Atiina A’e o le Malosiaga i Totonu

Mary Ellen Smoot

Peresitene Aoao ua Faatoa Faamaloloina Nei o le Aualofa

E faapefea ona matuai liua oe ma au i le upumoni, matuai faatumulia i le faatuatua, ma matuai faalagolago atu i le Atua, ma mafai ai ona tatou onosaia faafitauli ma faamalolosia ai?

E avea au ma sui o ou fesoasoani ma le pulega aoao o le Aualofa, matou te faafetai atu ai i tagata o le Ekalesia i le lalolagi atoa, aemaise lava tamaitai, o e na ositaulagaina o latou taimi ma taleni e ala i lo latou faatuatua ma le faamaoni, ina ia manuia ai olaga o tagata taitoatasi ma aiga i le lalolagi atoa.

I lou faamanuiaga na tuuina mai e Peresitene Gordon B. Hinckley a o faamanuiaina a’u i lo’u tofiga, sa ia saunoa ai i auaunaga e mafai ona tuuina atu e le Aualofa. Sa ia faapea mai, “O se faalapotopotoga uiga ese lenei, masalo o le faalapotopotoga sili lea ona tele ma leva o sea ituaiga i le lalolagi atoa. O lana misiona o le faia o mea lelei ma fesoasoani atu i e o faanoanoa ma manaomia le fesoasoani, ma faataunuuina le faiga o aoaoga, o tomai faatausi aiga lelei, ma isi tomai i olaga o tamaitai i le lalolagi atoa.”

Ua i ai ni o tatou taiala, o le tautinoga a le Aualofa; o fonotaga mo le faatamaoaigaina o le aiga, auaiga ma le tagata lava ia; ma le polokalama o faiaoga asiasi. O nei meafaigaluega ua iloiloina ma le faaeteete ma ua i ai ina ia fesoasoani ai i tamaitai e faalautele lo latou malosiaga i totonu e ala i le auauna atu, ma le lotogatasi.

Mo se faapupulaga o le ituaiga malosiaga i totonu o loo ou talanoa atu ai, ou te fia fetufaai atu le tala ia Susana Stone Lloyd, ina ua 26 ona tausaga, sa ia tuua ai Egelani i le 1856 ma malaga toatasi mai i Iuta. Ua na o Susana le tagata o lona aiga e auai i le Ekalesia, ma o se tasi o le Vaega o Taavale Tosolima A Uili. E pei foi o isi paionia, sa ia manumalo mai le taufaamatau o se olaga fiaai, o ma’i, ma le lailoa.

Ina ua taunuu atu i le Vanu i Sate Leki, sa aumaia e Susana se faata e faamama ma teteu faamanaia ai o ia. E ui lava i le tele o ana taumafaiga, sa ia fai mai, “O le a le galo ia te au o’u foliga. O nisi o au uo ua leva, sa latou le iloaina au.”¹ Talu ai ua ia faatau atu lana faata i se Initia mo sina fasi pafalo, o lea na le tele ai se taimi e vaavaai ai ia te ia lava. O lenei la ua na le toe manatuaina ona foliga. Ua avea o ia ma se tagata ese, i fafo ma totonu. I le taimi o lana malaga i mauga gaoa ma faigata matautia, na ia maua ai se talitonuga maumaututu loloto. Sa tofotofoina lona faatuatua ma ua mausali foi lona liua. Sa matuai faamatagofieina o ia i ni itu e le mafai e faata aupito silisili ona iloa ai. Sa tatalo Susana mo le malosi ma sa ia maua—i le ta’ele o lona agaga.

O le ituaiga malosiaga lena mai totonu, lea ou te fia tautala i ai. E faapefea ona matuai liua oe ma au i le upumoni, matuai faatumulia i le faatuatua, ma matuai faalagolago atu i le Atua, ma mafai ai ona tatou onosaia faafitauli ma faamalolosia ai?

