Tuu i Luga le Sulu
Ia atinae le tulaga paia o loo i totonu ia te oe. Aua nei faapouliuligia le malamalama o le agaga na e sau ma oe mai le lagi. E manaomia e le Alii lau amiolelei ma lau faatosinaga i le lalolagi nei.
O se sulu lenei na tauaveina le mumu o le Olimipeka i se vaega o lana malaga mai Eleni i le Aai o Sate Leki i a Fepuari talu ai. O se faailoga o le lelei maoae ma le faamoemoe. Na tutuina mo le uluai taimi i Eleni ina ua faatoa amata Olimipeka i aso ua leva.
O le sulu lenei a Tamaitai Talavou. O le faailoga lea o le malamalama o le talalelei lea e sau mai lo tatou Tama Faalelagi. Sa i ai le amataga o lenei malamalama i le lagi ae tou te le’i fananau mai. O iina na aoaoina ai outou i le fuafuaga sili o le fiafia, ma talu ai sa outou taliaina lenei fuafuaga, o lea ua faamamaluina ai outou o ni e tauaveina le sulu!
Sa aoaoina i tatou e le Faaola “ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi.”1 O le malamalama paia o loo e tauaveina i lou loto e mai le Atua ia, aua o oe o Lona afafine. O se vaega o le malamalama ua e matua lalelei ai, o le faamanuiaga o le tulaga faatamaitai. O se mea ofoofogia tele lou iloa o ou uiga faatama fafine, faatamaitai, o se meaalofa mai le Atua. Ua aoaoina i tatou e o tatou perofeta i aso e gata ai, “o le tulaga tane po o le fafine [o le tagata], o se vaega taua lea o le mua’i olaga, olaga faitino, ma lona faamoemoe e faavavau.”2 O se faamanuiaga paia le fanau mai ma uiga taua maoae o se afafine o le Atua. O tamaitai o le Atua, o e matutua ma e laiti, e faaleagaga ma iloa mea e manaomia e isi, e agavaivai ma agamalu. E i ai o latou natura agalelei, ma faafaileleina. O o outou tofi. Ia aua lava nei manatu faatauvaa i meaalofa ua tuuina mai e le Atua ia te outou. Ia atinae le tulaga paia o loo i totonu ia te oe. Aua nei faapouliuligia le malamalama o le agaga na e sau ma oe mai le lagi. E manaomia e le Alii lau amiolelei ma lau faatosinaga i le lalolagi nei.
O le mea lea, ou te fia talanoa atu ia te oe i le po nei, mai lo’u loto, ia e lelei, ma mea e lelei ai. E uiga i le tuuina i luga o lena sulu.
O le a taumafai le lalolagi ia e manatu, ua le toe aoga ma ua te’a aso o lena mea o le lelei, ma e lauiloa pe a soli tulafono ma tuutuu i lalo tulaga e ola ai. Aua nei e taliaina na ituaiga o mafaufauga. Pe a e matamata TV pe faitau i mekasini, atonu e te lagona faapea e ese a oe i manatu o tagata, ae o le mea moni, o oe lena ua iloa le ala e ui ai.
Ai ua outou silafia o au o se tina o se fanau tama e toafitu. Ua ou masani i tama! O se olaga e ese le malie i lo matou fale! E tele mea ua ou aoaoina mai ia te i latou ma a latou uo, o tama ma teine. E mafai ona ou faamatala atu nisi o a latou leo lilo. Masalo ua lava le tasi ou te faamatalaina atu, ae talosia ia aua nei ou pagatia ai. E matua inoino tama e faamaina. Ou te manatua se alii talavou na i ai sana uo mai se siva. Sa ia aumaia o ia i lo matou fale a o le’i faia le siva, se’i fai le matou puata. Ina ua taunuu i lo matou fale, sa sau le alii i le umukuka lea sa ou sueina ai le mea pueata ma ia faapea mai: “Faatali se’i e vaai i le ofu o la’u uo. E ese le lalelei!” E le’i tautala lava muamua lenei tama i se mea faapea, o lea na toetoe a ou le lava onosa’i lo’u fia iloa le uiga o lana tala.
Ina ua ou vaai i le tamaitai, sa ou malamalama; e ese le lalelei. Sa manaia lona ofu sa fai. Sa ta’u mai ia te au ua soo faleoloa o la sailia ma lona tina. Ina ua la mauaina lenei ofu, sa la iloa o le a atoatoa le matagofie pe a sosoo i ai se fasi ie ma nai teuteu e faaatoatoa ai ina ia fetaui ma tulaga tausaafia la te manaomia.
