ល្បែងផ្គុំរូប ការស្តារឡើងវិញ
អ្នកនិពន្ធរស់នៅរដ្ឋ យូថាហ៍ ស.រ.អា ។
តើពាក្យថា ការស្តារ ឡើងវិញ មានន័យដូចម្តេច ?
« ដ្បិតយើងបានដាក់មកលើអ្នកនូវកូនសោទាំងឡាយ និង អំណាចនៃបព្វជិតភាព ដែលយើងសាងឡើងវិញនូវការណ៍គ្រប់យ៉ាង » ( គ. និង ស. ១៣២:៤៥ ) ។
នៅតាមផ្លូវពីព្រះវិហារត្រឡប់ទៅផ្ទះវិញ អាណាបានចាំពីក្រដាសតូចមួយដែលគ្រូរបស់នាងបានឲ្យនាង ។ « ម៉ាក់ សូមទាយមើល ! ខ្ញុំនឹង ឡើងនិយាយនៅក្នុងថ្នាក់បឋមសិក្សានៅថ្ងៃអាទិត្យក្រោយ » ។
ម៉ាក់បានតបថា « ល្អណាស់ » ។ « និយាយពីអ្វីទៅកូន ? »
« កូនត្រូវនិយាយអំពីការស្តារឡើងវិញ ។ ប៉ុន្តែកូនមិនប្រាកដថាតើការស្តារឡើងវិញនោះជាអ្វីឡើយ » ។
ម៉ាក់បាននិយាយថា « ការស្តារឡើងវិញ មានន័យថាព្រះបាននាំត្រឡប់មកវិញ ឬ ស្តារឡើងវិញ នូវអ្វីគ្រប់យ៉ាងដែលទ្រង់ចង់ឲ្យសាសនាចក្រទ្រង់មាន » ។ « តាមរយៈព្យាការីយ៉ូសែប ស្ម៊ីធ ទ្រង់បាននាំត្រឡប់មកនូវព្រះវិហារបរិសុទ្ធ បព្វជិតភាព បុណ្យជ្រមុជទឹក និង អំណោយទាននៃព្រះវិញ្ញាណបរិសុទ្ធ ។ បើគ្មានការស្តារឡើងវិញទេ នោះយើងនឹងគ្មានសាសនាចក្រនេះឡើយ ! »
អណាបានងក់ក្បាល ។ « កូនគិតថាកូនយល់វាហើយ ។ ប៉ុន្តែកូនគិតថា កូនពុំអាចពន្យល់វាដូចម៉ាក់ពន្យល់ឡើយ » ។
ម្តាយបាននិយាយនៅពេលពួកគេមកដល់ផ្ទះថា « កូន ម៉ាក់មានយោបល់មួយ » ។ « តោះមកតាមម៉ាក់ » ។
អាណា បានដើរតាមម្តាយទៅកាន់បន្ទប់គ្រួសារ ។ ពួកគេបានចាប់ផ្តើមលេងល្បែងផ្គុំរូបយប់មិញ ហើយបំណែកទាំងនោះនៅរប៉ាត់រប៉ាយនៅលើតុតូចនោះ ។
« សូមគិតអំពីដំណឹងល្អឲ្យដូចជាល្បែងផ្គុំរូបដែលរៀបហើយ » ។ ម៉ាក់បានរើសយកបំណែកមួយឡើង ។ « បំណែកជាច្រើននៃរូបភាពនេះនៅលើផែនដីក្នុងសម័យកាលផ្សេងៗគ្នា ។ ប៉ុន្តែ បន្ទាប់ពីព្រះយេស៊ូវគ្រីស្ទ និង ពួកសាវករបស់ទ្រង់បានទទួលមរណភាពទៅ សេចក្តីពិតនៃដំណឹងល្អជាច្រើនត្រូវបានបាត់បង់ ឬផ្លាស់ប្តូរ ។ បំណែកនៃសេចក្តីពិតទាំងនោះត្រូវតែនាំត្រឡប់មកវិញ » ។
« ដូច្នេះតើអ្វីបានកើតឡើងបន្ទាប់ពីនោះ ? » អាណាបានសាប់បំណែកមួយចំនួនដែលបាត់នោះ ។
