Sa Latou Tatalo Ona Latou O Lea
Ia avea i tatou, o se vaega malosi o e ua umia le perisitua, ma e anaana i le upu, ae le na ona faalogologo i ai. Ia tatou tatalo; ona tatou o lea ma fai.
O’u uso e, ua faamamaluina lava a’u i le avanoa e lauga atu ai ia te outou i lenei afiafi. O se matuai fiafiaga lava le vaai atu i lenei Maota matagofie o Konafesi ua matuai faatumulia ia i latou o e talavou ma e matutua o e o loo umia le perisitua a le Atua. I le iloaina lea o loo i ai foi isi faapotopotoga faapea o loo faapotopoto i le salafa o le lalolagi e aumaia ai ia te au se lagona lofituina ona o le tiutetauave. Ou te tatalo ina ia taitaiina e musumusuga a le Alii o’u manatu ma musuia a’u upu.
I le tele o tausaga ua mavae, i se tofiga i Tahiti, sa ou talanoa atu ai i le peresitene o la tatou misiona, o Peresitene Raymond Baudin, e uiga i tagata Tahiti. Ua lauiloa i latou o nisi o tagata folau ofoofogia o le lalolagi atoa. Sa taumafai ia le Uso ia Baudin, o se tasi e tautala i le faaFalani ma le faaTahiti, ae faalelelei le faaPeretania, e faamatala mai ia te au le mea lilo e faamanuiaina ai ia kapeteni Tahiti i le vasa. Na ia faapea mai, “E ofoofogia i latou. Atonu e mafai ona sou le vasa, atonu e mama o latou vaa, atonu e leai ni tapasa ma ni mea faapena sei vagana ai o latou lagona i totonu ma fetu o le lagi ae latou te tatalo ona latou o lea.” E faatolu ona fai mai le faaupuga lea. O loo i ai se lesona iina i lena saunoaga. E moomia ona tatou tatalo ona moomia lea ona tatou galulue. E taua uma mea na.
O le folafolaga lenei mai le tusi o Faataoto e maua ai e i tatou le lototele: “Ia e faatuatua ia Ieova ma lou loto atoa; ae aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”1
E tatau ona tatou liliu atu i le tala o loo maua i le 1 Tupu ina ia toe manatua ai lena vaega pe a tatou mulimuli i fautuaga a le Alii, pe a tatou tatalo ma o loa e fai, o lona taunuuga e manuia ai tagata uma. O iina tatou te faitau ai i se lamala matautia lea na aafia ai le laueleele uma. Na sosoo mai ai le oge. Na maua e Elia le perofeta mai le Alii se faatonuga atonu sa matuai maofa ai o ia: “Tulai ia oe ma e alu i Sarefata: … faauta, ua ou fai atu i le fafine o i ai ua oti lana tane, na te fafaga ia te oe.” Ina ua ia maua le fafine ua oti lana tane, sa faapea atu i ai ia Elia, “Se’i e aumai sina vai itiiti i se ipu, so’u inu ai.
”Ua alu o ia e aumai ai, ona toe valaau ai lea o ia ia te ia, ua faapea atu, Se’i e au mai i lou lima se fasi areto ma’u.”
O lana tali na faamatalaina ai lona tulaga mativa sa i ai a o ia faamatala mai faapea o loo ia sauniaina sina meaai mulimuli ma ia ma lana tama, ona la oti lea.
Atonu e le talitonuina e ia le tali a Elia: “Aua e te fefe; alu ia ina e faia le mea na e fai mai ai; ae muamua ona e fai se potoi areto itiiti ma’u, ma aumai ai ia te au, e mulimuli ane ona e faia lea ma oulua ma lau tama tane.
“Aua ua faapea ona fetalai mai o Ieova le Atua o Isaraelu, E le uma le kate falaoa, e le faaitiitia le suauu i le fagu, seia oo i le aso e foaiina mai ai e Ieova le ua i le laueleele.
