“Unsaon nako sa pagkombinser ang akong mga higala nga ang atong mga sumbanan tinuod nga kabahin sa kagawasan ug dili palas-anon?”

Adunay daghan kaayong mga kapilian sa kinabuhi, ang pipila husto, ug ang pipila sayop. Ang Langitnong Amahan mihatag kanato og mga sumbanan aron pagtabang kanato nga makahimo og maayong mga pagpili. Kon atong sundon ang mga sumbanan, kita panalanginan ug panalipdan (tan-awa sa Mga Taga-Roma 8:28; Mosiah 2:41; D&P 130:21). Kon dili nato sundon ang mga sumbanan, kita mawad-an niadtong mga panalangin ug masakitan sa espirituhanon ug usahay sa pisikal nga paagi.

Kadtong kinsa nagsunod sa mga sumbanan sa ebanghelyo wala mowagtang sa ilang kabubut-on: sila nagpili sa paghimo og butang nga makahatag kanila og mga panalangin ug kalinaw sa hunahuna. Sila nasayud nga ang pagkadili masulundon magdala lamang og mga problema sa ilang mga kinabuhi—mga problema nga ilang gipili nga likayan.

Ang mga sumbanan sa Simbahan, sama niadtong makit-an sa Alang sa Kalig-on sa mga Kabatan-onan, gibase sa mga doktrina, o mahangturon nga mga kamatuoran. Sama pananglit, ang atong mga lawas mao ang mga templo sa atong mga espiritu (tan-awa sa 1 Mga Taga-Corinto 3:16). Ang usa ka sumbanan nga gibase niana nga doktrina mao ang Pulong sa Kaalam: atimana ang inyong lawas pinaagi sa pagkaon og maayong mga pagkaon ug paglikay sa makaadik ug makadaut nga mga butang.

Busa, samtang nagsunod kamo sa mga sumbanan, kamo nagpuyo nga makiangayon uban sa mahangturong kamatuoran nga gihatag kanato sa Langitnong Amahan. “Ug ang kamatuoran magahatag kaninyog kagawasan” (Juan 8:32).

Ang Pagkamasulundon Moresulta ngadto sa Kagawasan

Sa akong pagpaningkamot nga maminaw sa mga pulong sa mga propeta, kanunay ako nga makadawat og pisikal ug espirituhanon nga mga panalangin sa Dios. Dayon akong gibati ang labaw ka masaligon sa mga pagpili, ug ang akong mga higala nakaamgo nga nabayran nako ang bili sa pagkamasulundon aron makaangkon niining mas mahinungdanon nga kagawasan. Ipamatuod sa maisugon nga paagi ang mga panalangin nga inyong natagamtam isip masulundong miyembro sa Simbahan. Inyong makombinser ang inyong mga higala pinaagi sa inyong pulong ug ehemplo nga ang pagsunod sa inyong mga sumbanan dili mopugong sa inyong kabubut-on, apan ang paghimo og sayop nga mga pagpili sa kasagaran ang makapugong. Ang dinasig nga mga sumbanan nagtudlo kanato ngadto sa direksyon aron mohimo og maayo nga mga pagpili, nagtugot og daghang mga pultahan sa kahigayunan nga kanunayng dako og abli. Ang akong mga higala kanunay nga nagtinguha sa samang kagawasan.

Elder Madsen, 21, Indonesia Jakarta Mission

Ipasabut nga Ikaw Malipayon

Gipangutana usab ako sa akong mga higala, mga kauban sa klase, ug gani sa akong mga magtutudlo sa eskwelahan kabahin sa atong mga sumbanan. Sila miingon nga ang atong mga sumbanan sa Simbahan istrikto ra kaayo. Imbis nga makiglantugi kanila, nangayo ako og higayon nga mopasabut kanila sa tanan kabahin sa atong mga sumbanan sa Simbahan. Gipakita lang nako nila nga ako malipayon kaayo ug komportable nga nagsunod sa atong mga sumbanan. Wala usab nako gamita ang atong mga sumbanan isip rason sa dili pagtambong sa pipila ka mga kalihokan sa eskwelahan. Hinoon, misugyot ako og pipila ka mga ideya alang sa mga kalihokan sa eskwelahan aron masunod ang mga sumbanan sa atong Simbahan. Nakigbahin usab ako kanila sa mga kaayohan sa pagsunod niadtong mga sumbanan.

