O Uo Moni
O le a tofotofoina i tatou uma lava. Ma tatou te taufai manaomia uma lava ni uo moni e alolofa ia te i tatou, e faalogo mai ia i tatou, e faasino mai ia i tatou le ala, ma molimau mai ia i tatou i le upumoni.
O tausaga taitasi, e faitau fia selau afe fanau a lo tatou Tama Faalelagi e o mai i le Ekalesia a Iesu Keriso o le Au Paia o Aso e Gata ai. O le toatele lava, e manaomia se suiga tele i o latou olaga. Ua tofu osia e i latou uma se feagaiga paia faatasi ai ma folafolaga tele ma se tautinoga paia o le a tumau i le faamaoni. E matua taua tele lena feagaiga, o le ala lea na faamatala ai e lo tatou Tama Faalelagi le faamanuiaga ma le luitau i le perofeta o Nifae:
“Na ou faalogo foi i le siufofoga o le Tama, ua faapea mai: Ioe, e tonu ma ua faamaoni upu a la’u pele. O le tumau e oo i le iuga, e faaolaina lea.
“O lenei, o’u uso pele, o le mea lenei ou te iloa ai afai e le tumau pea lava le tagata e oo i le iuga, ma mulimuli atu i le faaa’oa’o o le Alo o le Atua soifua, e le mafai ona faaolaina lea.”1
Ua lapatai mai le Faaola afai tatou te amata i le ala [papatisoga ma tausi poloaiga], ma mamao le mea ua tatou oo i ai, ona tatou toe toilalo ai lea ma faafitia o Ia, sa sili ai pe a na aua nei o tatou amataina.2
Ou te mafaufau lava i lena mea i taimi uma ou te talanoa ai i uso fou o le Ekalesia. E tele ina ou maua lena avanoa, i vaega eseese o le lalolagi. Ou te vaai atu i o latou foliga faatuatuaina, ma e tele foi ina latou faamatala mai ia te au nisi o tofotofoga o lo latou faatuatua, ona lagona ai lea o le faanatinati i o latou leo, ma latou musumusu mai: “Faamolemole ia e tatalo mai mo au.” O taimi na, ou te toe lagonaina ai le tiutetauave ua poloaiina ai i tatou taitoatasi e le perofeta soifua a le Alii. O le tausia lea o le folafolaga lea na tatou faia i le vai o le papatisoga “e fesui i a outou avega.”3 O le avea lea o se uo.
O afioga tulei nei a Peresitene Hinckley ua faamalosia ai au: “… Ou te faamoemoe, ou te tatalo, ou te aioi atu ia te outou, outou uma taitoatasi, ina ia outou taliaina atoatoa tagata fou taitoatasi o le Ekalesia. Ia faauo atu ia te ia. Ia faatumauina i latou [i le Ekalesia.]”4
E le mafai ona ou i ai iina e fai ma uo i tagata fou taitoatasi o le ekalesia. Ae e mafai ona e i ai iina, mo se toatasi pe a itiiti. Na pau lava le mea e manaomia, ia e lagonaina se mea o latou lagona, ma se mea e lagonaina e le Faaola mo i latou. Taumafai ia e maua lagona o se alii talavou, o Nkosiyabo Eddie Lupahla, i Aferika, na tusia e uiga i sana uo.
“E lua ma le afa tausaga, ae ou te le i auai i le Ekalesia i le 1999, sa sailia ai au e la’u uo lelei o Mbuti Yona. Na ma uo mai lava a o vasega 5 e oo i le vasega 12, ona ma valavala ai lea ina ua eseese aoga ua ma o i ai.
