Tatou Te Vaavaai Atu ia Keriso
E pei o le fetu o le pole i matu,…o loo i ai le Faaola o le lalolagi, le Alo o le Atua, e mautu ma mautinoa o le taula lea o o tatou ola tino ola pea.
O’u uso e ma tuafafine pele, ou te fia faaopoopo atu foi lo’u agaga talisapaia loloto mo le tautua maoae a Tuafafine Smoot, Tuafafine Jensen, Tuafafine Dew, ma lo latou au ofisa. Sa latou tautua lelei ma le faamaoni a’ia’i i lenei faalapotopotoga maoae a tamaitai. O se sosaiete ofoofogia, ua oo atu le malosi i le 4,900,000. Ou te manatu e leai lava se mea e faatusalia i ai i le lalolagi atoa, ma ua matua anoanoai soifua o tamaitai ua faaleleia ai i le lalolagi atoa. Faafetai tele tuafafine pele, mo mea na outou faia. E faafeiloai atu foi ia Tuafafine Parkin ma ou fesoasoani, faapea foi le au ofisa o le a outou filifilia.
Ua tatou oo mai nei i le faaiuga o lenei konafesi maoae. Sa tatou olioli i se taumafataga matagofie i le laoai a le Alii. Ua uma ona aoaoina i tatou i Ona ala ma Ana faatulagaga.
Ua tatau ona fai si lelei atu o i tatou taitoatasi nai lo le mea sa i ai, ona o lenei aafiaga tamaoaiga. A leai, ua matua le aoga atoa lava la tatou mafutaga.
A maea la’u tautalaga ona lagiina lea e le aufaipese o le,
“Iesu, ia e faatasi mai,
Ua te’a nei le ao;
Ua afiafi le aso,
Ua lata mai le po.
Maliu mai lo’u loto nei,
Ma lo’u apitaga.
Iesu ia e faatasi mai;
Ua oo mai le po.
(“Iesu, Se’i e Faatasi Mai,” Viiga nu. 93).
Ua aotele ai [i lea pese] lagona o o tatou loto pe a tatou toe taliu atu i o tatou aiga.
Ia mafuta mai le Agaga o lo tatou Alii ma i tatou ma ia tumau ai ma i tatou. Tatou te le ma iloa po o a ni mea o faatalitali mai. Tatou te le ma iloa po o a mea e tutupu a taeao. O loo outou soifua ma tatou ola i se lalolagi e le o mautinoa. O nisi, o le a tele mea e ausia. O nisi, o le le fiafia. O nisi foi, o le tele lava o le fiafia, ma le olioli, o le soifua maloloina, ma le ola tauagafau. O nisi, atonu e mama’i, ma fetaiai ma le faanoanoa. Tatou te le ma iloa. Ae tasi le mea tatou te iloa. E pei o le fetu o le pole i matu, tusa lava pe o a mea e tutupu i le lumanai, ae o loo i ai le Faaola o le lalolagi, le Alo o le Atua, e mautu ma mautinoa o le taula lea o o tatou ola tino ola pea. O Ia o le papa o lo tatou faaolataga, o lo tatou malosi, o lo tatou fesoasoani, o le autu foi o lo tatou faatuatuaga.
Po o le fiafia po o le faanoanoa, tatou te vaavaai atu ia te Ia, ma o loo i ai o Ia iina e faamautinoa ma fesoasoani mai ia te i tatou.
O Ia o le autu tupito tatou te tapuai i ai. O Ia o le Alo o le Atua soifua, o le Ulumatua a lo tatou Tama, o le Alo Pele e Toatasi i le tino, o le na tuua le afioaga mamalu i luga, ina ia soifua mai ai o se tagata i la le tino, i tulaga e aupito sili ona maualalo. Na Ia fetalai i le tuulafoaiina o Lona soifua e faapea, “E fai lua o alope, e fai foi mea e momoe ai manu felelei; a o le Atalii o le tagata e leai se mea e moe ai o ia” (Mataio 8:20). Sa “femaliuai ma agalelei” (Galuega 10:38).
O Ia o le tagata o vavega. Sa Ia aapa atu ia i latou o e sa faanoanoa. Sa Ia faamalolo i e mama’i ma toe faatutu mai e na oti. Ae, o nei mea uma sa Ia fai i le lalolagi, sa inosia ai ma tuulafoaiina o Ia e tagata; o le tagata faanoanoa, ua masani foi ma le tiga: … Sa inosia, ma sa le manatua lava o Ia (Isaia 53:3).
Tatou te toe tepa i Lona soifua e le mafaatusalia, ma tatou faapea ane faatasi ma le Perofeta o Isaia: “Ua na tauave o tatou tiga, ma na tauave o tatou faanoanoa… .
