Ia Faapaiaina La Outou Galuega
Pe a mafaufau loloto i le tulimata’ia o le faapaiaina, e gatete o tatou loto ma le malamalama lelei i mea atonu e manaomia. Ae na fetalai faamafanafana mai le Alii, “Ua lava lo’u alofa tunoa mo outou” (MFF 17:8).
O nei faamatalaga e mo i latou e le atoatoa ae o loo taumafai pea i le aiga o le faatuatua [le Ekalesia]. E pei ona masani ai, pe a ou ofoina atu ni fautuaga e faaleleia atili ai, o le tagata muamua lava e sili ona manaomia, o a’u lava lea.
E matele lava ina tatou mafaufau o le faapaiaina lava ia, o le faamatuu atu lea o a tatou meatotino, pe a faatonuina ai mai le lagi. Ae o le faapaiaina moni lava ia, o le faamatuuina atu lea o oe lava i le Atua. O le loto, agaga, ma le mafaufau o upu autu ia a Keriso i le faamalamalamaina o le uluai poloaiga, lea tatou te taumafai e usitaia i taimi uma, ae le na o le aso ma i e lua (tagai Mataio 22:37). Afai tatou te tausia, ona faapaiaina ai lea atoatoa o a tatou galuega e faamanuiaina ai o tatou agaga (tagai 2 Ni. 32:9).
O lea atoatoa e aofia ai le gauai atu faatasi o mafaufauga, o upu, ma amioga, o le faafeagai tonu lava o le feitaga’i, “Aua pe faapefea ona iloa e le tagata le alii e le i auauna i ai o ia, o le tagata ese foi ia te ia, ma ua mamao i manatu ma manao o lona loto?” (Mosaea 5:13.)
E toatele e faatuatuana’i i le faapaiaina aua e foliga mai e lavelave naua pe faigata foi ona fai. Peitai, o i latou e galulue ma le filiga, latou te iloa le le fiafia o le lagi, ona e ui ina i ai se alualu i luma ae o loo lualuagia foi ma le faatuutuu. O le mea lea, ou te tuuina atu ai ni apoapoaiga alofa, faatasi ai ma le faamaoniga o lenei taitaiga, o le faamalosiauga e faaauau le faigamalaga, ma le faamafanafanaga pe a tatou feagai ma faigata.
O le gauai atu faaleagaga e le ausia i se minute, ae e faasolosolo malie le faaleleia, ma le laa atu mai lea faasitepu i lea faasitepu lea e tatau ona taitasi e laasia i le taimi. O le a mafai ai ona “faaumatia o tatou loto i le finagalo o le Tama” ma ua tatou “fia usitai … e pei lava ona gauai le tama itiiti i lona tama” (tagai Mosaea 15:7; 3:19). I se tasi itu, e ui ina tatou taumafai [ina ia faapaiaina], ae o le a tumau pea ona tatou lagona le le faamalieina ona e i ai lava taimi e maimau i le faiga o mea e le taua.
O le a fesoasoani pe a tatou manatu i ni tagata sa tatau ona faapaiaina i le Alii o latou tamaoaiga. Ina ua faatau atu e Anania ma Safaira a la’ua meatotino, sa la “tuu faanana foi mana nisi mea o le tau” (tagai Galuega 5:1–11). E toatele naua i tatou e taofiofi mamau “nisi mea” patino, e pei le faiga o mea tatou te faavalea i ai o ni meatotino. O le mea lea, po o a lava isi mea atonu ua tatou foai atu, o le vaega mulimuli lava e aupito sili ona faigata ona faamatuu atu. O le tuuina atu na o se vaega o a tatou mea po o i tatou foi o lena e lelei, ae e atagia manino mai ai le ’alofaga faapea, “O la na avatu i le ofisa” (tagai Iakopo 1:7–8.)
Mo se faataitaiga, atonu e i ai ni o tatou tomai patino po o ni taleni foi, tatou te mafaufau sese ai faapea o tatou e ona ia. Afai e faifai pea lo tatou taofiofi mamau i na mea e sili atu nai lo le Atua, o lona uiga ua tatou solomuli mai le usitai atoatoa i le uluai poloaiga. Talu ai e aumai e le Atua ia i tatou le “manava…mai lea itula i lea itula,” o le mea lea, e le se mea lelei le taofiofi mamau ma le saputu o le manava! (Mosaea 2:21).
O se isi maa faalaveavae e tulai mai pe a tatou tautua i le Atua ma le lima foai i o tatou taimi ma tusi siaki, ae tatou te taofiofi tufaaga o o tatou tagata i totonu, e ta’u mai ai e le’i tuuina atu uma o tatou tagata mo Ia!
