Le Faavae Malosi

Elder Russell M. Nelson

O Le Korama a Aposetolo e Toasefululua

O le faavae o le faatuatua o se tagata, afai e taula mau i upumoni e faavavau, o le a mafai e i tatou taitoatasi ona saili atu i luga mo se vaaiga e faavavau.

Pe tusa ma le luasefulu tausaga ua mavae, ina ua tatau ona fausia se malumalu i le Aai o Mekisiko, sa feagai ai tusiata o fale ma se luitau tele. Ona o le Aai o Mekisiko e i luga o se laueleele e tietie i luga o vai, o nisi o fale e femigoiai ma sisipa a o gasolo aso. O le fauina o se malumalu iina, e manaomia ai se faavae faapitoa. E luaselau luasefulutasi poutu¹ sima malolosi sa tutu’i i le silia ma le 100 futu le loloto i le palapala. O luga o nei poutu, sa tuu ifo i ai fusi uamea ma faamaumau ai i se vaega e mafai ona fetuunai pe afai e manaomia e faasa’o le fale.² Ona o lena faavae mautinoa e le o iloa atu, o loo tu sa’o ai ma mausali lena malumalu.

E taua se faavae mautu mo soo se fale lava, faalapotopotoga, po o se tagata foi ia tumau ai. Ia tatou mafaufau i lena mea, ona manatu ai lea i le faavae O Le Ekalesia a Iesu Keriso o le Au Paia o Aso e Gata Ai. Ona tatou tepa lea pe o faapefea e le faavae mausali o le Ekalesia, ona lagolago le faavae o lo tatou faatuatua taitoatasi o ni tagata o le Ekalesia.

I. FAAVAE O LE EKALESIA A IESU KERISO O LE AU PAIA O ASO E GATA AI

O lenei Ekalesia o loo tu i se faavae tulaga ese, e taula mau i mataupu faavae o le faavavau. Uso e ma tuafafine, o le galuega paia o loo tatou o galulue ai nei, e le i amataina i le 1820 i le setete o Niu Ioka. E le i amataina i Peteleema. E le i amataina i le Faatoaga i Etena. O lagolago o le talalelei e faavavau, ua leva ona faatutu a o le i foafoaina le lalolagi.

Ua faatele ona faamaonia mai lenei mea i tusitusiga paia. Sa ou suesue i tusitusiga paia e tusa ai ma lena vaega o le faavavau, a o le’i foafoaina le lalolagi. Aua tou te popole. O le a ou le faamalauina uma atu. Ae o le a ou faaopoopo i ai nisi o na faamaoniga i le lauga tusitusia. O nei upumoni e le o vaaia ma e faavavau, e aofia ai “poutu o le muai olaga” e lagolago ai le faavae o lenei Ekalesia.

O Le Fuafuaga o le Togiola ma le Avanoa e Maua ai se Togi i le Malo o le Atua.

A o le i faavaeina le lalolagi, sa saunia le fuafuaga o le faaolataga.³ Sa aofia ai le avanoa matagofie o se tofi paia i le malo o le Atua.⁴

O Le Togiola a Iesu Keriso

Sa totonugalemu i lena fuafuaga le Togiola a Iesu Keriso. I fonotaga i le muai olaga, sa muai faauuina ai o Ia e Lona Tama e togiolaina a tatou agasala ma motusi ai noataga o le oti faaletino ma le faaleagaga.⁵ Sa fetalai mai Iesu “O a’u … o le na saunia talu le faavaeina o le lalolagi e togiolaina lo’u nuu… . O au e maua ai e tagata uma le malamalama, e faavavau foi lea, o i latou lava o e faatuatua i lo’u igoa.”⁶ Mulimuli ane, sa faaopoopo mai foi Paulo o le Ekalesia “ua atina’e i luga o le faavae o le au aposetolo, atoa ma le au perofeta, o le maa tulimanu o Iesu Keriso.”⁷

Tetee Mai le Fili

E oo foi lava a o le’i faavaeina le lalolagi, a ua teena e Satani le Alii.⁸ O ia ma e na mulimuli ia te ia, sa tau ma tetee atu e le aunoa i le galuega paia a le Faaola ma o le a faaauau pea lava.

