សេចក្តីសញ្ញាថ្មី ហើយអស់កល្ប អស់កាលជានិច្ច
នៅពេលយើងយល់ ហើយរស់នៅតាមសេចក្ដីសញ្ញាថ្មី ហើយអស់កល្បអស់កាលជានិច្ច នោះយើងនឹងគ្រងមរតកនៃជីវិតដ៏នៅអស់កល្បជានិច្ច ។
រចនារូបថតនៃពិធីបញ្ជាក់ដោយ សារ៉ា ខារ៉ាប៊ីន ជេនសុន រូបថតរបស់គូស្វាមីភរិយានៅមុខព្រះវិហារបរិសុទ្ធ ឡូស អាន់ជើឡែស ដោយ ជើរី ហ្គន រូបភាពផ្ទៃខាងក្រោយមកពី ISTOCK/THINKSTOCK
គោលបំណងនៃជីវិតនេះ
មនុស្សម្នាក់ៗគឺជាបុត្រា ឬ បុត្រីដ៏ជាទីស្រលាញ់របស់ព្រះមាតាបិតាសួគ៌ ។១ ផែនការនៃសេចក្តីសង្គ្រោះរបស់ព្រះវរបិតាសួគ៌ ផ្តល់ឱកាសដល់បុគ្គលម្នាក់ៗឲ្យទទួលជីវិតដ៏នៅអស់កល្បជានិច្ច ដែលជាជីវិតដែលមានព្រះដឹកនាំ ។២ គ្មានអំណោយទានណាមហិមាជាងនេះឡើយ ។៣ ចំណេះដឹងនៃផែនការនៃសេចក្តីសង្គ្រោះពន្យល់ពីគោលបំណងនៃជីវិតនេះ បើសិនយើងជ្រើសរើសធ្វើដូច្នេះ នោះយើងនឹងត្រូវបានដឹកនាំឲ្យធ្វើការសម្រេចចិត្ត ដោយមានទស្សនវិស័យអស់កល្បជានិច្ចមួយ ។
ផែនការនេះ និង អ្វីៗដែលទាក់ទងនឹងជីវិតរមែងស្លាប់ត្រូវបានពន្យល់ប្រកបដោយអានុភាពនៅក្នុងអត្ថបទ លីអាហូណា ខែ តុលា ឆ្នាំ ២០១៥ ស្តីពីប្រធានបទនេះដោយអែលឌើរ រ៉ូបឺត ឌី ហែល នៃកូរ៉ុមនៃពួកដប់ពីរនាក់ ។៤ ជាផ្នែកមួយនៃផែនការរបស់ទ្រង់ ព្រះវរបិតាបានបង្កើតសេចក្តីសញ្ញាថ្មី ហើយអស់កល្បអស់កាលជានិច្ច ដែលធ្វើឲ្យបុត្រា និង បុត្រីរបស់ទ្រង់ត្រឡប់ទៅកាន់វត្តមានរបស់ទ្រង់ ហើយគ្រងមរតកនៃជីវិតដ៏អស់កល្បជានិច្ច ។
នៅក្នុងបុព្វកថារបស់ទ្រង់ចំពោះព្រះគម្ពីរគោលលទ្ធិ និង សេចក្តីសញ្ញាព្រះអម្ចាស់មានបន្ទូល ៖ « ហេតុដូច្នេះហើយ យើងជាព្រះអម្ចាស់ ដោយជ្រាបនូវគ្រោះដែលនឹងមានមកលើ បណ្តាជនទាំងឡាយនៅលើផែនដីនោះបានហៅយ៉ូសែប ស្ម៊ីធ ជុញ្ញ័រ ជាអ្នកបម្រើរបស់យើង ហើយបាននិយាយមកកាន់លោកពីលើស្ថានសួគ៌ …
« ដើម្បីឲ្យសេចក្តីសញ្ញាដ៏អស់កល្បអស់កាលជានិច្ចរបស់យើងអាចបានតាំងឡើង » ។៥
ជាញឹកញាប់សេចក្តីសញ្ញានេះគឺព្រះអម្ចាស់សំដៅលើ « សេចក្តីសញ្ញាថ្មី ហើយអស់កល្បអស់កាលជានិច្ច » ដែលដាក់បញ្ចូលនូវភាពពោរពេញនៃដំណឹងល្អនៃព្រះយេស៊ូវគ្រីស្ទ រួមមានទាំងពិធីបរិសុទ្ធ និង សេចក្តីសញ្ញាទាំងអស់ដែលចាំបាច់សម្រាប់សេចក្តីសង្គ្រោះនៃមនុស្សលោក ។៦ ទោះបីជាការតាំងឡើងនូវសេចក្តីសញ្ញាថ្មី ហើយអស់កល្បអស់កាលជានិច្ចលើផែនដីនេះ គឺជាគោលបំណងចម្បងនៃការស្តារឡើងវិញក្តី ក៏ពួកបរិសុទ្ធថ្ងៃចុងក្រោយមួយចំនួនពុំយល់ពីសារៈសំខាន់នៃសេចក្តីសញ្ញា និង ការសន្យាអំពីអ្វីៗដែលល្អដែលប្រទានមកដល់អស់អ្នកដែលនៅជាប់នៅក្នុងសេចក្តីសញ្ញាទាំងនោះឡើយ ។ គោលបំណងនៃអត្ថបទនេះគឺដើម្បីជួយយើងម្នាក់ៗឲ្យយល់ ហើយរស់នៅតាមសេចក្ដីសញ្ញាថ្មី ហើយអស់កល្បអស់កាលជានិច្ច ដើម្បីឲ្យយើងអាចនឹងគ្រងមរតកនៃជីវិតដ៏នៅអស់កល្បជានិច្ច ។ អត្ថបទនេះក៏នឹងពន្យល់ផងដែរពីរបៀបមួយនៃពិធីបរិសុទ្ធ និង សេចក្តីសញ្ញានៃដំណឹងល្អដែលសំខាន់បំផុត — អាពាហ៍ពិពាហ៍ដ៏នៅអស់កល្បជានិច្ច — ដែលជាផ្នែកមួយនៃសេចក្តីសញ្ញាថ្មី ហើយអស់កល្បអស់កាលជានិច្ចនៃដំណឹងល្អ ។