Sa tauia a la’ua taumafaiga uma aua sa matua lalelei o ia i lena po, ae e le na o le ofu na susulu ai o ia. O lona faatuatua filemu. A o ou tilotilo atu ia te ia, sa ou manatua ai le mau, “Ia teuteuina ou manatu i le mama e le aunoa; ona malosi ai lea o lou faatuatua fai ifo.”3 O fea na sau ai lea faatuatua na ia te ia? Sa ou vaaia e mafai ona taulai atu lenei tamaitai talavou i isi aua sa le popole pe o a ona foliga. Sa ia tapenaina lena tulaga i le tele o vaiaso a o le’i oo i ai. O le alii talavou foi na la o, sa lagona e ia le mafanafana ma le saogalemu ma le fiafia aua e le o se ofu faatosina le ofu o le tamaitai. Sa tausaafia i itu uma, ma o le mea lea na ia lagona ai le mautinoa ma le fiafia. Ma o se tulaga faatosina lena. E le’i maasiasi le alii ia te ia; ae sa mitamita ai o ia.
O le ituaiga o tamaitai talavou e mafai ona avea ma ave sulu maoae, e maualuluga ona tulaga faatonuina i taimi uma, ae le na o le taimi e ofu ai lona ofu siva, ae o aso taitasi. Ua toatele naua outou e faapena, ma ou te faamalo atu ia te outou i lenei po. Ua outou faatausaafiaina le olaga tou te ola ai. E sili atu i le na o le faiga o outou laei. E aofia ai nisi mea se ono ua ou mafaufau i ai: (1) e te amiolelei ma tausaafia ae ese foi le malie pe a e i ai; (2) e te le faaaogaina lava se gagana masoa ae e te fiafia foi lava ma malie; (3) e manaia le faiga o ou laei ma e ese le manaia; (4) e te tulimatai atu i le atinaeina o au taleni ma le faataunuuina o au sini, e le tatuia lou tino ma tata ni au pe’a pe e te faalialiavale i lou tino; (5) e te taalo sagisagi i taaloga ae e te le itaitagofie; (6) e te le popole po o a ofu ae po o a foi mea e fai e le tama po o le teine pese o lauiloa i le taimi nei; aua e i ai lava au sitaili faapitoa. I lona aotelega, e te le o faataitai i tulaga faalelalolagi aua ua e iloaina se tulaga faatonuina e maualuga atu. Ua e iloaina oe lava, ma o le mea lena e sili moni ai oe. Ua e iloa o oe moni lava o se afafine o le Tama Faalelagi. Ua e iloaina ua Ia silafia oe ma e alofa o Ia ia te oe; e te fia manao e faafiafia o Ia ma faamamaluina Lona alofa ia te oe. Ua e iloa foi tusa lava pe e te faia ni mea sese faavalevalea, e fesoasoani lava o Ia ia te oe pe afai e te liliu atu ia te Ia.
E foliga mai ua outou taulotoina le [tusi] Mo le Malosi o le Autalavou! Pe ua le maoae ea lena tamai taiala? O nisi taimi ou te fia ta’ua ai o “fesoasoaniga ia maua le fiafia” aua o le ola ai i ia tulaga faatonuina, e mafai ona avea ma au auupega lilo e faatosina mai ai tagata lelei ia te oe, ma taofiofi ai oe i le ala sa. Pe a e ola i tulaga faatonuina maualuluga o le Ekalesia i aso uma, ua e tuuina i luga le sulu.
Sa i ai se teineitiiti, o le a ou faaigoaina o Lisi, o se faataitaiga o le mea lea ou te talanoa atu ai. E vasega o ia ma Linisei i le numera, ma sa vaaia e Linisei e i ai se mea e “susulu” ai ia Lisi, e pei o lana tala. Sa tautino mai e Linisei, e le iloa o ia e Lisi, ae na te faafiafia atu lava ia te ia. Sa matua ola lava o ia i ona talitonuga, ma sa ia faafiafiaina lava isi ma faaaofia mai i mea e fai. E tele vaiaso sa mataituina ai e Linisei ia Lisi. Ona oo lea i le tasi aso, e le’i aoga ai Lisi. Sa sosoo ai ma le tasi aso ma le isi foi. Sa iloa mulimuli ane e Linisei, o loo taufao le mai ma le magalo i lona ma’i fiva fai’ai.
Ina ua tuua le aoga sa sau o ia ma nofo i le laulau ma tagi. E le faapea e mafana se la faigauo ma Lisi, ae sa fai atu Linisei i lona tina e tatau ona latou fesoasoani atu ia te ia. Sa fautua atu Linisei pe mafai ona anapogi lo latou aiga atoa mo Lisi. Oka se te’i o le tina i le faalogo atu i se tasi o lana fanau [i lea mea], aua ua tele tausaga e le o ta’ua lava se anapogi ma le tatalo i totonu o le latou aiga. Ina ua talanoa atu Linisei ma lona tina i le isi vaega o le aiga a o aai i lena po, sa le’i taliaina e nisi lea manatu, ae sa augani atu Linisei i ai ma iu ai ina latou malilie uma e anapopogi ma tatalo mo Lisi, o se tagata e le masani ai. Sa tupu le mea sili ona ofoofogia. E le’i leva ae toe vaaia Lisi i le aoga ma ua matua malosi lava. Ae e sili atu i lo lena, o lea aafiaga na aumaia ai se agaga aupito sili ona matagofie i le aiga o Linisei. Talu ai lena mea, sa i ai ni suiga matautia i lona aiga. Ua faia faatasi nei a latou tatalo faaleaiga, o se mea ua tele tausaga e le o faia.
