O Tina o Loo Natia
Aua ne’i tatou tuufaasoloina atu i augatupulaga i le lumanai ia feeseeseaiga, ma le feitaga’i o o tatou taimi. Ia tatou aveesea soo se tina o loo natia lea e leai se isi mea na te faia ae na o le faaumatia.
Ia Aperila o le 1966, i le konafesi aoao faaletausaga a le Ekalesia, na tuuina atu ai e Elder Spencer W. Kimball se lauga e le faagaloina. Na ia siitia mai ai se tala na tusia e Samuel T. Whitman e faaulutalaina “O Tina o Loo Natia.” O le aso lenei, ua ou filifili ai foi a’u e sii mai le tala a Samuel T. Whitman, e sosoo ai ma ni faataitaiga mai lo’u lava olaga.
Na tusia e Whitman: “Sa le masani ona avea le matagi aisa ma faatafunaga. E moni, e itiiti ni nai uaea eletise na pauu i lalo, ma na faafuaseia foi ona tele ni faalavelave sa tutupu i luga o le aualatele. E masani lava ona faigofie i le laau tele o le uolonati ona tauave le mamafa o le aisa pe a to’a ai i luga o ona lala. Ae ona o le tina u’amea sa i totonu o le uso o le laau, na mafua ai ona faaumatia le laau.
“O le tala i le tina u’amea na amata mai i tausaga ua mavae a o avea le alii faifaatoaga lauulu sinasina lea ua ia mauaina nei le fanua o loo tu ai nei le laau ma se alii talavou i le fanua sa pulea e lona tama. Na faatoa aveese lava i lena vaitaimi le ili laupapa mai le vanu, ma sa maua pea e tagata sa faamautu ai i lea nofoaga ni meafaigaluega ma ni fasi u’amea sa salalau solo ai… .
“I lea aso faapitoa, sa maua ai e lenei alii i le itu i saute o le fanua se tina lautele lea e faaaoga e tagata tipi laau—e lautele, mafolafola, ma mamafa, e sili atu ma le futu lona umi, ma na molali i le ta soo. [O se tina u’amea, e faaaoga e fesoasoani ai i le faapa’uina i lalo o se laau, e tuu i totonu i se mea na tipi i se ili laau ona ta lea i se samala mamafa e faalautele ai le mea na tipi.] … Talu ai ona ua tuai o ia i le meaai o le afiafi, o lea na faataatia ai e le alii talavou le tina u’amea lenei … i le va o lala o le tamai laau o le uolonati sa toto e lona tama i tafatafa o le faitotoa o le lotoa i le pito i luma. Na ia fuafua na te aveina le tina u’amea lea e teu i le fale kamuta pe a uma le meaai o le afiafi, po o se isi foi taimi pe a toe ui ane ai iina.
“O lona faamoemoega moni lava lena sa i ai, ae na te le’i faia lava. O iina lea sa matua’i mau ai le tina u’amea seia oo ina ua faaipoipo o ia ma suitulaga i lona tama i le vaaiga o le faatoaga. Pe tusa o le vaitaimi tonu lava ua afa ai le tele o le tupu o le laau, sa faapea ona aai ai i lalo le aufaigaluega… . Sa tupu le laau ma ua ufitia ai i totonu ia le tina u’amea, ma sa i ai pea i totonu o le laau le tina u’amea i le taimi o le taumalulu lea na oo mai ai le matagi aisa.
“I se taimi paganoa i lena po malulu … sa mafati ese ai se tasi o lala o lala lapopoa e tolu mai le tino o le laau ma pa’u i luga o le eleele. O lea sa le paleni ai luga o le laau, ma na vetelua ai ma pa’u i lalo. Ina ua tuanai le matagi, e leai ma se lala o lenei laau sa tu ma le mitamita, na totoe ai.
“I le taeao po o le aso na sosoo ai, na alu atu ai le faifaatoaga ma faanoanoa i le faaumatiaina o le laau… .