« ជាច្រើនឆ្នាំក្រោយមកព្រះបានហៅក្មេងប្រុសនៅកសិដ្ឋានម្នាក់ ឲ្យនាំយកបំណែកទាំងអស់ត្រឡប់មកវិញ ហើយដាក់វាជាមួយគ្នាដូចកាលព្រះយេស៊ូវបានគង់នៅលើផែនដី ។ តើកូនគិតថាម្នាក់នោះគឺជានរណា ? »
« យ៉ូសែប ស៊្មីធ ! » អាណាបាននិយាយ ដោយញញឹម ។ « កូនគិតថាចាប់ផ្តើមយល់វាហើយ » ។ នាង និង ម្តាយបាននិយាយគ្នាបន្ថែមពី យ៉ូសែប ស៊្មីធ និង បំណែកផ្សេងទៀតនៃដំណឹងល្អដែលព្រះបាននាំត្រឡប់មកវិញតាមរយៈលោក ។
អាណាបានសរសេរ ហើយអនុវត្តការឡើងនិយាយរបស់ខ្លួននៅប៉ុន្មានថ្ងៃនោះ ។ នាងបានអធិស្ឋានទៅកាន់ព្រះវរបិតាសួគ៌ថានាងអាចមានភាពក្លាហាន ហើយចែកចាយសារលិខិតរបស់នាងនៅក្នុងថ្នាក់បឋមសិក្សា ។
នៅថ្ងៃអាទិត្យ នៅពេលដល់ម៉ោងដែលអាណានិយាយ នាងបានក្រោកឡើង ដកដង្ហើមធំ ហើយបានកាន់រូបផ្គុំដាក់លើក្តារខៀនដូច្នេះមនុស្សគ្រប់គ្នាអាចមើលឃើញ ។ បំណែកទាំងអស់នៅជាមួយគ្នាក្នុងរូបផ្គុំនោះ ។
« ជាយូរយារមកហើយ មានបំណែកនៃដំណឹងល្អដ៏សំខាន់ៗលើផែនដីនេះ ។ បន្ទាប់ពីព្រះយេស៊ូវ និង សាវករបស់ទ្រង់បានទទួលមរណភាព នោះបំណែកមួយចំនួនបានបាត់បង់ » ។ អាណា បានយកបំណែកមួយចំនួនចេញពីរូបផ្គុំ ហើយដាក់វាចុះ ។ « បន្ទាប់មកព្រះវរបិតាសួគ៌ និង ព្រះយេស៊ូវ បានហៅយ៉ូសែប ស្ម៊ីធ ជាព្យាការីឲ្យនាំត្រឡប់មកវិញនូវបំណែកនៃដំណឹងល្អដែលបានបាត់នោះ ។ នេះគឺហៅថាការស្តារឡើងវិញ » ។ នាងបានចាប់យកបំណែកនៃរូបផ្គុំដើម្បីបង្ហាញថ្នាក់បឋមសិក្សា ។ នៅខាងខ្នងវាមានពាក្យ « អំណាចបព្វជិតភាព » ។
បន្ទាប់មកអាណា បានបង្ហាញបំណែកទាំងអស់ដែលនៅសល់ ។ នាងបានអាននៅខ្នងបំណែកនិមួយៗ ពីមុននាងដាក់វាចូលទៅក្នុងកន្លែងវាក្នុងរូបផ្គុំ ។ « ព្យាការីដែលរស់នៅ … សាវកដប់ពីរនាក់ … កិច្ចការព្រះវិហារបរិសុទ្ធសម្រាប់គ្រួសារអស់កល្បជានិច្ច … បុណជ្រមុជទឹកដោយការពន្លិច … ការដាក់ដៃលើក្បាលសម្រាប់អំណោយទាននៃព្រះវិញ្ញាណបរិសុទ្ធ » ។
អាណា បានចាប់រូបផ្គុំដែលរៀបហើយនោះឡើង ។ « ឥឡូវនេះយើងមានបំណែកទាំងអស់នៃដំណឹងល្អហើយ ។ នោះមានន័យថា យើងអាចឃើញយ៉ាងច្បាស់ពីរបៀបដែលយើងអាចរីករាយ ហើយរស់នៅជាមួយនឹងព្រះវរបិតាសួគ៌នៅថ្ងៃណាមួយម្ដងទៀត ។ ខ្ញុំមានអំណរគុណចំពោះការស្តារឡើងវិញ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន » ។