Nganong Ikaw Dili Moadto sa Party?
Ang pamugos nagpadayon. Kinahanglan nga mopili ko.
Isip kinabig sa Simbahan didto sa Malaysia, usa ka nasud diin may pipila lamang ka mga Kristiyano, usahay maglisud ako sa pagbarug sa akong tinuohan. Usa niana ka adlaw sa Disyembre, gisultihan ako sa akong boss nga ang among kompaniya adunay anniversary party sa katapusan sa tuig ug gilauman ang akong pagtambong. Nabalaka ako ug dili gusto nga motambong tungod kay ang pag-inom og bino sa mga party mao ang kabahin sa kultura sa among kompaniya. Nasayud usab ako nga ang akong kauban sa trabaho mamugos nako sa pag-inom.
Apan gusto gyud sa akong manager nga ako motambong. Akong gihunahuna kon unsaon nako pagbuntog niini nga hagit.
Unya, usa ka kauban sa trabaho misangpit nako ug nangutana, “Nganong dili ka man moadto sa party?” Giingnan nako siya nga tungod sa akong relihiyuso nga pagtuo, dili ako moinom og bino.
Masuk-anon siyang mitubag, “Kabalak-an nimo ang kalibutan nga imong gipuy-an karon, dili ang laing kalibutan nga tingali wala diha. Gusto ka bang mokita og kwarta o biyaan kini tungod sa imong hinanggaw nga tinuohan?” Sa iyang pagpangutana nako niini, gibati ako og kahadlok. Nasayud ako nga kon dili ako moinom didto sa party, mawad-an ako sa trabaho. Unya sa kalit usa ka kasulatan misantup sa akong hunahuna: “Bisan ako gayud mao siya nga nagalipay kaninyo: kinsa ba ikaw, nga mahadlok man ikaw sa tawo nga mamatay, ug sa anak nga lalaki sa tawo nga pagahimoon nga ingon sa balili; ug nahakalimot sa Ginoo nga imong Magbubuhat, nga nagbuklad sa kalangitan, ug nagpahaluna sa mga patukoranan sa yuta?” (Isaias 51:12–13).
Diha-diha nasayud ako nga kinahanglan ako nga mahadlok gayud sa Dios, dili sa akong mga kauban sa trabaho o sa akong boss. Nakaamgo usab ako nga ang akong katuyoan dinhi sa yuta dili ang pagpangita og kwarta kondili ang pagtubo sa espirituhanong paagi. Maong gitubag nako ang akong kauban nga, “Pilion nako ang akong tinuohan, ug kinahanglan nimong respituhon kini.”
Paglabay sa pipila ka semana miundang ako sa trabaho. Sa katapusang adlaw sa akong trabaho, nagkasultihanay kamig maayo sa akong mga kauban sa trabaho. Akong gipasabut kon unsa ka lahi ang Ang Simbahan ni Jesukristo sa mga Santos sa Ulahing mga Adlaw sa ubang mga simbahan. Sila akong gisultihan kabahin sa akong mga tinuohan ug sa akong tinguha sa pagsunod sa mga sugo.
Paglabay sa usa ka semana nakasulod ako og laing trabaho nga mas dakog sweldo kaysa akong gibiyaan. Ang bag-ong trabaho naghatag usab kanako og kahigayunan sa pag-andam aron makaalagad og full-time nga misyon.
Kini nga kasinatian wala lamang magtudlo kanako nga ang pagsunod sa mga sugo makapahimo nako sa pagbalik ngadto sa Langitnong Amahan sa umaabut, kondili naghatag kanako og pagsalig nga bisag unsay mga hagit nga akong atubangon sa matag adlaw, ang Ginoo moandam og paagi alang kanako (tan-awa sa 1 Nephi 3:7).
Paghulagway pinaagi ni Gregg Thorkelson