Ua ti‘aturi Oia ia tatou !
E ti‘a’tu tatou tata‘itahi i mua i te Atua i te hoê mahana no te horo‘a’tu i te hoê faataaraa no ta tatou taviniraa autahu‘araa.
Tau matahiti i mairi a‘e nei, ua piihia te tuahine Ellis e o vau nei ia peresideni i ni‘a i te Misioni Apatoerau no Sao Paulo i Paratira. Te auraa no teie piiraa, maori râ, e reva ê atu ïa matou no te roaraa e toru matahiti. No to maua utuafare e ta maua imiraa moni, ua faauruhia matou ia tape‘a noa i to matou fare e ta matou imiraa moni i Houston eiaha e hoo.
A faaineine ai maua i ta maua mau ohipa, titauhia ia maua ia farerei i to maua paruru no te hamani i « te hoê parau haamana i o te notera ». Na teie parau e horo‘a i te mana i te hoê atu taata ia ohipa i roto i to maua i‘oa. E nehenehe ïa i teie taata ia hoo i to maua fare e aore râ, i ta maua mau tauhaa, ia ani i te moni i roto i to maua i‘oa, ia haamau‘a i ta maua moni e aore râ, ia hoo i ta maua ohipa imiraa moni ! Te mana‘o no te horo‘a i teie mana i te hoê taata e mea măta‘u ïa.
Opua ihora maua i te horo‘a i teie parau haamana i te hoê taata o ta maua i ti‘aturi maitai, to maua hoa mau, o tei faaohipa maitai i teie mana. E rave oia i te ohipa mai te mea ra o maua iho ïa.
E te mau taea‘e, a feruri na i te mea o ta te Fatu i horo‘a mai na tatou – To’na mana e To’na tura ! Te tura e te mana no te ohipa No’na i roto i te mau mea’toa o Ta’na ra ohipa !
Na roto i teie mana o te autahu‘araa, e mai te mea e nehenehe, te parau faati‘a a te feia e mau ra i te mau taviri e au, e nehenehe ïa tatou e rave i te mau oro‘a faaora na roto i To’na i‘oa : e bapetizo no te faaoreraa o te mau hara, e haamau e e horo‘a i te Varua Maitai, e horo‘a i te autahu‘araa e te faatoro‘araa ia vetahi i roto i te mau toro‘a o te autahu‘araa e te raveraa i te mau oro‘a o te hiero. Na roto i To’na i‘oa e nehenehe tatou e faatere i Ta’na Ekalesia. Na roto i To’na i‘oa e nehenehe tatou e haamaitai, e hahaere e e faaora i te ma‘i.
Aue ïa ti‘aturiraa o ta te Fatu i tuu i ni‘a ia tatou ! A feruri na i te reira, e te mau taea‘e, ua ti‘aturi oia ia tatou !
Hou tatou a farii ai i te autahu‘araa, ua faaineinehia na e ua tamatahia na tatou. Ua faaohipa na tatou i te faaroo i roto ia Iesu Mesia, ua tatarahapa, ua bapetizohia, e ua farii i te horo‘a o te Varua Maitai. E mea huru ê te faito o te iteraa rau o ta tatou i hopoi mai i roto i to tatou faatoro‘araa. Area te faatereraa hanahana ra hoê â ïa. Ua purehia no tatou e ua uiuihia e te feia o te faaohipa nei i te mau taviri o te autahu‘araa. Ua paturuhia tatou na roto i te maitiraa a te mau melo o te Ekalesia o ta tatou paroita. E ua faatoro‘ahia e te hoê e mau ra i te mana e o tei farii i te parau faati‘a no te raveraa i te reira.
E mea mata ara te Fatu i To’na autahu‘araa. Te faaohiparaa i To’na tura e i To’na mana o te hoê ïa ti‘aturiraa mo‘a te reira.
E mea popou i te manuïaraa i te ti‘aturi a te Atua ! Ua ti‘aturi Oia ia outou ! Ua ti‘aturi Oia ia‘u !
I to tatou fariiraa i te autahu‘araa, ua farii tatou i te reira na roto i te fafauraa. Te hoê fafauraa o te hoê ïa parau faaau apipiti. Ua fafau Oia i te haamaitai ia tatou na roto i te tahi mau titauraa. E fafau ïa tatou i te rave faaoti i teie mau titauraa. A na reira ai tatou, e tape‘a tamau te Fatu i Ta’na parau e e horo‘a mai na tatou te haamaitairaa. E mea pinepine râ Oia i te horo‘a rahi mai i tei faaauhia. E aau horo‘a mau To’na.
