O Le Avea ma Faamanuiaga Tele i O Tatou Uso a Tagata
Ou te tatalo mo outou alii talavou e ese le lelei, ina ia le gata ina outou agavaa e taliaina le asiasiga a agelu, ae ia… avea [foi outou] ma agelu e asiasi ma galulue i olaga o isi tagata
A o avea o se alii talavou e 27 tausaga le matua, sa faauuina Uilifoti Uitilafi e avea ma ositaulaga i le aso 5 o Novema, 1834. E valu aso mulimuli ane, ae amata sana misiona mo le lua tausaga i le itu i Saute o le Iunaite Setete.1 I se tasi po sa malolo ai ma momoe ma lana soa i se aiga, sa avatu e lea aiga i ai le fola o le fale e momoe ai, ma sa ia faamatalaina faapea, “sa fai si faigata ona e onosefulu maila sa [ma] savavali ai e aunoa ma se meaai.”2
O le aso na sosoo ai, sa la savavali ai mo le 12 maila i le timu seia oo ina la tau atu i le fale o se tagata, ae iloa ane o se tasi lea tagata o le au faatupu faalavelave i Misuri. Sa faapea mai Uso Uitilafi, “E tau nonofo ifo i lalo le aiga mo le latou taumafataga o le taeao, ae ma ulufale atu loa. O aso na, o le tu ma aga i fanua a tagata Misuri, latou te fai atu ia te oe e te ‘ai tusa lava pe feitai ia te oe; o lea na fai mai ai ma te ‘aai, ma sa ma fiafia i le valaaulia. Sa iloa e ia o i ma’ua o Mamona; ma o le taimi lava na amata ai ona ma aai, sa amata ai foi ona laulauvavale e uiga i Mamona. Sa i ai lana ipu tele o puaa faaasu ma fuamoa, ma sa tele foi falaoa i luga o le laulau, ma e le i faavaivaia ai le ma aai ona o lona laulauvavale, aua o le tele lava o ana upusa o le tele foi lena o le ma aai, seia iu ina ma maoona; ona ma tulai ese ai lea mai le laulau, fai o ma pulou ma faafetai atu i ai mo le ma aiga o le taeao. O le taimi mulimuli na ou faalogo ai ia te ia, o la lava e laulauvavale. Ou te talitonu o le a tauia o ia e le Alii ona o le ma aiga o le taeao.”3
I le faaiuga o le uluai tausaga o lana misiona, na ia faamatalaina ai, sa ia malaga mo le tolu afe luaselau fasefuluvalu maila, e selau fitusefulu fonotaga na ia faia, [ma] sa ia papatisoina tagata e fasefulutolu”4
O lana uluai misiona i saute o le Iunaite Setete na sosoo ma ni misiona pupuu se lua i Atumotu o Alope, e ui atu i le talafatai o Maine,5 ona sosoo ai foi lea ma nisi misiona i Egelani.6 O le taimi o lana misiona mulimuli i Egelani i le 1840, na ia faailoa mai ai, “o faamanuiaga mai le Atua,” na avea ai o ia ma tufugaaao e aumaia ai le silia ma le 1,800 agaga i le Ekalesia i totonu o le valu masina.7
Na faamaonia e Uilifoti Uitilafi lava ia, ua folafola mai e le Tusi a Mamona “Ua faatuina e le Atua le ala e mafai ai e le tagata ona fai vavega tetele i le faatuatua; o le mea lea ua avea ai o ia ma tagata aoga tele i ona uso a tagata.”8 O’u uso talavou e, o le Perisitua Arona, ou te toe fia faamanatu atu ia te outou, ua na ona finagalo lava o lo tatou Tama i le Lagi ia outou lelei, ae ia faia mea lelei, e auauna atu ai ma faamanuia olaga o isi tagata, ma avea ai o se faamanuiaga i ou uso a tagata.
Ua tatou faitau i le Talalelei na tusia e Luka e faapea, “Ua tupu le poto ma le tino o Iesu, ua alofagia o ia e le Atua atoa ma tagata.”9 Talu ai ona o la tatou sailiga i le lalolagi mo le faaatoatoaina e aofia ai le saga avea atili e pei o le Faaola, o lea e tatau ai foi ia i tatou, ona tupu le poto ma le tino, ma ia alofagia e le Atua atoa ma tagata.