”Ona alu lea o ia ua ia faia e tusa ma le upu a Elia: ua latou aai ai, ma Elia, ma lona aiga, ua tele aso.
“Sa le uma le falaoa i le kate, sa le faaitiitia foi le suauu i le fagu.”2
Afai ou te fesili atu ia te outou po o a fuaiupu o mau i totonu o le Tusi a Mamona e sili ona faitauina soo, ou te manatu o le tala lea o loo maua i le Muamua Nifae e faatatau ia Nifae, o ona uso, o lona tama ma le poloaiga ina ia aumai mai ia Lapana ia papatusi apamemea. Atonu e mafua ona o le toatele lava o i tatou, mai lea taimi i lea taimi, e folafola atu ai o le a toe faitauina le Tusi a Mamona. E masani lava tatou te amata ona faitau i le Muamua Nifae. O le mea moni lava ia o fuaiupu o loo maua ai iina o loo atagia ai le moomia ona tatalo ona o ai lea ma fai. Na fai mai ia Nifae, “Ou te alu atu ma fai ia mea ua poloaiina e le Atua, aua ua ou iloa, e le aumai e le Atua ni poloaiga i le fanauga a tagata, seiloga na te saunia le ala mo i latou ia mafai ai i latou ona fai le mea ua ia poloaiina ai i latou.”3
Tatou te manatua le poloaiga. Tatou te manatua le tali a Nifae. Tatou te manatua le taunuuga.
I o tatou aso ma o tatou taimi, e tele naua ia faataitaiga e faatatau i mea na oo i ai i latou o e na tatalo ona o lea ma fai. Ou te fetufaai atu ia te outou se tala faamomoiloto o se aiga lelei lava sa nonofo i le aai matagofie o Perth, i Ausetalia. I le 1957, i le toe fa masina ona faapaiaina lea o le malumalu o Niu Sila, sa avea ai ia Donald Cummings, o le tama, ma peresitene o le itu i Perth. Sa fuafua o ia ma lona toalua ma le aiga e auai atu i le faapaiaga o le malumalu, e ui lava sa tau leai ni a latou tupe. Sa amata ona latou tatalo, ma galulue, ma sefesefe a latou tupe. Sa latou faatauina atu le latou taavale e tasi sa i ai ma aoina mai soo se sene apa sa latou mafai ona maua, pe tusa ma se vaiaso ona oo lea i le taimi atofaina o le latou malaga, ae toe 200 pauni o loo moomia. O ni meaalofa se lua e le’i faamoemoeina e ta’i 100 pauni, na latou ausia ai le latou sini. Talu ai ona sa le mafai e le Uso ia Cummings ona maua ni ona aso malolo mai lana galuega mo le latou malaga, o lea na ia fuafua ai loa o le a faamavae mai lana galuega.
Sa latou malaga mai le nofoaafi ma sopoia le konitineta tele o Ausetalia, ma taunuu atu i Sini, lea sa latou feiloai faatasi ai ma isi tagata o le Ekalesia e malaga atu foi i Niu Sila. O le Uso ia Cummings ma lona aiga o nisi ia o tagata muamua o Ausetalia na papatisoina mo e ua maliliu i totonu o le Malumalu o Niu Sila. Sa aofia foi i latou i le vaega muamua lava o tagata e mamao ese mai Perth i Ausetalia o e na maua faaeega paia i le Malumalu o Niu Sila. Sa latou tatalo, sa latou sauniuni, ma sa latou o atu ma fai.
Ina ua toe foi atu le aiga o Cummings i Perth, sa maua se isi galuega fou ma le sili atu a le Uso ia Cummings. Sa avea pea o ia ma peresitene o le itu i le isi iva tausaga na sosoo ai ina ua ou maua le avanoa e valaau ai o ia e avea ma uluai peresitene o le Siteki a Perth i Ausetalia.4 Ou te manatu o se vaega taua tele foi le avea o ia i le taimi nei ma uluai peresitene o le Malumalu o Perth i Ausetalia.
