Ia Mafai Ona Aoaoina
O le mafai ona aoaoina, tatou te faaaogaina ai le malosiaga atoatoa ma faamanuiaga o le Togiola i o tatou olaga
O soo moni o le Matai e mafai ona aoaoina. Na o nai upu itiiti lava o loo faamatala mai ai e Aperaamo se malamalamaaga tele i le mafuaaga na matua faamanuiaina ai o ia. Sa ia soifua i se soifuaga “naunau ia maua faatonuga, ma tausi i poloaiga a le Atua.”1 “O le naunau ia maua faatonuga” e sili atu i le naunau e faalogo. [Aua] a oo ina avea lo tatou naunau e maua faatonuga ma uunaiga e malosi atu nai lo le tatou lagona fiafia ua lava lea mea ua tatou i ai, ona mafai ai lea ona aoaoina i tatou.
Sa aoao mai e Peresitene Polika Iaga o lo tatou “uluai tiute sili o le sailia lea o le Alii seia oo ina tatala auala o fesootaiga mai le Atua i o tatou loto.”2 E lei umi ona mavae le maliu o le Perofeta o Iosefa Samita, ae faaali mai o ia i se miti ia Polika Iaga ma faatonuina o ia: “Tau atu i tagata ina ia lotomaualalo ma faatuatua, ma ia mautinoa o loo tausisia le agaga o le Alii ona taitaiina ai lea o i latou i le sao. Faaeteete ma aua nei fulitua ese mai le leo itiiti ma le filemu; na te aoao mai i latou i mea e fai ma mea e o i ai; o le a aumaia ai fua o le Malo.”3
E faapefea ona tatou faamumu lenei mana o faatonuga paia i o tatou olaga? Muamua, e tatau ona tatou amata i se naunautaiga ia aoaoina pe faatonuina foi. E ui ina toatele e fia aai lava i latou ma fia feinu i le amiotonu, ae o isi e tau faatonu ia lotomaualalo.4 O nisi o i tatou ua manatu e sili ai le na o le sui o tulafono, nai lo le mulimuli i faatonuga pe suia i tatou lava. O Naamanu na manao moni lava o ia ia te’a lona tino lepela, ae na alu ese ma le ita tele ina ua ta’u atu i ai e le avefeau a le Perofeta e tau lava ina alu e taele i le Vai o Ioritana. Sa le’i faigofie, o si mea itiiti ma sa ia manatu foi e sili atu vai i lona nuu nai lo Ioritana. Peitai, sa faamaloloina lona lepela ina ua faalogo ma usitai i ana auauna, sa suia lona mafaufau ma faia “… e tusa ma le upu a le tagata o le Atua.”5 Na maoae le faaalia ia te ia o loo i ai se perofeta a le Atua i Isaraelu. E ao foi ina tatou iloa e i ai poloaiga a le Atua e pulea ai6, ma e sili atu foi Lona poto nai lo i tatou. Sa maitauina foi e Mose, ina ua uma ona ia vaai i le mamalu o le Atua ma ana galuega, sa ia iloa ai “O le tagata o se mea noa, o se mea ou te le i mafaufauina lava.”7
Lona lua, e ao ina tatou atinae se uiga lelei o o tatou mafaufau ma loto. E maua lea mea i le mafaufau ma le loto tatalo ma galulue i le Agaga.8 O se galuega moni lava lenei. E aofia ai le faatino o le sailiili, faalogo ma usitai ma le suesue o tusitusiga paia. A lotomaualalo ma aveese le faamaualuga, o le a faamaluluina o tatou loto. Ina ua i ai nei la le loto ua faamaluluina, ma mafai ai ona tatou tulimatai atu i fautuaga ma faatonuga faalelagi. O le tama o Lamonae, le tupu Sa Lamana malosi, ua na o lena le suiga na ia faia, ua ifo toele o ia i le eleele, e faailoa mai ai lona naunautai tele e fia iloa le Atua. Na ia tautino atu: “Ou te lafoaiina a’u agasala uma ina ia ou iloa ai lau afio, ina ia toe faatuina mai foi au nai e ua oti, ma ia faaolaina au i le aso gataaga.”9
