2002
O Le Alofa Mama: O Le Alofa e Atoatoa ma Faavavau
Iulai 2002

O Le Alofa Mama: O Le Alofa e Atoatoa ma Faavavau

Elder Gene R. Cook

O Le Fitugafulu

Pe a tatou mafaufau pea ma galulue faapei o Ia, o le a seesee malie ese atu uiga faalelalolagi o le tagata ae suia i le loto ma le mafaufau o Keriso

Ou uso e, ma tuafafine pele, Ua ou manao tele i lenei itula nai lo se isi lava mea e molimau atu, se molimau patino ia te au lava, i le alofa o le Atua mo au, mo oe, ma tagata uma lava. O ai se tagata e mafai ona faamatalaina le loloto o lona agaga faafetai i le iloaina o le alofa o le Atua? E maeu le faamanuiaina o au i le tele o tausaga ua tatou mafuta ai ma outou ma maua le alofa mama o Keriso ua ala mai ia te outou. Ou te faafetai tele i le Atua ma outou.

FAAMALAMALAMAINA O LE ALOFA MAMA

Sa fetalai mai le Alii, o le alofa mama, o le “alofa mama lea o Keriso,”1 ma le “fiafia silisili i le Agaga,”2 “o le mea sili i mea uma e foaiina mai e le Atua,”3 “atoatoa … faavavau.” 4

E faigata le alofa e pei foi o lona faamatalaina, ae e faigofie ona iloa i soifuaga o i latou e maua i ai.

  • O se tina matua ua loa ona tausaga, ma pipili, na te okaina le nusipepa o le aoauli, na te iloa e sau ai le alii tufa nusipepa, o se atalii a sana tama i lona aiga i aso uma, ma ia aoao atu ai ia te ia i le tatalo a o ia tootuli atu i ona tafatafa.

  • O se tina i le vaitaimi faigata o le tamaoaiga ma le utiuti o aano o manu fasi, sa foliga mai sa fiafia ma talisapaia na o apaau moa, ma o se mea sa matua le malamalama ai tagata uma.

  • O le faamaasiasiina i luma o le toatele sa le tatau ona oo i ai se tama, peitai sa ia talia lava ma le lotomaualalo.

Pe le o le autu moni o nei faataitaiga o le alofa, o le le manatu faapito, ma le le sailia o se taui? O o tatou uiga paia uma e foliga mai e ala mai ma taitaia e lenei uiga e tasi.5 Atonu o tagata uma latou te maua le meaalofa o le alofa, peitai o le alofa mama e foaiina mai ia i latou o e mulimuli moni ia Iesu.6

O lea lava mana o le Atua ua i ai i ona uiga faaleatua.7 O le mana o le perisitua e faatumauina pea i nei uiga.8 Tatou te saili nei uiga, aemaise lava i le alofa moni, o le alofa mama o Keriso.9

O I LATOU O E FAAUMATIAINA LE ALOFA MA LE FILEMU

O lea foi e tu mai le tiapolo, o le e faaumatiaina lenei alofa, ae suitulaga ai le ita ma le faalii.10 O lau uo o Viliamu, sa faapena: e faalii. Sa foliga mai po o le a lava se mea e tupu, e fai mai lava e sese le Atua—o se ma’i, maliu, o se tamaitiiti faalogogata, o se vaivaiga faaletagata, o se tatalo e “le i talia” mai—o nei mea uma sa faamaaaina ai lona loto. O le ita o lona loto, lea e le i pine ae sasao i luga, sa faasaga atu i le Atua, o ona uso a tagata, ma ia lava. E mai lona loto le le talitonu, faaulu malo, faamaualuga, finauga, ma le leai o se faamoemoe, alofa, ma se taitaiga. Sa faanoanoa tele o ia!