“Ona tau atu lea o lana vaai i se mea o loo i totonu o le laau ua vete. ‘O le tina u’amea,’ o lana taumemumemu lea ia te ia lava, ‘lea na ou mauaina i le itu i saute o le fanua.’ Na ona tasi lava o lana tepa i ai, na ia iloa ai le mafuaaga na pa’u ai le laau. Ua avea le ola faatasi o le tina u’amea lenei ma le laau ma auala ua taofia ai alavalava o le laau mai le pipii faatasi i le mea e tatau ona i ai.”1
O’u uso e ma tuafafine, o loo i ai ia tina u’amea o loo natia i olaga o le toatele o i latou ua tatou iloa—ioe, atonu o i totonu o o tatou lava aiga.
Ou te fia fetufaai atu ia te outou le tala o se uo ua leva, ua tuua nei le olaga faaletino. O lona igoa o Leonard. O ia e le o se tagata o le Ekalesia, e ui o lona toalua ma lana fanau sa auai i le Ekalesia. Sa auauna atu lona faletua o se peresitene o le Peraimeri; o lona atalii sa auauna atu i se misiona faamamaluina. Sa faaipoipo atu lona afafine ma lona atalii i ni soa i sauniga paia ma ua fai o latou lava aiga.
O i latou uma lava e iloaina ia Leonard e fiafia ia te ia, e pei foi o au. Na te lagolagoina lona faletua ma lana fanau i o latou tofiga o le Ekalesia. E auai o ia faatasi ma i latou i le tele o gaoioiga a le Ekalesia. Sa ola o ia i se olaga lelei ma le mama, o se olaga o le auauna atu ma le agalelei. Sa taumanatunatu lona aiga, faapea ma isi tagata pe aisea ua mavae atu ai ia Leonard ma le olaga faaletino e aunoa ma faamanuiaga e aumaia e le talalelei i ona tagata.
Ina ua oo ina tagata matua Leonard, sa faapea ona faaletonu lona ola maloloina. Na i’u lava ina ua faataotolia o ia i le falemai, ma ua taulalata atu lava ina uma atu le ola. O le ma talanoaga mulimuli lava ma Leonard na faapea mai ai, “Tomasi, na ou iloa mai lava oe a o e laitiiti. Ua ou lagona le uunaiina o a’u e faamatala atu le mafuaaga ou te le’i auai ai i le Ekalesia.” Ona ia faamatala mai lea o se mea na oo i ai ona matua i le tele o tausaga ua tuanai. Sa le’i mananao i ai, ae na oo atu le aiga i se tulaga na latou lagona ai ua talafeagai ona faatau atu la latou faatoaga, ma na ofoina atu e se tagata se tau e faatau ai. Ae na talosaga atu se faifaatoaga sa latou tuaoi ina ia faatau atu ia te ia le faatoaga—e ui lava e fai si maualalo o le tau—ma faaopoopo mai faapea, “Ua leva ona mafana la tatou mafutaga. O le auala lenei afai o le a ou mauaina le fanua, o le a mafai ona ou vaaia.” Na fai si faaumiumi ma na iu ai loa ina ua malilie ia matua o Leonard, ma ua faatau atu loa le faatoaga. O le tagata na faatauina—o le tuaoi lava lea—ma sa ia umia se tofiga maualuga i le Ekalesia, ma o le faatuatuaina o ia ona o lona tofiga sa uunaiina ai le aiga e faatau atu le fanua ia te ia e ui lava e le’i tele se tupe na maua mai ai nai lo le tupe na semanu e maua pe ana faatauina atu i le tagata muamua lea na manao i ai. E le’i leva talu ona uma ona faatau atu le fanua, ae faatau ese atu loa e le tuaoi lana lava faatoaga ma le faatoaga lea na maua mai i le aiga o Leonard, i se faiga ua tele ai nei le fanua ma ua maualuga ai foi ma le tau. Ua taliina ai nei le fesili ua leva ona fesiligia i le mafuaaga e le auai ai ia Leonard i le Ekalesia. Sa ia lagonaina pea lava i taimi uma, sa faavalea lona aiga e lo latou tuaoi.