Ia farii tatou i te Autahu‘araa a Melehizedeka, e farii tatou i te mea i parauhia te « tăpŭraa e te fafauraa » o te autahu‘araa. E fafau atu ïa tatou i te Fatu e piti na mea e e na reira atoa mai ïa Oia. E fafau tatou « ia vai faaroo noa no te farii i teie na autahu‘araa e piti » e ia vai ti‘amâ noa no te « faahanahana i to [tatou] piiraa ». E fafau mai ïa Oia e e « haamo‘a mai Oia ia tatou i te Varua ». I muri mai i to tatou vai faaroo-noa-raa i roto i te mau mea’toa e tae noa’tu i te hopea, e fafau mai ïa Oia e « te mau mea atoa na to‘u Metua ra, e hopea roa ïa i te horo‘ahia na [tatou] » (a hi‘o PH&PF 84:33-41).
E haamaitai te Fatu i Ta’na mau tamarii na roto i te taviniraa a te autahu‘araa. No te tautururaa ia tatou ia manuïa na roto i te horo‘araa i te taviniraa autahu‘araa, e horo‘a mai ïa Oia i te mau arata‘iraa e te mau faaararaa. Ua na reira Oia i roto i te mau papa‘iraa mo‘a, e e tamau noa mai â Oia i te arata‘i ia tatou na roto i to tatou mau taata faatere e na roto i te mau muhumuhu a te Varua Maitai.
Rave rahi mau irava i roto i te mau papa‘iraa mo‘a no te arata‘iraa e no te faaararaa o te autahu‘araa. A tahi tei roto ïa i te tuhaa 121 o te Parau Haapiiraa e te mau Parau Fafau. I roto i taua mau irava ra, ua haapii mai te Fatu ia tatou e, e faaohipahia te autahu‘araa na roto noa i te parau-ti‘a. E mea ti‘a ia tatou ia aupuru ia vetahi ê na roto i te taparuraa, te faaoroma‘i, e te mărû. Te faahaamana‘o maira Oia ia tatou i te faufaa o te aroha e o te peu maitai na roto i te faahoaraa o te Varua Maitai.
Te faaara atoa maira taua tuhaa ra ia tatou no taua mau ti‘araa e no taua mau ohipa ra e na te reira e faatupu ia ere tatou i te tura o to tatou autahu‘araa. Mai te mea e « titau tatou i te mau faaturaraa o te taata », te tamataraa i te « tapo‘i i ta tatou mau hara », te tamataraa i te « haamauruuru i to tatou teoteo » e aore râ, « to tatou hoi opuaraa hahavai ra » e aore râ, ia faatere e aore râ, ia hau e aore râ, « ia haavî » ia vetahi ê, e ere ïa tatou i te tura o te autahu‘araa (a hi‘o te ii vv. 35-37). Mai te mea te na reira ra tatou, e riro ïa tatou ei mau orometua haavare. E haapae ïa tatou i te taviniraa a te Atua e e faaŏ atu ïa tatou i roto i te ohipa a Satane.
E mea ti‘a ia tai‘o tamau te feia o tei mau i te autahu‘araa i Te Parau Haapiiraa e te Mau Parau Fafau Tuhaa 121. E mea ohie roa ia ite e, no te aha to tatou mau peropheta no teie anotau i haapapû mai ai i te titauraa no tatou ia tape‘a maite i to tatou ti‘amâraa e ua horo‘a mai ia tatou buka iti ra, No te Puai o te Feia Apî ei arata‘i no te tauturu ia tatou.
Hoê tumu e titauhia ai ia tatou ia vai ti‘amâ noa no te mea ïa aita tatou i ite i te taime tatou e piihia’i ia faaohipa i te autahu‘araa.
I te rae‘a-raa-hia to ta maua Matthew e pae matahiti, ua topa mai oia na ni‘a i te hoê iri ou‘araa i roto i te vahi hopuraa pape i o to matou hoa. Ua ta‘iri to’na upoo i ni‘a i te tima e ua parari to’na ivi upoo e ua fifi to’na roro. Ua faahorohia oia na ni‘a i te hoê manureva tautau i te Fare Ma‘i no Houston ia rapaauhia. Ua hinaaro roa vau i te tauturu a te autahu‘araa i te reira iho taime. E mea ti‘amâ to matou orometua hahaere e to matou taata faatere no te autahu‘araa e ua ineine no taua taime ra. Ua tauturu raua ia‘u ia horo‘a i te hoê haamaitairaa ia Matthew, e ua ora roa.
E mea ti‘a ia vai ineine noa tatou i te mau taime atoa. Mai ta te Scout e parau ra e, « Ia vai ineine noa ».
