Sa mga Pulong sa mga Propeta
Ikapulo
Gikan sa “Tithing,” Ensign, Mayo 1994, 33–34.
“Ang akong biyuda nga inahan misuportar sa iyang tulo ka gagmayng mga anak sa sweldo sa usa ka magtutudlo nga gamay ra. Sa dihang ako nakamatngon nga kami walay pipila ka mga butang nga among gitinguha… , akong gipangutana ang akong inahan ngano nga siya mibayad og dako gikan sa iyang sweldo para sa ikapulo. Wala gayud ako makalimot sa iyang pagpasabut: “Dallin, tingali adunay pipila ka mga tawo nga makahimo ra nga dili mobayad sa ilang ikapulo, apan kita dili makahimo. Ang Ginoo mikuha sa inyong amahan ug mibilin kana aron mopadako kaninyo nga mga anak. Dili ako makahimo niana nga wala ang mga panalangin sa Ginoo, ug makuha nako kadto nga mga panalangin pinaagi sa pagbayad og matinuoron nga ikapulo. Kon ako mobayad sa akong ikapulo, anaa kanako ang saad sa Ginoo nga siya mopanalangin kanato, ug nagkinahanglan gayud kita niana nga mga panalangin kon kinahanglan kitang mabuhi.”
Daghang tuig ang milabay ako nakabasa sa handumanan ni Presidente Joseph F. Smith sa susama nga pagpamatuod ug pagtulun-an pinaagi sa iyang nabiyuda nga inahan. Niadtong Abril 1900 nga komperensya, si Presidente Smith mipakigbahin niini nga panumduman gikan sa iyang pagkabata.
“Ang akong inahan usa ka biyuda, nga adunay dako nga pamilya nga abagahon. Usa ka panahon sa tingpamulak sa dihang among giablihan ang mga lungag nga butangan sa patatas iyang gipakuha sa iyang anak nga mga lalaki ang labing maayo nga mga patatas, ug iya kining gidala ngadto sa opisina alang sa ikapulo; ang mga patatas nihit kaayo nianang panahona. Ako gamay pa kaayo nga bata anang higayona, ug midala sa karwahe. Sa dihang kami mipasaka sa may hagdanan sa opisina alang sa ikapulo, andam sa paghaw-as sa mga patatas, usa sa mga clerk ang migawas ug miingon sa akong inahan, ‘Biyuda nga Smith, kini usa ka makauulaw nga ikaw kinahanglan pa nga mobayad sa ikapulo.’ … Siya mibadlong sa akong inahan sa pagbayad sa iyang ikapulo, mingalan kaniya og bisan unsa apan usa nga maalamon o mapanagan-on; ug miingon nga adunay uban kinsa mga kusgan ug makahimo sa pagtrabaho nga gisuportahan gikan sa opisina alang sa ikapulo. Ang akong inahan miatubang kaniya ug miingon: ‘William, maulaw ka sa imong kaugalingon. Imo bang ihikaw kanako ang usa ka panalangin? Kon ako dili mobayad sa akong ikapulo, akong lauman nga ang Ginoo mopugong sa Iyang mga panalangin diri kanako. Ako nagbayad sa akong ikapulo, dili lamang tungod kay kini usa ka balaod sa Dios, apan tungod kay ako naglaum og panalangin sa pagbuhat niini. Pinaagi sa pagtuman niini ug sa ubang mga balaod, ako naglaum nga ako mouswag ug makasangkap sa akong pamilya’” (sa Conference Report, Abr. 1900, p. 48).
Ang pipila sa mga tawo moingon, “Ako dili makahimo sa pagbayad sa akong ikapulo.” Kadtong mga nagbutang sa ilang hugot nga pagtuo diha sa mga saad sa Ginoo moingon, “Ako dili makahimo nga dili mobayad sa ikapulo.”