Ang Akong Saad ngadto sa Ginoo
Juan Manuel Magaña Gómez, Guerrero, Mexico
Mga pipila ka tuig ang milabay ang akong pamilya nakasinati og kalisud. Ang akong mga ginikanan nagbuwag, ug ang among pamilya misugod sa pagkalimot sa gugma sa Dios.
Sa among talagsaon nga swerte, usa sa mga higala sa akong inahan nakakita sa among panginahanglan sa pagpaduol ngadto sa Dios ug mipaila-ila kanamo sa full-time nga mga misyonaryo. Samtang nagtudlo sila kanamo sa ebanghelyo, kami nakahunahuna nga ang Dios adunay plano alang kanamo, ug bisan sa among daghang mga hagit, Siya wala mobiya kanamo. Dihang among nasabtan kini nga mga baruganan, ang akong inahan, mga igsoon nga babaye, ug ako mihukom nga magpabunyag.
Samtang kami mitambong sa among mga miting sa Dominggo, ang among mga pagpamatuod sa ebanghelyo mitubo. Ako sa wala madugay mihukom sa pag-alagad og full-time nga misyon. Kadto dili sayon nga desisyon, bisan pa, tungod kay ako ang gisaligan sa balay. Ang akong inahan nagkinahanglan sa akong tabang. Dugang pa, ako misugod sa pagkadawat og daghang mga tanyag sa panarbaho ug nadawat sa pipila ka mga unibersidad. Ako sa katapusan mihukom sa pagpangutana sa Dios alang sa tabang ug direksyon.
Human sa pag-ampo, ako mibasa sa akong mga kasulatan ug miabut sa mosunod nga mga bersikulo:
“Busa, ang imong banay mabuhi.
“Tan-awa, sa pagkatinuod Ako moingon nganha kanimo, biya lamang kanila sa mubo nga panahon, ug ipahayag ang akong pulong, ug Ako mag-andam og dapit alang kanila.” (D&P 31:5–6).
Diha-diha dayon ako kusog nga mibati sa Espiritu ug nasayud nga ang akong gibasa mao ang pulong sa Langitnong Amahan para kanako.
Sa wala madugay human niana nga kasinatian, ako nakadawat sa akong mission call. Sa wala pa maset-apart isip usa ka full-time nga misyonaryo, ako misaad ngadto sa akong Langitnong Amahan nga akong buhaton ang Iyang kabubut-on isip usa ka misyonaryo—nga ako motrabaho nga makugihon ug isakripisyo ang tanan alang Kaniya. Ang bugtong panalangin nga akong giampo mao nga makita ang akong pamilya nga magkahiusa pag-usab sa moabut nga adlaw.
Ang akong unang tuig, isip usa ka misyonaryo mahagiton gayud, apan ang akong kompanyon ug ako mitrabaho sa tibuok namong kasingkasing. Niining higayona ako nakadawat og usa ka makapatingala nga sulat gikan sa akong inahan nagpahibalo kanako nga ang akong amahan miuli na sa balay! Nianang higayona ako nakahinumdom sa saad nga akong gihimo ngadto sa Dios, ug nakahinumdom sa Iyang saad diha sa Doktrina ug mga Pakigsaad: “Ako, ang Ginoo, mapugos sa pagtuman kon kamo mobuhat sa unsa nga Ako misulti, apan kon kamo dili mobuhat sa unsa nga Ako misulti, kamo dili makaangkon og saad” (D&P 82:10).
Mga pipila ka tuig ang milabay sukad sa akong misyon. Karon ang akong pamilya ug ako nakakita sa hingpit nga kalipay diha sa ebanghelyo ug pinaagi sa among mga pakigsaad uban sa Dios. Ako nasayud nga Siya buhi. Ako nasayud nga Siya nahigugma kanato. Ako nasayud nga Iyang gipadala ang Iyang Anak aron sa pagluwas kanato. Ako usab nasayud nga kon kita mohimo og mga saad ngadto Kaniya ug magmatinud-anon niadtong mga saad, Siya magmatinud-anon ngari kanato.