Ailyn L., 19, Davao, Philippines

Dapita ang Inyong mga Higala sa Kalihokan

Ang Langitnong Amahan mihatag og kabubut-on sa tanan Niyang mga anak. Ang atong mga sumbanan lahi kay sa kalibutanon, ug tungod niini, daghang higayon nga atong gihunahuna nga dili kita makahimo og piho nga mga butang. Apan kita adunay gahum sa pagpili, ug kita kinahanglan nga mopili kanunay sa labing maayo alang kanato aron dili madaut ang atong mga lawas ug ang atong espirituhanon nga pag-uswag.

Dapita ang inyong mga higala sa pagtambong sa kalihokan sa Simbahan, ug ipakita kanila kon unsaon nato sa paghimo og lain-laing nindot ug makalingaw nga mga butang nga dili makalimtan ang atong mga sumbanan. Paninguhaa nga kanunayng mahiangay sa Espiritu Santo, ug kini sayon ra kaayo nimo sa paghimo og tarong nga mga desisyon ug mahimong maayo nga ehemplo.

Amanda V., 18, Curitiba, Brazil

Buhata Gayud ang Matarung

Sa miaging tuig aduna akoy pipila ka mga higala kinsa walay pagtahud sa akong mga sumbanan. Ila akong gisultihan nga makapuol ako, nga gipugngan ako sa akong mga sumbanan o gipugngan sa paglingaw. Namalandong ako, nag-ampo, ug nagbasa sa mga kasulatan aron ubanan ako sa Espiritu Santo ug hatagan ako og dugang kalig-on. Gisultihan dayon nako ang akong mga higala nga aduna akoy laing li-ngaw—ang dili pagpanigarilyo, dili pag-inom og alkohol. Kini nga mga sumbanan naghatag kanako og dakong kagawasan, labaw pa kay sa ilaha, tungod kay sila nagapos sa alkohol ug tabako. Human sila sultihi niini, ila akong nasabtan. Apan bisan pa niana, midesider ako sa pag-ilis og mga higala. Dugay-dugay akong nag-inusara, apan wala madugay nakakita akog mga higala nga may samang mga sumbanan kanako, ug karon maayo na ang akong pamati. Ang Langitnong Amahan mopanalangin kanimo kon buhaton nimo ang matarung.

Belén G., 15, Colonia, Uruguay

Mga Sumbanan Gihimo alang sa Atong Kaayohan

Aduna usab akoy mga higala nga anaa nianang matang sa panghunahuna sa atong mga sumbanan sa Simbahan. Sa sinugdanan mibati ako og pagduhaduha sa pagpasabut, apan nakahunahuna ko nga dili sila makasabut kon dili kita mosulti kanila. Pahibaloa sila nga ang mga sumbanan gihatag kanato sa Ginoo alang sa kaayohan sa atong mga kalag aron ang dili angay nga mga impluwensya dili makadaut kanato. Ang mga sumbanan sama ra sa mga panudlo panahon sa eksaminasyon. Kon kamo dili mosunod niini, sigurado gayud nga kamo mahagbong. Ug sama sa usa ka eksamin, kamo makapili sa pagsunod o dili. Sa pag-abut sa panahon ang inyong mga higala makadayeg kon unsa kamo kalig-on sa inyong paghupot sa mga baruganan sa Simbahan, ug sigurado nga kamo mapanalanginan.

Cleem L., 18, Tanjay, Philippines

Mga Sugo Nanalipud Kanato

Ang mga sugo nga giisip nga mga pagdili sa pagkatinuod kini diay mga panalipod. Ang Dios mihatag kanato og mga patakaran aron sa pagpanalipud kanato sa tanang mga aspeto sa atong mga kinabuhi (pisikal, emosyonal, ug sa espirituhanon nga paagi). Kita nasayud sa pisikal nga balaod sa kasiguroan nga nagdili sa paghikap og init nga stove. Tinuod, makahikap kamo sa stove, apan kamo ang mag-antus sa mga sangputanan sa pagkapaso. Kon kamo mopili sa pagtan-aw og dautan nga salida o molapas sa Pulong sa Kaalam, inyong antusan ang “mga paso” nga hapdos kaayo. Ang tintasyon makapabalhin kanato sa atong tumong gikan sa Ginoo ngadto sa temporaryong katagbawan, sa walay pagtan-aw sa mga sangputanan sa atong sala. Kon kita mopili, atong gipili ang sangputanan, bisan kon wala nato kini planoha. Sumala sa gisulti sa akong mama kanunay, “Kon gituyo nimo ang paglapas sa mga sugo, ikaw tinuod nga adunay kabubut-on ug makapadayon ka sa paghimo, apan dili ka makabuot kon unsay gusto nimong mahitabo.” Ang pagtuman sa mga sugo makahatag kanako og tinuod nga kalipay nga maoy akong gusto.

Joseph G., 13, Utah, USA