Walay Paglubad nga mga Istorya sa Ebanghelyo
Paglantaw ngadto sa Templo
Ang templo mao ang balay o panimalay sa Ginoo. Kon ang Ginoo mobisita man sa kalibutan, Siya moanha sa Iyang templo. Kita sakop sa pamilya sa Ginoo. Kita Iyang mga anak nga gilalang didto sa atong kinabuhi sa wala pa dinhi sa yuta. Tungod kay, ang yutan-ong amahan ug inahan ug ang ilang pamilya nagpundok sa panimalay, busa ang takus nga mga sakop sa pamilya sa Ginoo managtigom sama sa atong buhaton sa balay sa Ginoo.
Ang templo usa ka dapit sa pagdawat og instruksyon. Dinhi ang mga baruganan sa ebanghelyo ipahinumdom og balik, ug ang lawom nga mga kamatuoran sa gingharian sa Dios ipadayag. Kon kita mosulod sa templo sa angay nga espiritu ug maminaw gayud, kita mogawas nga puno sa kahibalo sa ebanghelyo ug kaalam.
Ang templo mao ang dapit sa kalinaw. Dinhi mahimo natong dili hunahunaon ang mga kabalaka sa gawas, gubot nga kalibutan. Dinhi ang atong mga hunahuna kinahanglan nga masentro sa espritwal nga mga kamatuoran, tungod kay dinhi kita maghunahuna lamang sa mga butang nga espiritwal.
Ang templo usa ka dapit sa mga pakigsaad, nga makatabang kanato nga mopuyo sa pagkamatarung. Dinhi atong ipahayag nga kita mosunod sa mga balaod sa Dios ug mosaad sa paggamit sa talagsaon nga kahibalo sa ebanghelyo alang sa atong kaugalingong panalangin ug sa ikaayo sa tawo. Ang yano nga mga seremonya motabang kanato sa paggawas sa templo nga adunay matarung nga tumong sa pagdumala sa mga kinabuhi nga angay sa mga gasa sa ebanghelyo.
Ang templo usa ka dapit sa panalangin. Ang mga saad gihimo alang kanato, magdepende sa atong pagkamatinud-anon, nga gisumpay sa atong panahon karon ngadto sa kahangturan. Kini motabang kanato nga masabtan ang kaduol sa atong langitnong mga ginikanan. Ang gahum sa priesthood hinoon gihatag kanato sa bag-o ug sa mahinungdanon nga katuyoan.
Ang templo usa ka dapit diin ang mga seremonya kabahin sa pagkadiosnon ipresentar. Ang dagkong misteryo sa kinabuhi, lakip na ang mga pangutana sa tawo nga wala matubag, dinhi gihimong klaro: (1) Diin ako gikan? (2) Nganong ania ako dinhi? (3) Asa ako paingon kon matapos na ang kinabuhi? Dinhi ang espirituhanong panginahanglan diin ang tanang butang nga mahitabo sa kinabuhi gihatagan og dakong importansya.
Ang templo usa ka dapit sa pagpadayag. Ang Ginoo dinhi mahimong mohatag og pagpadayag, ug ang matag tawo modawat og pagpadayag aron matabangan siya sa kinabuhi. Ang tanan nga kahibalo, tanan nga tabang naggikan sa Ginoo, diretso man o gipaagi sa uban. Bisan tuod wala Siya didto sa personal, anaa Siya didto pinaagi sa Iyang Espiritu Santo ug pinaagi sa mga tawo dinhi sa yuta nga naghupot sa priesthood. Pinaagi niana nga Espiritu sila modumala sa buluhaton sa Ginoo dinhi sa kalibutan. Ang matag tawo kinsa mosulod niining sagrado nga dapit uban sa hugot nga pagtuo ug pag-ampo makakita og tabang sa pagsulbad sa mga problema sa kinabuhi.
Nindot kaayo nga makasulod sa templo, sa balay sa Ginoo, usa ka dapit nga matudloan mahitungod sa priesthood, sa kalinaw, sa mga pakigsaad, mga panalangin, ug pagpadayag. Ang pagpasalamat alang niini nga pribelihiyo ug kusog nga tinguha sa pag-angkon sa diwa sa mao nga okasyon kinahanglang mopatigbabaw sa atong mga kasingkasing.
Ang templo, uban sa mga gasa ug mga panalangin niini, bukas alang sa tanan niadtong kinsa makatuman sa mga kinahanglanon sa ebanghelyo ni Jesukristo. Ang matag tawo nga takus mahimong moduol ngadto sa iyang bishop alang sa usa ka rekomend sa pagsulod sa templo.
Ang mga ordinansa nga gipanghimo didto mga sagrado; kini dili mga misteryuso. Ang tanan kinsa modawat ug mopuyo sa ebanghelyo ug magpabiling limpyo sa ilang mga kaugalingon makaambit niini. Sa tinuod, ang tanang matinud-anong mga miyembro sa Simbahan gidapit ug giawhag sa pagpahimulos sa templo ug sa pagtagamtam sa mga pribelihiyo niini. Kini usa ka sagrado nga dapit diin ang sagradong mga ordinansa gihatag niadtong tanan kinsa mipakita sa ilang mga kaugalingon nga takus sa pag-ambit sa mga panalangin niini.
