“Buhata Ninyo Kini sa PAGHANDOM Kanako”
Unta kita mapuno sa Espiritu sa Ginoo samtang kita takus nga moambit sa sakrament.
Daghan nang mga tuig ang nanglabay isip usa ka batan-on nga misyonaryo sa Canada, ako naganahan sa usa ka linya gikan sa kasulatan nga maayo gayud nga pagkakulit sa usa ka hanas nga tigkulit sa atubangan sa lamesa sa sakrament sa branch sa Montreal: “Buhata ninyo kini sa paghandom kanako” (Lucas 22:19).
Nianang gamay nga branch, ang mga miyembro sa Aaronic Priesthood, sa sininaan ug linihokan, nagpahinumdom sa mga Santos sa mga instruksyon sa Manluluwas kabahin niining labing makahuluganon ug sagradong ordinansa. Kadtong gikulit nga mga pulong anaa gihapon sa akong hunahuna matag Dominggo samtang ang sakrament ipasa: “Buhata Ninyo Kini sa Paghandom Kanako.”
Isip mga tawo sa pakigsaad sa Ginoo, kita moabut og sayo mga pipila ka minutos sa dili pa ang atong mga miting as sakrament aron sa pagpakita og balaang pagtahud ug pagpamalandong niining sagradong ordinansa. Nianang mga higayona, samtang kita moadto sa simbahan aron sa pag-ambit, “kita mosunod sa tambag ni Pablo ngadto sa mga Santos sa Corinto. “Apan ipasusi sa matag-usa ka tawo ang iyang kaugalingon, ug unya pakan-a siya sa tinapay ug paimna siya sa kopa” (1 Mga Taga-Corinto 11:28).
Ang Pagpahigayon sa Sakrament
Ang sakrament nagpresentar sa maulaong sakripisyo ni Jesukristo. Kini usa ka balaan ug sagrado nga ordinansa nga ipahigayon sa hustong pamaagi pinaagi sa takus nga mga tighupot sa priesthood ug pagaambitan sa takus nga mga Santos sa Ulahing mga Adlaw. Ipakita ang pagkamainampingon diha sa ligdong nga kinaiya sa pagpangandam, pagpanalangin, ug pagpasa sa sakrament.
Si Pablo nagpahinumdom sa mga Santos nga ang sakrament gipahigayon sa labing importante nga kinatung-an sa panahon samtang si Jesus milingkod sa Kasaulogan sa Pagpalabay uban sa Iyang Napulog Duha ka mga Apostoles.
“Kay gikan sa Ginoo nadawat ko ang gikahatag ko usab kaninyo, nga ang Ginoong Jesus sa gabii sa pagbudhi kaniya mikuhag tinapay:
“Ug sa nakapasalamat na siya, kini iyang gipikaspikas, ug miingon: Kini mao ang akong lawas nga gipikaspikas alang kaninyo: buhata ninyo kini sa paghandom kanako.
“Sa maong paagi usab, tapus sa panihapon, ang kopa gikuha niya, nga nag-ingon, Kining kopa mao ang bag-ong pakigsaad diha sa akong dugo: buhata ninyo kini, sa matag-inom ninyo niini, sa paghandom kanako” (1 Mga Taga-Corinto 11:23–25).
Dinhi ang daang balaod, ang balaod ni Moises, natuman, sa diha nga ang bag-ong pakigsaad—gani mas taas nga balaod—gipahigayon. Ang ordinansa sa sakrament magpadayon hangtud sa Ikaduhang Pag-anhi ni Jesukristo, kon ang Manluluwas moambit sa sakrament uban sa Iyang mga Santos (tan-awa sa 1 Mga Taga-Corinto 11:26; D&P 27:5–14).
Ang karnero nga ihalad nga giandam alang sa Katapusang Panihapon usa ka importante nga bahin sa matag tuig nga kasaulogan sa Pagpalabay. Samtang ang Napulog Duha ka mga Apostoles nangaon, si Jesus, ang Kordero sa Dios Mismo sa Iyang Kaugalingon, mikuha og tinapay, mipanalangin niini, mipikas-pikas niini, ug dayon gihatag ngadto sa Iyang mga disipulo (tan-awa sa Mateo 26:26).
Sa Bag-ong Dapit sa Kalibutan, human nga gipakita ngadto sa mga Nephite ang mga agi sa mga lansang diha sa Iyang mga kamot ug mga tiil, ang nabanhaw nga Ginoo mipasiugda sa sakrament, nag-ingon:
“Ug kini kamo sa kanunay maninguha sa pagtuman, gani ingon nga Ako mibuhat, sa pagpikas-pikas sa pan ug pagpanalangin niini ug paghatag niini ngadto kaninyo.
“Ug kini kamo mobuhat agi og handumanan sa akong lawas, nga Ako mopakita kaninyo. Ug kini mao ang usa ka pagpamatuod ngadto sa Amahan nga kamo sa kanunay mahinumdom kanako. Ug kon kamo sa kanunay mohinumdom kanako, kamo makaangkon sa akong Espiritu uban kaninyo” (3 Nephi 18:6–7).
Sa kopa Siya miingon: “Ug kini kamo mobuhat sa kanunay ngadto kanila kinsa naghinulsol ug nagpabun-yag sa akong ngalan; ug kamo mobuhat niini agi og handumanan sa akong dugo, diin Ako mipaagas alang kaninyo, nga kamo unta makasaksi ngadto sa Amahan nga kamo sa kanunay makahinumdom kanako. Ug kon kamo sa kanunay mahinumdom kanako, kamo makaangkon sa akong Espiritu uban kaninyo” (3 Nephi 18:11).