“Sa papatiso Mbuti i a Aperila 1999, ma e 4 vaiaso mulimuli ane, ae asiasi mai ia te au i le fale ma folasia mai le talalelei ia te au. E ui lava i talasalatua e uiga i le Ekalesia, ae sa faagaeetia lava au i ‘tagata o le Au Paia’ o e sa faafeiloaia lelei au i la’u uluai asiasiga. O le Aso Sa foi lava lenei, na faafeiloai atu ai au e la’u uo i faifeautalai. Sa faia fuafuaga ina ia aoaoina au. Sa i ai la’u uo iina i lesona uma, ma sa ia saga valaaulia pea au i gaoioiga. Sa ou matua fiafia lava e faifai mea faatasi ma tagata e tutusa mea e faatauaina, o mea e fiafia i ai, tulaga faatonuina ma sini. O le taimi lava foi lea, na amata ai ona ou alu i le Inisititiuti [o mataupu faalelotu]. Sa foliga mai o ni mea sa ou masani ai: O po o Aso Tofi; [5:30]—o lesona a faifeautalai, ona sosoo ai lea ma le inisititiuti.
“E tele mea sa ou aoaoina mai le inisititiuti, ae sa sili ona ou fiafia i le matou vasega e uiga i le ala e maua ai se faaipoipoga faaselesitila. O le vaituuaga muamua na faaiu ia Me, ae faatoa amata ona ou auai, ma sa ou lagona ua le lava le taimi. Ae sa laki ona sa mafai ona ou maua le vasega o le vaituuaga lona lua, o le ‘O Aoaoga a Perofeta Soifua.’ A o ou i ai i le inisititiuti, sa ou faatauina a’u tusitusiga faavae e fa ma sa faaauau ai ona ou aoao ma tuputupu ae i le Ekalesia, o lea fuaiupu ma lea fuaiupu, o sina mea itiiti iinei ma sina mea itiiti iina. Sa papatisoina au i le aso 17 o Setema, 1999, e se isi a’u uo sa maua ina ua ou auai i le Inisititiuti.
“Ou te faafetai lava ona o le polokalama a le inisititiuti. Ua le gata ina faafoliga lelei ai au, ae ua fesoasoani foi e faaagavaaina ai au ia avea ma faifeautalai, ma o le misiona sa amata ona ou sauniuni i ai mo le lima masina ina ua uma lo’u papatisoga. Ua faamanuiaina au i le tele o avanoa e auauna atu ai ma faiaoga a o le’i faia la’u misiona.
“Ou te faafetai lava i si a’u uo. Ou te faamoemoe ua ia iloaina le mea ua ia faia mo au. Sa ma taufai auauna atu i ni misiona, o a’u i Aferika i Saute, a o ia i Cape Town i Aferika i Saute. Na pau lava le mea na manaomia, o se uo e aumaia ai sea ituaiga o liua maoae i le olaga o se tasi.”5
E foliga mai e leai se mea faavavega i lena tala. Peitai, o loo i ai se vavega o le poto i luga atu o le mea e gafatia e le tagata.
Atonu ona sa savalia e Mbuti lava ia le ala, pe atonu foi na ala mai i se faaaliga, na ia iloa le mea e tatau ona fai e lana uo ina ia tumau ai le faamaoni i le ekalesia. Ma o lea sa ia iloa ai le ala e faamalosiauina ai ma fesoasoani atu ia te ia.
Sa ia faafeiloai atu lana uo i faifeautalai. Sa ia faamautinoa ia papatiso lana uo ma talia le meaalofa o le Agaga Paia. Na ia aveina lana uo, a o le i papatisoina, i le mea o le a ia suesue ai i tusitusiga paia ma mafai ai ona faafaileleina i le afioga lelei a le Atua. E oo lava a o le i papatiso, sa ia fesoasoani i lana uo ia maua le folafolaga lenei: “O le mea lea na ou fai atu ai ia te outou, ia outou fiafia i le afioga a Keriso; aua faauta, e faaalia mai ia te outou i le afioga a Keriso mea uma tou te faia.”6 Atonu ai na ta’u atu e ia upu ia te ia e faatau ni tusitusiga paia, lea na ia faatauina ai.