អត្ថន័យ និង គោលបំណងនៃសេចក្តីសញ្ញាថ្មី ហើយអស់កល្បអស់កាលជានិច្ច
អត្ថន័យនៃសេចក្តីសញ្ញានៅក្នុងដំណឹងល្អមានន័យថា ជាការព្រមព្រៀងមួយ ជាកិច្ចសន្យា ឬ ជាការយល់ព្រមមួយរវាងព្រះ និង មនុស្សម្នាក់ ( ឬ ច្រើននាក់ ) ដែលទទួលពិធីបរិសុទ្ធនៃបព្វជិតភាពដែលធ្វើឡើងដោយនរណាម្នាក់ ដែលមានសិទ្ធិអំណាចបព្វជិតភាព ហើយយល់ព្រមតាមលក្ខខណ្ឌនៃសេចក្តីសញ្ញាដែលពាក់ព័ន្ធ ។ លក្ខខណ្ឌទាំងនេះត្រូវបានតាំងឡើងដោយព្រះ ។៧
សេចក្តីសញ្ញថ្មី ហើយដ៏នៅអស់កល្បអស់កាលជានិច្ចនេះ « គឺជាលទ្ធផលសរុបនៃសេចក្តីសញ្ញា និង កាតព្វកិច្ចទំាងឡាយនៃដំណឹងល្អ »៨ ដែលបានប្រទានឲ្យតាំងពីបុរាណ៩ ហើយត្រូវបានស្តារឡើងវិញម្តងទៀតនៅលើផែនដីនៅថ្ងៃចុងក្រោយនេះ ។ ការណ៍នេះបានពន្យល់នៅក្នុង គោលលទ្ធិ និងសេចក្ដីសញ្ញា ៦៦:២ ៖ « យើងបា្រប់អ្នកជាប្រាកដថា អ្នកមានពរហើយ ដែលបានទទួល សេចក្តីសញ្ញាដ៏អស់កល្បអស់កាលជានិច្ចរបស់យើង គឺជាភាពពោរពេញនៃដំណឹងល្អរបស់យើង ដែលបានចាត់ឲ្យចេញទៅដល់កូនចៅមនុស្ស ប្រយោជន៍ឲ្យពួកគេអាចមានជីវិត ហើយអាចបានទៅជាពួកអ្នកមានចំណែកក្នុងសិរីល្អទាំងឡាយដែលនឹងត្រូវបានបើកសម្តែង នៅក្នុងគ្រាចុងក្រោយបង្អស់ដូចដែលបានសរសេរទុកដោយពួកព្យាការី និង ពួកសាវកសម័យបុរាណ » ។១០ ដោយសារសេចក្តីសញ្ញានេះត្រូវបានស្តារឡើងវិញនៅក្នុងសម័យកាន់កាប់ត្រួតត្រាចុងក្រោយនេះ ដូច្នេះវាគឺជាសេចក្តីសញ្ញា « ថ្មី » ហើយដោយសារវាគ្មានទីបញ្ចប់១១ នោះវាគឺ « នៅអស់កល្បជានិច្ច » ។
នៅក្នុងព្រះគម្ពីរ ព្រះអម្ចាស់មានព្រះបន្ទូលទាំងសេចក្តីសញ្ញាថ្មី ហើយអស់កល្បអស់កាលជានិច្ច « នេះ » និង សេចក្តីសញ្ញាថ្មី ហើយអស់កល្បអស់កាលជានិច្ច« មួយ » ។ ឧទាហរណ៍នៅក្នុង គោលលទ្ធិ និង សេចក្តីសញ្ញា ២២:១ទ្រង់បានមានព្រះបន្ទូលសំដៅលើពិធីបុណ្យជ្រមុជទឹកថាជាសេចក្តីសញ្ញាថ្មី ហើយអស់កល្បអស់កាលជានិច្ចមួយ ដែលមានតាំងពីដើមដំបូងមកម្ល៉េះ » ។ នៅក្នុង គោលលទ្ធិ និង សេចក្តីសញ្ញា ១៣២:៤ព្រះអម្ចាស់ក៏សំដៅលើអាពាហ៍ពិពាហ៍អស់កល្បជានិច្ចថាជា « សេចក្តីសញ្ញាថ្មី ហើយអស់កល្បអស់កាលជានិច្ចមួយ ដែរ » ។ នៅពេលទ្រង់មានបន្ទូលពីសេចក្តីសញ្ញាថ្មី ហើយអស់កល្បអស់កាលជានិច្ច « មួយ » ទ្រង់មានបន្ទូលពីសេចក្តីសញ្ញាមួយនៃសេចក្តីសញ្ញាជាច្រើន ដែលបានបញ្ចូលដោយដំណឹងល្អរបស់ទ្រង់ ។
នៅពេលព្រះអម្ចាស់មានបន្ទូលជាទូទៅអំពី សេចក្តីសញ្ញាថ្មី ហើយអស់កល្បអស់កាលជានិច្ច « នេះ » នោះទ្រង់កំពុងមានព្រះបន្ទូលពី ភាពពោរពេញនៃដំណឹងល្អនៃព្រះយេស៊ូវគ្រីស្ទ ដែលមានក្តោបទាំងពិធីបរិសុទ្ធ និង សេចក្តីសញ្ញាទាំងឡាយដែលចាំបាច់សម្រាប់សេចក្តីសង្គ្រោះ និង ភាពតម្កើងឡើងនៃមនុស្សលោក ។ ពិធីបុណជ្រមុជទឹក និង អាពាហ៍ពិពាហ៍ដ៏នៅអស់កល្បជានិច្ចពុំមែនជាសេចក្តីសញ្ញាថ្មី ហើយអស់កល្បអស់កាលជានិច្ច « នេះ » ឡើយ ផ្ទុយទៅវិញវាគឺជាផ្នែកមួយៗនៃសេចក្តីសញ្ញាទាំងមូល ។