O le au faaumatia filemu11 ua faatauasoina Viliamu mai lagona o le Atua mo ia. Sa le mafai ona ia maua pe lagonaina foi le alofa o le Atua. Sa le mafai ona ia iloa, aemaise lava i taimi faigata, sa faamanuiaina lava o ia e le Atua. Peitai ane, sa ia taui atu le alofa i le ita. Pe tatou te lei lagonaina ea lena mea, i nisi o taimi? Tusa lava pe ua le tatau ona alofagia i tatou, ae e sili pea lava Lona alofa mo i tatou. E moni lava, Na uluai alofa mai o Ia, ia i tatou.12

O MAFATIAGA ONA O SE FAAMOEMOEGA: O LE ALOFA MAMA E MAMANA

O la’u uo o Peti, o se faafeagai lelei lava. Sa feagai foi o ia ma le tele o faigata e pei foi o Viliamu peitai, ona sa ia lagonaina le alofa o le Atua, o lea sa ia tigaina ai i tofotofoga i le suafa o le Faaola,13 tofo i lona manuia e faavavau,14 ma o lea na maua ai lona faatuatuaga loloto i le Atua ma lona alofa, faatasi ai ma le malosiaga e gafataulimaina ai soo se mea e ono oo mai.

Sa faateleina lona alofa i isi. Sa foliga mai sa vave ona ia faamagalo atu i isi. Sa ia aoao ina ia mafai ona faaosofia tagata ia latou lagonaina lona alofa. Sa ia aoaoina o le alofa e fetufaai atu o le alofa faateleina lena.

Mulimuli ane, sa ia aoao ia faateleina lona alofa ia te ia lava, faateleina lona agalelei, agamalu ma le faapalepale. Sa faamutaina ana tauiviga mo le faatauaina o ia ae amata ona alofa ia te ia i le ala o loo alofa mai ai le Atua ia te ia. O lona lava faatusa ia te ia lava, na avea ma faatusa o le Alii ia te ia.

O LE ILOAINA, MAUA, MA LE FAAILOA ATU O LE ALOFA O LE ATUA

E faapefea la, ona tatou “faaoofu i tatou i noataga o le alofa … o le atoatoa ona lelei ma le filemu”?15 Sei ou fetufaai atu ia te outou ni manatu se tolu.

  1. Iloaina Lona Alofa

    “Tatalo … ma le malosi uma o lou loto”16 mo lenei meaalofa. Ia faia i le agamalu ma le loto momomo ona faatumuina lea o oe i le faamoemoe ma le alofa mai le Agaga Paia, lava Ia. O le a ia faaali atu Keriso ia te oe.17

    O se vaega o le meaalofa o le alofa MAMA, le mafai ona iloaina le aao o le Atua ma lagona lona alofa i mea uma ua siomia ai i tatou. I nisi taimi, e le faigofie ona maua le alofa o le Atua ia i tatou i mea uma tatou te oo i ai, aua Ia o Le Foai mai e le o faalauaiteleina. O le a e saili i lou olaga atoa e fiailoa Lona aao ma meaalofa o loo Ia foaiina mai i ou luga, ona o ala faatauvaa o loo Ia tuuina mai ai nei faamanuiaga matagofie.

    Mafaufau loloto faatasi ma au mo sina taimi i meaalofa faatupu nei: o le mamalu o ana foafoaga uma,18 le lalolagi, le lagi; o ou lagona o le fiafia ma le alofa, o Ana tali mai ma le alofa tunoa, faamagaloga, ma le anoanoai o tali i tatalo, o meaalofa o e pele, ma le faaiuga, o le meaalofa sili o meaalofa uma—o le meaalofa a le Tama o Lona Alo na taulagaina, o le atoatoa e toatasi i le alofa, o le alofa lava lea o le Atua.19

  2. Mauaina Lona Alofa ma le Lotomaualalo

    Ia faafetai atu mo meaalofa aemaise mo Le na foaiina mai le meaalofa.20 O le agaga faafetai moni o le malosiaga e iloa ma faamaualalo ai, lagona, ma maua ai le alofa.21 O le agaga faafetai o se ala e faafoi atu ai lou alofa i le Atua. Ia e iloa Lona aao, ma tau atu ia te ia, faailoa atu lou alofa ia te Ia.22 Pe a e iloa moni le Alii, o le a e mauaina se sootaga vavalalata ma le paia ua fausia i luga o le faatuatuaina. O le a mafai ona e iloa e malamalama o Ia i ou lagona toatamai23 ma le faapelepele o le a ia tali atu ai ma le alofa ia te oe.