O nisi e matua faigata lava pe a faaleagaina e se tiute faapitoa lo latou aso. Peitai, o Ioane le Papatiso o se faataitaiga lea, a o tautala e uiga i le faatupulaia o le lafu a Iesu, “E ao ina tupu pea o ia, peitai a’u nei, e tauau ina itiiti o au” (Ioane 3:30). O le manatu faaseseina e tusa ai ma o tatou tofiga faapea ona pau lea o le faailoga o le tele o le alofa o le Atua ia te i tatou, e na ona faaopoopo ai i lo tatou mumusu e tuu. Uso e ma tuafafine, o le taua o le tagata lava ia, ua maea ona faatuina e le Atua e “sili,” e le fesuisuia’i pei o maketi o fefaatauaiga.
E tumau le le faaaogaina o isi laasaga aua, e faapei foi o le alii mauoa, amiotonu, talavou, tatou te le o naunau e faafetaiai vaega e tatau ona tatou faaleleia (tagai Mareko 10:21.) Ua aliai mai ai le totoe pea o le manatu faapito.
E tele mea o loo faaalia ai lo tatou faatuatuai e faapaiaina i tatou lava. Mo se faataitaiga, o le Malo Terasitila, e aofia ai i latou o e mamalu, e manino lava e le o ni molimau pepelo, ae o i latou “na le loto totoa i le molimau ia Keriso” (MFF 76:75, 79). O le auala sili lava e molimau totoa atu ai ia Keriso, o le avea atili lea e faapei o Ia, ma o le faapaiaina e mamanuina ai o tatou olaga ia faapei o Ia (tagai 3 Ni. 27:27).
A o tatou taumafai e faafetaia’ia luitau sa ou ta’ua, e sili ona fesoasoani pe a tatou gauai atu faaleagaga—o nisi taimi ia “faagalo” ni mea, e oo lava i le olaga faitino, o isi taimi “ia taofiofi mamau,” ma o isi lava foi taimi, ia faaaoga ai le isi laasaga (tagai 1 Nifae 8:30).
Afai e le lava le faautautaga, e mafai ona matua faigata lava le isi laasaga. E ui ina sa iloa e Lamana ma Lemuelu mafaufau papa’u, le ala na faamanuia ai e le Atua ia Isaraelu anamua, ia sosola ese mai le Farao matautia, ae na leai lava so la’ua faatuatua i le Atua e fesoasoani ia i la’ua i si nei lava taitai faatauvaa o Lapana.
E mafai foi ona tatou o ese mai le ala, pe afai tatou te popole tele e faamalie o tatou pule faalegaluega ma isi mea fai. O le faamalieina o “isi atua” nai lo le Atua moni, e solia ai foi le poloaiga muamua (Esoto 20:3).
O nisi taimi tatou te puipuia ai o tatou uiga faatamaiti, e foliga mai e taua i o tatou tagata. Peitai, o le avea ma soo e pei lava “o se taaloga e fepa’ia’i,” [o lona uiga e mafai ona tiga], e pei ona molimau mai le Perofeta o Iosefa:
“Ua pei a’u o se maa talatala tele, … ma na pau lava le taimi e faalamolemole ai a’u o le taimi e oloia ai i nisi tulimanu pe a fetaui ma se isi mea, e matua taia lava i le malosi o le saosaoa … Ona avea ai lea o au ma se meafaigaluega lamolemole ua faaiilaina i le utu a le Silisiliese” [Teachings of the Prophet Joseph Smith, sel. Joseph Fielding Smith [1976], 304]
Talu ai e tele taimi tatou te naunau ai [e avea ma soo] ae mumusu e sui o tatou uiga le lelei, o le “vaega” ua taofi, ua taofia ai nisi o tagata sili ona atamamai mai le faia o o latou sao i le galuega a le Atua. E sili atu le agamalu e pei o Mose, o le sa aoaoina mea “na te le’i mafaufauina lava” (Mose 1:10). Peitai, ona o le lavelave o le sootaga i le va o lo tatou saolotoga e filifili ai, ma o tatou faasinomaga tulaga ese, o le ala lea e matua faatuatuai ai. O le lafoaia o mafaufauga, o se manumalo moni lena, aua e folasia mai ai ia te i tatou ala loloto ma le “maualuluga atu” a le Atua! (tagai Isaia 55:9).