អស់អ្នកទាំងឡាយណាដែលកាន់ខ្ជាប់ដរាបដល់ចុងបំផុត នៅក្នុងសេចក្តីសញ្ញាថ្មី ហើយអស់កល្បអស់កាលជានិច្ចនេះទទួលបានជីវិតដ៏នៅអស់កល្បជានិច្ច
ពរជ័យដ៏មហិមា និង អស់កល្បជានិច្ចត្រូវបានសន្យាប្រទានដល់អស់អ្នកណាដែលទទួល ពិធីបរិសុទ្ធនៃដំណឹងល្អដែលបានធ្វើឡើងដោយសិទ្ធិអំណាចបព្វជិតភាពត្រឹមត្រូវ ហើយផ្សារភ្ជាប់ដោយព្រះវិញ្ញាណបរិសុទ្ធនៃសេចក្តីសញ្ញា១២ ហើយជាអ្នកដែលបានរក្សាសេចក្តីសញ្ញាដ៏ពិសិដ្ឋដែលទាក់ទងជាមួយពិធីបរិសុទ្ធទាំងនោះ ។ ពរជ័យទាំងនេះរួមមានការអភ័យទោសពីអំពើបាប១៣ អំណាចនៃព្រះ១៤ និង មានភាពជាដៃគូនៃព្រះវិញ្ញាណបរិសុទ្ធ១៥ រួមគ្នាជាមួយនឹងសេចក្តីណែនាំ ការបំផុសគំនិត ការលួងលោម សេចក្តីសុខសាន្ត សេចក្តីសង្ឃឹម និង ការញែកចេញជាបរិសុទ្ធដែលអមមកជាមួយនឹងអំណោយនោះ ។១៦
ពរជ័យ និង អំណោយទានដ៏ធំមហិមាបំផុតរបស់ព្រះនោះគឺ ជីវិតដ៏នៅអស់កល្បជានិច្ច — ដែលវាគឺជាជីវិតដែលព្រះរស់នៅ !១៧ អំណោយទាននេះត្រូវបានប្រទានឲ្យតែអស់អ្នកដែលទទួលបានពិធីបរិសុទ្ធទាំងអស់នៃដំណឹងល្អ ហើយរស់នៅតាមសេចក្តីសញ្ញាដែលមានបញ្ចូលនៅក្នុងសេចក្តីសញ្ញាថ្មី ហើយដ៏អស់កល្បអស់កាលជានិច្ច ។១៨ នៅក្នុងព្រះបន្ទូលរបស់ព្រះអម្ចាស់ ៖ « សេចក្តីសញ្ញាថ្មី ហើយអស់កល្បអស់កាលជានិច្ច … នោះត្រូវបានបង្កើតឡើង សម្រាប់ភាពពោរពេញនៃសិរីល្អរបស់យើង » ។១៩ ពិតណាស់ អស់អ្នកដែលចូលក្នុងសេចក្តីសញ្ញាថ្មី ហើយដ៏អស់កល្បអស់កាលជានិច្ច ហើយកាន់ខ្ជាប់ដរាបដល់ចុងបំផុត នោះ « នឹងត្រូវបានក្រោកឡើងនៅក្នុងដំណើររស់ឡើងវិញលើកទីមួយ … ហើយនឹងបានគ្រងបល្ល័ង្កទាំងឡាយ នគរទាំងឡាយ ក្សត្របុរីទាំងឡាយ និងអំណាចទាំងឡាយ អំណាចគ្រប់គ្រងទាំងឡាយ គ្រប់ទីកំពស់ និង ជម្រៅទាំងអស់ » ។២០ ព្រះអម្ចាស់ថ្លែងយ៉ាងដាច់អហង្កាថា « នោះនឹងបានសម្រេចដល់ពួកគេ ចំពោះគ្រប់ការណ៍ទាំងអស់ ដែលអ្នកបម្រើរបស់យើងបានភ្ជាប់ទៅលើពួកគេ ក្នុងកាលវេលា និង រហូតដល់អស់ទាំងភាពអស់កល្បជានិច្ចផង ហើយនឹងមានប្រសិទ្ធិភាពពេញលេញ កាលពួកគេចាកចេញពីលោកិយទៅ ហើយពួកគេនឹងបង្ហួសទេវតាទាំងឡាយ និង ព្រះទាំងឡាយដែលបានចាត់ឲ្យនៅទីនោះ ដើម្បីទៅរកភាពតម្កើងឡើង និង សិរីល្អរបស់ពួកគេ ក្នុងអ្វីៗគ្រប់ទាំងអស់ ដូចដែលបានភ្ជាប់លើក្បាលពួកគេ គឺជាសិរីល្អដែលនឹងបានពូជដ៏បរិបូរ និង បន្តបន្ទាប់ជារៀងដរាបទៅ ។ ខណៈនោះពួកគេនឹងទៅជាព្រះ » ។២១
