Nagkat-on sa Pagpaminaw
“Paminaw sa akong mga pulong; lakaw diha sa kaaghup sa akong Espiritu, ug ikaw makabaton og kalinaw ngari kanako” (D&P 19:23).
Sa nag-edad pa ako og siyam, dihay reunion sa pamilya sa akong balay sa Coimbra, Portugal. Ang akong mga ginikanan nagkapuliki sa pag-abi-abi sa among mga paryente. Ang tanan nagtabi ug nagkataw-anay. Samtang ang mga hamtong nagkapuliki, ako nakahukom nga gustong malingaw usab.
Ang akong balay duol sa Suba sa Mondego, ug akong gihunahuna nga makalingaw ang pagpamasol. Dili ko gusto nga mag-inusara, mao nga akong gidala ang akong upat ka tuig nga igsoong babaye. Gibati nako nga kinahanglang mananghid ni mama ug papa kon asa kami moadto. Apan lingaw kaayo ang ilang pagtabi, busa ako mihukom sa pag-adto nga dili na lang mananghid kanila.
Nanglakaw kami buyon sa tampi sa suba hangtud nga nakakita kami og nindot nga luna. Gihatagan nako ang akong igsoong babaye og gagmayng mga bato aron ilabay sa tubig samtang nalingaw ako og pamasol.
Wala madugay ang akong mga ginikanan nakamatikod nga ang akong igsoong babaye ug ako wala sa balay. Gisuhid nila ang palibut sa lungsod sa pagpangita kanamo. Paglabay sa daghang oras ang akong amahan nakamatikod nga ang akong himan sa pangisda nawala. Busa siya ug si mama misuhid sa tampi sa suba hangtud nga ila kaming nakit-an.
Ang akong mga ginikanan nahuwasan sa pagkakita kanamo, apan sila wala usab malipay kanako. Peligro kaayo ang pagdula sa suba nga wala ang akong mga ginikanan, ilabina uban sa gamay nakong igsoon.
Tungod niini nga kasinatian ako nakat-on nga kita kinahanglan nga kanunayng makigsulti sa atong mga ginikanan—ug maminaw kanila. Sila nagtinguha kon unsay labing maayo alang kanato. Nakat-unan usab nako nga importante ang pagpaminaw sa Espiritu Santo. Ang Espiritu Santo misulay sa pagsulti kanako nga dili gayud ako mangisda kon walay pananghid sa akong mga ginikanan. Apan wala ako maminaw. Bisan tuod nalingaw kami, ang akong igsoong babaye ug ako anaa sa kakuyaw. Kon mainampingon kaming maminaw sa among mga ginikanan ug sa Espiritu Santo, mahimo kaming luwas.
Mga paghulagway pinaagi ni Casey Nelson