O gaoioiga a korama o le Perisitua ma gaoioiga o le Mutuale faatasi ma Tamaitai Talavou, a fuafuaina lelei ma le agaga tatalo, ma talanoaina i le komiti talavou a le au epikopo,10 o le a fesoasoani i alii talavou ma tamaitai talavou uma, e tutupu ai i le poto pe a latou maua se agaga talisapaia e tele atu mo tusitusiga paia, ma afioga tulei a perofeta soifua, ma auai i gaoioiga o le Mutuale e aofia ai soo se mea “e mama, matagofie, logoleleia, ma tauleleia.”11
O le fefautuaa’i faatasi i le komiti talavou a le au epikopo e maua ai aoaoga taua mo se augatupulaga atoa o taitai i le lumanai, o e o le a aoao e galulue lelei faatasi i aufono.
O outou alii talavou o le a tutupu i le tino ma le malosi faaletino, a o outou faia siva faaanamua, o taaloga, ma tauvaga lelei faaafeleti e faamasani ai i aga faatausala. O le a alofagia outou e le Atua pe a outou sailiili i talafaasolopito faaleaiga, faia papatisoga i le malumalu mo augatuaa ua maliliu, ia avea ma faiaoga faamaoni o aiga, faamama soo i le falelotu, asiasi i falemai, ma fesoasoani e faamatagofie nuu ma alaalafaga. Pe a outou faia na mea, ua outou faatinoina mea na apoapoai mai ai le Tupu o Peniamina “pe a i ai outou i le galuega a o outou uso ua na ona i ai outou i le galuega a le Atua.”12 O se taitai poto o le autalavou, o le a itiiti se manatu i gaoioiga e sue ai tupe, ae tele atu le faamamafa i le tuuina atu o auaunaga ma le le manatu faapito i isi.
O outou alii talavou, o le a faateleina le alofagia e tagata ma sili atu ona saunia lelei mo misiona, o faaipoipoga ma galuega i le lumanai, pe a outou aoao atili i galuega eseese, ma atinae ai se tulaga mautinoa sili atu, e ala i le tuuina atu o lauga, auai i le faatinoga o tala fou e taitasi vaaiga, ma faaaliga taleni.
O a tatou gaoioiga faale-autalavou, e tatau ona atagia ai lo tatou talitonuga “ua ola le tagata ina ia latou maua le olioli,”13 ma e tatau ona tatou naunau e fetufaai atu lena olioli i isi tagata. E le i leva talu ai, sa ma feiloai ai ma se fafine mai Sasae o le Iunaite Setete, ua nofo nei i le Vanu o Sate Leki. O ia o se tagata faamaoni o se isi ekalesia Kerisiano, ma sa ou fesili atu ia te ia pe o fiafia faapefea i lo latou nonofo ai faatasi ma le Au Paia o Aso e Gata Ai. Fai mai a ia: “Ma te fiafia lava i ai ma lo’u toalua, ae ua ou popole i le ma tama teine talavou. O afiafi uma lava o Aso Lulu pe tusa o le ta o le fitu, e toatele teineiti o le matou pitonuu, e pasi mai lava i luma o le matou fale e o i se mea, ae e le’i i ai lava se taimi e tutu mai ai ma valaaulia le ma tama teine e 14 tausaga latou te o.”
Sa ou fai atu, “Le tuafafine pele, o lou aso laki lenei; o lea ua ou tu i se tulaga e foia ai lena faafitauli. Sa vave ona ia tuu maia le igoa o lana tama teine ma le tuatusi, ma sa matou faafesootaia le peresitene o le siteki ma le puleaoga o le seminare.
O a tatou uo ma tuaoi, o fanau a le Tama i le Lagi alofa, o le e finagalo ina ia latou toe foi uma atu ia te Ia. Mata e mafai ona tatou fiafia pe a le auai uma mai uso o la tatou korama i le taeao o le Aso Sa? E moni e tatau lava ona tatou tuuina atu i tatou lava i tagata ua le toaaga mai, ma i latou foi o isi faatuatuaga, ma valaaulia i latou ma le alofa i gaoioiga a Alii Talavou ma Tamaitai Talavou, seminare, vasega ole Aoga Sa, ma sauniga faamanatuga.
Ina ua maua e Iosefa Samita ma Oliva Kaotui le Perisitua Arona mai aao o Ioane le Papatiso, o le ua toetu, sa la’ua mauaina “ki o asiasiga ma galuega a agelu,”14 ma e faapena foi outou ina ua faauuina. Ou te tatalo mo outou alii talavou e ese le lelei, ina ia le gata ina outou agavaa e taliaina le asiasiga a agelu, ae ia faapei foi outou o le taulealea o Uilifoti Uitilafi, o le a avea ma agelu e asiasi ma galulue i olaga o isi tagata, pe a outou faaaogaina lo outou faatuatua e galueaiina ai “vavega ofoofogia,” ma avea ai ma se “faamanuiaga tele” i o outou uso a tagata.
