Ang North Visitors’ Center

Ni Chad E. Phares

Mga Magasin sa Simbahan

Dali uban kanamo aron motan-aw sa importante nga dapit sa Temple Square.

Si Kaemin ug Ikani (“Kolby”) nasayud na og daghan kabahin sa mga propeta. Apan ang pagbisita sa North Visitors’ Center sa Temple Square nakatabang kanila nga makakita og bag-ong pamaagi giunsa sa mga propeta sa pagpamatuod kabahin ni Jesukristo.

Nianang adlawa si Kolby ug Kaemin nakakita sa sama sa gidak-on sa tawo nga mga rebulto sa mga propeta gikan sa mga kasulatan. Ilang nakat-unan nga bisan tuod ang mga propeta nagpuyo sa managlahi nga mga panahon, ang tanang mga propeta nagpamatuod nga si Jesukristo mao ang atong Manluluwas ug ang Anak sa Dios.

Si Isaias usa ka Daang Tugon nga propeta nga nagpuyo sa wala pa matawo si Jesus. Siya misaysay mahitungod sa pagkatawo ni Jesus ug kabahin sa Iyang tahas isip atong Manluluwas. Si Isaias misulat, “Kay alang kanato ang usa ka bata natawo alang kanato ang usa ka anak nga lalaki gihatag: … ug ang iyang ngalan pagatawgon og Kahibulongan, Magtatambag, Dios nga Makagagahum, Amahan nga walay Katapusan, Principe sa Pakigdait” (Isaias 9:6).

Si Mormon mipuyo mga 400 ka tuig human kang Jesus. Iyang gihiusa ang mga sinulat sa daghang mga propeta sa Basahon ni Mormon diha sa bulawan nga mga palid. Iya usab nga gidugang ang pipila sa iyang kaugalingong mga sinulat. Si Mormon mitudlo nga kita kinahanglan nga “motuo diha kang Jesukristo, nga siya mao ang Anak sa Dios” (Mormon 7:5). Iyang gihatag ang rekord ngadto sa iyang anak nga si Moroni, kinsa milubong sa bulawan nga mga palid.

Human sa kamatayon ni Moroni, wala nay mga propeta sa yuta sulod sa gatusan ka mga tuig. Niadtong 1823 ang anghel nga si Moroni mipakita kang Joseph Smith kon asa niya makaplagi ang bulawan nga mga palid. Si Joseph mihubad niini nga mga palid pinaagi sa gahum sa Dios ug miimprinta sa mga sinulat isip ang Basahon ni Mormon. Ang Biblia maoy usa ka testamento ni Jesukristo; ang Basahon ni Mormon lain usab.

Lakip ni Joseph Smith, kita adunay 16 ka mga Presidente sa Simbahan. Sila mga propeta kinsa gitawag sa Dios aron motudlo kanato mahitungod ni Jesukristo. Ang atong propeta karon mao si Presidente Thomas S. Monson.

Human masayud kon unsa ang gitudlo sa mga propeta kabahin ni Kristo, si Kolby ug Kaemin misaka sa spiral ramp ngadto sa itaas sa visitors’ center. Didto ilang nakita ang dakong estatuwa ni Jesus nga gitawag og Christus. Naminaw sila og rekord sa mga pagtulun-an ni Jesus. Ang mga butang nga gitudlo sa mga propeta kabahin ni Jesus mao usab ang mga butang nga gitudlo ni Jesus kabahin sa Iyang kaugalingon.

Ang Christus nga Estatuwa ug ang Rotunda

Ang Christus nga estatuwa anaa sa ikaduhang andana sa North Visitors’ Center sa rotunda. Ang rotunda usa ka lingin nga kwarto nga giatupan og simboryo (lingin nga atop).
Ang orihinal nga Christus nga estatuwa gimugna ni Bertel Thorvaldsen sa Copenhagen, Denmark, niadtong mga 1800.
Ang Christus nga estatuwa sa Temple Square gikulit og puti nga marmol gikan sa Italy.
Ang mga bong-bong sa rotunda gidrowingan og mga hulagway [mural] sa kawanangan. Luyo sa estatuwa sa Manluluwas mao ang dibuho sa kalibutan. Ang Amihanang Bitoon naa tungod gayud sa Iyang ulo. Ang pundok sa mga bitoon sama sa mga Big ug Little Dipper gilakip usab diha sa drowing sa bong-bong.
Ang mga bitoon sa rotunda nagpakita kon unsay panagway sa kalangitan sa tungang gabii didto sa Northern Hemisphere niadtong Abril 6, 1830. Kana mao ang petsa nga Ang Simbahan ni Jesukristo sa mga Santos sa Ulahing mga Adlaw giorganisar (tan-awa sa D&P 20).
Ang linginon nga kisame 46 ka pye (14 m) ibabaw sa salog. Ang gidrowingan nga bong-bong 166 ka pye (51 m) ang gitas-on. Kapin sa 150 ka galon (568 l) nga pintal ang nagamit aron pagmugna sa drowing.

Mga paghulagway sa mga icon ug mapa pinaagi ni Dilleen Marsh; mga litrato pinaagi ni Christina Smith, gawas kon gipahibalo; mga litrato sa replica sa bulawan nga mga palid ug sa North Visitors’ Center pinaagi ni Jed Clark; gisukip:litrato sa Christus pinaagi ni Robert Casey