O Le Auala ua Tatou Ta’ua o le Olaga
Ae a e tumau i le ala sa’o, o le a aoga taimi uma ma puapuaga o le olaga na e oo i ai i le ala, ona o le taui o i ai i le faaiuga o le malaga fai o le olaga.
Uso e, ua ou fiafia lava ina ua tatou faatasi i lenei afiafi. Ou te fia tautala faapitoa atu foi i alii talavou o le Perisitua Arona. Ou te alofa ia te outou ma e ese lo’u popole mo outou.
I le tamaitusi fou o le Mo Le Malosi o le Autalavou, o loo saunoa atu ai le Au Peresitene Sili ia te outou e faapea: “O matou alii talavou e…ua i ai lo matou talitonuga tele ia te outou. O outou o ni agaga faapitoa ua filifilia e soifua mai i lenei vaitaimi, [o se taimi] ua aupito sili ona tele ai tiutetauave ma avanoa, e faapea foi ona tetele ai tofotofoga. Ua outou i ai nei i le amataga o la outou faigamalaga i lenei soifuaga faaletino. E finagalo lo outou Tama Faalelagi ina ia olioli o outou olaga ma ia toe taitaiina atu outou i Lona afioaga. O faaiuga tou te faia i le taimi nei, o le a fuafua ai le tele o mea o le a mulimuli mai i o outou olaga faapea foi ma le faavavau.” (tamaitusi, 2001, 2).
Ou te faamoemoe, o le a i ai sina mea itiiti, i lenei afiafi, e mafai ai ona outou aoao mai i o’u tausaga toeitiiti atoa le 70 o o’u faimalaga i lenei auala ua ta’ua o le olaga. Atonu ua uma ona faamatala atu e o outou matua ma matua matutua lenei mea: “O le tele o tausaga o lou olaga, o le vave foi lena o le alu o le taimi.” E pei lava e na o sina minute lava, ua 12 ou tausaga ma lou olaga atoa o loo i ou luma, e le umi ae toeitiiti atoa lou 70 ma lou puimanava lapoa i ou luma!
E faigata ona talitonuina toeitiiti atoa le 13 tausaga ua mavae, sa ou lauga ai i le sauniga Aoao a le Au Perisitua. O le taimi lena, sa ou faamatala ai i le usoga, se faigamalaga sa matou faia ma o’u atalii, ma sa aoao mai ai i lena mea, le taua o le saunia lelei mo le faigamalaga o le olaga.
O le aso, ou te fia faamatalaina atu e uiga i isi faigamalaga sa ou faia, ma fetufaai atu ai lesona sa ou aoaoina mai ai.
Talu ai nei, sa fuafua ai e nisi o le matou aiga faapea, ai se malie pe a tietie uila mai Posemana, i Monetana agai atu i le Ava i Siakisone, i Uaiomi i le Iunaite Setete. O lenei faigamalaga e 225-maila, o le a faia i le tolu aso ma o le a matou sopoia ai faatolu le Vaeluaga o le Konetineta. Na matou fuafua faapea o le matou uia o atumauga i le taimi o le lelei o le tau, o se aafiaga matagofie matou te talisapaia ai foafoaga a le Atua.
Ina ua maea se fuafuaga ma se sauniuniga maeaea, sa matou tuua loa i a matou uila ma o’u atalii e toalua, ma lo’u afafine e toatasi, i le uluai aso mo la matou malologa i le po i Big Sky i Monetana. Sa matua manaia le taeao, ma sa matou faamoemoe mo se malaga manuia. Peitai, a o matou malaga atu, sa puaoa le lagi ma iu ai ina timu seia oo lava ina sau faatasi le timu ma le kiona ma le timu ‘aisa ’ma sa matou matua maalilili ai, ma susu, ma faanoanoa. Ina ua faaiuina le aso muamua o le matou faigamalaga, ma matou taunuu i le mea matou te faamautu i ai i le po, sa ou manatua ai e mafai ona faapena le olaga e pei o lena aso. O le mea e sili ai, sa matou saunia mo soo se ituaiga tau; pe a na fai matou te le faia, semanu e faigata ona faamaea la matou malaga i le aso muamua. I laasaga taitasi o le faigamalaga o le olaga, e tatau ona tutumu i tatou i le faamoemoe ma le manatu o le a lelei, peitai, e ao lava foi ona tatou sauniuni e fetaiai ma le fili po o faigata i se taimi.
