« Te here rahi e te faahiahia »
Na te faaroo mai to te tamarii te huru i roto i te here faahiahia o te Metua i te Ao ra e o Iesu Mesia, e « pihaehae » i te mau marei a Satane no te rava‘i-ore, no te hape rahi e no te faufaa-ore.
E poro te mau tamarii viivii-ore i roto i te faaroo e, « Te ti‘aturi nei matou i te Atua, te Metua Mure Ore, e i Ta’na Tamaiti ia Iesu Mesia, e i te Varua Maitai hoi ».1 Tera râ, i te tahi taime, aita te feia apî e te mau taata paari e ite i te reira mana o te parau ohie.
O Satane te « enemi o te parau ti‘a atoa »2 no reira ua tanu oia i te feaa no ni‘a i te natura o te Atuaraa e no to tatou auraa e o Ratou. Ua tohu Iesu Mesia e ia tae i te mau mahana hopea e riro te feia tei maitihia i te haavarehia.3 A feruri na i teie e toru hi‘oraa e mea nahea Lucifero ia « tuu i te mau here e te mau marei ia rave i te feia mo‘a o te Atua ra ».4
Te marei no te rava‘i-ore. Ua mana‘o te hoê vahine apî faaroo e aita ana e rave‘a no te farerei i te mau titauraa a vetahi ê. I te fare e i te fare haapiiraa, aita oia e aruehia area râ, e faaino pinepine-noa-hia oia. Ua parau te mau ve‘a tuiroo e eite oia i te mea nehenehe e aore râ, i te mea ite. I te mau mahana atoa e uiui teie tuahine parau ti‘a ia’na iho e vahine ti‘amâ anei oia i te here o te Metua i te Ao ra, i te tusia taraehara o te Faroo e aore râ, i te arata‘iraa tamau a te Varua.
Te marei o te hape rahi. Ua mana‘o te hoê misionare tuiroo aita ana e rave‘a no te farerei i te mau titauraa a te Atua. I roto i to’na feruriraa, ua mana‘o teie misionare ti‘amâ e ua tuu te Metua i te Ao ra i te hoê taumu no te parau ti‘a te ore e ti‘a ia faaorehia, te hoê Faaora e nehenehe e faaore i te mau ofatiraa ture a vetahi eiaha râ i ta teie iho misionare, e te hoê Varua Maitai o te ore e hinaaro i te apee i te hoê taata ti‘amâ-ore.
Te marei no te hape faufaa-ore. Te hoê vahine afa paari te hoê metua itoito, te hoê hoa maitai, e tavini faaroo i roto i te Ekalesia, e te hoê vahine rave oro‘a tamau. Area i roto i to’na aau, aita e nehenehe i teie tuahine ia faaore ia’na i te mau hara o ta’na i rave, rave rahi mau matahiti i mairi e o ta’na i haere e tatarahapa e o tei faaafarohia e te feia faatere o te autahu‘araa. Ua feaa oia i te mea eita roa te Fatu e farii i to’na oraraa e ua mo‘e te ti‘aturiraa no te oraraa mure ore i pihai iho i te Metua i te Ao ra.
Mai te mea te vai nei to outou mau feruriraa e mau mana‘o mai to teie mau Feia Mo‘a, te ani nei au ia outou ia faariro ia outou mai te ho‘e tamarii rii iti e ia ite faahou « i te here rahi e te faahiahia o ta te Metua e ta te Tamaiti a te Atua, no te Faaoraraa i to te ao nei ».5 Te faaroo mai to te tamarii te huru i roto i te here faahiahia o te Metua i te Ao ra e o Iesu Mesia no te « pihaehae »6 i te mau marei no te rava‘i-ore, no te hape rahi e no te faufaa-ore.
Te haapii mai nei te Maseli, « O to’na ra mana‘o i roto i to’na aau, o oia iho ïa ».7 E horo‘a’tu vau i te hoê mana‘o tauturu – ei faahauraa i te mau pure tuutuu-ore, te tai‘oraa i te papa‘iraa mo‘a, e te haereraa i te Pureraa e i te hiero – e pae tauiraa i to outou mau mana‘o e te aau ia ite atu â i te here rahi o te Atua.