I le papatisoga, na taliaina ai e Uso Lupahla le meaalofa o le Agaga Paia e avea ma ana soa tumau i taimi uma na te valaaulia ai o ia, ma ola agavaa foi ia maua. O lena na faamautinoa atu ai ia te ia le isi folafolaga: “Aua faauta, ou te toe fai atu ia te outou, afai tou te ui atu i le ala ma talia le Agaga Paia, na te faaali ia te outou mea uma e tatau ona outou faia.”7 Atonu ai na ta’u atu ia te ia e le Agaga Paia e amata sauniuni mo se misiona, ma sa faapea foi ona ia faia.
Tatou te le iloa po o ai uo na latou o i sauniga faamanatuga a o le’i papatiso ma ina ua uma foi ona papatiso, ae ai na faafeiloaia o ia e nisi ma le alofa i lana uluai asiasiga. O iina, na ia faafouina ai lana feagaiga ia manatua pea e le aunoa le Faaola, ia tausi ana poloaiga, ma ia maua le folafolaga o le mafutaga ma le Agaga Paia. Tatou te le ma iloa po o le a le vaega na fai e ana uo i lona valaauga e auauna atu ma lauga atu. Ae e mafai ona tatou talitonu, na latou faafetai atu ia te ia ina ua latou lagonaina le agaga o lana auaunaga ma ana aoaoga.
E mafai ona tatou iloa se mea e uiga i lona olaga patino. Manatua foi na ia tusia sa faaauau pea ona ia aoao. Na ia tusia na ia tuputupu ae “i le Ekalesia, i lea fuaiupu ma lea fuaiupu, o si mea itiiti iinei ma si mea itiiti iina.” Na fai mai a ia, sa faafoliga leleia o ia i ona aafiaga i le inisititiuti a le Ofisa o Aoga a le Ekalesia. Ua tatou iloa mai tusitusiga paia le mea na mafua ai ona suia o ia. Ai na tatalo o ia ma le faatuatua i le Faaola. Sa ia maua molimau ma faatonuga mai le Agaga. Ona le gata lea ina ia faia le mea na faatonuina ai o ia e fai, ae na ia ole atu foi i le Atua ia aoga le Togiola i lona olaga.
Na faamatala e Nifae lena vavega o le suia ma lona mafuaaga:
“O lenei foi o’u uso pele, ua ou iloa ua outou masalosalo pea i o outou loto, ua tigaina a’u ona ua ao ina ou tautala atu e uiga i lenei mea. Aua afai e faalogo atu outou i le Agaga e aoao atu i le tagata ia tatalo, ona iloa lea e outou e tatau ona outou tatalo, aua e le aoao atu le agaga leaga i se tagata ia tatalo o ia, a ua ia aoao atu ia te ia e le tatau ona ia tatalo.
“Ae peitai, faauta, ou te fai atu ia te outou e ao ina outou tatalo e le aunoa, aua le faavaivai, aua tou te faia se mea e tasi i la le Atua, sei iloga tou te muai tatalo i le Tama i le suafa o Keriso, ina ia faapaiaina e ia la outou galuega ia te outou, ina ia aoga la outou galuega ia te outou, ina ia aoga la outou galuega e faamanuiaina ai o outou agaga.”8
O le Agaga Paia o se fesoasoani ma se taiala. Ae o se auala foi e faamamaina ai. O le mafuaaga lena e matua taua ai lava le auauna atu e tumau ai le faamaoni. Pe a tofia i tatou e auauna atu, e mafai ona tatou tatalo mo le Agaga Paia ia avea ma a tatou soa ma le talitonuga, o le a oo mai. Pe a tatou ole atu i le faatuatua, e mafai ona oo mai se suiga i o tatou natura e le gata mo le sologa lelei o o tatou agaga ae e faamalolosia ai foi i tatou mo tofotofoga e tatau ona tatou taufai oo uma i ai.