    Ia e taliaina. Ia e lagonaina. E le lava le na o lou iloa e alofa le Atua ia te oe. O lea meaalofa e tatau ona lagonaina pea i lea aso ma lea aso.24 O le a avea ma se faamalosiauga paia i lou olaga atoa. Salamo. Tuuese ni mea faalelalolagi mai lou olaga,25 e aofia ai le ita. Ia maua se faamagaloga faifai pea o au agasala 26 ma ia e taofi i ou tuinanau uma, ina ia faatumuina oe i le alofa.27

  3. 3. Faailoa Atu Lona Alofa

    O le tali mai a le Alii ia te i tatou e masani ona faatumuina i le alofa. Pe le tatau ea ona tatou tali atu ia te Ia i le agalelei, ma lagona moni o le alofa? Na te aumaia le alofa tunoa (po o mea lelei) mo le alofa tunoa, o uiga faaalia foi mo uiga faaaliga. A faateleina lo tatou usiusitai, tatou te maua le tele o le alofa tunoa (po o mea lelei), ona o mea lelei tatou te toe faafoi atu ia te Ia.28 Aveatu ia te Ia ou uiga e aupito sili ona lelei, pe a Ia oo mai, o le a avea foi oe e faapei o Ia.29

    E pei ona muai faatumulia o se tagata i le alofa, ma faailoa atu ia lagona i le Atua, o se tasi po o oe lava, o se vaega lautele o lena uiga o le a oo mai ma le Agaga. O le mea moni lena i uiga uma faaleatua. O faalogona amiotonu e faia e le tagata e foliga mai ua sili atu le faateleina o ia faalogona mai le Agaga. Seiloga ua e lagonaina le alofa, ona mafai lea ona e faaali atu le alofa moni i isi. Ua tauina mai e le Alii ia i tatou ia tatou fealofani e pei ona Ia alofa mai ia i tatou,30 o le mea lea ia manatua: ina ia alofaina mai, ia e alofa atu ma le faamaoni.31

O FUA O LE MEAALOFA O LE ALOFA MAMA

Uso e, ma tuafafine, i le avea ai ma se molimau faapitoa a Keriso, ou te toe molimau atu ia te outou i le alofa tele o le Atua mo i tatou uma taitoatasi. O le faalauteleina o lena meaalofa mai le Atua o le a aumaia ai se loto fou, se loto mama, ma se alofa faifai pea ma le filemu. Pe a tatou mafaufau pea ma galulue faapei o Ia, o le a seesee malie ese atu ai uiga faalelalolagi o le tagata ae suia i le loto ma le mafaufau o Keriso.32 O le a tatou avea faapei o Ia, ma tatou talia moni ai lea o Ia.33

O le perofeta a le Alii o loo i o outou luma nei, e alofa ia te outou, ma e faapena foi i latou uma nei, o le Usoga. Tau ina ia faamanuia mai le Alii ia i tatou ina ia i ai “le alofa o [o tatou loto] … ia [te Ia] e faavavau.”34 “Ina ia mama [a tatou] avega, ona o le olioli mai lona Alo”35 o la’u tatalo lea i le suafa o Iesu Keriso, amene.

Faamatalaga

  1. Moronae 7:47.

  2. Tagai 1 Nifae 11:22-23; 8:10–12

  3. 1 Nifae 15:36.

  4. Moronae 8:17.

  5. “Na o le tasi le uiga lelei, e taua, po o le mataupu faavae, lea e faapelepeleina ma ola ai tagata o le Au Paia, o le a faamautinoaina ai le faaolataga i le faitau fia afe o tagata. Ou te taua faapuupuu le alofa mama, po o le agaalofa, lea e aumaia ai le faamagaloga, faapalepale, agalelei ma le onosai” (Brigham Young, Deseret News, 11 Ian. 1860, 353). 6

  6. Tagai Moronae 7:48. E i ai se eseesega o le alofa mama ma le alofa? Sa faaaoga eseese e le Alii nei upu i nisi o taimi, i le MFF 4:5. Fai mai nisi o le alofa moni e faaopoopo i ai ma le ositaulaga—o le alofa faavaitaimi. Atonu o le alofa mama o le alofa atu lea, e pei foi o le faatuatua i le talitonu. O le faatuatua ma le alofa mama e faatino, galue ma ositaulaga. O le alofa moni e taitaiina mai ai Lona alofa mo i tatou, lo tatou alolofa mo Ia, ma le alofa Faakeriso mo isi.