Bisan unsa ang itanyag sa ebanghelyo mahimong buhaton sulod sa templo. Mga bunyag [alang sa patay], mga ordinasyon sa priesthood [alang sa patay], mga kaminyoon, ug mga pagbugkos alang sa panahon karon ug hangtud sa kahangturan alang sa mga buhi ug sa patay, ang endowment alang sa mga buhi ug sa patay, … mga instruksyon sa ebanghelyo, mga konseho sa buluhaton sa pagpangalagad, ug uban pang tanan nga may kalabutan sa ebanghelyo dinhi gipangbuhat. Sa tinuod, dinhi sa templo ang tibuok ebanghelyo ikapakita. …
Dili malauman nga ang mga seremonya sa templo masabtan dayon sa kinatibuk-ang detalye sa unang higayon nga ang usa ka tawo “mosulod” sa templo. Busa, ang Ginoo naghatag og paagi sa pagbalik-balik. Ang buhat sa templo kinahanglan nga buhaton og una sa matag tawo alang sa iyang kaugalingon; dayon mahimo kining buhaton makadaghan kutob nga itugot sa sirkumstansya ngadto sa iyang mga patay nga katigulangan o mga higala. Kini nga pangalagad moabli sa mga pultahan sa kaluwasan alang sa patay ug makatabang usab nga magpabilin sa hunahuna sa mga buhing tawo ang kinaiyahan, kahulugan ug mga obligasyon sa endowment. Pinaagi sa paghimo sa endowment nga kanunayng lab-as diha sa panumduman, mas mahimo nato ang atong mga buluhaton sa kinabuhi ubos sa impluwensya sa mahangturong mga panalangin.
Ang mga seremonya sa mga templo kompletong gilatid sa pagpadayag diha sa sekyon 124, bersikulo 39–41, sa Doktrina ug mga Pakigsaad:
“Busa, sa pagkatinuod Ako moingon nganha kaninyo, aron ang inyong mga pagdihog, ug ang inyong mga pagpanghugas, ug ang inyong mga pagbunyag alang sa mga patay, ug ang inyong maligdong nga mga katiguman, ug ang inyong mga handumanan alang sa inyong mga sakripisyo pinaagi sa mga anak ni Levi, ug alang sa inyong mga orakulo diha sa inyong labing balaan nga mga dapit diin kamo makadawat sa mga pagpadayag, ug ang inyong mga balaod ug mga paghukom, alang sa sinugdanan sa mga pagpadayag ug katukuran sa Zion, ug alang sa himaya, dungog, ug pagtuga [endowment] sa iyang tanan nga mga sakop, nga gihan-ay pinaagi sa ordinansa sa akong balaan nga balay, diin ang akong mga katawhan gisugo sa kanunay sa pagtukod ngadto sa akong balaan nga ngalan.
“Ug sa pagkatinuod ako moingon nganha kaninyo, himoa kini nga balay nga matukod ngadto sa akong ngalan, aron Ako mopadayag sa akong mga ordinansa diha niini ngadto sa akong mga katawhan;
“Kay Ako mopahiangay sa pagpadayag ngadto sa mga butang sa akong simbahan nga gitago gikan sa wala pa ang katukuran sa kalibutan, mga butang nga mahitungod ngadto sa kapaigoan sa kahingpitan sa panahon.”
Sa templo ang tanan parehang magsinina og puti. Ang puti simbolo sa kaputli. Walay hugaw nga tawo ang adunay katungod sa pagsulod sa balay sa Dios. Dugang pa, ang kapareha og sinina nagsimbolo nga diha sa atubangan sa Dios nga atong Amahan sa langit, ang tanan nga mga tawo patas. Ang manlilimos ug ang tigdumala sa banko, ang maalamon ug dili malaamon, ang prinsipe ug ang kabus tapad nga maglingkud diha sa templo ug adunay sama nga importansya kon sila magpuyo nga matarung sa atubangan sa Ginoong Dios, ang Amahan sa ilang mga espiritu. Kini usa ka espirituhanong pagkaangay ug pagsabut nga madawat sa usa ka tawo diha sa templo. Ang tanan adunay managsama nga luna sa atubangan sa Ginoo. …
Gikan sa sinugdanan hangtud sa katapusan, ang pagsulod sa templo usa ka mahimayaong kasinatian. Kini makapabayaw, ug makahatag og impormasyon sa daghang mga butang. Kini maghatag og kaisug. Ang tawo nga mosulod sa templo mapanalanginan og dugang nga panabut ug gahum alang sa iyang buluhaton.
Ang mga balaod sa templo ug ang mga pakigsaad sa endowment nindot, makatabang, yano, ug daling masabtan. Ang pagtuman niini sama ra usab ka yano. Kini gayud katingalahan, gani, si Propeta Joseph Smith, nga wala matudloi sa mga paagi sa kalibutan, nakahan-ay man niini sa hustong pagkasunod-sunod sa pagbutang sa pundasyon alang sa espiritwal nga kalamboan sa tawo. Kini lang gani daan mopamatuod sa atong hugot nga pagtuo nga si Joseph Smith giniyahan sa mga gahum nga labaw pa niadtong mga mortal nga mga tawo.
Alang niadtong kinsa mosulod sa pagpangalagad sa templo nga may hugot nga pagtuo, hingpit nga mosunod sa kabubut-on sa Ginoo, ang adlaw mahimong usa ka mahimayaong kasinatian. Ang kahayag ug gahum moabut ngadto kanila. …
Si bisan kinsa nga modawat sa gipadayag nga ebanghelyo ni Ginoong Jesukristo, ug ilabi na sa templo, ang konbisksyon motubo nga ang buluhaton sa Dios naestablisar pag-usab alang sa Iyang piho nga mga katuyoan sa ulahing mga adlaw. Ang pagpangalagad sa templo mao ang pagtabang kanato nga makasarang alang niining dako nga buluhaton: “ang pagpahinabo sa pagka-imortal ug sa kinabuhi nga dayon sa tawo” (Moises 1:39).
Paghulagway sa litrato pinaagi ni Craig Dimond
Litrato sa Templo sa Guayaquil Ecuador pinaagi ni Eduardo Ledeno Perez