E le tele se taimi o le soifuaga tatou te iloa ai, toeitiiti lava a le tulai mai le olaga i le mea sa e fuafuaina. E oo mai puapuga ma mafatiaga i tagata uma. E te iloaina se tasi e le manao e suia se mea e uiga ia te ia po o se tulaga o i ai? A o lea, ou te mautinoa tou te iloa le toatele o e agai pea i luma ma le faatuatua. E te fia mafuta ma i latou, e musuia, ma faamalosia ai oe i a latou faataitaiga.

I le silia ma le lima tausaga ua tuanai, sa ou feiloai atu ai i uso mai Aferika e oo atu i Sepania, o i latou o ni paionia i o latou lava ala. Sa faagaeetia au i lo latou malosi ma sa faamalosiauina au i le loloto o a latou molimau. O uso nei ua latou soifua i le upumoni o loo tautino mai i le tautinoga a le Aualofa

E faamanatu mai e le [tatou] tautinoga ia te i tatou po o ai moni i tatou ma po o le a foi le mafuaaga tatou te faia ai mea o tatou faia. O le tele lava o lo tatou ola i ona tulafono, o le tele foi lea o le malosiaga mai totonu o le a tatou maua. O le a tatou vaai atu i le faata i o tatou talitonuga. O le anapogi, tatalo, ma le suesue i tusitusiga paia ma o tatou sootaga ma le Faaola. Ou te fia faamamafaina nisi auala se lua e mafai ai ona atinae o tatou malosiaga mai totonu:

Auauna atu

Pe a liua moni i tatou, e aveese mai lo tatou vaai ifo ia i tatou lava ae taulai atu i isi. E mafai ona tatou maua le malosiaga mai totonu e ala i le auauna atu. E leai se mea e sili atu ona faamalieina ai le tiapolo, nai lo le faalavelave mai o lagona ma manatu faapito ia i tatou. Peitai, ua sili atu lo tatou iloa. O le auauna atu o le a fesoasoani tatou te tumau ai i le ala sao

E musuia lava au ia outou galuega auauna atu; o konafesi a tamaitai; o fonotaga o le faatamaoaigaina o le aiga, auaiga ma le tagata lava ia; ma le mea e sili ona taua, o totonu o o outou lava aiga.

I ni nai vaiaso talu ai, sa ou mauaina ai se telefoni mai le Peresitene o le Eria i Europa Tutotonu. Sa ia faapea mai o tagata o le ekalesia ma faifeautalai i Albania ma Moldova sa matuai maalilili lava, ma na te le o iloa pe o i ai ni ie soosoo a le Aualofa sei auina atu mo i latou. Manatu faalemafaufau ane i lo’u fiafia tele ina ua ou asiasi atu i le Ofisa o Fesoasoaniga mo Tagata, ma iloa ai e mafai ona tatou tuuina atu le 1,000 o ie soosoo. Ma sa na o ni nai aso ae teuina nei pusa ma auina atu loa. Sa tusi mai le peresitene o le misiona: “Sa tuia loto o le au paia iinei, ona o loo mafaufau mai isi au paia ia i latou.” Faafetai atu mo la outou auaunaga e le manatu faapito.

Uso e, tagai ane ma le totoa i autu fautuaina mo fonotaga mo le faatamaoaigaina o le aiga, auaiga ma le tagata lava ia, ma saili ni auala e fausia ai malosiaga faaleagaga, atinae tomai faale-tagata lava ia, faamalolosia aiga ma auaiga ma tuuina atu auaunaga faale-talalelei. O le faia o ia mea, o le a tuuitiitia ai lo tatou mafaufau i o tatou faafitauli ae faalagolago atili atu i le Atua.

Lotogatasi

O se tasi auala e mafai ona atinae ai malosiaga mai totonu, o le taumafai lea ia maua le lotogatasi i totonu o o tatou aiga, o totonu o tatou siteiki ma a tatou uarota ma totonu o a tatou au peresitene. Ua aoao mai le Alii lava Ia, “A le tasi outou e le a au outou.”²

O le lotogatasi i faamoemoega, mafaufauga ma lagona o ni uiga faaeaina. Pe a tatou lafoai o tatou eseesega ae faatauaina malosiaga o isi, o le a tutupu mai ni mea sili. Ua lapatai mai le Perofeta o Iosefa Samita, “Aua e te manatu faatauvaa i uiga lelei o lou tuaoi… . E tatau ona tatala atu o outou loto ma feagaleleiai.”³ O le agalelei faapea e amatalia ai se lotogatasi e tele atu.

