Faamalolosia o le Aiga ma le Auaiga
O mataupu autu e tolu ole a fesoasoani ia te oe e faamalosi ai lou aiga ma le auaiga o le faafaileleina, taulaga, ma le tatalo.
A o tatou matamata i le faaiuiuga o le Olimipeka o le Taumalulu i le 2002, sa le mafai ona galo i latou taitoatasi sa manumalo i pine auro. E anoanoai au afeleti sa tele tausaga o a latou sauniuniga, na o mai e tauva, ma sa faamoemoe e manumalo. O outou o tamaitai talavou o le Ekalesia, o loo outou sauniuni foi ma tauva mo se pine a o mumusaesae le Agaga i o outou loto.
O le polokalama a Tamaitai Talavou e mafai ona maua ai se malae matagofie e koleni ai, e fesoasoani ai ia te outou taitoatasi ia ausia a outou sini, ma o le autu a Tamaitai Talavou o se faamanatu e le aunoa lea e le o tuulafoaiina i tatou i le tauvaga. O loo tatou i ai i le ‘au a le Alii, ma o le a i ai pea lava pea o Ia iina e fesoasoani ina ia tatou manumalo i pine auro.
O i tatou o afafine o le Atua, o nisi o outou atonu e maoae o outou tomai faaafeleti, ae peitai ua faamanuiaina outou uma i taleni ma meaalofa e tele. O se tasi o meaalofa e aupito sili ona taua o lou tomai lea e faamalosi lou aiga ma le auaiga, o se fasifuaitau fou ua faaopoopo i le autu a Tamaitai Talavou. O e manatuaina nei upu? O se tasi o galuega ua tuuina mai ia te i tatou teine ma tamaitai i le malo, o le alolofa lea ma faamalolosia o tatou aiga.
Ou te tatalo i le po nei, ia mumu le Agaga i lou loto, ina ia e maua se faanaunauga e tele atu, e faamalosi ai lou aiga i le taimi nei ma sauniuni ai mo lou aiga i le lumanai. Ua tutumu tusitusiga paia i auala e aoao ai i tatou i le ala e faamalolosia ai o tatou aiga. E leai se faiaoga e sili atu nai lo le Faaola. A o tatou suesue i Ana aoaoga ma mulimuli i Ana faataitaiga, e mafai ona tatou faaleleia atili o tatou olaga faaleaiga. Sei o tatou talanoa i ni mataupu faavae se tolu o le a fesoasoani e te faamalosi ai i lou aiga ma le auaiga:
-
Faafaileleina
-
Taulaga
-
Tatalo
Faafaileleina:
O ai se e le fiafia e taaalo ma se tamaitiiti pe siiina foi se pepe fou faatoa fanau mai? O i tatou o ni tamaitai na fananau mai ma se tomai faanatura e alolofa ai ma faafailele isi. O uiga o le faafailele o le lagolagoina lea e le tasi o le isi, faamalosiau i le tasi, e fafaga ma ia fealofani. Pe o tatou faia ea lenei mea i o tatou aiga?
Na aoaoina i tatou e le Faaola lava Ia ia tatou faafaileleina. Ua faatele ona Ia fetalai mai, “Ua atu fia ona ou faapotopotoina outou, e pei o se moa ona ofaofatai i lana toloai i lalo o ona apaau, ma ou fafagaina outou” (3 Nifae 10:4).
Pe a faapotopoto faatasi lo outou aiga e tele mea tou te mafaia e valaaulia ai le agaga o le lotogatasi. O le a le taimi mulimuli na e fusi maia ai lou tina po o lou tama ma faafetai atu ia te i la’ua mo mea uma ua la faia? O le tele lava o le faafaileleina e faia e matua, ae e manaomia foi le faafaileleina o i la’ua.
O i tatou o tamaitai, e mafai ona tatou faapotopoto a tatou fanau i lalo o o tatou apaau ma le alofa ma le agalelei. Talu ai nei sa ou maitauina ai se tina talavou o talanoa i lana tama e lua tausaga le matua. Ina ua tagi le teineitiiti ae le malamalama le tina pe o le a le mea e tagi ai, sa fai atu le tina, “Aua e te tagi. Tautala mai. Ta’u mai po o le a le mea ua tupu.” O le tele o lona faaaloalo na ia faaalia mo lenei pepe e lua tausaga, na uma ai le tagi o le pepe ae “tautala.” Ua aoaoina e lenei tina talavou le auala e faafailele ai.