O le a faaitiitia e Satani lou faatuatua ma faavaivaia lou malosi faaleperisitua e faia ai vavega ofoofogia, peitai ua saunia e se Tama Faalelagi alofa mo oe se puipuiga faalelagi—o le Meaalofa a le Agaga Paia. I le mataupu muamua o le Tusi a Mamona, ua tatou aoao ai ina ua faitau e Liae ia tusitusiga paia, “faatumuina o ia i le Agaga o le Atua.”15 Sa folafola mai mulimuli ane e Nifae, a tatou “fiafia i le afioga a Keriso … e faaalia mai e afioga a Keriso ia [i tatou] mea uma [tatou te] faia.”16
Atonu e te feagai ma le faiga o ni faaiuga e faatatau i se misiona, o lau galuega i le lumanai, ma, mulimuli ane ai i se faaipoipoga. Pe a e faitau i tusitusiga paia ma tatalo mo se taitaiga, atonu o le a e vaai tino i le tali o lolomi i ni upu i se laupepa, ae a o e faitauina, o le a e maua se uunaiga malamalama, ma musumusuga, ma e pei lava ona folafola mai, o le Agaga Paia “o le a faaali mai ia te outou mea uma e tatau ona outou faia.”17
E manao Satani e faamatuu atu lau filifiliga lelei i foliga eseese o amioga faavalea, ae ua uma ona folafola mai e se Tama Faalelagi alofa ia te outou e ala mai i Lana perofeta, o Isaia, o le anapogi ma le loto atoa, a o faaogea oe mai lou fiaai faaletino, o le a Ia fesoasoani ia te oe e “tatalaina fusi na faia i le amioleaga,” ma “gausia amo uma lava.”18 Tago e faamaonia lena folafolaga e ala i le anapogi. O le tulaga gaogao tatou te oo i ai, o le a lava ai le avanoa mo le atoaga o le talalelei. E muamua faagaogao ona faapaiaina ai lea.
O le suesue i tusitusiga paia ma le anapogi, e amata ma faaiu foi i le tatalo, e mafai moni ai lava “ona suia le ao i le po.”19 O le soifuaga atoa o le Perofeta o Iosefa Samita, o loo faapupula mai ai le mana o le tatalo ma le faataunuuga o le folafolaga a le Alii e faapea, “Afai e te ole mai, o le a e maua lea faaaliga, ma lea faaaliga.”20 O se tasi faaaliga taua o le a e maua, o le malamalama lea i le auala sili e mafai ai ona e pa’i atu i olaga o isi ua se lo latou ala. O le faia o lea mea, e lelei ona manatua o le fautuaga poto a Peresitene Hinckley: “O le Agaga Paia o le Molimau lea o le upumoni, o le e mafai ona aoaoina tagata i mea e le mafai ona aoao ai e le tasi le isi.”21
Ua silafia e Peresitene Gordon B. Hinckley o se tasi o aafiaga autu mo le faatumauina o uso fou faatoa liliu mai ma le toe faatoagaina mai o e ua le toaaga mai, o uo lelei ia, ma sa faamatalaina ma le manino e Robert Browning le mafuaaga:
… Pe ana faamanuiaina au e pei o oe,
E tatau ona siomia a’u i le alofa, ioe,
E tatau ona latou puipuia a’u; e foliga mai
E le tatau ona ou toilalo, aua o a’u ua vaavaai,
E uo agalelei e faapei o au nei.22
I se taimi mulimuli ane, a o peresitene i le Ekalesia Uilifoti Uitilafi, sa ia tautino mai: “E leai lava se eseesega pe o se Ositaulaga se tagata po o se Aposetolo foi, pe afai na te faalauteleina lona valaauga. E umia e se Ositaulaga ki o asiasiga ma galuega a agelu. E le i i ai se taimi i lo’u olaga, a o avea ma se Aposetolo, po o se Fitugafulu, po o se Toeaina, na tele atu ona ou maua ai le puipuiga a le Alii nai lo le taimi na ou umia ai le tofi o se Ositaulaga. Sa faaalia mai e le Alii ia te au e ala i faaaliga vaaia, o faali’ali’aga, ma le Agaga Paia, mea tele sa tuu mai i o’u luma.”23
O’u uso talavou pele e, ou te tatalo ia taitasi i tatou, e ala i lo tatou faatuatua, ma faaaoga le mana o lo tatou perisitua e galueaiina ai vavega ofoofogia e ala lea i le fetufaai atu o le talalelei ma auauna atu i isi, ona avea ai lea o i tatou ma faamanuiaga tele i o tatou uso a tagata, i le suafa o Iesu Keriso, amene.