Peitai, e ao foi ona tatou iloa, o le maelega foi e faataunuu ni mea lelei, e mafai ai ona faaitiitia lo tatou faamaoni i le Atua. Mo se faataitaiga, e mafai e se tagata ona ova le naunau i taaloga ma faamemelo i le fuaitino. E mafai e se tasi ona faaaloalo i le natura o mea, ae faagalogalo le Atua na faia le natura. E mafai ona ova le manatu o se tasi i musika lelei, ma e faapena foi i se galuega taua. O tulaga faapena, e masani ai ona le faia “mea silisili” (Mataio 23:23; tagai foi i le 1 Kori. 2:16). E na o le Silisiliese lava e mafai ona taialaina atoa i tatou i le maualuga o le lelei e mafai e oe ma au ona fai.
I poloaiga sili e lua, na tautino mai ai e Iesu, e leai se mea e sili atu ona taua nai lo na, ae le o le isi itu! (tagai Mataio 22:40.) E le faapea ua faataatia ese le uluai poloaiga, ona o le tulimata’ia malosi o se manuia e maualalo ifo, aua tatou te le tapuai i se atua maualalo.
A o le’i sapi i le seleselega o taumafaiga amiotonu, sei o tatou muai manatua le aao o le Atua. Ne’i o tatou faapea ane, “O lo’u malosi ma le malosi o lo’u lima ua ou maua mai ai lenei oloa” (Teuteronome 8:17). A le o lea, po ua tatou “tala gugutu” ia i tatou lava e pei ona sa faia ai e Isaraelu anamua (vagana ai le autau toaitiiti a Kitiona), sa latou limalala’u faapea “o lo’u lava lima ua ola ai au” (Faamasino 7:2). O le talagugutu i o tatou lava “lima” e faaopoopo ai le faigata ona faailoa atu le aao o le Atua i mea uma! (Tagai Alema 14:11; MFF 59:21).
I se nofoaga e igoa o Meripa, o se tasi o tagata maoae, o Mose, na atu lona loto i le fetagisi mai o tagata mo se vai. E le’i leva ae “fai atu [Mose] ma le le magafagafa,” ma faapea atu, “Ma te faatafeina mai ea le vai ai lenei papa mo outou?” (Salamo 106:33; Numera 20:10; tagai foi Teuteronome 4:21). Na aoao ai e le Alii le Mose ofoofogia ona o le soanauna sese lea na ia faaaogaina, [o loo ta’u mai ai e manao Mose i le viiga ae ia le na o le Atua] ma sa atili faaatamaiina ai o ia. E lelei foi ona tatou agamalu e pei o Mose (tagai Numera 12:3.)
E le’i faapea lava na alu ese mai Iesu mai Lona faamoemoega! E ui lava ina sa femaliuai o Ia ma faia le tele naua o mea lelei, sa Ia silafia lava e le aunoa, o loo faatalitali mai le Togiola, ma sa ia aioi atu ma se tofa loloto, “Lo’u Tama e, faaola mai ia te au i lenei ituaso: a o le mea lava lea na ou oo mai ai i lenei ituaso” (Ioane 12:27; tagai foi 5:30; 6:38).
Pe a tatou atinaeina se faaopoopoga o le alofa, onosai, ma le agamalu, e tatau foi ona tuu atu lea faaopoopoga i le Atua ma tagata. E le gata i lea, e leai se isi tagata e tutusa ma i tatou i avanoa ua tatou maua.
E moni, o laasaga ia na ta’ua tatou te iloa ai nisi luitau fou atonu tatou te le fia oo i ai. O lea foi, o i latou e fetaiai ma luitau ma manumalo ai, o ni faatosinaga mamana i latou mo i tatou. E masani ona sili lo tatou sagisagi filemu atu i e tatou te viia . Sa manatua e le atalii faamaumauoa fiaai ia meaai i lona aiga, ae sa fetosoaiina o ia i isi manatu, ma ia faapea ai ma le naunautai, “O le a a’u tulai ma alu i lo’u tama” (Luka 15:18).
A o taumafai e gauai atu atoatoa, o o tatou faanaunauga e aofia ai a tatou mea uma e tatau ona tatou avatu i le Atua. O meaalofa masani ma o latou mafuaaga tatou te avatu ia te Ia, e mafai ona malamalama le tuu i ai o le faailoga “Faafoi i Le Na Auina Maia,” ae faamata’itusi tetele “Le Na Auina Mai.” E oo lava foi pe a maua e le Atua lenei meaalofa e tasi, ona toe maua mai ai lea e le au faamaoni atoatoa “o mea uma o ia te [Ia]” (MFF 84:38). Oka so tatou faamanuiaga e maua i lenei fesuiaiga!