Muai Faauuina mo le Perisitua ma le Faaeeina Atu

A o le’i faavaeina le lalolagi, o i tatou uma taitoatasi, sa ola o ni fanau agaga a lo tatou Tama i le Lagi. Sa tatou i ai faatasi ma ni tagata taua ma le maoae na muai faauuina e tauaveina le perisitua.⁹ O Aperaamo,¹⁰ o Ieremia,¹¹ o Iosefa Samita,¹² ma isi¹³, na fuafua lava e avea ma perofeta a le Atua. Na muai vaaia ai foi, o le a faamaligiina le toto o perofeta i lenei faamoemoega paia.¹⁴ O le faiga o le faaeeina atu o le perisitua, e tatau ona faasolo mai i tama “mai le amataga o taimi, … a o le i faavaeina le lalolagi.”¹⁵

Ua Faapaiaina Tuafafine e Faamamalu i le Atua

Ua mauaina e tamaitai ni meaalofa faapitoa. O i latou, e tusa ai ma le fetalaiga a le Alii, sa faapaiaina “e faatoateleina ma faauluolaina le lalolagi, e tusa ma la’u poloaiga, ma ia faataunuuina le folafolaga na tuuina atu e lo’u Tama a o le’i faavaeina le lalolagi, … mo lo latou faaeaga i lalolagi e faavavau, ina ia latou fanaua mai agaga o tagata; … e fai pea le galuega a lo’u Tama, ina ia faamamaluina ai o ia.”¹⁶ Mafaufau i ai: Pe a fanauina e se tina se tamaitiiti ma tausia, e le gata ina fesoasoani o ia i le lalolagi e faataunuuina iuga o lona foafoaga,¹⁷ ae ua ia faamamalu foi i le Atua!

O Fanau o le Feagaiga

O fanau o le feagaiga sa filifilia i le malo o le muai olaga. Sa aoao mai e Paulo “na filifili [e le Alii] i tatou ona o ia, a o lei faavaeina le lalolagi.”¹⁸

O Faamanuiaga e Autu i le Usiusitai i le Tulafono

Ona faavae ai lea o tuutuuga e mafai ai ona tatou maua faamanuiaga mai le Atua—ma pe a tatou maua foi soo se faamanuiaga mai le Atua, e maua ai i le usiusitai i le tulafono e autu ai.¹⁹

O Mea Paia e Ao ona Faaalia i Aso e Gata Ai

O se tasi poutu e tusa ai ma faaaliga na faapolopolo mo aso e gata ai. Ua leva ona fuafua e le Alii e faaali mai “mea na lilo talu ona faavaeina le lalolagi.”²⁰ O na mea e aofia ai faaaliga o loo tusia i le Tusi a Mamona.²¹ O loo aofia ai foi sauniga ma feagaiga o le malumalu paia.²² Na fetalai atu le Alii i le Perofeta o Iosefa Samita, “Aua ou te loto ina ia faaali atu i la’u ekalesia mea ua natia pea a o le’i faavaeina le lalolagi, o mea tau le augatupulaga o le atoatoaga o aso.”²³

Faaolaina o E Ua Maliliu

Sa faaalia mai e le Alii “o le sauniga o le papatisoga mo e ua oti… . na faatuina a o le’i faavaeina le lalolagi.”²⁴ O lea na mafua ai ona i ai le faaolataga mo i latou “ua oti e aunoa ma le malamalama i le talalelei.”²⁵ Sa saunia foi se sootaga maopoopo o augatupulaga, ina ia mafai ai ona i ai le fesootaiga maopoopo atoatoa o augatupulaga, ki, mana, ma mamalu.²⁶

Uso e ma tuafafine, o nei poutu e le o vaaia ae e mautinoa, sa faatutuina a o le’i i ai le lalolagi. O loo latou lagolagoina ai le talalelei e faavavau—o lea ua toefuataiina nei i lona atoatoa.²⁷ O lea ituaiga o faavae, o le a le aveesea ai lava le Ekalesia mai lona tulaga,²⁸ e oo lava i le Meleniuma.²⁹

