O Nai Aoaoga Faigofie mai le Talafaasolopito o Iosefa Samita

Elder Carlos H. Amado

O Le Fitugafulu

O le liua, o se faagasologa patino ma le faaleagaga. E tatau i tagata taitoatasi ona suesue e ia lava nei mataupu faavae.

Sa tusia le talafaasolopito o Iosefa Samita e faamatala ai le tala o le toefuataiga o le Ekalesia i nei Aso e Gata Ai. O le natura faavae o le tala, o se faapupulaga o le talitonu i folafolaga a le Alii, ma se sosia o le olioli ma le mautinoa o i latou uma o e talitonu.

E tele taimi ua mafai ai ona ou faitauina faapea foi i tulaga eseese. Sa ou fiafia i ai a o ou laitiiti; sa avea ma taiala ma se sosia o le malosi a o ou talavou; sa ou fetufaai atu ma le lototoa ma le naunautai a o avea au ma se faifeautalai talavou; e oo mai nei lava, o loo faatumuina ai pea lava pea au i le maofa ma se lagona o’oo’o o le faafetai. Talu ona faatoa mauaina e Iosefa Samita le uluai faaaliga, o loo tumau pea ona avea ma se meaalofa o le faatuatua i e talitonu faamaoni; o se valaaulia e le faatuaoia mo i latou o loo saili mo le upumoni, ma o se luitau tumau foi i le e le talitonu.

Mo i latou e le i auai i le Ekalesia, ou te fautua atu ia outou faitau ma se mafaufau matala ma se loto faamaoni. O le a outou lagonaina lona faamaoni, ma o le a outou iloa ai o le faavaeina o le Ekalesia, na toefuatai mai i se ala faavavega!

E ui ina tele mataupu faavae faaleagaga o loo aoao mai i lenei tala ofoofogia, ae o le a na o le lima ni mataupu faavae o le a ou fetufaai atu i la’u tautalaga, ma e faapei lava ona faia i le perofeta talavou, o le a fesoasoani atu foi ia te outou e iloa ai le Atua.

MATAUPU FAAVAE 1: IA I AI SE FAANAUNAUGA FAAMAONI E ILOA LE UPUMONI

Sa i ai se faanaunauga loloto o Iosefa Samita e iloa le Atua, ma faia Lona finagalo. E mafai foi ona e maua lena faanaunauga e tasi, ma e mafai e le Atua lava Ia ona taitai oe i le upumoni. A e iloaina le upumoni, ona e faia ai lea o mea uma e te mafaia ia ola ai e tusa ma [na upumoni].

MATAUPU FAAVAE 2: AOAO LE TAUA O LE FAITAU I TUSITUSIGA PAIA

Sa iloa e Iosefa Samita tusitusiga paia, aua sa ia suesue i ai. Na fai mai a ia: “Sa ou faitau i le tasi aso i le Tusi a Iakopo, mataupu muamua, a o le fuaiupu e lima, e faapenei: Ae afai ua leai se poto i so outou, ina ole atu ia i le Atua, o le foai tele mai i tagata uma, ma le le toe tautaua; ona foaiina mai lea ia te ia” (Talafaasolopito—Iosefa Samita 2:11).

I le taimi puupuu o lana galuega, sa maua ai foi e Iosefa Samita le tele o isi faaaliga taua ona o le faitau i tusitusiga paia. E tatau ona e suesue i tusitusiga paia, ina ia mafai ai ona e iloa le Atua, o le puna ia o upumoni uma.