A tahi, ia farii outou e e tamarii faahiahia outou na te hoê Metua i te Ra‘i ra. E himene ta tatou mau tamarii ma te ti‘aturi e, « E tamarii au na te Atua ra, e ua tono mai oia ia‘u i ô nei ».8 E ite te mau tamarii i te mea e peneia‘e ua mo‘ehia ia outou. E mau tamaroa e e mau tamahine outou na te Metua i te Ao ra, hamanihia « ma to’na ihora huru ».9 e e faufaa rahi roa – i horo‘a’i Iesu Mesia i To’na ora no outou.
E Metua aroha te Atua e e here mure ore to’na noa’tu ta outou mau hape. Na te reo o Satane e parau ia outou e aita to outou e faufaa. Taa ê atu i te reira, e faaite te Varua Maitai ia outou e « te oto e au i te Atua »10 i roto i te tatarahapa o te hoê ïa mea o te faî ia outou i te ti‘aturi i te tauiraa mau.
Ia mana‘o outou e e mea faufaa ore outou, « A haamana‘o e e faufaa rahi to te mau varua taata i to te Atua hi‘oraa mai ».11 Te haapaeraa i te feruri pinepine e aore râ, te parauraa i te mau parau faati‘a-ore no ni‘a ia outou iho – te vaira te hoê taa-ê-raa maramarama mau i rotopu i te haehaa e te faahaehaa. A imi e a faaohipa i ta outou mau taleni i te faaearaa i ni‘a i to outou paruparu.
A piti, a tuu i ta outou mau hopoi‘a i ni‘a ia Iesu Mesia. Ia ite outou e ua faateimahahia outou e te mau titauraa e te mau tamataraa, eiaha e aro e o outou ana‘e. A pee i te hi‘oraa o te mau tamarii rii, e a tuu i te turi i raro.
Ua faaue mai Iesu Mesia ia tatou e, « A hi‘o mai ia‘u nai i to mau mana‘o atoa na; eiaha e feaa, eiaha e măta‘u ».12 E faaite te feaa, te ri‘ari‘a e te horuhoru e ua rave tatou i ta tatou mau hopoi‘a e to tatou mau taia i ni‘a ia tatou iho. Ia tae mai te mau ma‘i pee o te rava‘i ore na roto i te mau mana‘o a parau ma te papû e, « E ti‘a ia‘u te mau mea atoa nei i te Mesia tei tauturu mai ia‘u ra ».13 E « ia rave [outou] i te mau mea atoa i roto i to [outou] mana ia rave ma te oaoa »,14 e nehenehe outou e faaea ma te papû e e rave faaoti te Fatu i te toe o te mau mea’toa e e maitai te mau mea’toa.
Ua fafau mai te Faaora e, « E haere mai outou ia‘u nei, e te feia atoa i haa rahi, e tei teiaha i te hopoia, e na‘u outou faaora ».15 E ia « tuu [outou] i ta [outou] hopoia ia Iehova ra »16 e ite ïa outou i te hau o te Varua.17
A toru, a faaore outou i ta outou mau hara e mau hape. Aita te Metua i te Ao ra e titau ia otuout ia riro ei mea maitai roa i roto i teie oraraa. Ua ite Oia e hape Ta’na mau tamarii a haapii ai ratou i te mau iteraa rau o te tahuti nei. Area râ, « I aroha mai te Atua i to te ao… »18 e ua horo‘a mai Ta’na faanahoraa no te oaoa i te aroha o te Faaora.
Ua parau Iesu e, « E faaore au, o te Fatu, i te hara a ratou ta‘u i hinaaro i te faaore atu, ia outou râ ua titauhia’tu ra outou ia faaore i te hapa a te taata atoa ».19 A haamata na ni‘a ia outou iho, e a faaore i ta vetahi ê. Mai te mea eita te Atua e haamana‘o faahou i ta tatou mau hara tei tatarahapahia,20 no te aha ïa eiaha tatou ? A haamarirau i te oreraa e haamau‘a i te taime e te puai no muri nei.