II. FAAVAE O TAGATA TAITOATASI O LE EKALESIA

E pei foi ona i ai faavae o fale ma faalapotopotoga, e faapena foi ona i ai faavae o i tatou taitoatasi e lagolago ai lo tatou faatuatua. O nisi e vaivai; o nisi e malolosi. E mafai ona tatou taumalua “e pei o peau o le sami ua sousou ma ua felafolafoaiina,”³⁰ e mafai foi ona tatou tutu i luga o se faavae mautu ma taula ai i tatou lava i fusi u’amea faaleagaga, ma mauaa ai ma mausali i poutu e faavavau o le talalelei.³¹

Sa talosaga mai Peresitene Gordon B. Hinckley ina ia lagolagoina o tatou tagata faatoa liliu mai i le Ekalesia i se uo, o se valaauga e auauna atu ai, ma faafaileleina i le upu lelei a le Atua.³² E masani ona tatou usuina le “Le faavae malosi, le Au Pa’ia e, Ua fai mo tou faatuatua i ana afioga!”³³ Pe a tatou maua lena faafaileleina i le afioga lelei a le Atua, o lona uiga ua tatou fiafia i Lona alofa.³⁴

Manatua: “E ao ina outou atinae lo outou faavae i luga o le papa o lo tatou Togiola, o le Keriso lea, le Alo o le Atua; pe a faaoo mai e le tiapolo ana matagi tetele, … pe a pesi mai lana uatoa uma lava ma ana afa, e leai sona malosi … e toso ifo ai outou i le vanu o le puapuaga ma le auega e le gata, ona o le papa ua atinae ai outou, o le faavae mau lea.”³⁵

E oo lava i faavae malosi e le mafai ona taofia ai faafitauli o le olaga. O fanau faalogogatata e afua ai ona faanoanoa matua. O ulugalii ua tatala faaipoipoga ma le mafai ona toe tuufaatasia. O le fenumiai o lagona o itupa [tane po o le fafine] e matua le malamalama lava i ai. O ulugalii ua faaipoipo, ae le iloa le mafuaaga, e le faamanuiaina ai i se fanau. E oo lava i lenei vaitaimi, “ua tuu atu i e ua tausalaina ma e amioleaga e o ae le faasalaina ona o la latou tupe.”³⁶ E i ai lava nisi mea e foliga mai e le fetaui.³⁷

Peitai, o le i ai o faavae malolosi, ua matua mafai ai lava ona tatou saili atu i luga mo se fesoasoani, e oo foi pe a tatou fetaiai ma fesili e aunoa ma ni tali faigofie. O lea na tusia ai e se tusisolo e faapea:

O ai Lau afio ou te le iloa,
O lo’u iloa ua na o se mea noa:
Na e faatutuina fetu o le Peleite
I se laina siliva uiga ese;
Na e auina mai matagi matautia
E le tapasaina o latou ala na uia;
Na e faia se eseesega tele
I le ao faapea foi ma le po ia ese.
Na e faia ia taufuifui fugalaau
Ma fetu ia fepulafi atu;
O maataua anagata foi ua natia
I maina maualalo e suatia;
Ae e silisili i Au galuega ofoofogia uma,
O Au fuafuaga o loo i ai le laualuga,
O le mafai lea ona sailia le Alii e tagata,
E le o se isi mea a o lona loto lava.38

E ui lava ina tatou le iloaina mea uma,³⁹ ae tatou te iloa o loo soifua le Atua ma e alofa o Ia ia te i tatou.⁴⁰ O le tutu ai i luga o lena faavae malosi, e mafai ai ona tatou saili atu i luga ma maua mai ai le malosi e onosaia ai avega mamafa o le olaga.