Ua ou asiasi i siteiki ma uarota e lotogatasitasi. E galulue faatasi uso o le au peresitene; e felagolagomai au peresitene o ausilali ma fefaamaopoopoa’i a latou taumafaiga; latou te lagolagoina o latou taitai perisitua ma o loo latou taumafai faatasi e aumaia aiga ia Keriso. A o agai atu pea i luma le malo o le Atua, e tatau ona tuufaatasia a tatou taumafaiga i le faasaoina o agaga.

I le avea ai ma au peresitene aoao o le Aualofa, matou te lagona le agaga faafetai i le faamamafaga fou ua i ai i faiaoga asiasi.⁴ O savali fou ua valaauina ai uso e faitau mai i a latou tusitusiga paia ma aoaoga a le Au Peresitene Sili ma isi Pulega Aoao, e uiga i mataupu o le talalelei. Ona uunaia ai lea o e fetufaai atu manatu ma aafiaga, pe faapefea ona faamanuiaina o latou olaga ona o le ola ai i mataupu o le talalelei.

Uso e, afai o le a outou mulimuli i lenei faatulagaga, o le a e saga maua le lotogatasi ma lau soa faapea foi i latou o loo oulua aoaoina. O le a faamalolosia outou faaleagaga.

E tusa lava po o a tulaga ua tatou i ai, o ai o i tatou e mafai ona faamaumau o tatou olaga i luma o faata ona o le alofa ifo ia te ia lava ma le lotovaivai? Ioe, e pei ona lapatai mai le Aposetolo o Paulo, e manaomia lo tatou “iloiloina [o i tatou lava]”⁵ mai lea taimi i lea taimi. Tatou te manaomia uma ona salamo, ona iloa o tatou vaivaiga, ma ia faalatalata mai ma le atoatoa ia Keriso. Peitai e leai se tasi o i tatou e tatau ona tumau i le mailei o le manatu ifo ia te ia lava. E faapei o Susana, atonu ua tatau ona faatau atu a tatou faata, ina ia mafai ai ona laasia mauga o tiga, faanoanoaga, ma le lotovaivai. Peitai pe afai tatou te faia, o le a tatou maua pea lava malosiaga mai le Atua semanu tatou te le iloa.

Sa tulei saunoa Peresitene Iosefa F. Samita ma le ootia, ona o le malosiaga mai totonu o tina paionia. Sa ia faapea mai, “O le oti o se mea noa ia i latou. O faigata o se mea noa. Malulu po o le timu, po o le vevela, o ni mea noa lava ia i latou. Pau le mea ua latou lagona ma iloa ma manaomia o le manumalo o le malo o le Atua ma le upumoni ua tuuina atu e le Alii ia i latou.” Ona ia augani atu ai lea ma le loto atoa o se perofeta a le Atua, “Lo’u agaga e, o fea o i ai nei tamaitai i le taimi nei?”⁶

Ua ou i ai iinei i le aso e molimau atu ia te outou, o na ituaiga tamaitai, o loo i ai i le Aualofa a le Ekalesia i le lalolagi atoa. E le mafuatia lo’u agaga faafetai mo le avanoa ua ou maua ou te vaai ai i nei tamaitai paionia o o tatou vaitaimi, o e o loo tutupu malolosi i le malamalama o le upumoni.”⁷ Ou te iloa ma lou loto atoa, e faia e le Alii mea vaivai e avea ma mea malolosi.”⁸ Ua ou iloa o Lana galuega ma lona malo lenei.Ou te iloa e mafai ona vaaia le Faaola ia i tatou taitoatasi, e ala i le ituaiga olaga tatou te filifili e ola ai. I le suafa o Iesu Keriso, Amene.