Mai le ata tifaga o le Shenandoah, e maua mai ai upu na tautalagia lea e musuia: “Afai tatou te le taumafai, tatou te le faia lava; ma afai tatou te le faia, aisea la ua tatou o mai ai iinei?”
Ua i ai nei le silia ma le 60,000 faifeutalai faamisiona o loo auauna atu i le Alii i le lalolagi atoa. O le toatele o nei faifeautalai o loo faalogologo mai i le po nei, ma maimoa mai i lenei sauniga a le peristua o le Konafesi Aoao. Latou te tatalo ona latou o lea, ma faatuatua i le Alii e faatatau i le mea o le a auina atu i ai i latou ma faatuatua i o latou peresitene o misiona po o fea latou te talai ai i a latou misiona. Faatasi ai ma le tele o faaaliga e faatatau i o latou valaauga paia o loo i ai ia fuaiupu e lua e sili ona ou fiafia i ai. E maua uma mai le Mataupu Faavae ma Feagaiga.
O le fuaiupu muamua e mai le vaega e 100. O le a outou manatuaina sa tele ni taimi sa tuua ai e Iosefa Samita ma Sini Rikitone o la aiga ma sa latou popole tele mo i la’ua. Na faaali atu e le Alii ia i latou lenei faamautinoaga, lea e avea foi ma faamafanafanaga i faifeautalai i le Ekalesia atoa: “E moni, ua faapea mai le Alii ia te oulua, a’u uo e … o loo manuia o oulua aiga; o loo i o’u lima i latou, ma ou te faia ia i latou e tusa ona lelei ia te a’u, aua e ia te a’u mana uma.”5
O le fuaiupu lona lua e mai le vaega e 84 o le Mataupu Faavae ma Feagaiga: “Ai foi se talia outou, ou te i ai foi, aua ou te muamua atu i o outou luma. Ou te i ai foi i lo outou itu taumatau ma lo outou itu tauagavale, o lo’u Agaga o le a i outou loto, e si’omia foi outou e a’u agelu, e lagolagoina outou.”6
E ese le musuia o le auaunaga faafaifeautalai na tuuina atu e Walter Krause, o loo nofo nei i Prenzlau, i Siamani. O le Uso o Krause, o lana auaunaga i le Alii e logologoa, ma ua 92 nei tausaga o lona soifua. I le avea ai ma se peteriaka, ua ia tuuina atu le silia ma le afe ia faamanuiaga faapeteriaka i tagata o le Ekalesia o loo nonofo i le tele o vaega o Europa.
I le leai o se fale e nonofo ai ina ua mavae le Taua Lona II o le Lalolagi, e pei o le toatele o isi tagata i lena taimi, sa nonofo ai le Uso ia Krause ma lona aiga i se tolauapiga a tagata sulufai i Cottbus ma amata ai ona auai i le lotu iina. Na vave ona valaauina o ia e taitai le Paranesi a Cottbus a le Ekalesia. I le fa masina na mulimuli ane ai, ia Novema o le 1945, a o faatafunaina lava le aai, na malaga atu ai ia le peresitene o le Itu o Peresitene Richard Ranglack i le Uso ia Krause ma fesili atu ia te ia po o le a sona manatu i le alu atu i se misiona. O le tali a le Uso ia Krause na atagia ai lana tautinoga i le Ekalesia. Na fai mai o ia, “Ou te le tau mafaufau i ai. Afai ua manaomia a’u e le Alii, o le a ou alu.”
Na alu atu o ia i le aso 1 o Tesema, 1945, ma le luasefulu maka (tupe Siamani) i lana taga ma se fasi falaoa mago. O se tasi tagata o le paranesi na tuuina atu ia te ia se ofu mafanafana a sona atalii na maliu i le taua. O le isi tagata, o se fai seevae na ia tuuina atu ia te ia se pea seevae. Faatasi ai ma nei mea ma ni ofutino se lua, o ni solosolo se lua, ma ni pea totini se lua, sa ia alu atu loa i lana misiona.