Sa susulu le lelei o Lisi ma ua fepesia’i. Lisi, afai o e faatasi mai i le po nei, ou te fia fai atu ia te oe, “Faafetai! O lau amiolelei ua e faamanuiaina ai se aiga atoa, atonu e te le o iloa. A o ai o iloa, pe toafia isi ua taialaina i le malamalama o le talalelei, a o e tuu i luga lou sulu.”
O le amiolelei e te lagona ai le fiafia ma lagona ai foi e isi le fiafia! Ou te fia ta’u atu le mea lenei—e sili atu ona faigofie ona fai le mea sa’o nai lo le fai o le mea sese. E matua sili atu ona faigofie le olaga pe a e amiolelei.
O le mea e aupito sili ona aoga ai le amiolelei, e taitai atu ai oe i le malumalu, le nofoaga e aupito sili ona matagofie ma paia i le fogaeleele. O le malumalu o le maota e mafai ona asiasi mai i ai le Faaola aua o Lona maota paia lea i le fogaeleele.
O se tasi o afafine o le fanau a Peresitene Lorenzo Snow sa i ai ma ia i le malumalu i se tasi aso ona faapea atu lea o Peresitene Snow ia te ia, “Allie, ou te fia ta’uina atu ia te oe se mea. O i tonu lava sa faaali mai ai le Alii o Iesu Keriso ia te au.” “Sa tuu e [Tamamatua] lona lima taumatau i [lo’u] ulu ma faapea mai, ‘O lea, afafine, ou te manao ia e manatua o le molimau lenei a lou tamamatua, sa na ia ta’uina atu ia te oe i ona lava laugutu, e moni lava na ia vaai i le Faaola, iinei i le malumalu, ma sa ma talanoa fesaga’i ma ia.’”4
E mafai ona e manatu faalemafaufau i le lagona migao e te maua i lou savali i le potu e tasi na savali ai le Faaola? Pe e te vaai faalemafaufau ia te oe iina, e mama ma atoatoa, o se afafine o le Atua, ua saunia e talia Ana faamanuiaga silisili?
O le [polokalama] o le Alualu i Luma o le Tagata Lava Ia, o le a fesoasoani ia te oe mo au sauniuniga mo le malumalu. Ua musuia mai le lagi. E maeu le matagofie o lea ‘oa itiiti. O le a fesoasoani e te latalata atili atu ai i le Faaola, ma o le a fesoasoani ia te oe e faalauteteleina ai meaalofa paia o le tulaga faatamaitai o loo matou talanoa atu ai. Ua mamanuina faapitoa lava mo oe i lenei vaitau taua tele o sauniuniga, aua o mamanu e te faatuina ma filifiliga e te faia i le taimi nei, o le a aafia ai lou olaga atoa. Matou te tatalo, pe a mae’a lau [polokalama] o le Alualu i Luma o le Tagata Lava Ia, o le a matua susulu lou malamalama ma avea ai ma se faatosinaga mo le lelei o augatupulaga fai mai. O mafuaaga nei ma isi foi, na tulei saunoa ai le Au Peresitene Sili, “Matou te mananao i tamaitai talavou uma ina ia taumafai e galulue ia maua le Aloaiaina o le Tulaga Faatamaitai Talavou. Pe afai e galulue le tupulaga talavou i nei sini, o le a latou atinaeina tomai ma uiga e taitai atu ai i latou i le malumalu ma saunia ai i latou e auauna atu i o latou olaga atoa i o latou aiga ma le Alii.”5 O le pine matagofie o le Tulaga Faatamaitai Talavou o loo i ai tumutumu o le malumalu, e faamanatu atu ai ia te oe o loo e sauniuni mo le mauaina o sauniga o le malumalu, aua o le malumalu tatou te o atu ai ia Keriso.
E faapitoa ona tatou mafaufau ia Keriso i lenei Eseta. Ua silia ma le 2,000 tausaga talu ai, a o i ai Lona tino i le tuugamau, sa talitonu nisi ua le toe i ai se malamalama. Peitai, tatou te iloa, o lena taeao i le aso tolu, lea ua tatou faaigoa o le Eseta, na toetu ai o Ia e avea ma o tatou faaolataga, o lo tatou Faaola, o lo tatou malamalama e faavavau, e le tuua lava i tatou. Ou te molimau atu o Keriso, o le malamalama ia ma le ola o le lalolagi.
Tamaitai talavou pele, ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi. O se faamamaluga lava le tauaveina o le sulu. Matou te tatalo o le a susulu atu lona malamalama i lou ala, i au laa taitasi uma i le ala ma o lau amiolelei foi o le a e agavaa ai i se aso mo le mauaina o faamanuiaga o le malumalu, aua o le maota paia lena o le a e maua ai le malamalama e aupito sili i lo mea uma, i le suafa o Iesu Keriso, amene.