Mga Ideya sa Family Home Evening

Kini nga mga sugyot sa pagtudlo gihatag aron sa paghatag kaninyo og mga ideya. Inyong mapahaum kini sa inyong pamilya. Ang mga numero nga naa sulod sa parentheses nagpasabut sa mga pahina sa Pagtudlo, Walay Labaw ka Mahinungdanon nga Tawag.

“Ang Walay Paris nga Ski,” p. 12: Panahon sa leksyon, ang Espiritu Santo mahimong modasig kaninyo o sa inyong mga gitudloan sa pagpaambit og personal nga mga kasinatian nga gikinahanglan nga madungog sa uban (45). Paghunahuna og mga paagi nga ikaw makahatag sa mga sakop sa pamilya niini nga mga oportunidad samtang ikaw magtudlo gikan niini nga artikulo. Sama pananglit, human makakat-on kabahin sa kasinatian sa tagsulat, ang mga sakop sa pamilya mahimong mag-inambitay og kasinatian dihang sila mibati sa kalig-on ug kamabination sa Langitnong Amahan sa kaugalingon nilang kinabuhi.

“Paglantaw ngadto sa Templo,” p. 16: Usa ka paagi sa pagtabang sa mga tigkat-on nga makasabut sa mga baruganan sa ebanghelyo mao ang pagpadrowing kanila og mga litrato nga may kalabutan sa tema sa leksyon (166–67). Human matudlo ang pito ka mga baruganan nga gilatid diha sa artikulo, hunahunaa ang pagdapit sa mga sakop sa pamilya nga modrowing og usa ka litrato sa templo o modrowing kon unsa ang ilang nakat-unan gikan sa leksyon.

“Pagtubo ngadto sa Ginoo,” p. 42: Ang paghangyo sa mga sakop sa pamilya nga maminaw sa piho nga impormasyon niini nga artikulo makadugang sa partisipasyon sa leksyon (69). Sa inyong pagbasa og dungan sa artikulo, hunahunaa ang paghangyo sa mga sakop sa pamilya sa pagpaminaw sa piho nga mga hugpong sa mga pulong, o sa mga baruganan nga makatabang kanila sa “pagtubo ngadto sa Ginoo.”

“Ang Bag-ong Sinina ni Maria,” p. 62: “Kon ikaw mogamit og lain-laing kalihokan sa pagkat-on, ang mga tigkat-on malagmit nga mas makasabut sa mga baruganan sa ebanghelyo ug mas daghan ang mahinumduman” (89). Ikonsiderar ang paghunahuna og mga paagi nga makapaminaw ang inyong mga anak, mokanta, o mopaambit sa mga kamatuoran nga ilang nakat-unan gikan niini nga artikulo. Sama pananglit, samtang magbasa ka sa istorya, dapita ang inyong mga anak sa pag-isa sa ilang mga kamot og sa pagbutang sa ilang mga tudlo diha sa ilang ilong dihang nakamatikod sila nga si Maria wala maminaw. Hunahunaa ang pagpakanta sa inyong mga anak og usa ka kanta sa Primary nga may kalabutan sa ilang nakat-unan gikan sa istorya.