សរុបមកវិញ អស់អ្នកដែលចូលក្នុងសេចក្តីសញ្ញាថ្មី ហើយអស់កល្បអស់កាលជានិច្ច ហើយស៊ូទ្រាំដោយស្មោះត្រង់រហូតដល់ទីបំផុតនោះនឹង ( ១ ) ទទួលភាពពោរពេញនៃសិរីល្អនៃព្រះ ( ២ ) រីករាយនឹងអំណាចនៃព្រះសម្រាប់វេលាកាល និង អស់ទាំងភាពអស់កល្បជានិច្ច២២ ( ៣ ) ត្រូវបានតម្កើងឡើង ( ៤ ) រីករាយនឹងអាពាហ៍ពិពាហ៍ដ៏នៅអស់កល្បជានិច្ច ព្រមទាំងបន្តរីកចម្រើន និង ( ៥ ) ក្លាយទៅជាព្រះ ។ រួមគ្នាមក ពរជ័យទាំងនេះរួមបញ្ចូលដើម្បីតម្កើងឡើងអំណោយទាននៃជីវិតដ៏នៅអស់កល្បជានិច្ច ។
យើងត្រូវតែគោរពតាមសេចក្តីសញ្ញានិមួយៗនៅក្នុងសេចក្តីសញ្ញាថ្មី ហើយអស់កល្បអស់កាលជានិច្ច
ព្រះអម្ចាស់ថ្លែងយ៉ាងច្បាស់ថា យើងនឹងទទួលនូវពរជ័យដ៏ទេវភាពទាំងនេះបានលុះត្រាតែ នៅពេលយើងធ្វើតាមក្រឹត្យវិន័យនានារបស់ទ្រង់ ដែលបានកំណត់មកនៅក្នុងសេចក្តីសញ្ញាថ្មី ហើយអស់កល្បអស់កាលជានិច្ចនេះ ៖ « សេចក្តីសញ្ញាថ្មី ហើយអស់កល្បអស់កាលជានិច្ច … ត្រូវបានបង្កើតឡើងសម្រាប់ភាពពោរពេញនៃសិរីល្អរបស់យើង ហើយអ្នកណាដែលទទួលនូវភាពពោរពេញនៃសិរីល្អនោះ នោះត្រូវហើយគួរនៅជាប់នឹងក្រឹត្យវិន័យ បើពុំនោះសោតទេ អ្នកនោះនឹងជាប់ទោស ព្រះអម្ចាស់ដ៏ជាព្រះទ្រង់មានព្រះបន្ទូលថាដូច្នោះ » ។២៣ ទ្រង់ក៏បានថ្លែងដែរថា « ដ្បិតអស់អ្នកណាដែលបានព្រះពរពីព្រះហស្តរបស់យើង នោះនឹងនៅជាប់នឹងក្រឹត្យវិន័យដែលបានតាំងសម្រាប់ព្រះពរនោះ និង លក្ខខណ្ឌនៃក្រឹត្យវិន័យនោះ ដូចដែលបានបង្កើតឡើងតាំងពីមុនកំណើតលោកិយមកម្ល៉េះ » ។២៤ នៅក្នុងកណ្ឌដដែលនោះនៃគោលលទ្ធិ និងសេចក្ដីសញ្ញា ព្រះអម្ចាស់បានលើកពីគោលការណ៍នេះ ៖ « ប្រាកដមែន យើងប្រាប់អ្នកជាប្រាកដថា លើកលែងតែអ្នករាល់គ្នានៅជាប់នឹងក្រឹត្យវិន័យរបស់យើង នោះអ្នករាល់គ្នាពុំអាចបានសិរីល្អនេះឡើយ » ។២៥
តម្រូវការត្រង់នេះ ដែលថាយើងត្រូវតែគោរពធ្វើតាមក្រឹត្យវិន័យនៃព្រះ ដើម្បីទទួលបានសិរីល្អដែលទ្រង់ប្រទានឲ្យដល់ពួកអ្នកស្មោះត្រង់នោះ អនុវត្តចំពោះពិធីបរិសុទ្ធ និង សេចក្តីសញ្ញាទាំងអស់នៅក្នុងសេចក្តីសញ្ញាថ្មី ហើយអស់កល្បអស់កាលជានិច្ចនេះ ។ ឧទាហរណ៍ បើសិនខ្ញុំពុំទទួលពិធីបរិសុទ្ធ ហើយរក្សាសេចក្តីសញ្ញានៃពិធីបុណ្យជ្រមុជទឹកទេ នោះខ្ញុំនឹងជាប់ទោស មានន័យថា ខ្ញុំពុំអាចរីកចម្រើន — ខ្ញុំពុំអាចគ្រងមរតកដ៏ពេញលេញនៃសិរីល្អរបស់ទ្រង់បានឡើយ ។ ដូចគ្នានេះដែរ បើសិនខ្ញុំពុំបានទទួលពិធីបរិសុទ្ធនានាក្នុងព្រះវិហារបរិសុទ្ធ ហើយរក្សាសេចក្តីសញ្ញាដែលទាក់ទង ឬថាបើសិនខ្ញុំបដិសេធពុំព្រមទទួលពិធីបរិសុទ្ធណាមួយនៃដំណឹងល្អ ឬ បើសិនខ្ញុំបដិសេធមិនព្រមនៅជាប់នឹងសេចក្តីសញ្ញាណាមួយ ដែលជាប់ទាក់ទងនោះទេ នោះខ្ញុំនឹងពុំត្រូវបានតម្កើងឡើងឡើយ ។ ផ្ទុយទៅវិញ ខ្ញុំនឹងជាប់ទោស ដែលមានន័យថាការរីកចម្រើនរបស់ខ្ញុំនឹងត្រូវបានបញ្ចប់ ។ សរុបមក ខ្ញុំត្រូវតែទទួលគ្រប់ពិធីបរិសុទ្ធនៃដំណឹងល្អ ហើយនៅជាប់នឹងគ្រប់ទាំងសេចក្តីសញ្ញាដែលទាក់ទង បើសិនខ្ញុំប្រាថ្នាចង់ជីវិតដ៏នៅអស់កល្បជានិច្ច ។
