Hangtud Kita Magkita Pag-usab
Ang Pagkanta og Bag-ong Himno
Ang pamilyar nga himno nga gihan-ay sa dili pamilyar nga tuno mitudlo kanako nga mopadayon sa pagkat-on nga kanunay mao ang akong gihimo o molambo ako sa mga paagi nga ang Ginoo lamang ang nasayud.
Samtang ang bishop nagbasa sa mga ngalan sa mga miyembro sa ward nga gi-release gikan sa ilang mga calling nianang Dominggoha, nangagho ako, nagtan-aw sa akong walay gamit nga mga kamot. Gi-release ako isip first counselor sa presidency sa Relief Society. Lisud nga hunahunaon nga mobiya niini nga calling diin ako nalingaw gayud ug mawala ang kasuod uban sa mga sister diha sa presidency.
Sa pagkadungog nako sa mga ngalan sa bag-ong presidency nga gibasa, akong gibati ang pagkumpirma sa Espiritu, nagpahibalo kanako nga ang tanan mao gayud ang angay. Ang bag-o nga mga sister gipili sa Ginoo sa pagbuhat niini nga buluhaton. Samtang akong gipataas ang akong kamot sa pagpaluyo kanila, nasayud ako nga ilang buhaton ang talagsaong buhat ug adunay laing mga paagi alang kanako sa pagserbisyo. Sa dakong pasalamat, ako malinawon.
Dayon panahon na nga manganta sa himno sa sakrament. Ang bishop mipahibalo sa laing bersyon sa daang paborito nga, “While of These Emblems We Partake” (Mga himno, nu. 173 ug 174). Sa pagpaminaw sa organista nga mitukar sa introduksyon, akong gibati ang kalinaw nga nagkahanaw. “Nganong di man lang mi manganta sa pamilyar nga bersyon?” Hilum akong naghunahuna. “Mas ganahan ko adto.” Apan sa nagsugod nako og kanta, ang katahum sa dili pamilyar nga tuno mitandog sa akong kalag, ug nakaamgo ako nga kining tuno usa ka maanindot nga han-ay alang sa mga pulong niini. Ang musika maoy hinungdan sa akong paghunahuna sa kahulugan sa himno sa bag-ong paagi.
Sa kalit kini nga himno ug ang pagka-release nagdungan og santup sa akong hunahuna pinaagi sa gamhanang pagpaila sa Espiritu. Ang bag-ong presidency mobuhat sa sama nga buluhaton nga akong nahimo apan sa laing mga kamot ug bag-ong panan-anawon—sama nga ang himno adunay mao gihapon nga mensahe apan lahi nga musika. Ug ako mahatagan og bag-ong calling aron paghaum sa akong tuno. Kini nga kausaban makatabang kanako nga motubo sa mga paagi nga dili nako mahunahuna kon nagpabilin pa ako sa samang karaan nga dapit.
Kanunay nakong nahibaloan nga ang ebanghelyo ug ang organisasyon sa Simbahan mopanalangin sa matag miyembro sa daghan kaayong mga paagi. Kita nakat-on kon unsaon sa pagdumala ingon man usab sa pagsuporta, ug ang proseso niini nga pagkat-on magbalik-balik sa tibuok natong mga kinabuhi. Apan naamgohan nako niana nga miting sa sakrament nga kon padayon kitang maminaw sa Espiritu, makaila kita sa matag kausaban sa katingalahan nga pagkamakanunayon sa plano sa Langitnong Amahan alang kanato.
Paghulagway sa litrato pinaagi ni John Luke.