MATAUPU FAAVAE 3: AOAO LE TAUA O LE TATALO

Na fai mai le taulealea o Iosefa:

“Sa iu ina oo ifo i lou mafaufau le tonu e faapea, e lua mea e ao ina ou filifili i ai, o lou nofo pea i le pouliuli ma le fenumiai, po o lou faia e pei ona faatonu mai e Iakopo, o le ole atu lea i le Atua …

“O le taimi muamua lava lea na faatoa ou faia ai se taumafaiga faapea, aua e ui lava i mea uma na ou popole ai, ou te le i taumafai lava e tatalo ma le leo …

“… Sa ou tootuli ifo loa ma amata ona sii ae manaoga o lo’u loto i le Atua …

“Ua ou iloa e moni le molimau a Iakopo—e mafai e se tagata ua leai se poto ia te ia ona ole atu i le Atua, ma e tuuina mai e le Atua ia te ia lea poto, ma le le toe tautaua” (TIS 2:13–15, 26).

O lo tatou Tama Faalelagi, o se tama atoatoa, e silafia mea uma e te manaomia faaletino ma le faaleagaga, ma e finagalo ia faamanuia ia te oe, ma o le mafuaaga lea ua Ia avatu ai ia te oe le poloaiga e saili atu ia te Ia ma ole atu ia te Ia.

Na aoaoina e Iosefa le upumoni, aua sa tatalo o ia. O aso nei, e faitau miliona tagata o lenei Ekalesia, ua latou molimau atu foi i le moni o le toefuataiga, aua, sa latou mulimuli i lena fautuaga [o le saili atu ia te Ia ma ole atu ia te Ia], ma sa latou ole atu ma le faatuatua i le Alii. Ua ia te oe foi lena lava aia tatau e tasi, e te mauaina ai se tali i au tatalo aua o le molimau o se meaalofa lea e tuuina mai e le Atua na o i latou e ole atu ma le loto faamaoni. Tago e faataitai, ma o le a faataunuuina lava le folafolaga.

MATAUPU FAAVAE 4: SAILI IA MAUA LE FAAMANUIAGA O LE MAFAUFAU LOLOTO

E tele taimi sa mafaufau loloto ai Iosefa Samita; sa mafaufau, faavasega, faatusatusa, ma sa ia taumafai e saili tali i mea sa ia faitauina i tusitusiga paia. Sa ia fai mai:

“Sa ou mafaufau loloto lava i aso o lea fefinauaiga tele, ma sa ou atuatuvale tele ai; …

“… Na ou faapea ifo ai: O ai o nei lotu uma ua sao; po o ua sese i latou uma? Afai foi ua sao se tasi o i latou, o le fea, ma pe faapefea foi ona ou iloa? …

“E leai se isi lava mau mai se tusitusiga paia na matua ootia ai se loto o se tagata i le mana malosi nai lo le ootia o lou loto i lea mau i lea lava taimi. Sa foliga mai na matua ootia ma faagaeetia ai lou lava loto. Sa oo ina ou mafaufau pea lava i ai”… (TIS 2:8, 10, 12).

Ina ia mafaufau loloto i upumoni e faavavau, o le mafaufau lea ma fesili ma saga fesili ifo ia i tatou lava: “E mafai faapefea ona ou iloa?” “E faapefea ona iloa e isi?”

E mafai faapefea ona e iloa nei mea? Faamolemole mafaufau loloto i ai ma le loto atoa.

MATAUPU FAAVAE 5: IA ILOA LE OLIOLI O LE ALU I LE LOTU

O lona manao ia iloa le mea moni, sa alu ai Iosefa Samita i faalapotopotoga faalelotu eseese i lona nuu. Sa ia faamatalaina manino faatonuga mai le Atua, le Tama ma lona alo, o Iesu Keriso:

“Sa ou fesili atu ia i Laua na tutu mai i ou luga i totonu o le malamalama, po o le fea o lotu uma ua sao (aua o le taimi lea ou te le i mafaufau lava faapea e sese lotu uma)—ma tatau ona ou auai …

“… E le tatau ona ou auai i se tasi o ia lotu, a ia ou tumau pea i se tulaga sa ou i ai i lena taimi, seia oo ina toe faatonuina mai au” (TIS 2:18, 26).