O amioga tou te amatalia i lo outou talavou, e mafai ona tumau i lo outou olaga atoa. O le faia o faaiuga sa’o i le taimi nei, o le a mafai ai ona e savalia le ala o le a fesoasoani e te onosaia ai taimi aupito malulu ma le leaga o le olaga.
Mo se faataitaiga, afai ua e amio a’i i le faaaoga o le gagana masoa, o le umi a ona e faaaogaina, o le faigata foi lena ona suia pe tuu foi. E sili nei loa ona filifili se auala e ese, se auala e tau atu i mafaufauga mama, o upu ma faatinoga ina ia mafai ai ona e fiafia i le mafutaga ma le Agaga Paia. Manatu i le faigata o le faia o se misiona ae osooso ane le gagana leaga i lou mafaufau ae o la e te manaomia le avea o le Agaga ma au soa tumau. Afai o se faafitauli ia te oe le faaaogaina o le gagana leaga, o le taimi lenei e suia ai.
I le aso lona lua o le matou faigamalga, sa matou agai atu ai i West Yellowstone. Sa lelei mea uma e tatau ona i ai—sa lelei uila, sa malolosi o matou vae, a o matou latalata atu i lo matou taunuuga lona lua. O iina na ou iloaina ai, afai tatou te le faaeteete pe a sologa lelei mea uma o le olaga, e ono mafai ona i ai se tofotofoga e faagalo lo tatou Tama Faalelagi ma faamalo ia i tatou lava mo le tulaga fiafia ua i ai. Ia aua lava nei outou sese ai.
Sa aoao mai e le Perofeta o Iosefa Samita: “O le fiafia o le faamoemoega lea ma le fuafuaga o lo tatou ola ai; ma o le iuga foi lea, pe afai tatou te tulimata’ia le ala e tau atu i ai; ma o lea ala o le amioatua, amiotonu, faamaoni, paia, ma le tausia o poloaiga uma a le Atua” (Teachings of the Prophet Joseph Smith, sel. Joseph Fielding Smith [1976], 255–56).
Ua tumu le Tusi a Mamona i tala e uiga ia i latou sa faamanuiaina e le Alii, ona latou femitai ai lea i mea ua latou faataunuuina. Ona iu ai lea ina latou tuua le ala sa’o ona o lo latou faamaualuga, ma latou le toe maua ai mea uma sa latou maua ona ua pauu ese mai le upumoni. Ia mautinoa tou te le faapei o sa Nifae o anamua; ia manatua e le aunoa le punavai moni o o outou faamanuiaga.
I le aso lona tolu o le matou faigamalaga, sa ou iloa ai e ui ina i ai tauiviga i o tatou olaga a o agaigai atu i luga o le mati’e, ae o o tatou uiga faaalia o le a fuafua ai le ala tatou te taulimaina ai. O le aso lena sa matou laasia ai faatolu le Vaeluaga o le Konetineta, mai se maualuga e 4,800 futu e oo atu i le 8,300 futu. O le a’ea o se atumauga tifato i se uila, e manaomia ai se uiga faalia sa’o ia oo atu ai i le maualuga sa’o. E faapena foi le olaga. O le faatuina o sini e tatau ai, ma le taulai atu i ai o mata, o le a e aoaoina ai le amio pulea ma faataunuu ai le tele o mea. Ioe, sa i ai taimi na aea ai ala o mauga tifato na toetoe ina ou le gafatia, ae ou te le i faavaivai ai aua sa taulai atu la’u vaai i lo’u faamoemoega.