Ina ua faafeiloai mai e lo tatou Tama Faalelagi le Faaola i le lalolagi, sa Ia faaalia mai le faafaileleina lelei i le faaaogaina lea o se leo malu. Fai mai le tala a tusitusiga paia, “Ua latou faalogo i le leo, e peiseai ua sau mai le lagi; … e le o se leo saua, e le o se leo tele; … e ui lava ina itiiti le leo, ua ati ai i totonu o i latou o e na faalogo i ai” (3 Nifae 11:3).
I o tatou aiga, e mafai ona avea lea ma faataitaiga i le ala tatou te talanoa atu ai i tagata o o tatou aiga. Aua tatou te leotetele, ae faaaoga se leo malu pe a tatou talanoa i e tatou te alolofa i ai. E faapea ona talanoa mai le Tama Faalelagi i Lana fanau.
Taulaga
O le mataupu faavae lona lua o le taulaga. O outou o tamaitai talavou, o loo outou aoao e fai taulaga i aso uma. Ua matua faagaeetia lava i matou i mea lelei uma o loo outou faia:
-
Tou te tausia nai o outou tei pe a tuua le aoga ae fai galuega a tina. Tou te fesoasoani e fai le kuka ma faamomoe pepe.
-
Tou te nonofo i le fale ae le o i pati aua tou te le matamata i ni tifaga leaga tusa lava pe o a tausaga e talia.
-
E faitau afe outou e ala i luga i le lima i taeao taitasi, e o i le seminare a o le’i o i le aoga.
E ese le mitamita o le Faaola mo outou. Ua Ia silafia mea o loo outou feagai. E malamalama o Ia i le faigata ona outou osia taulaga. Sa aoao mai i tatou e le Faaola i le auala e fai ai taulaga. Sa Ia taulagaina Lona soifua mo tagata uma.
Ina ua mavae Lona toetu, o le mea muamua lava na Ia aoao atu i Sa Nifae, o le ala na taulagaina ai o Ia. Sa Ia fetalai mai, “Ua ou inu foi i lena ipu oona na tuuina mai ia te au e le Tama… . Ua tigaina au i le finagalo o le Tama i mea uma talu le amataga” (3 Nifae 11:11). Sa Ia faia le mea na finagalo le Tama Faalelagi Na te faia.
E finagalo le Tama Faalelagi tatou te foafoaina se aiga amiotonu. O le avea ma se ava ma se tina, e ono faaitiitia ai ou avanoa faigaluega, ae e mafai ona tauia. A o avea au ma se tina talavou, ou te manatua lo’u taina o se pese mo la’u fanau teine laiti a o sisiva faataamilo i le potu. Atonu e vasi i le faafofogaaga, ae o loo auiliili mai ai:
A ou matua, ou te fia avea ma se tina e fai se aiga:
Tasi, lua, tolu ou te fanauina.
O le faigaluega, ou te le toe mafaufauina
Aua ua fai lo’u aiga… .
Ou te alofa ia i latou i le aso atoa
ma tufa a latou susu, o kuki,
Faapea ma paluni.
Ou te opo i latou pe a faaletonu,
E faitau atu foi ni malie
Ma usu ni pese faigofie.
(Janeen Brady, “I Want to Be a Mother,” in Beloved Songs [1987], 10–13)
Ia, na ua outou maua mai se manatu. O le avea ma se tina, o se faamanuiaga tele, e le o se taulaga.
Tatalo
Lona tolu, ua aoaoina i tatou e le Faaola ia tatalo
A o e fesoasoani e faamalosi lou aiga, e ao lava ona le misi le tatalo, ia avea o se vaega o lou olaga i aso taitasi. O le a puipuia outou e le tatalo mai le fili, e avatu ai le filemu, ma fesoasoani i o outou aiga ia faateleina le fealofani.
Ina ua asiasi atu le Faaola i a Sa Nifae, sa na o ni nai aso na tatau ona Ia aoao atu ai ia i latou le atoaga o le talalelei. O le tele o lena taimi, na Ia taulai atu ai i le tatalo. Tou te iloa o le mataupu e 17 e oo atu i le 20 o le Tolu Nifae, e tusa ma le faa-38 ona ta’u le tatalo. O le tele o taimi na Ia poloaiina ai tagata ia tatalo. Sa tootuli o Ia i le palapala ma tatalo ai mo i latou. Sa Ia aoaoina i latou i le ala e tatalo ai. Sa Ia faamanuia i fanau laiti ma tatalo atu i le Tama mo i latou. Sa Ia poloaiina i latou ina ia tatalo e le aunoa i o latou loto.
