Atong Luna

2010

Atong Luna

Pebrero 2010

Atong Luna

Pagpraktis ug Pagpangandam

Usa ka Dominggo gihangyo ako sa pagpatukar sa akong violin atol sa miting sa sakrament. Ginerbyos kog maayo nga nagtukar, ug nangurog ang akong mga kamot ug mga tuhod. Ang mga tawo diha sa kongregasyon mihunahuna nga maayo kaayo ang akong pagtukar, apan gibati nako nga makahimo pa unta ko og labaw ka maayo. Sama sa giingon sa Doktrina ug mga Pakigsaad 38:30, “Kon kamo andam dili kamo mahadlok.” Nakat-on ako gikan niini nga kasinatian sa kaimportante sa pagpraktis.

Dili lamang nga magamit kini sa instrumento kondili sa bisan unsang butang sa kinabuhi. Sama pananglit, sa klase sa geometry wala ako makasabut og maayo sa materyal. Sa dihang nagpraktis ako og maayo, nagbunga ra kini, ug nakapadayon ako sa materyal. Sama kini sa ebanghelyo. Kon magpraktis kita sa paghatag sa atong mga pagpamatuod, makahimo kitag labaw ka maayo ug dili nerbyuson o magduhaduha sa pagpakigbahin niini. Sa pagkatinuod, usahay makigbahin ako sa kahibalo sa ebanghelyo sa akong dili motuo og Dios nga higala sa eskwelahan.

Nasayud ako nga makahimo pa kita og mas maayo sa kinabuhi kon kita magpraktis.

Tifare C., 15, Virginia, USA

Kon Ako Magpaambit sa Sakrament

Sa unang higayon nga nagpaambit ako sa sakrament isip usa ka deacon, ginerbyos ako gikan sa pagsugod hangtud pagkahuman. Nabalaka ako nga maadto sa sayop nga direksyon o maadto sa sayop nga lumbay. Gipangandoy na nako ang magpaambit sa sakrament kutob sa akong nahinumduman. Akong gitan-aw ang mga deacon matag semana ug naghunahuna sa kaligdong nilang tan-won.

Ang sakrament mao ang importante nga higayon kon maghunahuna kita ni Jesukristo ug unsay atong mausab ug unsaon nato sa paglambo. Ang deacon makatabang sa uban nga mamalandong atol sa sakrament pinaagi sa angay nga pagsinina, may balaang pagtahud, hinay nga maglakaw, magkupot sa mga sakrament tray nga maampingon, ug dili magkomedya.

Nakahimo ako niini sa akong unang semana nga wala masayop, ug wala na ako nerbyosa. Gani, kon magpaambit ko sa sakrament, bation nako ang balaang pagtahud ug kamalipayon.

Aduna akoy upat ka manghud nga igsoong mga lalaki, ug naningkamot ako og maayo sa pagtabang pa kanila ug dili makiglalis kanila. Importante kaayong mahimo nga maayong ehemplo. Kon dili ako mohimo, ila unyang hunahunaon nga ang priesthood dili importante. Apan importante kini. Nausab na ako sukad akong nadawat ang priesthood. Ang buotan nga naghupot sa priesthood kinahanglang mosunod sa mga sugo, motagad og maayo sa uban, ug mohinumdom nga kita mga naghupot sa priesthood diha sa eskwelahan ingon man usab ma-Dominggo.

Hao-Chen W., 15, Taiwan

Kini mao ang Inyong Luna

Kini mao ang inyong mga pahina—inyong luna sa pakigbahin sa ubang mga batan-on kon unsay kahulugan sa ebanghelyo diha kaninyo. Ania ang inyong paabuton nga basahon niini nga mga pahina ug unsay inyong ikatampo:

Mga kasinatian o mga hunahuna nga makatabang kaninyo nga makasabut ug mas mosunod sa ebanghelyo.
Usa ka maayo og kalidad nga litrato nga inyong gikuha, uban sa kasulatan isip caption.
Usa ka maayong kasinatian nga inyong nabatunan samtang nagtrabaho sa Katungdanan ngadto sa Dios o sa Personal nga Kauswagan.
Inyong mga komentaryo mahitungod sa kasulatan nga nakapadasig kaninyo. Ilakip ang inyong litrato kon gusto ninyo.
Ikasulti kabahin sa Liahona. Unsay nagustohan ninyong basahon?

I-e-mail ang inyong istorya, litrato, o mga komentaryo ngadto sa liahona@ldschurch.org. Palihug isulat ang “Our Space” diha sa hilisgutan nga linya, ilakip ang pagtugot sa inyong ginikanan nga maimprinta ang inyong gipadala kanamo. Ang mga gi-submit mahimo nga i-edit alang sa gitas-on o sa pagklaro.