Te parau tumu no te mau faaoaoaraa na te feia apî no te matahiti 2007

I te matahiti 2006 ua opere haere te feia apî o te Ekalesia i ta ratou mau taleni e to ratou mau iteraa papû a faatumu ai ratou i ta ratou mau ohiparaa i ni‘a i te parau tumu « A ti‘a mai na i ni‘a e ia anaana mai na, ia riro to outou maramarama ei hi‘oraa no te mau nunaa » (PH&PF 115:5).

I te matahiti 2007, ua faatumuhia te parau tai‘o i ni‘a i te puai pae varua o te taata iho. No roto mai te parau tumu apî i te hoê heheuraa i te peropheta Iosepha Semita i roto i to’na mau hora hepohepo i roto i te fare auri o Libereti : « Ia faa‘una‘una noa te tai‘ata ore i to outou mau feruriraa i te mau taime atoa; ei reira to outou ti‘aturiraa e puai roa ai i mua i te aro no te Atua » (PH&PF 121:45).

Ei apitiraa i teie parau, ua parau na peresideniraa no te Feia Apî Tamahine e no te Feia Apî Tamaroa i te feia apî o te ‘aro nei i roto i te papu ore e te feaa e roaa te ti‘aturiraa ia ratou i roto i teie parau tumu apî. « Te ti‘aturiraa ‘i mua i te aro o te Atua’, o te ti‘aturiraa mau ïa », ta ratou ïa i parau. « Mai te mea e ti‘aturi outou i mua i te aro o te Atua, e nehenehe outou e ti‘aturi i mua i te aro o te tahi noa’tu taata ».

No te mea e « hi‘o te Fatu i te aau » (1 Samuela 16:7), te feia apî e mau mana‘o viretu to ratou e ti‘aturi ïa e e farii te Fatu ia ratou e e ora ïa i te hoê oraraa maitai a‘e. Te faaitoito mai nei te mau peresideniraa o te Feia Apî Tamahine e te Feia Apî Tamaroa i te feia apî ia imi i te arata‘iraa no te oraraa i te hoê oraraa peu maitai i roto i te buka No te Puai o te Feia Apî (no. 36550 895).

Nahea te feia apî ia faa‘una‘una i to ratou mau feruriraa i te tai‘ata ore ? Ua parau te peresideni James E. Faust, tauturu piti i roto i te Peresideniraa Matamua e, « e rave rahi mau faataaraa no te parau viretu, mai te maitai roa i te pae morare, te ohipa e te feruriraa maitai, te maitai i te pae no te huru e aore râ, i te pae no te viivii-ore » (« How Near to the Angels », Ensign, Me 1998, 95).

« Rave rahi feia o te ore nei e maramarama i te auraa no te parau viretu », o te parau ïa a te peresideni Faust. « Te parau ra vetahi e to’na auraa ra o te vai viivii-ore-raa ïa e aore râ, ia vai mâ noa area râ, viretu to’na auraa mau ra ua amui tahi ïa i te mau parau faahiahia atoa o te parau ti‘a o te tauturu nei ia tatou ia hamani i to tatou huru » (« Te mau faufaa morare o te mau tamahine parau ti‘a na te Atua », Liahona e Ensign, Me 2003, 108).

Ua tatara Elder Joseph B. Wirthlin no te Pŭpŭ no te Tino Ahuru Ma Piti Aposetolo e nahea te parau-ti‘a ia haaputapû i to tatou ti‘aturiraa: « Ia rave ana‘e tatou i te maitai, eita ïa tatou e haama e ia pipiri i te imiraa i te arata‘iraa hanahana. E ite tatou e, e pahono mai te Fatu i ta tatou mau pure e e tauturu ia tatou i to tatou mau hinaaro » (« Personal Integrity », Ensign, Me 1990, 33).

E hopoi mai te oraraa i te hoê oraraa viretu i te auhoaraa o te Varua Maitai, o te hopoi mai i te faaûruraa mai te Fatu mai e i te ti‘aturiraa i mua i To’na ra aro.

I te 1 no te ava‘e Atete 2006, i roto i te hoê parau faaite no te parau tumu no te matahiti 2007, ua faaitoito te Peresideniraa Matamua i te feia faatere no te Feia Apî Tamaroa e te Feia Apî Tamahine ia haapapû i teie parau tumu i roto i te pureraa haamataraa o te mau pô faaoaoaraa e i te tahi atu mau ohiparaa a te feia apî.

Te tahi atu mau matereria haapiiraa no ni‘a i teie parau tumu tei roto ïa i te Liahona e i te New Era o te ava‘e Tenuare 2007.