Ang mga Miyembro Miabag sa Pagpasiugda alang sa paglikay sa Tipdas
Sukad ang Simbahan miapil sa Pagpasiugda alang sa paglikay sa Tipdas ug sa Pakigtambayayong niadtong 2003, liboan ka mga miyembro sa Simbahan mitabang alang sa paningkamot sa pagwagtang sa maong sakit.
Gibana-bana nga mokabat sa 56,000 ka mga miyembro sa Simbahan sa tibuok kalibutan ang mihatag og labaw sa 600,000 ka oras nga serbisyo sa 32 ka mga nasud sa Africa, Asia, ug sa Central ug sa South America.
Ang grupo sa makatawhanong mga organisasyon—ang American Red Cross, ang United Nations Foundation, U.S. Centers for Disease Control and Prevention, UNICEF, ug ang World Health Organization—mitukod sa Pagpasiugda alang sa paglikay sa Tipdas ug sa Pakigtambayayong niadtong 2001 uban sa tumong nga maminusan ang gidaghanon sa nangamatay sa tibuok kalibutan tungod sa tipdas ngadto sa 90 porsyento sa katapusan sa tuig sa 2010.
Isip kabahin sa pasalig sa Simbahan ngadto sa maong pagpasiugda, nga naglakip sa $3 milyones nga donasyon, ang Unang Kapangulohan midapit sa mga miyembro sa Simbahan sa naapektohang mga nasud, ubos sa pagdumala sa lokal nga mga lider sa priesthood ug Relief Society, sa pag-apil aron mapahibalo kini nga paningkamot ug sa pagtabang sa mga pagbakuna.
Kapin sa 20 ka mga magtiayon Church-service missionary ang misuporta niini nga kampanya. Nagtrabaho sa mismo nga dapit gikan sa usa ngadto sa upat ka bulan, kini nga mga magtiayon nakigtambayayong sa mga lider sa priesthood ug Relief Society, sa departamento sa panglawas, ug sa laing mga kaubanang mga organisasyon sa paghatag og boluntaryo nga suporta alang sa lain-laing mga aspeto sa maong kampanya.
Bisan og ang mga miyembro sa Simbahan dili ang mopalit o ang direktang mohatag sa mga pagbakuna, gihimo nila ang pagpahibalo sa mga kasilinganan sa paghatag og mga pahibalo, sa pagbitay og mga poster ug mga banner, sa pagtabang kon asa gihimo ang mga pagbakuna, ug sa paghimo og diha-diha nga pahibalo pinaagi sa radyo ug sa TV. Usa ka batan-ong returned missionary mihimo og usa ka kanta alang sa maong kampanya didto sa Madagascar. Kini nga kanta gihubad ug gikanta sa 28 ka mga pinulongan sa daghang mga estasyunan sa radyo nga kadaghanan didto sa mga dapit diin gipahigayon ang kampanya.
Gikan sa sinugdanan sa pagpasiugda niini nga kampanya niadtong 2001 hangtud Disyembre 2008, 600 ka milyon ka mga bata ug kabatan-onan ang nabakunahan sa giplanohan nga mga dapit, nga miresulta ngadto sa 74 porsyento nga pag-us-os sa mga pagkamatay tungod sa tipdas sa tibuok kalibutan ug 89 porsyento nga pag-us-os sa Africa lamang. Ang mga pagkamatay tungod sa tipdas mius-os gikan sa 750,000 niadtong tuig 2000 ngadto sa 197,000 pagka 2007, nga mihimo sa kalibutan nga duol na kaayo sa tumong sa United Nation nga mas ubos pa sa 100,000 ang mamatay sa tibuok kalibutan inig katapos sa 2010.
Bisan og ang tinguha sa kampanya mipalambo og daghang mga kinabuhi, dili tanang mga benepisyo nahimong pisikal. Ang igsoon nga babaye ni Olavi Ndafediva nga lumulupyo sa Namibia, kinsa usa ka miyembro sa Simbahan, miboluntaryo sa lokal nga kampanya niadtong 2006. Usa ka adlaw miingon siya ni Olavi nga dili siya makahimo niini ug mihangyo kaniya nga moadto isip puli kaniya. “Human nianang adlawa,” siya miingon, “Nakahukom ako nga magpakisayud pa og dugang mahitungod sa simbahan nga mitabang og maayo sa akong mga tawo.” Human sa pagpasakop sa Simbahan, si Brother Ndafediva misalmot sa kampanya niadtong 2009.
Ang Cape Verde, usa sa daghang mga isla nga pipila ka gatusan ka milya ang gilay-on gikan sa baybay sa kasadpang Africa, usa sa daghang mga nasud diin ang mga miyembro sa Simbahan miboluntaryo. Sa Marso 2009 nga kampanya, ang mga miyembro mitabang nga mahimong posible ang mga pagbakuna sa kapin sa 50,000 ka mga bata. Kapin sa 600 ka mga miyembro sa Cape Verde miboluntaryo og 4,200 ka oras sa pagtuboy sa kampanya ngadto sa matag balay.
“Kami adunay dakong kalabutan sa mga tawo gikan sa unom ka mga isla diin ang Simbahan adunay mga branch, ilabi na sa mga kabatan-onan ug sa mga young single adult,” miingon si Isias Barreto da Rosa, second counselor sa Cape Verde Praia Mission presidency. “Kini nga programa sa tipdas tataw kaayo nga mipalapad sa among panglantaw kon unsay among mabuhat aron sa pagpangilabut sa pagsulbad sa mga problema sa among komunidad.”
Ang tipdas usa ka makatakud nga sakit nga moataki sa sistema sa pagginhawa ug maoy hinungdan sa mga butoy-butoy [rashes] sa panit, pulmonya, paghubag sa utok, ug lain pang mga sakit. Sa kasagaran makamatay kini. Sigun sa Tigpasiugda alang sa paglikay sa Tipdas, gibana-bana nga 540 ka mga bata ang mamatay matag adlaw tungod niana nga sakit niadtong 2007. Ang kakulang sa sustansya ug walay bakuna nga mga bata sa kasagaran ang mamiligro sa tipdas. Hinoon, kana nga sakit dali rang mapugngan pinaagi sa pagbakuna nga mokantidad og minus sa US $1 sa pagtambal sa matag bata.
Ang mga bata sa Africa mipakita sa pag-uyon pinaagi sa pagpataas sa mga kumagko human sila mabakunahi batok sa tipdas niadtong 2008.
© IRI.