E i ai tuaoi o mea e mafai e uo ona fai, e fesoasoani ai ia i latou e tatau ona tumau. O uso fou e tatau ona tatalo. O i latou e tatau ona faalagolago i le malosi latou te maua mai tali i a latou tatalo. E tatau ona latou filifili i le faatuatua ina ia papatiso, ia i ai lo latou faatuatuaga i la latou uo atoatoa, o le Faaola lea. E ao ona latou filifili i le faatuatua ia te Ia ia salamo, ia lotomaualalo ma agamalu.
E tatau ona latou filifili e talia le meaalofa o le Agaga Paia. O upu o le faamauga i le Ekalesia o se valaaulia: “Talia le Agaga Paia.” Ma o lena filifiliga e le faatasi ona faia, ae o aso uma lava, o itula uma, ma minute uma. Tusa lava foi pe a sau le Agaga Paia e musuia i latou i le mea e ao ona latou fai, o le faia po o le le faia foi o se filifiliga. E oo lava foi pe a latou faitauina ni tusitusiga paia i aso taitasi, e manaomia ai foi se filifiliga e “fiafia i afioga a Keriso.” E oo lava foi i le fiafia po o le taumamafa i ai, e leai se aoga e aunoa ma se filifiliga e fai mea o loo ta’u mai e afioga a Keriso e fai. O le umi ona ola i le faatuatua ma le usiusitai, e avea ai le Agaga Paia ma soa tumau, o le a suia ai o tatou natura, ma mautinoa ai foi le tumau ai.
E tatau i le tagata o le ekalesia ona faia filifiliga, ae e taua lava le uo moni. E i ai auala taua mo oe e te lua fefaasoaai ai ma le uso fou lana avega, ina ia mama ai. E mafai ona e alofa, faalogo, faaali atu, ma molimau atu i ai.
Muamua, e tatau ona tatou alofa ia i latou. O le mea lena e fai e le Faaola. E mafai ona tatou faia faatasi ma Ia ma mo Ia foi. Sa Ia faaalia ia i tatou le ala i Lana auaunaga i la le tino. Na ia aoao mai i mataupu faavae ma faataitaiga, e tatau ona tatou alolofa i Ona soo.
“O la’u poloaiga lenei, ia outou fealofani, pei ona ou alofa atu ia te outou.
“E le sili lava le alofa o se tasi i lenei alofa, ia tuuina atu e se tasi lona ola e sui a’i ana uo.
“O a’u uo outou, pe afai tou te faia mea uma lava ou te fai atu ai ia te outou.
“Ou te le toe ta’ua outou o auauna, aua e le iloa e le auauna mea e faia e lona alii; a ua ou ta’ua outou o uo, aua ua ou faailoa atu ia te outou mea uma na ou faalogo ai i lo’u Tama.”9
E silasila le Faaola i se uso o tautevateva, o se uo. Na Ia tuuina mai Lona soifua mo i tatou uma. E alofa o Ia ia i latou, ma o le a Ia tuuina mai ia te i tatou, pe afai tatou te faamaoni, le meaalofa o le lagonaina o se vaega o Lona alofa mo i latou. E i ai taimi ua faamanuiaina ai au e le Agaga Paia, ou te lagona ai le Alofa o le Faaola mo se uso fou o tautevateva. Ou te iloa e mafai.
Lona lua, e tatau ona tatou faalogo atu ma le malamalama ma le alofa i se uso fou. E manaomia ai foi i lena tulaga ia meaalofa faaleagaga, talu ai e seasea ona tutusa o tatou aafiaga ma i latou. O le a le lava ona faapea, “Ou te malamalama, ou te malamalama i ou lagona,” sei vagana ua tatou malamalama i ai. E malamalama le Faaola. Ua saunia foi o Ia e fesoasoani ia avea oe o se uo e malamalama, e oo lava ia i latou faatoa e feiloai i ai, pe afai e te ole atu i le faatuatua. A o le’i soifua mai o Ia, sa silafia e perofeta mea Na te faia ina ia mafai ai ona fesoasoani ia avea oe o se uo ia te Ia:
“E maliu foi o ia, e onosai i mea tiga, ma puapuaga, ma tofotofoga uiga eseese; e faapea foi ina ia faataunuuina le upu ua faapea mai, na te ave i ona luga puapuaga ma ma’i o lona nuu.