ក្នុងនាមយើងជាពួកបរិសុទ្ធថ្ងៃចុងក្រោយ យើងយល់ព្រមរស់នៅតាមលក្ខខណ្ឌនៃសេចក្តីសញ្ញាដែលអាចត្រូវបានចែកជាបួនក្រុម ៖ ( ១ ) លើកដាក់មកលើខ្លួនយើងនូវព្រះនាមនៃព្រះអង្គសង្គ្រោះ ចងចាំទ្រង់ជានិច្ច ហើយធ្វើតាមគំរូរបស់ទ្រង់ ( ២ ) គោរពព្រះបញ្ញត្តិទាំងឡាយរបស់ទ្រង់ ( ៣ ) មានឆន្ទៈបម្រើកូនចៅរបស់ព្រះដែលជាផ្នែកមួយនៃកិច្ចការនៃសេចក្តីសង្គ្រោះរបស់ទ្រង់ សូម្បីតែជាការបូជាផ្ទាល់ខ្លួនក្តី និង ( ៤ ) ការថ្វាយខ្លួន និង អ្វីៗទាំងអស់ដែលជារបស់យើងចំពោះកិច្ចការរបស់ព្រះអម្ចាស់ ។
យោងតាមក្រឹត្យវិន័យរបស់ព្រះ នោះដំណឹងល្អ ( និង សិរីរុងរឿងដែលដំណឹងល្អបានផ្តល់ឲ្យ ) គឺត្រូវបានទទួលដោយការធ្វើពិធីបរិសុទ្ធពិសេសៗតាមរយៈសិទ្ធិអំណាចនៃបព្វជិតភាព ។ តាមរយៈពិធីបរិសុទ្ធនៃបព្វជិតភាព នោះអំណាចនៃព្រះត្រូវបានបើកបង្ហាញនៅក្នុងជីវិតរបស់យើង — ប៉ុន្តែលុះត្រាតែយើងរក្សាសេចក្តីសញ្ញាដែលទាក់ទង ។ សេចក្តីសញ្ញាធ្វើឲ្យមានអំណាច ឬ ផ្តល់អំណាចដល់ពិធីបរិសុទ្ធ គឺដូចជាម៉ាស៊ីនដែលធ្វើឲ្យឡានដំណើរការ ហើយអាចដឹកមនុស្សពីកន្លែងមួយទៅកន្លែងមួយទៀតបាន ។ សរុបសេចក្ដីមក គឺវាទៅតាមកម្រិតដែលយើងរក្សាដោយចេះគិតគូរ និង ស្មោះត្រង់ចំពោះសេចក្តីសញ្ញាដែលទាក់ទងជាមួយពិធីបរិសុទ្ធដែលយើងទទួលបាន នោះយើងនឹងរីកចម្រើននៅក្នុងចំណេះដឹងរបស់យើងអំពីព្រះ និង បទពិសោធន៍នៃ « អំណាចនៃព្រះ »២៦ ដោយព្រះគុណនៃព្រះតាមរយៈដង្វាយធួននៃព្រះគ្រីស្ទ ។២៧
តួនាទីនៃអាពាហ៍ពិពាហ៍នៅក្នុងសេចក្តីសញ្ញាថ្មី ហើយអស់កល្បអស់កាលជានិច្ច
នៅក្នុង គោលលទ្ធិ និង សេចក្តីសញ្ញា ១៣២:៤ព្រះអម្ចាស់បានថ្លែងថា ទ្រង់នឹងបើកសម្តែងសេចក្តីសញ្ញាថ្មី ហើយអស់កល្បអស់កាលជានិច្ច « មួយ » ហើយទ្រង់បានបន្ថែមថា « បើសិនជា អ្នកមិនកាន់សេចក្តីសញ្ញានោះជាប់ទេ ខណៈនោះអ្នកជាប់ទោស ដ្បិតគ្មានអ្នកណាមួយអាចបដិសេធសេចក្តីសញ្ញានេះ ហើយអនុញ្ញាតឲ្យចូលក្នុងសិរីល្អរបស់យើងបានឡើយ » ។ ព្រះបន្ទូលទាំងនេះសំដៅលើ សេចក្តីសញ្ញានៃអាពាហ៍ពិពាហ៍ដ៏នៅអស់កល្បជានិច្ច២៨ ដែលធ្វើឡើងយ៉ាងត្រឹមត្រូវដោយសិទ្ធិអំណាចបព្វជិតភាព២៩ ដែលជាផ្នែកមួយសំខាន់ និង ចាំបាច់នៃសេចក្តីសញ្ញាថ្មី ហើយអស់កល្បអស់កាលជានិច្ច « នេះ » ( ភាពពោរពេញនៃដំណឹងល្អនៃព្រះយេស៊ូវគ្រីស្ទដែលបានស្តារឡើងវិញ ) ។៣០ ព្រះអម្ចាស់បានគូសបញ្ជាក់ពីសារៈសំខាន់ដ៏ធំបំផុត នៃសេចក្តីសញ្ញានៃអាពាហ៍ពិពាហ៍ដ៏នៅអស់កល្បជានិច្ច ដោយប្រាប់ពួកយើងថា អស់អ្នកណាដែលបដិសេធសេចក្តីសញ្ញានេះ នោះនឹងពុំអាចទទួលជីវិតដ៏នៅអស់កល្បជានិច្ចឡើយ ។៣១