  7. Tagai MFF 84:19–24.

  8. Tagai MFF 121:41–46.

  9. “O se tagata e tumu i le alofa o le Atua, e le malie lona loto pe a manuia na o lona aiga, ae e faasafua atu i le lalolagi atoa, e naunau foi ia manuia le fanauga uma a tagata” (Joseph Smith, History of the Chursh, 4:227).

  10. Pe a tutupu mafatiaga moni o le olaga, o loo i ai pea le tiapolo e faaoso le ita i loto o tagata, a o loo faifai pea le tuuina mai e le Alii o le alofa. O nei foi mafatiaga “… e toatele ua faamaaaina… . ma le toatele ua faamaluluina ona o o latou puapuaga” (Alema 62:41). E matagofie tele faataitaiga o auala e tali atu ai i puapuaga.

  11. O nisi o mea e faaumatia ai le alofa ma le filemu o tagata, ua le na o le: popole, manao i viiga, losilosivale, le usiusitai, le mautonu, ita, lotoleaga, pulega amioletonu, o le le talitonu, o le le onosai, faamasinosino, faatupuina o lagona tiga, faamaualuga, finauvale, muimui, sailia o le mamalu, faatautava, talapelo. O nei mea uma, o uiga ia o le tagata o le lalolagi, ae le o se tagata o Keriso.

  12. Tagai 1 Ioane 4:19.

  13. Tagai MFF 138:13. Sa iloa e la’u uo o le a faamaonia o ia lava e ala i le puapuaga (tagai Ape. 3:24–25; MFF 98:13–14); aoao e filifili mai le lelei ma le leaga (tagai 2 Ni. 2:18); aoao e oo mai faamanuiaga pe a mavae tofotofoga (tagai MFF 58:2–4); aoao le usiusitai, onosai, ma le faatuatua (tagai MFF 105:6; Mosaea 23:21; Roma 5:3–5); ia maua se faamagaloga o agasala (tagai Helamana 15:3; MFF 132:50, 60; 95:1).

  14. Tagai 2 Peteru 1:1–8.

  15. MFF 88:125.

  16. Moronae 7:48.

  17. Tagai Moronae 8:25–26; Roma 5:5; 2 Nifae 26:13.

  18. Tagai Mose 6:63; Alema 30:44.

  19. Tagai 1 Ioane 4:8.

  20. Tagai MFF 88:33.

  21. Tagai Alema 5:26.

  22. Tagai Alema 26:16; Moronae 10:3.

  23. Tagai MFF 133:52–53.

  24. Tagai Alema 34:38.

  25. Tagai 1 Ioane 2:15–17.

  26. Tagai Mosaea 4:11–17.

  27. Tagai Alema 38:12.

  28. Tagai MFF 93:12–13, 20.

  29. Tagai 1 Ioane 3:1–3.

  30. Tagai Ioane 13:34; MFF 112:11.

  31. “Ia faaeteete i le faamaualuga ma aua nei saili ia sili atu le tasi i le tasi, ae ia galulue mo le lelei o le isi tagata” (Joseph Smith, Teachings of the Prophet Joseph Smith, sel. Joseph Fielding Smith [1976], 155).

  32. Tagai 1 Korinito. 2:16; 2 Korinito. 10:5.

  33. “O le tagata ua maoae tele o le ua faapei o Keriso. O ou manatunatuga loloto e uiga ia Keriso o le a iloa gofie ai le ituaiga tagata o loo e i ai, ma o le a sili ona iloa gofie ai au galuega o le a faia… .Ona o lo tatou filifilia o ia e avea ma faataitaiga o le atoatoa, ua tatou faatupuina i totonu o i tatou lava le naunau ia avea pei o ia, ma faauo atu ia te ia” (David O. McKay in Conference Report, Apr. 1951, 93, 98). Pe a e mafaufau ia te ia i se taimi umi, o le a amata ona e amio faapei o Ia. Pe a lava le taimi e amio ai faapei o Ia, o le a avea moni oe e pei o Ia.

  34. Alema 37:36.

  35. Alema 33:23.