Atonu e mafai ona aumai a outou tusitusiga paia i le Mutuale, faitau leotele mataupu na e fa, ma vasevase le upu tatalo—ma fetufaai tala ma molimau i le mana o le tatalo. Ou te folafola atu o le a e lagona le Agaga o le Alii ma atinae ai se molimau e malosi atu e uiga i le tatalo.
Ua saunoa mai o tatou perofeta, latou te popole i le autalavou e tatalo faalua i le aso. O lona uiga, afai e le o popole i latou mo i tatou, o lona uiga e le tatau ona tatou popole mo i tatou lava, tau lava ina tatou tatalo faamaoni ta’ifaalua i le as.
Faalogo i se tala matagofie a le tina o le Perofeta o Iosefa Samita, i le po na alu ai e aumai papatusi auro. Sa ia tusia: [O le po lena] sa tuai ai ona ou moe… . Pe tusa o le sefululua na sau ai Iosefa i totonu … ma fesili mai ia te au pe i ai sa’u pusa e i ai se loka ma se ki… . ma sa ou matua faaletonu ai lava… . Peitai na fai atu … Iosefa, ‘E le afaina, e mafai lava ona fai … e aunoa ma se pusa—ia to’a le tai—o le a lelei mea uma.’”
E le’i umi, ae malaga Iosefa ma Ema, i se solofanua ma se taavaletoso. Faalogo la i le tala a lona tina: “Sa alu le po o o’u tatalo ma faatoga atu i le Atua, aua ua le mafai ona ou moe i le popole o lo’u mafaufau.” O aioiga a se tina, se afafine amiotonu o le Atua, na faamafanafanaina ai le Perofeta ma puipuia papatusi auro. I le tele o tausaga, sa fesoasoani ai ana tatalo faifai pea e faamalosi ai lona aiga ma le auaiga. (tagai Lucy Mack Smith, History of Joseph, iloilo e Preston Nibley, [1979], itulau 102.)
E mafai faapefea ona e faaogaina le tatalo e faamalosi ai lou aiga? Talu ai ona e alofa tele le Tama Faalelagi ia te oe, o lea e finagalo ai o Ia e te talanoa atu ia te Ia. Po o a lava au tauiviga o i ai, e mafai ona e tatalo mo soo se mea lava.
-
E mafai ona e tatalo mo se fesoasoani i le tausia o tulafono faaleaiga, e pei o le vave mai i le fale.
-
E mafai ona e tatalo ia naunau lou aiga e suesue faatasi i tusitusiga paia.
-
E mafai ona e tatalo ia atili lelei a oulua fesootaiga ma lou tama ma lou tina.
-
E mafai ona e tatalo ia e atili onosai i lou uso po o le tuagane, ma fesoasoani i o latou faafitauli.
Tatalo mo faafitauli o loo e popole ai. Aua le fiu. E mafai e le Tama Faalelagi ona tali mai ma o le a tali mai lava i a tatou tatalo. E anoanoai a’u tatalo ua tali mai. E i ai foi a’u tatalo e le i tali maia lava. O le a tali mai lava a tatou tatalo i le taimi o le Alii, pe a ua tatou saunia.
Ua ou talanoa atu i lenei po e uiga i mataupu autu e tolu e fesoasoani ai e faamalosi lou aiga ma le auaiga:
-
Faafailele
-
Taulaga
-
Tatalo
Ua faasino mai e le Faaola, lo tatou Togiola ma la tatou uo, ia i tatou le ala. A o e ola ai i Ana aoaoga, atonu o le a e le manumalo lava i se pine siliva po o se pine auro o le Olimipeka, ae o le mauaina o lau pine o le Tulaga Faatamaitai Talavou, e mafai ona aumaia ai se taui e sili atu ma faamumu tele ai le afi o le Agaga Paia i o outou loto taitoatasi. A o e suesue ma atinaeina se fiafia i tusitusiga paia, ou te tatalo ia e maua auala ‘anoa e faamalolosia ai lou aiga ma le auaiga, i le suafa o Iesu Keriso, amene.