មនុស្សមួយចំនួន រួមទាំងសមាជិកនៃសាសនាយើងខ្លះដែរ អានដោយយល់ខុសថា គោលលទ្ធិ និង សេចក្តីសញ្ញា ១៣២:៤ ចង់និយាយថាអាពាហ៍ពិពាហ៍ពហុពន្ធភាពគឺ ចាំបាច់សម្រាប់ភាពតម្កើងឡើង ដែលនាំឲ្យពួកគេជឿថាអាពាហ៍ពិពាហ៍ពហុពន្ធភាពគឺជាតម្រូវការចាំបាច់សម្រាប់ភាពតម្កើងឡើងនៅក្នុងភាពអស់កល្បជានិច្ច ។ ប៉ុន្ដែចំណុចនេះមិនត្រូវបានគាំទ្រនៅក្នុងវិវរណៈទាំងនេះឡើយ ។ ដូចដែលបានកត់ត្រានៅក្នុង គោលលទ្ធិ និង សេចក្តីសញ្ញា ១៣១ និង ១៣២ព្រះអម្ចាស់បានណែនាំក្រឹត្យវិន័យនៃអាពាហ៍ពិពាហ៍ដ៏នៅអស់កល្បជានិច្ច ដោយការសំដៅយ៉ាងច្បាស់ទៅលើការផ្សារភ្ជាប់រវាងបុរសម្នាក់ និង ស្ត្រីម្នាក់ ( សូមមើល គោលលទ្ធិ និង សេចក្ដីសញ្ញា ១៣២:៤–៧, ១៥–២៥ ) ។ តាមរយៈការដាក់ចេញនូវក្រឹត្យវិន័យ នៃអាពាហ៍ពិពាហ៍ដ៏នៅអស់កល្បជានិច្ចនៅក្នុងបរិបទនៃអាពាហ៍ពិពាហ៍ដែលមានភរិយា ឬ ស្វាមីតែមួយ នោះព្រះអម្ចាស់បានគូសបញ្ជាក់ថាពរជ័យនៃភាពតម្កើងឡើង ត្រូវបានប្រទានដល់បុរស និង ស្ត្រីម្នាក់ៗដែលសក្តិសមចូលទៅក្នុងសេចក្តីសញ្ញានៃអាពាហ៍ពិពាហ៍ដ៏នៅអស់កល្បជានិច្ច ដែលធ្វើឡើងដោយសិទ្ធិអំណាចបព្វជិតភាពត្រឹមត្រូវ គឺមិនអាស្រ័យលើថាតើវាជាអាពាហ៍ពិពាហ៍ពហុពន្ធភាព ឬ ជាអាពាហ៍ពិពាហ៍ដែលមានភរិយា ឬ ស្វាមីតែមួយនោះឡើយ ។៣២
រូបថតនៅឯព្រះវិហារបរិសុទ្ធ រ៉េចប៊ើក អៃដាហូ
គោលលទ្ធិ និង សេចក្តីសញ្ញា ១៣២:១៩ បានពន្យល់ច្បាស់ថា ជីវិតដ៏នៅអស់កល្បជានិច្ចគឺត្រូវបានសន្យាដល់ គូស្វាមីភរិយាណាដែលមានស្វាមី ឬ ភរិយាតែមួយដែលបានផ្សារភ្ជាប់ដោយសិទ្ធិអំណាចនៃបព្វជិតភាព ហើយជាអ្នកដែលនៅជាប់ក្នុងសេចក្តីសញ្ញានោះ — ដែលគ្មានលក្ខខណ្ឌ ឬ តម្រូវការណាបន្ថែមទៀតឡើយ ។ បុរស និង ស្ត្រីណាក៏ដោយដែលបានផ្សារភ្ជាប់តាមរបៀបនេះ ហើយនៅជាប់នឹងសេចក្តីសញ្ញានោះនឹងត្រូវបានតម្កើងឡើង ។៣៣ ការអនុវត្តន៍នៃអាពាហ៍ពិពាហ៍ក្នុងព្រះវិហារយើងពីបុរាណគឺ វាស្របគ្នាជាមួយនឹងគោលលទ្ធិនៃអាពាហ៍ពិពាហ៍ដ៏នៅអស់កល្បជានិច្ចដូចដែលបានពន្យល់នៅក្នុងអត្ថបទនេះ ។៣៤ ពិធីបរិសុទ្ធដែលផ្សារភ្ជាប់គូស្វាមីភរិយាសម្រាប់ភាពអស់កល្បជានិច្ច រួមមាននូវសេចក្តីសញ្ញា និង ពរជ័យដែលដូចគ្នាសម្រាប់អាពាហ៍ពិពាហ៍ដែលមានស្វាមី ឬ ភរិយាតែមួយ និង សម្រាប់អាពាហ៍ពិពាហ៍ពហុពន្ធភាពដែលបានអនុញ្ញាតដែលធ្វើឡើងកាលពីអតីតកាល ។ សេចក្តីសញ្ញា និង ពរជ័យដូចគ្នាទាំងនេះ នឹងត្រូវផ្តល់ឲ្យដល់អ្នកស្មោះត្រង់បន្ទាប់ពីជីវិតនេះ ដែលពុំមានឱកាសផ្សារភ្ជាប់នៅក្នុងជីវិតរមែងស្លាប់ ។៣៥
បន្ទាប់ការបើកសម្តែងក្រឹត្យវិន័យ និង សេចក្តីសញ្ញានៃអាពាហ៍ពិពាហ៍ដ៏នៅអស់កល្បជានិច្ចរវាងបុរសម្នាក់ និង ស្ត្រីម្នាក់ នោះព្រះអម្ចាស់បានបង្រៀនយ៉ូសែប ស្ម៊ីធ ថា បុរសម្នាក់អាចរៀបអាពាហ៍ពិពាហ៍ប្រពន្ធច្រើនជាងម្នាក់ ដោយស្មោះត្រង់ជាមួយនឹងសេចក្តីសញ្ញានៃអាពាហ៍ពិពាហ៍ដ៏នៅអស់កល្បជានិច្ច នៅពេលត្រូវបានអនុញ្ញាត ឬ បញ្ជាដោយព្រះអម្ចាស់តាមរយៈព្យាការីដែលបានតាំងយ៉ាងត្រឹមត្រូវ ( ដែលកាន់កូនសោបព្វជិតភាពដែលទាក់ទងនោះ ) ។៣៦ ការអនុញ្ញាត និង ការបញ្ជាឲ្យអនុវត្តអាពាហ៍ពិពាហ៍ពហុពន្ធភាព ត្រូវបានប្រទានដោយព្រះអម្ចាស់ដល់អ័ប្រាហាំ និងព្យាការីផ្សេងទៀតកាលពីជំនាន់បុរាណ៣៧ ក៏ដូចជាបានប្រទានដល់ព្យាការីយ៉ូសែប ស្ម៊ីធផងដែរ ៖ « យើងប្រទានដល់អ្នកគឺយ៉ូសែប ជាអ្នកបម្រើរបស់យើង នូវតំណែងមួយ ហើយសាងឡើងវិញនូវការណ៍គ្រប់យ៉ាង » ។៣៨