Na ia tautino mai ia te a’u ina ua mavae le ma talanoaga e faapea, ua ia lagonaina ua matuu ese atu se avega tele a o ia sauni e fetaiai ma le Alii. O le faalavelave na tupu ona o se tina na natia na taofia ai Leonard mai le ausia ma le mauaina o faamanuiaga silisili.
Ou te masani i se aiga na malaga mai i Amerika mai Siamani. Sa faigata le gagana Igilisi mo i latou. Sa tau leai ni a latou tupe, ae sa taufai faamanuiaina uma i latou i le naunau e galulue faapea ma se alofa i le Atua.
Na fanau mai le la tama lona tolu, na o le lua masina na ola ai ae oti. O le tama o se tagata fau meaafale ma sa ia faia se pusa maliu matagofie mo le tino o le tamaitiiti pele. O se aso pogisa le aso o le falelauasiga, na atagia mai ai le lagona faavauvau sa la lagonaina. A o savavali atu le aiga i le falesa, faatasi ma le Tama o loo tauaveina atu lenei tamai pusa maliu, sa faapotopoto atu nisi o uo. Ae peitai, sa loka le faitotoa o le falesa. Sa matuai galo lava i le epikopo pisi le maliu. Sa le manuia taumafaiga ina ia maua mai o ia. I le leiloa po o le a le mea o le a fai, o lea sa afisi ai e le tama le pusa maliu i lalo o lona lima, faatasi ma lona aiga i ona autafa, ma toe sii atu i le fale, ma savavali i le maligi o timuga.
Ana fai o le aiga e maualalo o latou uiga, semanu e mafai ona latou tuuaia le epikopo ma tumau ai pea ni lagona le fiafia. Ina ua iloa e le epikopo le mea na tupu, sa ia asiasi atu i le aiga ma faatoese atu i ai. Sa vaaia pea le tiga i ona foliga, ae sa maligi ona loimata, sa talia e le tama le faatoesega ma sa faapea ona fusifusi nei alii e toalua i se agaga o le femalamalamaa’i. Sa leai ni tina u’amea sa i ai e faatupu ai ni lagona ita. O le alofa ma le taliaina na manumalo.
E tatau ona saoloto le agaga mai mea na e taofia ai i tatou i tua ma lagona leaga na tatou te teuina i o tatou loto ina ia mafai ona siitiaina faaleagaga i tatou ma maua le malamalama ma le fiafia i o tatou agaga. I le tele o aiga, o loo i ai lagona tiga ma le musu e faamagalo atu. E le afaina po o le a le mea na mafua ai na lagona tiga. E le mafai ma e le tatau ona tuu ai pea ina ia maua ai le tiga. E na o le fefaamagaloa’i e faamaloloina ai. Na tusia e George Herbert, o se tagata tusisolo i le senituri 17 e faapea, “O le na te le mafai ona faamagalo atu i isi ua ia motusiaina le ala laupapa lea e tatau ona ia sopoiaina pe afai e alu atu o ia i le lagi, aua e moomia e tagata uma le fefaamagaloa’i.”
E matagofie fetalaiga a le Faaola ina ua latalata ona maliu o ia i luga o le satauro mataga. Na Ia fetalai, “Lo’u Tama e, ia e faamagalo atu ia te i latou; aua ua latou le iloa le mea ua latou faia.”2
E i ai nisi e faigata lava ia i latou ona faamagaloina i latou lava ma tumau ai pea i o latou sese o loo taumate i ai. Ou te fiafia i le tala i se taitai faalelotu o le na alu atu i tafatafa o le moega o se tamaitai o loo taoto ua lata ona oti, ma taumafai e faamafanafana ia te ia—ae le’i faamanuiaina. “Ua ou leiloa,” o le tala lea a le tamaitai. “Ua ou faaleagaina lo’u olaga ma olaga uma sa siomiaina a’u. Ua leai se faamoemoe mo a’u.”