I se tasi taimi, i le ogatotonu o le taumalulu, na ia savali atu ai mai Prenzlau e agai atu i Kammin, o se nuu laitiiti i Mecklenberg, lea e 46 tagata e auai i sauniga sa faia. E taunuu atu o ia ua pogisa i lena afiafi ina ua mavae le ono itula sa ia savali ai i luga o auala ta, o ala pefu, ma i’u ai ina ua ia sopoia ia fanua sa suotosinaina. Ina ua tau lalata atu o ia i le nuu, na tau atu o ia i se vaega tele o le fanua e pa’epa’e ma laugatasi lea e faigofie ona savali ai, ma e le’i pine ae taunuu atu loa i le fale o se tagata o le Ekalesia e faamautu ai i le po.
O le taeao na sosoo ai na tu’itu’i atu ai le tagata o loo vaaia ia taaloga i le faitotoa o le fale o le tagata lenei o le Ekalesia, ma fesili atu, “O i ai sau malo?”
“Ioe,” o le tali lea.
Na faaauau le tala a le tagata o loo vaaia ia taaloga, “Sau la e vaai i ona tulaga vae.” O le vaega tele ma laugatasi o le fanua lea na savali mai ai i luga ia le Uso ia Krause o se vaituloto ua to’a, ma o se taimi na muamua atu na faia ai e le tagata e vaaia ia taaloga se pu tele i le vaituloto mo fagotaga. Na agi atu le matagi ma tafi atu ai le kiona ma ufiufi ai le lua lea ma na le mafai ai e le Uso ia Krause ona iloa atu le tulaga matautia lea. Na iloga lelei ona tulagavae i augutu o le lua ma faasasao atu loa i le fale o le tagata lea o le Ekalesia, e aunoa ma lona iloaina o se mea i ai. O le mamafa o lana ato faafafa ma ona seevae pa’u, na semanu e mautinoa lava lona malemo ai pe ana toe laa teisi lava lona vae agai i luma i le mea o loo i ai le lua na te leiloa. Na ia faamatalaina mulimuli ane faapea o lenei mea na tupu sa avea ma mea e talanoa i ai tagata o le nuu i lena taimi.7
O le olaga atoa o le Uso ia Krause o le mulimuli lea i le faatulagaga o le tatalo ona alu lea.
Afai e i ai se tasi o i tatou e lagonaina le le agavaa pe tau masalosalo e tali atu i se valaauga faaperisitua e auauna atu i le Alii, ia manatua lenei upu moni paia: “E mafaia mea uma e le Atua.”8
E le’i leva talu ai nei ona ou iloaina le maliu o James Womack, le peteriaka o le Siteki a Shreveport i Louisiana. E tele tausaga sa auauna atu ai o ia ma na faamanuiaina ai le tele o olaga. I tausaga e tele ua mavae, na fetufaai mai ai e Peresitene Spencer W. Kimball i a Peresitene Gordon B. Hinckley, Elder Bruce R. McConkie, ma a’u se mea na ia oo i ai i le tofiaina o se peteriaka mo le Siteki a Shreveport i Louisiana o le Ekalesia. Na faamatalaina e Peresitene Kimball le auala na ia faia ai faatalanoaga, o le auala na ia saili ai, ma le auala na ia tatalo ai, ina ia mafai ona ia iloa le finagalo o le Alii e faatatau i le filifiliga. Na i ai se mafuaaga, na leai ai ma se tasi o tagata na fautuaina mai mo lenei tofiga i lenei taimi faapitoa.