“Ua manua o Ia ona o a tatou solitulafono, ua momomo o Ia ona o a tatou amioleaga: o le aoaiga e filemu ai tatou sa i Ona luga lea; o ona faalavalava foi ua malolo ai i tatou” (Isa. 53:4–5).
Ina ua tauina le Taua i le lagi, sa tulai Lusifelo, le Atalii o le Taeao, ma tuuina mai se fuafuaga sa teena. Sa tuuina mai e le Tama o i tatou uma, faatasi ma le alofa ia i tatou o Lana fanau, se fuafuaga e sili atu, ma o lea fuafuaga e i ai lo tatou saolotoga e filifili ai le ala tatou te ola ai. O Lona Alo Ulumatua, lo tatou Uso Matua, o le fatu lea o lena fuafuaga. O le a i ai i le tagata lana filifiliga, ma o lena filifiliga e te tali atu ai mo oe lava. O le a savalia e le tagata ala o le lalolagi, ma agasala ma sese. Peitai le Alo o le Atua, o le a ofu o Ia i le tino aano, ma tuuina atu ai Ia lava e fai ma taulaga ona o agasala a tagata uma. O ona puapuaga e le mafaamatalaina, o le a avea ai o Ia ma Togiola sili, o le Faaola o tagata uma.
Faatasi ai ma sina malamalama i lena meaalofa e le mafaatusalia, lena meaalofa ofoofogia o le togiola, tatou te punonou ai ma ifo atu i Ona luma.
E i ai le au faitio i le tatou Ekalesia, e toatele. Latou te fai mai tatou te le talitonu i le Keriso masani o le Faa-Kerisiano. E i ai nai mea e sa’o ai le latou mau. O lo tatou faatuatuaga, ma lo tatou malamalama, e le faavaea i tu ma aga masani faaanamua, o talitonuga na maua mai i si malamalama utiuti, ma talatalanoaga faifai pea a tagata sa taumafai ia maua ai se faauigaga o le Keriso toetu. O lo tatou faatuatuaga, ma lo tatou malamalama, e maua mai i le molimau a se perofeta o lenei tisipenisione, o le na vaai i le Atua silisili o le atulaulau ma Lona Alo Pele, le Alii toetu o Iesu Keriso. Sa ia talanoa atu ia i La’ua. Sa ia molimau mai ma le manino, ma le toto’a, ma le maua’i i lena faaaliga maoae. O se faaaliga vaaia o le Silisiliese ma le Togiola o le lalolagi, e le oo i ai lo tatou malamalama i le ofoofogia, ae e mautinoa ma manino le malamalama na aumai ai. O le malamalama lena, ua faavaeina ma le mausali ma o se taunuuga lea o faaaliga i ona po nei, i upu a Nifae, matou te “tautalatala ia Keriso, matou te olioli ia Keriso, tatou te tala’i ia Keriso, ua matou vavalo atu foi ia Keriso, ua matou tusitusi e tusa ma a matou valoaga, ina ia iloa e [i matou ma] a matou fanau le mea latou te faamoemoe ai mo le faamagaloina o a [tatou] agasala” (2 Ni. 25:26).
Ma o lea, o’u uso e ma tuafafine, a o tatou taumavae mo se vaitaimi, matou te toe fai atu la matou molimau mausali ma le tumau. Matou te taitasi ona faia ma se malamalama mausali ma le mautinoa. E faapei ona fai atu faafia, ma ou te toe fai atu foi i le taimi nei, ou te iloa o loo soifua le Atua lo tatou Tama Faavavau. O Ia o le Atua silisili o le atulaulau. O Ia o le Tama o o tatou agaga, lea e mafai ona tatou talanoa i ai i le tatalo.
Ou te iloa o Iesu Keriso o le Alo Pele e Toatasi, o le Togiola o le lalolagi, o le na tuuina mai Lona soifua ina ia tatou maua le ola e faavavau, ma e pule foi o Ia ma nofotupu faatasi ma Lona Tama. Ou te iloa o i La’ua o ni tagata e patino, e mavaevae ma e ese le tasi mai le isi, ae tutusa i foliga vaaia, o le taua ma le faamoemoe. Ou te iloa o le galuega a le Silisiliese o le “faataunuuina o le faaofuina o le tagata i le tino ola pea ma le ola e faavavau” (tagai Mose 1:39). Ou te iloa o Iosefa Samita o se perofeta, o le perofeta maoae o lenei tisipenisione, lea na tauala mai ai nei upumoni. Ou te iloa o lenei Ekalesia, o le galuega a le Atua, o loo pulefaamalumalu ai ma taitaia e Iesu Keriso, e ona ia le igoa o loo ia tauaveina.
Ou te molimau atu ma le paia atoatoa i nei mea, a’u uo pele, ma ou te alofa ia te outou, ma ou tuuina atu ai a’u faamanuiaga, i le suafa o Iesu Keriso, amene. Ia faatasi le Atua ma outou seia tatou toe feiloai.