Sa vaaia e le alii lenei se ata faavaa o se teineitiiti aulelei lava i luga o le pusatu. “O ai lea?” na ia fesili atu ai.
Na ataata le tamaitai. “O la’u tama teine, o le mea lena e tasi e sili ona matagofie i lo’u olaga.”
“Mata e te fesoasoani ia te ia pe afai e mafatia o ia pe na te faia se mea sese? Pe e te faamagalo atu ea ia te ia? Pe e te alofa pea foi ia te ia?”
“Ioe, ou te alofa pea i ai!” sa tagi le tamaitai. “Ou te faia soo se mea mo ia. Aisea ua e tuuina mai ai lena ituaiga fesili?”
“Aua ou te manao ina ia e iloa,” o le tala lea a le alii, “e pei o se tala faatusa, o loo i ai sou ata i luga o le pusatu a le Tama Faalelagi. E alofa o Ia ia te oe ma o le a fesoasoani ia te oe. Valaau atu ia te Ia.”
Na aveeseina se tina u’amea na taofia ai lona fiafia.
I se aso o puapuaga po o se taimi o faigata, o sea iloa, o sea faamoemoe, o sea malamalama o le a aumaia ai le mafanafana i le mafaufau fesouaina ma le loto faanoanoa. O le savali atoa o le Feagaiga Fou o loo manavaina mai ai se agaga o le fafagu mai i le agaga o le tagata. O ata lafoia o le faanoanoa e aveesea e ave susulu o le faamoemoe, e suia le faanoanoa i le fiafia, ma le lagona o le leiloa i le olaga e aveesea i le malamalama mautinoa o loo manatu mai lo tatou Tama Faalelagi ia i tatou uma taitoatasi.
Na tuuina mai e le Faaola se faamautinoaga o lenei upu moni ina ua Ia aoao mai faapea e oo lava i se manu iti e le tatau ona pa’u i le eleele e aunoa ma le silafiaina e le Tama. Ona ia faaiuina lea o le manatu matagofie i le fetalai mai, “O lea, aua tou te matatau ai, e sili outou i manu iti e tele.”3
I se taimi ua mavae sa ou faitau ai i le savali lenei mai le Associated Press lea sa vaaia i le nusipepa: “Sa faamatala e se alii matua i le toe sauniga o lona uso, lea sa la potu, i vaitaimi o talavou, i se tamai fale laupapa e tasi le potu e tu latalata i Canisteo, i Niu Ioka, fai mai, ina ua uma se la finauga, sa la vaeluaina loa le potu i le afa i se laina e tusi i le penisina, ma e le tatau ona sopo le tasi i le itu a le tasi, pe fai atu foi se upu i le isi talu mai lena aso—i le 62 tausaga na mulimuli mai ai.” Oka se malosi ma le faatafuna o lea tina natia.
E pei ona tusia e Alexander Pope, “O le sese o se uiga lea faaletagata, a o le faamagalo atu o se uiga faalelagi.”4
O nisi taimi e faigofie lava ona tatou taliaina se faaonoono mai. O nisi taimi, e tatou te matuai le maluelue lava e taliaina se faatoesega faamaoni. Ia tatou tuuese le manatu o le tagata mo ia lava, le faamaualuga ma le tiga—ona laa lea i luma ma faapea atu, “Ua ou matuai sese lava! Ia avea i tatou e pei o le mea sa i ai muamua: o ni uo. Aua ne’i tatou tuufaasoloina atu i augatupulaga i le lumanai ia feeseeseaiga, ma le feitaga’i o o tatou taimi.” Ia tatou aveesea soo se tina o loo natia lea e leai se isi mea na te faia ae na o le faaumatia.