Ua faaauau pea le aso; ua amata sauniga o le afiafi. E le’i leva ae faliu atu ia Peresitene Kimball i le peresitene o le siteki ma fai atu i ai e faailoa mai se tagata o loo nofo masalo pe o le lua vaetolu o le alu agai i tua mai luma o le falesa. Na tali atu le peresitene o le siteki faapea o lea tagata o James Womack, lea na faapea atu ai ia Peresitene Kimball, “O ia le tagata ua filifilia e le Alii e avea ma peteriaka a lau siteki. Faamolemole ia logo atu o ia ina ia ma feiloai i le potu o fautua maualuga pe a mae’a le sauniga.”
Sa tau le mautonu le peresitene o le siteki, o Charles Cagle, aua e le’i foliga mai ia James Womack o se tagata ua talafeagai. O loo i ai pea ni ona manu’a tuga a o tau ai i le Taua Lona II a le Lalolagi. Ua mumutu uma ona lima ma se vaega o le isi ogalima, e faapea foi i lana vaai ma lana faalogo ua tau le lelei. E leai se tasi na manao ia te ia i le aoga faaloia ina ua ia toe foi mai, ae sa tu tolu o ia i lana vasega i le Iunivesite a le Setete o Lusiana.
O lena afiafi a o feiloai atu ia Peresitene Kimball i le Uso ia Womack ma logoina o ia faapea ua tofiaina o ia e le Alii e avea ma peteriaka, sa umi o leai se mea e gase i totonu o le potu. Ona faapea atu lea o le Uso o Womack, “Le Uso e Kimball, o lo’u malamalama o se peteriaka e ao ona tuu ona lima i luga o le ulu o le tagata na te faamanuiaina. E pei ona e silasila mai, e leai ni o’u lima e tuu i luga o le ulu o soo se tasi.”
Na valaaulia e le Uso ia Kimball, i ona uiga tauagafau ma le onosai, ia le Uso ia Womack ina ia tu i tua o le nofoa o loo nofo ai ia le Uso ia Kimball. Ona ia fai atu lea, “Ia punou mai i luma le Uso e Womack, ma vaai pe pa’i mai pito o ou lima i luga o lo’u ulu.” Na fiafia ia le Uso ia Womack, ina ua pa’i ona lima mumutu i le ulu o le Uso o Kimball, ma se tuualaga na faalogoina e faapea, “E mafai ona ou pa’i ia te oe! E mafai ona ou pa’i ia te oe!”
“E mafai lava ona e pa’i mai ia te a’u,” o le tali lea a le Uso o Kimball. “Ma afai e mafai ona e pa’i mai ia te a’u, e mafai foi ona e pa’i atu i soo se tasi e te faamanuiaina. Atonu o a’u le tagata sili ona puupuu o le a nofo i ou luma.”
Na lipoti mai e Peresitene Kimball ia i matou e faapea ina ua tuuina atu le igoa o James Womack i le konafesi a le siteki, “sa vave ona tasii i luga lima o tagata e lagolagoina ma le fiafia.”
Na matou manatuaina ai ia upu a le Alii na tuuina atu i le perofeta o Samuelu i le taimi na tofiaina ai ia Tavita e avea ma tupu o Isaraelu i le lumanai: “Aua e vaai tagata i le tino, ae vaai le Alii i le loto.”9
Uso e, po o le a lava o tatou valaauga, e tusa po o a o tatou popolega ma atugaluga, ia tatou tatalo ona tatou o lea ma fai, ma manatua fetalaiga a le Matai, le Alii o Iesu Keriso, o le na folafola mai: “Ou te ia te outou i aso uma lava, e oo lava i le gataaga o le lalolagi.”10
I le Tusi a Iakopo o loo fautuaina ai i tatou, “A ia fai outou ma e anaana i le upu, ae aua le na ona faalogologo i ai, o faaseseina ai outou e outou.”11
Ia avea i tatou, o se vaega malosi o e ua umia le perisitua, ma e anaana i le upu, ae le na ona faalogologo i ai. Ia tatou tatalo; ona tatou o lea ma fai.
I le suafa o Iesu Keriso, amene.