Alii talavou e, o le Perisitua Arona, ou te uunaia outou ina ia faatutu sini mo outou lava, e pei o le faamaeaina o le seminare, faia se misiona faamamaluina, faauu mai le kolisi, ma ia agavaa mo se faaipoipoga i le malumalu. Atonu e foliga mai o ni sini tetele naua nei i le tulaga ua outou i ai nei, ae afai e amata nei ona outou galulue agai i na sini, o le a sili atu ona outou saunia ina ia ausia.
E lua tausaga talu ai, sa ma maua ai le avanoa ma Elder Richard G. Scott o le Korama a Aposetolo e Toasefululua, e o i se malaga i se paopao i le vaega tuufua o Quetico i Ontario, i Kanata, ma tauamo lo matou paopao ma le uta i le va o vaituloto. Ina ua matou taunuu i le ogatotonu o le isi vaituloto tele, sa matua leaga le tau, ma sa matamataita ma matautia le sou o le vai, ma felafoaiina solo ai si o matou tamai paopao.
Sa tatau ona faia se matou faaiuga. Pe matou te taumafai pea seia taunuu i le mea na fuafuaina, pe o le a matou faatutu atu i le motu pito lata mai ma faatalitali ai seia maui atu le afa. Sa foliga manino mai le tali, ae sa le o se faaiuga faigofie. A faaauau pea, atonu e mafai ona matou taunuu i le nofoaga matou te tolauapi ai. A toe faatuatuai le matou malaga, o le a matua tuai ona taunuu ma atonu o le a matou malaga i le pogisa. A o matou manatunatu loloto i ni mea e fai, sa ma maua le uunaiga o le a vave faatutu atu i le motu aupito lata mai. A o matou aga atu i ai, sa afatia i matou i se afa e sili atu ona matautia. Ana faapea e faaauau pea le folauga, semanu e tuga se mea e oo i ai o matou ola.
O le olaga lenei, e manaomia ai lo tatou faia o faaiuga matuia, o ona taunuuga e mafai ona i ai se aafiaga tumau i lo tatou lumanai faaleagaga. Ou te uunaia outou ia agavaa e le aunoa e saili atu i le Agaga ina ia fesoasoani ia te outou e filifili le mea tonu e le aunoa.
O le Tusi a Mamona o loo ta’u mai ai e Nifae: “Ona i ai lea o outou i lenei ala sa’o ma le lauitiiti e tau atu i le ola faavavau; ioe, ua ulu atu ai outou i le faitotoa; ua faia e outou e tusa ma poloaiga a le Tama ma le Alo; ua maua foi e outou le Agaga Paia” (2 Nifae 31:18).
E pei ona faaiuina e lo matou aiga le malaga e 225-maila i uila, tusa lava po o le a le faigata e mafai ona oo i ai i lenei auala ua ta’ua o le olaga, ae o loo i ai lava le fiafia o loo faatalitali mai mo i latou e tausia poloaiga ma tumau e oo i le iuga.
O outou na alii talavou o le Perisitua Arona, ua i ai le tiutetauave e taulai atu ma le mausali i lo outou taunuuga e faavavau. Ioe, o le malaga o le olaga, e mafai ona tele fitaituga. Ioe, o le a i ai aso e te lagona ai le faigata o le olaga. Ae a e tumau i le ala sa’o, o le a aoga taimi uma ma puapuaga o le olaga na e oo i ai i le ala, ona o le taui o i ai i le faaiuga o le malaga fai o le olaga.
Ou te toe fai atu, mai le tamaitusi o le, Mo Le Malosi o le Autalavou, o loo tusia ai e le Au Peresitene Sili: “Ia tausisia le mama o outou mafaufau ma o outou tino mai agasala o le lalolagi, ina ia mafai ai ona outou faia le galuega sili o loo i o outou luma. Matou te tatalo ina ia outou agavaa e faaauau ia tiutetauave o le fausiaina o le malo o le Atua ma saunia le lalolagi mo le Afio Faalua Mai o le Faaola” (itulau 3).
A’u uo talavou e, faamolemole ia outou iloa le taua o le atamai, e ala lea i le mulimuli i apoapoaiga a o tatou Perofeta, ona outou fiafia ai lea i la outou malaga fai o le olaga.
Ou te molimau atu ai i le suafa o Iesu Keriso, amene.