Pagserbisyo diha sa Simbahan
Kanus-a man ang Panahon sa Pagserbisyo?
Gikan sa “Pagpangandam alang sa Langitnong Kaminyoon,” Liahona, Peb. 2006, 19; ug pakigpulong nga gihatag didto sa Unibersidad sa Brigham Young –Idaho niadtong Abril 7, 2007.
Sa dihang iyang nahinumduman ang lisud kaayo nga mga tuig nga iyang gigahin sa Harvard Business School, si Elder Robert D. Hales sa Korum sa Napulog Duha ka mga Apostoles miingon kabahin sa iyang graduate program, “Gibuhat gayud nako ang tanan kutob sa akong mahimo.” Sa iyang graduate program, mga ikatulo nga bahin sa mga estudyante ang—mibuhat labaw pa sa ilang kapasidad—napakyas ug nahagbong sa programa.
Niining panahona si Elder Hales midawat og calling nga mahimong presidente sa elders quorum. Siya nabalaka kabahin sa dugang nga gibug-aton gumikan niini nga calling nga moukupar sa iyang iskedyul. “Kadto mao ang usa sa daghang mga panahon sa akong kinabuhi nga ako wala mosugot diha-diha dayon,” siya mipasabut. “Miuli ako sa balay mideretso sa akong asawa ug miingon, ‘Siguro ako mahagbong sa eskwelahan kon akong dawaton kini nga calling.’”
Si Sister Hales mitubag, “Bob, mas maayo alang nga adunay aktibo nga naghupot sa priesthood kay sa usa ka lalaki kinsa nga nagkupot og master’s degree gikan sa Harvard.” Si Sister Hales dayon migakos kaniya ug midugang, “Atong buhaton kining duha.”
Sila miluhod sa pag-ampo ug dayon miadto sa trabaho. Ang nagsunod nga mga buwan malisud, apan sila nakahimo sa “pagbuhat niining duha.”
Pipila ka mga tuig ang milabay si Elder Hales na-busy sa trabaho isip presidente sa usa ka kompanya sa dihang siya gitawag sa pag-alagad isip bishop sa iyang ward. Napulo ka tuig human niana, niadtong 1975, samtang siya nagtrabaho isip corporate vice president sa usa ka dako nga korporasyon, siya gitawag nga mahimong assistant sa Korum sa Napulog Duha ka mga Apostoles. Siya wala maglisud sa pagdawat niini nga mga calling.
“Kini sayon lang,” siya miingon. “Ako nakahimo na niana nga desisyon sa batan-on pa ako.”
Si Elder Hales mitapos, “Alang kaninyong tanan kini nga pangutana moabut sa kinabuhi, ‘Kanus-a man ang panahon sa pagserbisyo?’ Ang labing maayo nga tubag nga akong mahatag kaninyo mao kini, ‘Kon kamo gitawag.’”
Paghulagway sa litrato pinaagi ni Steve Bunderson