O le Avanoa e Auauna Atu Ai
Ua ou iloa le loloto ma le le matineia o Lona alofa mo i tatou.
I le maea ai o tausaga e 34 i totonu o le Ofisa o Aoga a le Ekalesia, na tonu ai ia i maua ma lou toalua i le tolu tausaga talu ai o le a ma litaea ma taumafai atu i se i si mea fou i le olaga. Ma o lena tulaga, na amata ai ona faia a ma fuafuaga. Na suia lo ma fale ina ia ma latalata atu i le ma fanau ma a latou fanau. Sa amata ona ou atinaeina ni taumafaiga, sa ou manatu o ni atinae matagofie. Sa ou manatu, o nisi o nei mea ua sili atu ona matagofie. Ma e lei leva ae oo mai loa se taimi taua o le olaga.
O se faamanuiaga ia i maua i lena taimi lo ma nonofo faafesagai mai i le isi itu auala ia Elder F. Enzio Busche, o le ua avea nei ma se Fitugafulu ma lona faletua. O le tasi aso na aoaoina ai e Elder Busche la matou korama o le au faitaulaga sili, ma sa ia taulotoina mai ai se mau mai le tusi a Alema i le taimi na momoo ai Alema e fia faapei lona leo o le leo o se agelu. Ona vave salamo ai lea o Alema mai nei lagona, ma ia tuuina mai ai se faamatalaga matagofie o loo i le fuaiupu e 4. Sa ia fautua mai ina ia tatou faaeteete i mea tatou te faananau i ai, aua e foai mai e le Alii mea ua faananau i ai o tatou loto. Ona oo mai lea o se faamatalaga ua sili ona mataina ia te au: “O le faaolataga, po o le malaia.” O le a tuuina mai e le Atua ia i tatou, e tusa ma o tatou loto, o mea ua tatou mananao i ai (tagai i le Alema 29:1–5).
Na ou alu i le fale i lena aso—e lei faapea na ou lagonaina o ou manao ua sese—peitai i lena taimi, na ou iloa ai o ia manao o au lava e ona. O lena aso sa ou taumafai ai e faailoa atu i le Alii o le mea ua ou manao e fai, o le faataunuuina o Lona finagalo. O lena taimi, sa ou manatu ua ou matuai tautino atu lava lea lagona, peitai ua ou iloa e faigofie tele lou tautala ai ae matua faigata lona faataunuuina. E pei ona saunoa mai Elder Maxwell i le aso ananafi, seiloga ua tatou tuuina atu moni o tatou loto i le Atua, ona amata ai lea ona faataalise lana galuega o le faamamaina ma le faapaiaina ma le faaatoatoaina (tagai i le Helamana 3:35). Na ma iloa i lena tolu tausaga, ua tuuina ai i maua e le Alii i auala eseese, nai lo mea sa maua faamoemoeina, ma o lenei valaauga o se tasi o nei auala.
I se tasi aso, ina ua uma ona valaau mai Peresitene Hinckley ia i maua ma lou toalua, sa ou faitau ai i le tusi a Teuteronome ma ou tau ai i se fuaiupu i le mataupu 12 na taua tele lona uiga ia te au. Ua tuuina mai faapoloaiga. Ua fetalai mai le Alii, “E te olioli foi i luma o Ieova lou Atua, i mea uma lava e te faia i ou lima” (Teuteronome 12:18). Ma te faafetai tele i le Alii mo lenei faamanuiaga e olioli ai i lenei avanoa fou.
Talu mai le amataga o nei ala, ua maua aoaoina ai le alofa tunoa moni o le Atua ma le loloto ma le le matineia o lona alofa mo i tatou. I le 16 o ou tausaga ma le le lava o le poto ou te iloa ai mea uma, na pai mai ai le Agaga i lou loto ma ou iloa ai le taua o le tamaitai e te faaipoipo atu i ai. Na amata mai i lena taimi ona ou tatalo atu i le Alii na te saunia se tamaitai e avea ma au soa e faavavau. Sa taliaina uma na tatalo, ma o mea uma ua matou fiafia ai i totonu o lo matou aiga faatasi ma fanau ma a latou fanau ua ala mai uma ona o ia.
Ua ou iloa o Iesu o lo tatou Keriso, ma o lo laua alofa tunoa ma le Tama ua faavavau ma leai sona mutaaga, e tusa pe tatou te le agavaa. Ou te alofa pea i le Perofeta o Iosefa Samita, ae o se faamanuiaga mo au lou faaaluina pe a ma le 10 tausaga i le suesueina o lona olaga, i ana tusitusiga, ana aoaoga, ma i latou sa silafia ma alolofa ia te ia, ma ua ou iloa ai o ia lava o le perofeta o perofeta o se tasi sa agavaa e aumaia le Toefuataiga o lenei augatupulaga maoae mulimuli. Faatasi ai ma se mana malosi ua ou iloa ai o ki sa ia toefuataiina ua faaauauina pea e lei toe motusia e oo mai i lenei aso ma o loo i ai nei i lo tatou perofeta soifua o Gordon B. Hinckley.
Ou te toe faapea atu, ma te olioli tele i lenei avanoa e auauna atu ai. Ua maua lagona le faamaualalo ma le agaga faafetai tele, ou te tuuina atu ai lenei molimau ia te outou i le suafa o Iesu Keriso, amene.