E manaomia e i tatou uma ona tatou iloa le Malo o le Atua i le fogaeleele, ma ia maua se molimau i ona upumoni. Tatou te o i le lotu ia lagona ai le Agaga, aoao Ana mataupu faavae, faafou a tatou feagaiga, ma maua sauniga o le faaolataga ma le faaeaga e toe foi atu ai i le afioaga o le Atua faatasi ma o tatou aiga. E valaau atu ma le faaaloalo ina ia e susu mai i le lotu ma ia e iloa ai e oe lava ia nei mea uma.

O le liua, o se faagasologa patino ma le faaleagaga. E tatau i tagata taitoatasi ona suesue e ia lava nei mataupu autu. E le lava le taumafai faa’afa’afa, ma le le mautonu, ma le atuatuvale po o le leai foi o se talitonuga. Ua folafola mai le Atua ia i tatou, ona o Lona alofa mutimutivale, o le a Ia tali mai ai i a tatou talosaga e tusa ai ma lo tatou faamaoni. E na o i latou e saili atu ma le loto faamaoni, o le a mauaina a latou tali, o se meaalofa mai le Atua, e ala mai i le Agaga Paia.

O le Agaga Paia ua ta’ua foi o le Fesoasoani ma le Molimau. Tatou te nofo aitalafu ia te Ia i lo tatou malamalama ma a tatou molimau o Keriso o le Alo o le Atua.

A maea ona e papatiso, afai e tumau lou agavaa ma le faamaoni i au feagaiga, o le a e maua le taitaiga faifai pea a le Agaga Paia, e ala i musumusuga, o foliga vaaia, lagona, miti ma lapataiga.

O le talafaasolopito ma tusitusiga paia o loo ta’u mai ai tagata sa faafofoga, sa talanoa, pe i se isi foi tulaga, na i ai se molimau patino o loo soifua le Atua, ma Lana fuafuaga mo lo tatou faaolataga. Ae ui o lea, o le toatele o i latou e le i tumau faamaoni i o latou talitonuga maumaututu.

Ua tatou iloa mai ai, e le o mea ua tatou aoaoina mai o tatou faalogona faaletino, ae o mea e oo mai i le uunaiga a le Agaga Paia, ia e mafai ai ona tatou malamalama i faamoemoega o le Atua ma mulimuli ai ia te Ia.

Pe a aoaoina e se tasi nei mataupu faavae ae na te le ola ai, ua ia le maua le malamalama ma le taiala e fesoasoani ia te ia, e malamalama ai i le Atua ma Ana perofeta. O le faailoga tatou te vaaia, o lo latou tavavaeseina mai lea o i latou lava, ma le toe toaaga mai ai, pe faatautava ai foi i le Ekalesia. O le faailoga i totonu, o lo latou le ola ai lea i se tasi po o le sili atu foi o nei mea e lima:

Ua le toe i ai so latou faanaunauga e iloa upumoni uma.
Ua le toe faitau i tusitusiga paia.
Ua le toe tatalo
Ua le toe mafaufau loloto i upumoni e faavavau.
Ua le toe o i le lotu.

E ese le matagofie, i se taimi o le tele o le faanunununu faalelotu, ae le i atoa le 15 tausaga, i le lotolotoi o le tetee ma sauaga, ae sa faaalia mai lava ia i tatou e Iosefa Samita le onosai ma le filiga, le ala faigofie ma le lelei e faalatalata atu ai i le Atua.

O lenei faiga e manaomia ai lo tatou aoao i lea mataupu ma lea mataupu, o sina mea itiiti iinei ma sina mea itiiti iina, seia oo ina atinae lo tatou faatuatua ma se malamalama manino i o tatou tulaga faalelagi (tagai 2 Nifae 28:30).

O lo tatou tiute le faamalolosia, i lea aso ma lea aso, le lagona lea tatou te maua mai le Agaga, ma faaaoga e le aunoa nei mataupu faavae e lima.

Ou te tatalo ina ia tatou faia lea mea e le aunoa, i le suafa o Iesu Keriso, amene.