ច្រើនឆ្នាំក្រោយមក ព្រះអម្ចាស់បានលុបចោលនូវការអនុញ្ញាត និង ការបញ្ជារបស់ទ្រង់សម្រាប់សមាជិកសានាចក្រឲ្យអនុវត្តអាពាហ៍ពិពាហ៍ពហុពន្ធភាព ( ឬ និយាយម្យ៉ាងទៀតថា គឺពុំឲ្យផ្សារភ្ជាប់លើសពីភរិយា ឬ ស្វាមីម្នាក់ដែលកំពុងរស់នៅនេះឡើយ ) នៅពេលប្រធាន វិលហ្វូឌ វូឌដ្រុព្វ ( ១៨០៧–៩៨ ) បានចេញសេចក្តីប្រកាសឆ្នាំ ១៨៩០ ។៣៩ សេចក្តីប្រកាសនេះបាននាំឲ្យឈប់មានការអនុវត្តន៍អាពាហ៍ពិពាហ៍ពហុពន្ធភាព មានន័យថាគ្មានសមាជិកសាសនាចក្រណាម្នាក់អាចរៀបអាពាហ៍ពិពាហ៍ ឬ ផ្សារភ្ជាប់ជាមួយនឹងភរិយា ឬ ស្វាមីលើសពីម្នាក់ដែលកំពុងរស់នៅឡើយ ។ វាចាំបាច់ដើម្បីចាំថា សេចក្តីប្រកាសនោះពុំបានហាមប្រាមបុរសសក្តិសមណាម្នាក់ដែលត្រូវបានផ្សារភ្ជាប់នឹងភរិយាម្នាក់ដែលបានស្លាប់ទៅហើយ ថាកុំឲ្យផ្សារភ្ជាប់នឹងភរិយាម្នាក់ទៀតដែលកំពុងរស់នៅឡើយ ។ គោលការណ៍នេះ ស្របជាមួយនឹងគោលលទ្ធិដែលបានបើកសម្តែងថាការរៀបអាពាហ៍ពិពាហ៍ស្វាមី ឬភរិយាមួយគឺជាច្បាប់បទដ្ឋានរបស់ព្រះអម្ចាស់សម្រាប់អាពាហ៍ពិពាហ៍ លុះត្រាតែទ្រង់ប្រកាស ហើយអនុញ្ញាតឲ្យធ្វើដូច្នោះតាមរយៈអ្នកតំណាងដែលបានតែងតាំងឡើងយ៉ាងត្រឹមត្រូវរបស់ទ្រង់ មានន័យថាជាប្រធាន និងព្យាការីនៃសាសនាចក្រ ។៤០
ជំនួសមុខឲ្យគណៈប្រធានទីមួយ និង ការឆ្លើយចំពោះសំណួរដែលសួរថា « តើអាពាហ៍ពិពាហ៍ពហុពន្ធភាព ឬ អាពាហ៍ពិពាហ៍សេឡេស្ទាលចាំបាច់ចំពោះភាពពោរពេញនៃសិរីល្អនៅក្នុងពិភពខាងមុខដែរឬទេ ? » ប្រធាន ឆាលលេស ដ័បុលយូ ផេនរូស ( ១៨៣២–១៩២៥ ) បានសរសេរ ៖ « អាពាហ៍ពិពាហ៍សេឡេស្ទាលគឺចាំបាច់ចំពោះភាពពោរពេញនៃសិរីល្អនៅក្នុងពិភពខាងមុខ ដូចដែលបានពន្យល់នៅក្នុងវិវរណៈទាក់ទងនឹងវា ប៉ុន្តែ វាពុំបានថ្លែងថាអាពាហ៍ពិពាហ៍ពហុពន្ធភាពវាចាំបាច់ដូច្នោះឡើយ » ។៤១
នៅឆ្នាំ ១៩៣៣ គណៈប្រធានទីមួយបានថ្លែង ៖ « អាពាហ៍ពិពាហ៍សេឡេស្ទាល — គឺជាការរៀបការសម្រាប់វេលាកាល និង អស់ទាំងភាពអស់កល្បជានិច្ច — ហើយអាពាហ៍ពិពាហ៍ដែលមានប្រពន្ធច្រើន ឬ អាពាហ៍ពិពាហ៍ពហុពន្ធភាពគឺជាពាក្យដែលមិនមានន័យដូចគ្នានោះទេ ។ អាពាហ៍ពិពាហ៍ដែលមានភរិយាតែមួយសម្រាប់វេលាកាល និង អស់ទាំងភាពអស់កល្បជានិច្ចធ្វើឡើងជាឱឡារិកនៅក្នុងព្រះវិហារបរិសុទ្ធរបស់យើងស្របទៅតាមព្រះបន្ទូលរបស់ព្រះអម្ចាស់ និង ក្រឹត្រវិន័យរបស់សាសនាចក្រគឺជាអាពាហ៍ពិពាហ៍សេឡេស្ទាល » ។៤២
