí, ko ia ne u pehē ai ke u toki ʻalu ʻi he Tūsite hono hokó, ka naʻe toe mālohi ange ʻeku ongo ke u ʻalu he pō ko iá.
Naʻá ku manatuʻi e faleʻi naʻe fai ʻe ʻEletā Loni A. Laasipeeni ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻi he senitā akoʻanga fakafaifekau ʻi Lima, Peluú, ʻi heʻeku kei hoko ko ha faiako aí: “Muimui ʻi he ʻuluaki ueʻi fakalaumālié.” Naʻá ku tā leva ki hoku hoa faiako fakaʻapí ka naʻe ʻikai tali mai. Naʻá ku pehē ke u ʻalu pē au.
Naʻá ku fakatokangaʻi ʻi heʻeku hū ki tuʻa mei falé ha taulaʻeiki siʻi kei talavou ʻi homau uōtí ʻoku lue hake he halá. Naʻá ku fakafeʻiloaki atu ki ai peá u kole ange pe ʻe fie ʻalu mo au. Naʻá ne loto ki ai. ʻI he fuofua ʻapí, naʻe fakaava mai ʻe he tangataʻeikí e matapaá. Naʻá ku talaange kiate ia naʻá ku ongoʻi ʻoku fie maʻu ke u haʻu ʻo vakai ia. Naʻá ne malimali mo ne talamai ʻoku fai hono tafa ʻi he ʻaho ʻe tahá pea ʻe lelei ke foaki ange hano tāpuaki. Naʻá ku foaki ange ha tāpuaki pea naʻá ma hoko atu ki he ʻapi hono hokó.
Ko e 8:40 efiafi ia ʻi heʻema aʻu atu ki he ʻapi ʻo e fāmili hono hokó. Ne nau ʻohovale ʻaupito he sio mai kiate kimauá he kuo fuoloa e poʻulí. Naʻá ma hū atu ki he falé peá ma fakatokangaʻi ʻoku puke ʻa e tangataʻeikí. Naʻá ku kole ange ke u foaki maʻana ha tāpuaki.
ʻI heʻema foki ki ʻapí, naʻá ku vahevahe e tohi ʻa Molonai 7:13 mo hoku hoa kei talavoú: “Ko e meʻa kotoa pē ʻoku fakaafeʻi mo poupouʻi ke faileleí, mo ʻofa ki he ʻOtuá, pea tauhi kiate iá, ʻoku ueʻi hake ia ʻe he ʻOtuá.”
Naʻá ku talaange kiate ia naʻe ʻikai fakatuʻupakē e ngaahi meʻa naʻe toki hokó he naʻá ku maʻu ha ueʻi fakalaumālie. Naʻá ne talamai ʻoku tui ki ai koeʻuhí naʻá ne lotua ha founga ke ne ʻilo ai e Laumālié kimuʻa peá u fakafetaulaki angé.
ʻOku ʻikai ke u ʻilo pe naʻe ʻaonga ʻeku ongoʻi ke u ʻalu ʻo faiako fakaʻapí ki hoku fāmilí pe ko e kiʻi talavou ko ʻení, ka ʻoku ou fiefia naʻá ku fakafanongo. ʻOku ou ʻilo te tau maʻu ha ngaahi tāpuaki lahi ʻi heʻetau muimui ʻi he ʻuluaki ueʻi ʻa e Laumālié.