Ngaahi ʻAta ʻo e Tuí
Feinga Fanguna
Tongatapu, Tonga
ʻOku tauhi ʻe Feinga ko ha tokotaha tā tongitongi, ʻa hono uaifí, ko ʻena fānau ʻe toko tolú, mo e toko tolu kehe ʻokú na tokangaʻí. Ne ʻikai faingofua maʻu pē, ka ʻi hono fakamuʻomuʻa ʻo e ʻOtuá, kuo nau maʻu maʻu pē ha meʻa feʻunga.
Tokotaha faitaá, Christina Smith
ʻI heʻeku fuofua mali mo hoku hoa ko ʻĀnaú, na ʻá ku tā tongitongi ha fanga kiʻi meʻa iiki peá u ʻalu ki he māketí ke fakatau kinautolu. Naʻá ku foki mai mo ha paʻanga ʻi ha ngaahi ʻaho ʻe niʻihi, pea ʻikai fakatau ha meʻa ʻi he ngaahi ʻaho kehé.
Naʻá ku fanongo ʻoku ʻi ai ha tangata naʻe foki mai mei Hauaiʻi ʻa ia naʻe akoʻi ʻe ha kau Mauli mei Nuʻu Sila ʻi he tā tongitongí. ʻI heʻema fetaulakí, naʻá ne pehē mai, “ʻOku ʻikai ko ha faiako au, ko ha tangata tā tongitongi au. Ka ʻo kapau ʻokú ke fie tokoni hono faʻu ha kalia (ko ha pōpapo faka-Tonga), ʻe lava ke ta ʻalu.” Naʻá ku ako lahi meiate ia fekauʻaki mo e tā tongitongí.
ʻOku talaʻofa mai ʻe hoku tāpuaki fakapēteliaké, ʻe tāpuekina ʻe he ʻEikí e ngāue ʻo hoku nimá pea te u fakaʻaongaʻi hoku talēnití ke tokoniʻi ʻa e kakaí. ʻOku hoko e ngaahi talaʻofa ko ʻení.
Kuó u folau ki ʻAositelēlia, Nuʻu Sila, Kuamu, Siapani mo ʻAmelika ke fakafofongaʻi ʻa Tonga ʻi he ngaahi kātoanga ʻātí mo e tā tongitongí.
Kuó u lava ʻi heʻeku hoko ko e tokotaha tā tongitongí, ʻo tauhi hoku fāmilí. ʻOku ou maʻu mo hoku uaifí ha fānau ʻe toko tolu mo ha niʻihi kehe ʻe toko tolu ʻokú ma tokangaʻi. ʻOkú ma fai e meʻa ʻokú ma lavá ke tokoniʻi e fānaú. ʻOkú ma feinga ke fakahaaʻi kiate kinautolu ʻa e fiefia ʻoku maʻu ʻi he ongoongoleleí.
ʻOkú ma maʻu ha fanga puaka, pulu mo e fanga moa. ʻOkú ma maʻu ha siaine mo ha mei. ʻOkú ma tō e manioké mo e ʻufí ke vahevahe mo e niʻihi kehé.
ʻOku faitāpuekina kimaua ʻi ha ngaahi founga lahi. ʻOku pehē ʻe homa ngaahi kāingá ʻokú ma tuʻumālie. ʻOku ʻikai, ka ʻokú ma maʻu e meʻa kotoa pē ʻokú ma fie maʻú koeʻuhí ko ʻema fakamuʻomuʻa ʻa e ʻOtuá.
ʻOkú ma tauhi e ngaahi fekaú, ʻalu ki he lotú, fai e efiafi fakafāmilí, lau e Tohi ʻa Molomoná mo lotu fakafāmili, pea ʻokú ma totongi ʻema vahehongofulú. Ko e maʻuʻanga tāpuaki ia homa fāmilí.