E mea papû te hinaaro nei tatou ia ore e riro ei orometua haavare. Area râ, ua faaara mai te Aposetolo Paulo i te hoê atu ati. Ua faaara mai oia e ia tae i to tatou anotau te vaira « te mau taata hoho‘a paieti, o te puai râ o te reira ra, ua hunahia ïa ia ratou » (2 Timoteo 3:5).
Tatou tei mau i te autahu‘araa nahea tatou ia farii i te hi‘oraa paieti e e huna i te puai o te reira ? E nehenehe anei tatou e mau i te autahu‘araa eiaha râ e faaohipa i te reira ? E hahaere noa i te mau utuafare eiaha râ e haapii ? E pure no vetahi i roto i te hoê oro‘a e aore râ, faatoro‘araa, aita râ e haamaitai ia ratou ? Te ohipa ra anei te Fatu na roto i te rave‘a maitai roa o ta tatou i ite e mai te mea aita te taparuraa ia ite i To’na hinaaro e i Ta’na mau rave‘a ?
A haamana‘o i te a‘o a te Fatu ia tatou na roto ia Nephi e « eiaha outou e rave i te hoê mea i te Fatu maori râ e mata na [tatou] i te pure » (2 Nephi 32:9).
Tau matahiti i mairi a‘e nei, ua piihia vau ia tavini ei tauturu i roto i te peresideniraa tĭtĭ no Texas Apatoerau i Houston. E te tai‘o ra vau i te parabole o te mau taleni. Te haamana‘o ra outou i te reira aamu. Ua opua te hoê taata e tere i te atea, ua opere oia i to’na mau maitai i ta’na mau tavini. Ua farii hoê e pae taleni, te tahi e piti e te hopea ra hoê ïa. I to’na hoiraa mai, ua ani oia i te hoê faaafaroraa.
Te tavini o tei farii e pae ra ua faaho‘i mai ïa hoê ahuru, oia’toa tei farii e piti ua faaho‘i mai ïa e maha, e ua parauhia mai ïa e e na tavini maitai e te haavare ore. Te mea râ o tei tape‘a i to‘u feruriraa o te tavini ïa o tei farii hoê e o tei haapa‘o maitai i te reira e ua faaho‘i mai ïa i to’na ra fatu. Ua hiti ma‘ue au na roto i te pahono a te fatu : « E teie nei tavini ino e te faatau… a rave mai i ta’na taleni… a huri atu i taua tavini faufaa ore nei i roto i te pouri i rapae au ra ». (A hi‘o Mataio 25:14-30.)
E mea huru etaeta teie pahonoraa i te hoê taata o tei hinaaro i te atuatu maitai i te mea tei horo‘ahia ia’na. Tera râ, ua haapii mai te Varua ia‘u i teie parau mau e – e titau mai te Fatu i te hoê taa ê raa ! Ua ite roa vau i taua taime ra e ti‘a’tu tatou tata‘itahi i mua i te Atua i te hoê mahana ma te horo‘a’tu i te hoê faataaraa no ta tatou taviniraa e te ti‘aauraa autahu‘araa. Ua faaite anei tatou i te hoê taa ê raa ? No‘u iho nei, ua hau atu anei te maitai o to‘u pii-raa-hia i roto i te tĭtĭ no Texas Apatoerau o Houston i to‘u haamauruuru-raa-hia ?
Auaa, ua haapii te Fatu ia tatou nahea ia faahotu, nahea ia faaite i te hoê taa ê raa. « O tei ati mai ia‘u ra, e o tei ati atu vau ia’na ra, oia te hotu rahi » (Ioane 15:5). Mai te mea e faaohipa tatou i To’na autahu‘araa na roto i Ta’na rave‘a, ma te pee i te arata‘iraa o ta tatou e farii mai o mai i Ta’na mau tavini e i To’na Varua, e riro ïa tatou ei mau tavini maitai e te haavare ore !
E au mau taea‘e here o te autahu‘araa, te ora nei te Fatu o Iesu Mesia, to tatou Faaora ! Ua ite e ua here Oia ia tatou. Ua tuu Oia i To’na ti‘aturiraa i ni‘a ia tatou na roto i te horo‘araa mai i te tura e i te mana oTo’na autahu‘araa ia tatou. O vau ïa te hoê ite no taua parau mau ra. Ia faaohipa tatou i teie nei puai e te mana no te rave i To’na hinaaro na roto i Ta’na rave‘a o ta‘u ïa pure.
A faaroo ai tatou i te peresideni Hinckley, te peresideni Monson e te peresideni Faust, te faaite nei au i to‘u iteraa papû e, e peropheta ana‘e teie mau taata tata‘itahi, e hi‘o e e heheu parau. Te hinaaro nei au i te faaroo i ta ratou a‘o. Na roto i te i‘oa o Iesu Mesia, amene.