ស្របតាមសេចក្តីថ្លែងការណ៍ទាំងនេះ អែលឌើរ ប្រូស អ័រ ម៉ាក់ខន់ឃី ( ១៩១៥–៨៥ ) នៃកូរ៉ុមនៃពួកសាវកដប់ពីរនាក់បានសរសេរ ៖ « អាពាហ៌ពិពាហ៌ពហុពន្ធភាព គឺពុំចាំបាច់ចំពោះសេចក្តីសង្គ្រោះ ឬ ភាពតម្កើងឡើងឡើយ ។ នីហ្វៃ និង ប្រជាជនរបស់លោកត្រូវបានបដិសេធអំណាច ដើម្បីមានប្រពន្ធច្រើនជាងម្នាក់ ប៉ុន្ដែពួកគេអាចបានទទួលគ្រប់ពរជ័យទាំងអស់ នៅក្នុងភាពអស់កល្បជានិច្ចដែលព្រះអម្ចាស់ពុំធ្លាប់បានប្រទានដល់មនុស្សណាម្នាក់ឡើយ ។ នៅក្នុងសម័យរបស់យើងនេះ ព្រះអម្ចាស់បានសង្ខេបដោយវិវរណៈនៃគោលលទ្ធិទាំងមូលនៃភាពតម្កើងឡើង ហើយបានផ្អែកគោលលទ្ធិនេះលើអាពាហ៍ពិពាហ៍រវាងបុរសម្នាក់ជាមួយស្ត្រីម្នាក់ ។ ( គ. និង ស. ១៣២:១–២៨ ) ។ បន្ទាប់ពីលើនេះ លោកបានបន្ថែមគោលការណ៍ទាក់ទងនឹងការមានភរិយាច្រើន ដោយបង្ហាញពីលក្ខខណ្ឌជាក់លាក់ថាការរៀបអាពាហ៍ពិពាហ៍បែបនោះមានប្រសិទ្ធិភាពបានលុះត្រាតែ ទទួលបានការអនុញ្ញាតពីប្រធានសាសនាចក្រតែប៉ុណ្ណោះ ។ ( គ. និង ស. ១៣២:៧, ២៩–៦៦ ) » ។៤៣
សព្វថ្ងៃនេះ ដូចដែលបានដឹកនាំដោយព្រះអម្ចាស់តាមរយៈព្យាការីរបស់ទ្រង់ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ពុំអនុវត្តអាពាហ៍ពិពាហ៍ពហុពន្ធភាពទៀតឡើយ ហើយបុគ្គលម្នាក់ៗដែលអនុវត្តវានោះមិនត្រូវបានអនុញ្ញាតឲ្យចូលរួម ឬ ធ្វើជាសមាជិកនៃសាសនាចក្រនេះទៀតទេ ។ សាសនាចក្របញ្ជាក់ថា អាពាហ៍ពិពាហ៍ដែលមានភរិយាតែមួយគឺជាបទដ្ឋានរបស់ព្រះសម្រាប់អាពាហ៍ពិពាហ៍ លើកលែងតែនៅពេលមានការអនុញ្ញត ឬ បញ្ជាដោយប្រការណាមួយតាមរយៈព្យាការីរបស់ទ្រង់ប៉ុណ្ណោះ ។ សាសនាចក្រពុំបានបង្រៀនថា ការចូលរួមក្នុងអាពាហ៍ពិពាហ៍ពហុពន្ធភាពគឺចាំបាច់សម្រាប់ភាពតម្កើងឡើងឡើយ ។
សេចក្តីបញ្ចប់
មានអ្វីៗជាច្រើនដែលយើងពុំបានដឹងអំពីជីវិតបន្ទាប់ពីជីវិតនេះ ទោះជាយ៉ាងណាក៏ដោយ យើងដឹងយ៉ាងច្បាស់ថាការទទួល និង នៅជាប់ក្នុងសេចក្តីសញ្ញាថ្មី ហើយអស់កល្បអស់កាលជានិច្ចគឺចាំបាច់សម្រាប់ការគ្រងមរតកនៃជីវិតដ៏នៅអស់កល្បជានិច្ច ។ យើងក៏ដឹងផងដែរថាអស់អ្នកដែល « មានទំនាក់ទំនងនៅក្នុងចំណោមពួកយើងនៅទីនេះ » — នៅក្នុងជីវិតរមែងស្លាប់នេះ — « នោះក៏នឹងមាននៅក្នុងចំណោមពួកយើងនៅទីនោះ » — នៅក្នុងជីវិតបន្ទាប់ — យ៉ាងនោះដែរ « គ្រាន់តែរួបរួមដោយសិរីល្អដ៏នៅអស់កល្បជានិច្ច » ប៉ុណ្ណោះ ។៤៤
ពរជ័យដ៏ទេវភាពដែលអាចទទួលបានតាមរយៈសេចក្តីសញ្ញាថ្មី ហើយអស់កល្បអស់កាលជានិច្ចគឺ សំខាន់ចំពោះគោលបំណងដ៏ធំនៃផែនការរបស់ព្រះវរបិតា និង ការស្ដារឡើងវិញនៃសាសនាចក្រនៃព្រះយេស៊ូវគ្រីស្ទនៅក្នុងជំនាន់ចុងក្រោយនេះ ។ « ដោយមានការភ្លឺថ្លានៃសេចក្តីសង្ឃឹមដ៏ឥតខ្ចោះ »៤៥ សេចក្តីសញ្ញាដ៏រុងរឿងនេះបំផុសគំនិតដល់អ្នកស្មោះត្រង់ ផ្តល់ « ជាយុថ្កាមួយដល់ព្រលឹងមនុស្ស ដែលនឹងធ្វើឲ្យពួកគេស្ថិតស្ថេរ នៅនឹងធឹង ហើយខ្ជាប់ខ្ជួន គឺនៅក្នុងកិច្ចការល្អដ៏បរិបូរជាដរាបដែលនាំឲ្យសរសើរតម្កើងដល់ព្រះ » ។៤៦ ដ្បិតអស់អ្នកដែលនៅជាប់នឹងលក្ខខណ្ឌទាំងនោះនៃសេចក្តីសញ្ញាថ្មី ហើយអស់កល្បអស់កាលជានិច្ច នោះរង្វាន់របស់វាគឺជាសេចក្តីអំណរ និង សេចក្តីសុខសាន្តនៅក្នុងពិភពលោកនេះ និង ជីវិតដ៏នៅអស់កល្បជានិច្ចនៅក្នុងជីវិតបន្ទាប់ ។៤៧