Ang Manluluwas misulti usab ngadto sa mga Nephite, “Siya nga mokaon niini nga pan mokaon sa akong lawas ngadto sa iyang kalag; ug siya nga moinom niini nga bino moinom sa akong dugo ngadto sa iyang kalag; ug ang iyang kalag dili gayud gutumon ni uhawon, apan pagatagbawon.” Human nga ang katawhan nakaambit sa sakrament, ang rekord nagsulti kanato, “sila napuno sa Espiritu” (3 Nephi 20:8–9).
Pag-ambit nga Takus
Si Elder L. Tom Perry sa Korum sa Napulog Duha ka mga Apostoles mitudlo:
“Gikan pa gayud sa sinugdanan, sa wala pa buhata ang kalibutan, ang Dios mipahayag og plano diin mohatag siya og mga panalangin ngadto sa Iyang mga anak pinasikad sa ilang pagkamasulundon sa Iyang mga kasugoan. Hinoon Iyang nasabtan, nga kita mapaling usahay sa mga butang nga kalibutanon ug gikinahanglang pahinumduman kanunay sa atong mga pakigsaad ug sa Iyang mga saad. …
“Ang tuyo sa pagkalawat sa sakrament mao, sa pagkatinuod, ang pagbag-o sa atong mga pakigsaad ngadto sa Ginoo. …
“… Ang pagkalawat sa sakrament nga takus maghatag kanato og kahigayunan alang sa espirituhanong pagtubo. …
“… Kon mokalawat kita sa sakrament nga wala sa hunahuna, mawala kanato ang kahigayunan alang sa espirituhanong pagtubo.”1
Si Pablo mitudlo sa bag-o pang natukod nga Simbahan sa Corinto nga ang mga miyembro niini mahimong mga “maluya ug masakiton” ug nga “ang uban nangamatay” tungod kay sila miambit nga “dili takus, … walay pagkaila sa lawas sa Ginoo” (1 Mga Taga Corinto 11:29, 30). Ang Manluluwas mipahayag, “Kay kinsa kadto nga mokaon ug moinom sa akong lawas ug dugo nga dili takus siya makakaon ug makainom sa tunglo sa iyang kalag” (3 Nephi 18:29).
“Tan-awa, Ako ang Alpha ug Omega, gani si Jesukristo.
“Busa, himoa nga ang tanan nga mga tawo magbantay giunsa nila paggamit ang akong ngalan diha sa ilang mga ngabil” (D&P 63:60-61).
Kita ba mokaon ug moinom alang sa kaluwasan sa atong mga kalag? Kita ba mobiya gikan niining “sagradong tipik sa panahon diha sa balaanong dapit”2 nga napuno?
Pag-ambit sa Kanunay
Ang Ginoo miingon, “Kini angay nga ang simbahan magtigum kanunay aron sa pag-ambit” sa sakrament (D&P 20:75). Kon kini angay ngadto sa Ginoo, kini hilabihan gayud ka importante alang kanato!
Ang atong Manluluwas, sa paglimpyo sa sulod sa sudlanan, dili mobiya kanato nga haw-ang, maluya ug masakiton, apan Iya kitang pun-an sa Iyang gugma ug gahum sa pagbuntog sa pagsulay. Kadtong kinsa nga moduol kang Kristo mahimong sama ni Kristo samtang sila magbansay sa hugot nga pagtuo ngadto Kaniya ug moambit sa “tinapay sa kinabuhi” ug sa “buhi nga tubig” (Juan 4:10; 6:35).
Niadtong Abril 6, 1830, sa dihang ang unang mga Santos niini nga dispensasyon nagpundok aron sa pagtukod sa Simbahan, ilang giapil sa ilang unang opisyal nga miting ang ordinansa sa sakrament, sama sa gilatid sa Ginoo (tan-awa sa D&P 20:75–79).
Isip mga miyembro sa Simbahan, kita nakasabut nga ang atong personal nga kaluwasan mahimo lamang pinaagi sa atong Manluluwas, nga si Jesukristo. Kita nagpahayag ug nagpamatuod ngadto sa kalibutan nga Siya miula sa atong mga sala pinaagi sa hingpit nga pagkamasulundon ngadto sa kabubut-on sa Amahan. Kita makadawat sa labing mahinungdanon nga gasa sa Ginoo, ang kinabuhing dayon, pinaagi sa pagkamasulundon ngadto sa mga balaod ug sa mga ordinansa sa gipahiuli nga ebanghelyo.
Kita usab nakasabut nga sa pagtulun-an ni Amahang Lehi ngadto sa iyang anak nga si Jacob sa dihang siya miingon, “Unsa ka dako ang pagkamahinungdanon sa paghimo niini nga mga butang nga masayran ngadto sa mga lumulupyo sa yuta, aron sila masayud nga walay tawo nga makapuyo nga buhi atubangan sa Dios, gawas pinaagi sa mga maayo nga buhat, kalooy, ug grasya sa Balaang Mesiyas” (2 Nephi 2:8).
Unta kita makakaon ug makainom aron kita dili na gutumon ug uhawon sa espirituhanong paagi. Ug unta kita mapuno sa Espiritu sa Ginoo matag adlaw sa Igpapahulay samtang kita moambit isip paghinumdom Kaniya, aron kita mahimong tibuok ug mahiusa uban Kaniya.
Ang Katapusang Panihapon, pinaagi ni Simon Dewey
Si Kristo Nagpakita sa mga Nephite, pinaagi ni Simon Dewey, © 2003 IRI
Detalye gikan sa Ang Ikaduhang Pag-anhi, ni Grant Romney Clawson; paghulagway sa litrato pinaagi ni Marina Lukach