I le taimi nei, e tumau lava le mea moni: Ua tuuina mai e le Atua o tatou ola, o a tatou filifiliga, o a tatou taleni, ma avanoa, ua Ia aumaia a tatou ‘oa; ua Ia aumaia le taimi faatulagaina tatou te ola ai faatasi ma le manava tatou te manaomia (tagai MFF 64:32). I le taialaina ai la e lena malamalama, o le a tatou aloese mai ai i le faia o ni sese ogaoga e faavae i manatu sese, o nisi e sili atu ona le malie nai lo le faalogologo i se aufaipese e toavalu ma sese ai faapea o le Aufaipese a le Tapeneko!
E leitioa ona faamamafa mai e Peresitene Hinckley le ao ona avea i tatou ma tagata o le feagaiga, ma sa faamamafa mai ai feagaiga o le faamanatuga, sefuluai, ma le malumalu, ma ta’ua ai o le ositaulaga o le “autu lea o le Togiola” (Teachings of Gordon B. Hinckley, [1997], 147).
O le usitai maoae na ausia ma faataunuuina e le Faaola, a o feagai o Ia ma le matamataita o tagata ma tiga o le Togiola, ma “ia loto [Na] te le inu i le ipu oona, ae teena” (MFF 19:18). I sa tatou fua faatauvaa e le atoatoa, tatou te feagai ma mea e ao ona faatoilaloina ma moomoo maimau pe ana mafai ona aveesea.
Manatu i le mea lenei. Mata o le a le taua o le galuega a Iesu pe ana fai Na te faia nisi vavega e aunoa ma le faataunuuina o le vavega maoae i Ketesemane ma Kalevario? O isi o ana vavega na oo mai ai le faaopoopoga manuia o le ola, ma faaitiitia ai mafatiaga o nisi. Ae e mafai faapefea ona faatusatusa nei vavega i le vavega aupito sili o le Toetu mo le atulaulau? (tagai 1 Kori. 15:22). O le faateleina o potoi areto ma i’a na fafagaina ai le motu o tagata fia taumamafa. Ae tusa lava, e le i umi foi ae toe fia taumamafa i latou na avatu i ai, a o i latou e aai i le Areto o le Ola, o le a le toe fiaaai lava (tagai Ioane 6:51, 58.)
Pe a mafaufau loloto i le tulimata’ia o le faapaiaina, e gatete o tatou loto ma le malamalama lelei i mea atonu e manaomia. Ae na fetalai faamafanafana mai le Alii, “Ua lava lo’u alofa tunoa mo outou” (MFF 17:8). Pe ua tatou talitonu moni ea ia te Ia? Ua Ia folafola mai foi na te faia mea vaivai ma mea malolosi (Tagai Eteru 12:27). Pe ua tatou naunau moni ea e usitai atu i lena faiga? Ae afai la tatou te mananao ia maua uma ia mea, e le tatau ona taofi pe tuu nisi mea i le taimi nei!
O le tuu atu o o tatou loto ina ia saga faaumatia i le finagalo o le Tama, o lona uiga moni lava, e ausia ai se tutoatasi faateleina, e sili atu ai ona malosi e mauaina “mea uma o i ai i le [Atua]” (MFF 84:38). E le gata i lea, e mafai la faapefea ona tuuina mai ia i tatou Ana “mea uma” pe a le faapei o tatou loto o Ia? E le mafai foi ona talisapaia atoatoa “mea uma” e i latou e le o naunau e avatu mea uma.
O lona uiga, o i tatou lava ua tatou faafitia ona o lo tatou taofia “o nisi mea” po o le a lava. E le tatau ona tatou fesili, “Le Alii e, o a’u ea?” (Mataio 26:22) Ae fesili le tagata lava ia e uiga i maa faalaveavae, “Le Alii e, po o le mea ea lea e tatau ona ou faaleleia?” Atonu ua leva ona tatou iloa le tali, ma ua manaomia se faaiuga nai lo Sana tali e aumai.
O le fiafia aupito sili i le fuafuaga alofa a le Atua, ua teuina mo i latou e naunautai e atinae ma totogi le tau o le malaga fai i Lona malo. Uso e ma tuafafine, “O mai, tatou faafou, [lenei] malaga fai” (“Come, Let Us Anew,” Hymns, no. 217).
I le suafa o le Alii o Le Faaloaloa mai Lona Aao, (tagai MFF 103:17; 136:22), o Iesu Keriso, amene.