Mo se faataitaiga, ou te faamamaluina na agaga faapitoa o loo feagai ma luitau faamatua, ma le faatuatua femoumouai i lo latou Matai. E i ai se aiga e pele ia i ma’ua ma Sister Nelson, sa fanauina talu ai nei se atalii. Sa tigaina lenei tamaitiiti i ni faaletonu na fanau mai ma ia, ma sa aafia ai vaega uma o si ona tino augavale. Sa manaomia ni taotoga se lua i le vaiaso muamua na ola ai. E tele foi nisi taotoga e tatau ona fai. Ina ua matou talanoa ma matua o le tamaitiiti, la te le’i fesili, “Pe aisea ua tupu ai ia te i la’ua?” Ae na la tautino mai, “Ma te iloa ua fetaui lava le aumai o lenei tamaitiiti mo i ma’ua. Ua tuuina mai e le Atua lenei pepe faapitoa ia te i maua. O le a ma alolofa ma tausi ia te ia i le mea sili ma te mafaia.” Faafetai i le Alii mo nei ituaiga o matua!

E le i leva atu, na oo mai ai le oti i le tane a se tasi o a ma’ua uo, na faafuaseia lava e aunoa ma se lapataiga. O upu nei na tusia e faatatau i le faletua, e lona lava uso: “Na saili i le tele o tausaga ma aso ua mavae, ma ua lofituina nei o ia aua ua ia iloa, o i ai tomai patino ma aafiaga ua faamanuiaina ai lona olaga e se Tama alofa, o mea atonu sa le’i fuafuaina i lena taimi ae sa saunia patino lava mo ia, ina ia taulimaina lelei ai lenei oti faamomoiloto. E le i i ai sona lagona tuulafoaiina ma le oona matuitui, ae sa ia lagona le mafanafana ma le alofagia… . Sa ia fai mai ia te au, ‘Ina ua ou vaai i le saunia lelei o au e le Tama Faalelagi ma le fuafuaina mo le tulaga ua ou i ai nei, e mafai la faapefea ona ou fefe i lo’u lumanai? E moni na Ia tapenaina lelei mea uma ou te manaomia e faafetaiaia ai taimi e le o mailoa i le lumanai.’”⁴¹

Sa ou mauaina mai se faifeautalai se tusi e le mafai ona galo. Na ia tusi mai: “Ou te le o mautinoa lava pe aisea sa ou [mafatia] ai i le [kanesa], aemaise o le taimi sa ou auauna atu ai i le Alii i se misiona, ae e mafai ona ou fai atu ma le faamaoni atoatoa ma lo’u loto atoa, ou te matua faafetai e faavavau i lo tatou Tama Faalelagi alofa, i le faatagaina o au ou te oo i lena aafiaga. E leai se aso e misi,” na ia faaauau ai lana tusi, “ou te le mafaufau ai i aso sa ou taoto ai i le falemai ma mafatia ai i togafitiga o le kanesa, po o le mafatia foi i le tiga o se isi taotoga… . E leai se aso ou te le mafaufau ai i aso ou te suesue ai i tusitusiga paia, aemaise lava o le Tusi a Mamona, ma ou manatua ai lagona lofituina o le mafanafana ma le filemu sa ou maua. E masani ona ou mafaufau i po e tatau ai ona ou malolo ma tuu atu lo’u loto atoa i lo’u Tama Faalelagi e faafetai atu ai ia te Ia ona o le faasaoina o lo’u ola.” Ona faamatala mai lea e le Faifeau o le talafou matagofie lenei: “Sa ou toe foi i le fomai i le vaiaso nei, ma … sa ia iloa ai e leai se faamaoniga e iloa ai e i ai se ma’i i lo’u tino.”⁴² E ese lo’u alofa i nei faifeautalai faatuatua!

O le a le malosi o lo tatou faavae? O le faavae o lenei Ekalesia sa foafoaina a o le’i taitai ona faavaeina le lalolagi. E malosi le faavae. E moni foi. E faavavau. O le faavae o le faatuatua o se tagata, afai e taula mau i upumoni e faavavau, o le a mafai e i tatou taitoatasi ona saili atu i luga mo se vaaiga e faavavau.⁴³ O lena faatuatua o le a aumaia ai le faamoemoe pe a leai se faamoemoe. O le a tatou maua ai le olioli iinei ma le ola e faavavau i le olaga a sau. Ou te molimau atu ai i le suafa o Iesu Keriso, amene.