“Na te ave foi le oti i ona luga, ina ia tatalaina e ia noanoaga o le oti o loo ua noanoatia ai nei lona nuu; na te ave foi i ona luga o latou vaivai, ina ia faatumuina lona alo i le alofa e tusa ma le faaletino, ina ia silafia e ia e tusa ma le tino le ala e tausi a’i lona nuu e tusa ma o latou vaivai.”10
Lona tolu, e tatau ona avea i tatou ma se faataitaiga i le uso fou. E mafai ona tatou fiafia i le afioga a le Atua. E mafai ona tatou ole atu ma ola ai mo le mafutaga a le Agaga Paia. E mafai ona tatou usiusitai ona o le faatuatua ia Iesu Keriso. Ma e i ai le taimi e mafai ai ona avea i tatou ma se faataitaiga o se soo, o le ua toe fanauina e ala i le Togiola. Atonu e faifai malie. E ono mafai foi ona faigata ia i tatou ona iloatino i tatou lava. Peitai, e moni lava. Ma o le a aumaia ai le faamoemoe i se uso fou ma i latou uma tatou te faauo i ai i le ala agai i le ola e faavavau.
Lona fa, e tatau ona tatou molimau atu i le moni i o tatou uso fou. E tatau ona faamaoni, ma e aupito sili pe a faigofie. E sili foi ona fesoasoani pe afai e faatatau i le moni o le misiona a le Faaola, o le alofa o lo tatou Tama Faalelagi, ma meaalofa ma le mafutaga a le Agaga Paia. Ma e taua e le aunoa ona molimau atu, na faaali mai le Tama ma le Alo i le taulealea o Iosefa Samita, ma ua toefuataiina mai le Talalelei atoatoa ma le Ekalesia e avefeau faalelagi. O le a faamaonia e le Agaga Paia na tautinoga faigofie o upumoni.
O le a manaomia pea lava pea e le uso fou lena faamautinoaga, tusa lava pe e te le i ai iina e molimauina. Afai latou te filifili e teena le mafutaga a le Agaga Paia, o le a le tumau lo latou faamaoni. Peitai, e moni lena mea mo i tatou uma, pe o fea lava tatou te i ai, ma pe o le a foi lo tatou faamaoni. O le a tofotofoina i tatou uma lava. Ma tatou te taufai manaomia uma lava ni uo moni e alolofa ia te i tatou, e faalogo mai ia i tatou, e faasino mai ia i tatou le ala, ma molimau mai ia i tatou i le upumoni, ina ia mafai ai ona tatou faatumauina le mafutaga ma le Agaga Paia. E tatau ona avea oe o sea ituaiga o uo moni.
O loo mafai pea ona ou manatua e pei lava o le aso, ia uo sa faaaafiaina lo’u olaga mo le lelei i aso ua leva. Ua mavae atu i latou, ae e faagaeetia ai pea lava au i le manatuaina pea o lo latou alolofa, faataitaiga, faatuatua, ma molimau. Ma o lou faauo atu tusa lava pe na o le toatasi se uso fou, e mafai i lenei olaga ma le isi olaga, ona faamanu atu ia te oe le faitau fiaselau po o le fiaafe o o latou augatuaa ma e e tutupu mai ai.
O le Ekalesia moni lenei a Iesu Keriso. O loo soifua o Ia. E alofa o Ia ia te outou, ma e alofa foi ia i latou tou te auauna atu i ai, ma e o le a avea ma a outou uo moni i le faavavau.
I le suafa paia o Iesu Keriso, amene.