Lona tolu, ua tatau ona tatou usitai i faatonuga na tatou maua. Fai mai Alema, “Tofotofo i a’u upu, ma faaaoga sina faatuatua itiiti.”10 Fai mai Nifae: “Ou te alu ma faia.”11 E maeu le matagofie o lea uiga faaalia o le gauai atu ma le usiusitai a o ia taliaina le fautuaga a lona tama i le aumaiga o Papatusi Apamemea, o le taimi na ta’u atu i ai le mea e tulimanu ai ma le fauina o le vaa.12 Aua o mea taitasi, sa ia faia ma le faatuatua, ma agai i luma “ma le le muai iloa o mea”13 e ao ona ia fai pe faatoilalo. Peitai, talu ai tatou te saoloto ia tatou filifiliga, o lea e faigata ai i nisi taimi le faatatauina o o tatou loto ma mafaufau i upumoni a le Atua. Ae ui o lea, e pei ona saunoa Peresitene Thomas S. Monson, “E faamoemoe le Alii ia tatou mafaufau. E faamoemoe o Ia ia tatou gaoioiga. E faamoemoe o Ia ia tatou galuega.”14
O le mafai ona aoaoina, o se faagasologa lea o le aoao i lea fuaiupu ma lea fuaiupu. O lenei faagasologa tatou te faaliliu mai ai mafaufauga ma lagona ma avea ai ma faatinoga. Peitai e i ai taui sili mo lenei faaaogaina o lo tatou faatuatua pe a tatou tatala le ala mo fesootaiga ma le Alii. Aua ua fetalai mai le Alii, “Amuia foi i latou o e faalogo i a’u upu, ma uai mai o latou taliga i la’u faatonuga, aua latou te aoao i le poto.”15 Na Ia toe fetalai mai foi: “O tagata uma foi o e gaua’i i le leo o le Agaga, e o atu i le Atua, o le Tama lava lea.”16
I ni nai tausaga ua mavae, ou te manatua lo’u fesili atu i le tama o lo’u toalua, o se alii ua loa ona auauna atu o se epikopo, e uiga i se tama’i pepa malo e 3 x 5 na te feavea’ia pea lava pea i le taga o lona ofutino. Sa ia tali mai e i ai taimi na te maua ai lagona po o uunaiga. Ona ia manao ai lea e se’i ane lena pepa ma tusi ai i lalo na lagona, i soo se taimi e oo mai ai. Ona ia taumafai foi lea e galue ai, i se taimi vave. E lagona le lotomaualalo pe a manatu o loo i ai pea e le aunoa le leo itiiti malu mo i tatou, o loo aoaoina i tatou i le mea e fai ma le mea e o i ai. Ua ta’u mai e le Alii ia i tatou, afai e gauai atu i musumusuga, e tele atu isi mea e maua. Afai tatou te le mulimuli ai, ona faaitiitia ai foi lea o uunaiga.
O le taunuuga o le mafai ona aoaoina, tatou te maua se molimau e sili atu i le alofa o le Tama Faalelagi mo i tatou. Tatou te maua le saogalemu ma le mautinoa o mea o loo tatou faia i le olaga, o loo tusa ma Lona finagalo.17 E i ai foi a tatou mafuaaga ina ia tatou lelei, o mafuaaga ia amio mama ma mafuaaga e suia a tatou amioga. O le mafai ona aoaoina, tatou te faaaogaina ai le malosiaga atoatoa ma faamanuiaga o le Togiola i o tatou olaga. Tatou te nofouta i musumusuga a le Agaga Paia ina ia mafai ai e mataupu faavae o le amiotonu o loo aoao mai e perofeta ma upumoni mai le lalolagi, ona tuutuu ifo i le loloto Keriso i o tatou olaga.18 E avea i tatou ma Ona soo moni.
O le fiafia i nei upumoni ma o tatou loto atoatoa e atinaeina ai se sootaga vavalalata i lo tatou va ma le Punavai o le upumoni lava ia, “Aua o le faautauta e pipii i le faautauta; e talia le poto e le poto, o le upu moni e fusia le upu moni [ma le] alofa i le amiomama.”19 Ona tatou iloa ai lea o mea sili e ao ona tatou faatauaina ma talisapaia, e mai le Alii ia.
Ou te molimau atu o le Perofeta o Iosefa Samita ua tatou maua ai faaaliga e le mafaitaulia o le upumoni, ua molimauina ai le taulaga togiola a Iesu Keriso. O le mafai ona aoaoina, o le a sili atu ai ona manino la tatou vaai, faalogo ma usitai i na faaaliga o loo faifai pea i ona po nei, e ala mai i o tatou perofeta, tagata vaai ma tali faaaliga. I le suafa o Iesu Keriso, amene.