No te faaoreraa i ta outou iho hapa, e i ta vetahi ê, e mea ti‘a ia ti‘aturi outou i te Taraehara a Iesu Mesia. Ua pure te peropheta Zenoka e, « Ua riri oe, e te Fatu, i teie nei feia, no te mea aita i au ia ratou ia ite i to oe ra aroha, ta oe i tuu mai ia ratou no ta oe ra Tamaiti ».21 E oto roa to tatou Metua i te Ao ra ia ta‘otia ana‘e tatou i te mana o te tusia taraehara a Ta’na Tamaiti. A faaohipa’i outou i te faaroo i roto ia Iesu Mesia, e « horoi-ê-hia » ta outou mau hape.22 Mai te mea e toe noa mai â te hape i muri mai i te hoê tatarahaparaa mau, a ti‘aturi i to outou feia faatere o te autahu‘araa ia parau mai ratou e, ua mâ outou.23
A maha, a paturu i te ti‘aturi i te ora mure ore. Mai te mea e mana‘o outou eita ta outou mau hara tahito, to outou mau hape e ta outou mau opuaraa faufa-ore e haafifi ia outou i te fariiraa i te mau haamaitairaa atao a te Atua, a feruri i te mau iteraa o Alama Metua. Ma te faahoi i roto i to’na mau matahiti o to’na apîraa ei tahu‘a arioi no te Arii ino o Noa, ua faati‘a Alama e, « Ua fifi atoa vau, o vau ihora, i te tahi marei, i rave ai au i te mau mea faufau e rave rahi i mua i te aro o te Fatu ra, e ua tatarahapa hoi au ma te mauiui rahi ra ».24 Area te tatarahapa a Alama ua hope roa ïa e te Taraehara a te Mesia e mea mure ore ïa i riro mai ai Alama ei peropheta e ua fafauhia ia’na te ora mure ore.25 A faaitoito ai outou ia haapa‘o e ia tatarahapa, e nehenehe atoa outou e farii i te hoê vahi i roto i te basileia tiretiera na roto i te Taraehara e i te aroha o Iesu Mesia.26
A pae, te imiraa i te oaoa i te mau mahana atoa. E itehia te tumu no te oaoa i roto i te taviniraa, ia ohipa outou i te taviniraa ia vetahi ê, e iti mai ïa to outou oto i ta outou mau hara. Ua haapii mai te Faaora ma te paari e « O tei hinaaro hoi i te tapea i to’na ora, e ere ïa i te ora; e o tei tia ia’na ite tuu i to’na ora ia‘u e te evanelia nei, e ora ïa to’na ».27
E ite outou i te oaoa hau a‘e i roto i te oraraa e i te faaore i te aau taia a tupu ai outou i te paari e ia mono i te huru tamarii e te taata mana‘o maitai. Ua riro te mana‘o maitai ei viretu o te faati‘a ia tatou ia ite i te rima here o te Atua i roto i te mau faahu‘ahu‘araa o to tatou oraraa. Ua a‘o mai te hoê himene herehia e tatou e, « Tai‘o mai na i to mau maitai ; a hi‘o eaha ta te Atua i rave ».28
Te faaite papû nei au no te Metua i te Ao ra, o te imi mai nei na roto i To’ na here rahi e te faahiahia i Ta’ na mau tamarii. Te faaite papû nei au no « Iesu Mesia, no tei puai ia faaora »29 ia tatou i ta tatou mau hara rava‘i-ore e te mau hape. Te faaite papû nei au no te Varua Maitai, o te apee noa i te varua ti‘a-ore inaha râ o tei tatarahapa. Ia outou na e te Feia Mo‘a ti‘amâ o te aro nei i te mau marei a te diabolo o te mau mahana hopea nei,30 ia haamaitai noa mai te Atua ia outou « e ia haamâmâ te Atua i to outou hopoia i reira ra, na roto i te oaoa i ta’na ra Tamaiti ».31 Na roto i te i‘oa mo‘a o Iesu Mesia, amene.