E mea maitai te ‘ea o te peresideni Hinckley e to te Ekalesia
I roto i te 176raa o te amuiraa rahi afa matahiti, ua faaite te peresideni Gordon B. Hinckley e e mea maitai oia e te Ekalesia atoa.
« E mea maitai au », o te parau ïa a te peropheta, 96 matahiti. « E mea maitai to‘u ‘ea ».
Ua parau te peresideni Hinckley e ua riro to’na mau taote e te faaoraraa o to’na tapu o te ava‘e Tenuare ra mai te « semeio » ra te huru. I te mau mahana matamua no te ava‘e Novema nei, e riro ïa te peresideni Hinckley ei peresideni paari roa‘e i roto i te aamu no te Ekalesia tei faati‘a-faahou-hia. Ua pohe te peresideni David O. McKay (1873-1970) i te 96 raa o to’na matahiti e 132 mahana. Ua faahanahana te peresideni Hinckley i to’na 96raa matahiti i te 23 no tiunu nei.
Ua tae mai 100.000 taata i te mau putuputuraa o te amuiraa i roto i te pû amuiraa i Roto Miti, e milioni feia i te ao atoa nei tei mata‘ita‘i i te reira. Ua iritihia te mau a‘oraa o teie amuiraa i roto e 85 reo e te reo apî mai i iritihia oia te reo Turetia [Turquie].
I roto i te putuputuraa o te po‘ipo‘i mahana maa, ua faaite te peresideni Hinckley i te haereraa i mua o te Ekalesia. « E nehenehe noa vau e parau atu e, ua haamaitai rahi mai te Fatu i Ta’na Ekalesia », o te parau ïa a te peresideni Hinckley. « Ta tatou râ hopoi‘a o te imiraa ïa i te mau rave‘a atoa ia tere teie ohipa i mua ».
No haamo‘a-noa-hia’tura te 123raa e te 124raa o te hiero a te Ekalesia i Sacramento, Kalifonia e i Helsinki i te fenua Finelani. Ua faaite te peresideni Hinckley e te fatu nei te Ekalesia e 6.066 reni faariiraa rave‘a pee‘utari i na fenua e 83, ia faaauhia 300 noa i te matahiti 1982 ra.
Ua faaite atoa te peresideni Hinckley e te faaapîhia nei te Fare Menemene o Roto Miti e te mau tauhaa e faaohipahia nei e te Pŭpŭ Himene o te Fare Menemene i Temple Square no te mau haapurororaa o te mau hepetoma no te Pehe e te A‘oraa Parau. E iriti-faahou-hia teie fare i te tau no te faatupuraa raau o te matahiti 2007. Te haapararehia nei te pŭpŭ himene mai roto atu i te pû amuiraa i teie taime no te tata‘iraa.
I roto i te putuputuraa o te mahana maa avatea, ua haamauruuruhia e va‘u mau melo no te Pŭpŭ Piti no te Hitu Ahuru ei mau hui mana faatere rahi rave tamau no te Ekalesia. Teie te mau melo tei haamauruuruhia o Elders Ronald T. halverson, Dale E. Miller, H. Bryan Richards, Donald L. Staheli, David R. Stone, H. Bruce Stucki, Robert J. Whetten e o Richard H. Winkel.
Taa ê noa’tu te reira, ua piihia o Erich W. Kopischke, 49 matahiti no Francfort no te fenua Helemani ei hitu ahuru area. Ua haamauruuru-atoa-hia e toru hitu ahuru area i te mahana maa ra o: Elders Cesar A. Milder, Hyae-Kee-Min, e o Masayuki Nakano.
Ua riro te matahiti 2006 ei tapa‘o no te 150raa o te matahiti no te taeraa mai te mau pereoo huti rima o te mau pionie i te peho no Roto Miti.
Teie te parau a te peresideni Hinckley no ni‘a i teie mau pionie « Ua riro to ratou faaroo ei faufaa tupuna na tatou. Ua riro to ratou faaroo ei faahaamana‘oraa ia tatou i te hoo o ta ratou i aufau no te turoto [confort] o ta tatou e popou nei ». E ei opaniraa teie ta’na i parau : « I roto i teie ohipa rahi, titauhia ia tatou te faaroo rahi. Mai te mea aita te reira, e mau te ohipa. E na roto atu i te reira ra, eita ïa te hoê taata e nehenehe e tape‘a i te haereraa o te [Ekalesia] i mua ».