Mga Batan-on sa Daang Tugon
Ang impormasyon niini nga sidebar naggikan sa Bible Dictionary sa LDS nga bersyon sa King James Bible ug gikan sa The New Westminster Dictionary of the Bible, ed. Henry Snyder Gehman (1970).
Unsa ang gisulti sa Daang Tugon ngari kanato kabahin sa nabuhat sa mga lider diha sa kasulatan isip mga batan-on?
Bisan tuod kita makahinumdom kadaghanan sa inilang mga tawo sa Daang Tugon tungod sa mga butang nga ilang nabuhat isip mga hamtong, usahay kita makadiskobre og mga ideya mahitungod niining talagsaong mga tawo kon unsa sila panahon sa ilang kabatan-on. Sa pagkatinuod, ang pagdiskobre sa ilang mga desisyon ug mga pagpili nga ilang gipanghimo samtang nagtubo makatabang kaninyo sa pagpuyo sa inyong kinabuhi karon. Ania ang pito ka mga ehemplo:
Moises
Human madiskobre isip usa ka bata sa may mga tanuman sa sapa ug gidala ngadto sa palasyo nga midako isip usa ka prinsipe, si Moises nakadawat og hilabihan ka nindot nga edukasyon (tan-awa sa Mga Buhat 7:22). Sa iyang pagkabatan-on, siguro siya gitudloan unsaon sa pagbasa ug pagsulat sa Ehiptohanon.
Samuel
Si Samuel natawo isip usa ka gasa gikan sa Ginoo ngadto sa iyang inahan nga si Hannah. Siya misaad sa pagtugyan kaniya ngadto sa Ginoo aron amumahon sa pari nga si Eli. Si Samuel mitubo ug mialagad, ug sa dihang nag-edad siya og 12, siya nakamata pinaagi sa tingog sa Ginoo nga nagtawag kaniya sa kagabhion (tan-awa sa 1 Samuel 3:4–10). Bisan bata pa, si Samuel nakakat-on sa pagpaminaw sa tingog sa Ginoo. Kini misugod sa iyang pagpangandam nga mahimong usa ka propeta.
Daniel
Human nga ang iyang pamilya ug mga katawhan nadakpan ug gidala ngadto sa Babilonia, si Daniel ug tulo ka mga higala gipadala aron magserbisyo sa palasyo sa hari. Isip batan-ong mga lalaki, sila midumili sa pagkaon og karne ug pag-inom og bino nga nga maoy ganahan sa mga tawo didto sa palasyo. Sila misunod sa mga sugo ug gipanalanginan og kahibalo ug kahanas. Sa Daniel 1:20 nag-ingon nga ang hari nakakita nga kining upat ka batan-ong mga lalaki “labing maayo sa napulo ka pilo kay sa tanang mga mago ug mga maglalamat nga diha sa tibuok niya nga ginsakupan.”
Jose
Si Jose mga 17 anyos sa dihang ang iyang magulang nga mga lalaki mibaligya kaniya ngadto sa usa ka magpapatigayon nga midala kaniya isip usa ka sulugoon ngadto sa Ehipto. Bisan pa nianang mga sirkumstansya, si Jose napanalanginan. Si Jose nakahimo og maayo gayud nga trabaho alang kang Potiphar, ang tawo nga mipalit kaniya, ug ang tanang gibuhat ni Jose milambo (tan-awa sa Genesis 39:3–4). Bisan pa sa sayop nga mga sumbong ug mga pasangil, si Jose sa wala madugay nahimong usa ka lider sa Ehipto ikaduha sa Paraon. Ang iyang kalampusan mibutang kaniya sa usa ka posisyon aron sa pagtabang sa iyang kaugalingong pamilya panahon sa huwaw.
Ruth
Si Ruth siguro usa ka batan-ong babaye sa dihang ang iyang unang bana, ang anak ni Noemi, namatay. Imbis mobalik ngadto sa iyang pamilya, si Ruth mipili nga mouban sa iyang ugangan nga babaye ug modawat sa mga gitudlo sa iyaha kabahin sa Dios sa Israel. Siya miingon ngadto kang Noemi, “Bisan asa ikaw mopuyo, adto ako mopuyo: ang imong katawhan mamahimo nga akong katawhan, ug ang imong Dios mamahimo nga akong Dios” (Ruth 1:16). Si Ruth naminyo pag-usab ug nahimong apohan nga babaye sa tuhod ni Haring David, sa linya sa kaliwatan diin si Jesukristo sa kaulahian natawo.
David
Si David mao ang kinamanghuran sa walo ka anak nga mga lalaki nga nagpuyo sa Bethlehem. Samtang bata pa, iya nang napakita ang iyang kaisug pinaagi sa pagluwas sa karnero sa iyang amahan gikan sa pag-atake sa usa ka leon ug sa usa ka oso. Samtang batan-on pa, si David gipili ni propetang Samuel nga mahimong hari (tan-awa sa 1 Samuel 16:12–13). Sa sinugdanan, si Samuel nagtuo nga ang magulang nga lalaki ni David mao ang gipili sa Dios tungod kay siya taas ug maayo og pamarug, apan ang Ginoo miingon sa propeta nga ang batang lalaki nga si David mao ang mahimong hari. Si Samuel giingnan nga, “Ang Ginoo nagatan-aw dili ingon sa makita sa tawo; kay ang tawo nagatan-aw sa panagway sa gawas, apan ang Ginoo nagatan-aw sa kasingkasing” (1 Samuel 16:7).
Kanus-a man ang mga lalaki ug mga babaye sa Daang Tugon nagsugod sa pagpangandam alang sa usa ka tibuok nga kinabuhi nga pag-serbisyo ngadto sa Ginoo? Gikan sa mga kasulatan atong nakita nga kini samtang sila batan-on pa. Kon kamo anaa sa inyong pagkabatan-on, kamo may igong pangidaron sa pagkat-on kabahin sa Ginoo ug sa pagbuhat sa Iyang kabubut-on. Sama sa giingon ni propetang Alma ngadto sa iyang anak nga lalaki nga si Helaman, “O, hinumdumi, akong anak nga lalaki, ug pagkat-on og kaalam diha sa imong kabatan-on; oo, pagkat-on diha sa imong kabatan-on sa paghupot sa mga sugo sa Dios” (Alma 37:35).
Imbis nga magpaabut hangtud kamo mahimong hingkod, karon mao ang hingpit nga panahon sa pagsugod og pagpuyo sa matarung nga kinabuhi.