O fea e pogai mai ai ia tina natia? O nisi e mafua mai i ni feeseeseaiga e le’i faaleleia lava, lea e tau atu ai i ni lagona le fiafia, ona sosoo mai ai lea ma le faanoanoa. O nisi e amata mai i ni le fiafia, o le lotoleaga, o finauga ma mea e mafaufau e tiga ai. E tatau ona tatou faaleleia—Ia faagalo ae aua ne’i tuu atu i le tiapolo e faateteleina ai ma faatafunaina ai.
O se tamaitai lelei lava e silia ma le 90 tausaga na ma feiloai i se tasi aso na te’i lava ua faamalau mai le tele o mea e faanoanoa ai. Sa ia ta’ua faapea i le tele o tausaga na muamua atu, sa talosaga atu ai se faifaatoaga latou te tuaoi, lea e masani ona latou feeseeseai ma lona toalua, pe mafai ona oso atu sona auala ‘alo i totonu o le latou fanua e tau atu ai i lona fanua. Sa tu o ia ma lona leo ua tete, ma faapea atu, “Tommy, ou te le’i faatagaina o ia e sopoia lo matou fanua ae ia taamilo pea o ia i le auala mamao—e tusa lava pe savali—ina ia tau atu ai i lona fanua. Sa ou sese ma ou matuai faanoanoa lava. Ua leai nei o ia, ae ma’imau e pe ana mafai ona ou fai atu ia te ia ‘Ua ou sese.’ Ma’imau e pe ana ou toe maua se isi avanoa.”
A o o’u faalogo atu ia te ia, sa faapea ona oo mai i lo’u mafaufau ia upu na tusia e John Greenleaf Whittier: “Mai upu faanoanoa uma lava a le laulaufaiva po o le peni, o upu sili lava nei ona faanoanoa, ‘Semanu lava!’”5
Mai le 3 Nifae i le Tusi a Mamona na oo mai ai lenei fautuaga musuia: “Aua foi ne’i i ai ni finauga ia te outou… . Aua, e moni, e moni, ou te fai atu ia te outou, o le ua i ai le agaga o le finauga, e le mai ia te au lea, ae mai le tiapolo, o le tama lea o finauga, ua ia faaosoina foi loto o tagata e fefinauai ma le ita. Faauta e le o la’u mataupu lea, e faaosoina loto o tagata i le feitagai; a o la’u mataupu lenei, ia mavae atu lava mea faapea.”6
Ou te fia faaiuina i se tala i ni alii se toalua o e na avea ma ni a’u tagata totoa. O a la gaoioiga totoa e le’i faataunuuina mo se atunuu atoa, ae o totonu o se vanu filemu ua lauiloa o Midway, i Iuta.
E tele ni tausaga ua mavae a o le’i auauna atu faatasi ia Roy Kohler ma Grant Remund i tofiga i le Ekalesia. O i la’ua o se uo lelei tele. O i la’ua o ni fai faatoaga ma ni fai lafumanu. Ona i ai lea o se le malamalama na tulai mai na mafua ai ona va i la’ua.
Mulimuli ane, na matuai ma’i tigaina ia Roy Kohler i le kanesa ma e puupuu lava se taimi sa totoe e ola ai. Sa ma asiasi atu ma lo’u toalua o Frances ia Roy ma ou tuuina atu se faamanuiaga ia te ia. A o matou talatalanoa, sa faapea mai le Uso ia Kohler, “Ou te fia ta’u atu ia te oe se tasi o mea sili ona matagofie na ou oo i ai i lo’u olaga.” Ona ia faamatala mai lea ia te a’u lo la’ua le femalamalamaa’i ma Grant Remund ma le feeseeseaiga na tulai mai ai. Fai mai lana faamatalaga, “Ma te le’i toe faauo.”
“Ma,” sa faaauau ai le tala a Roy, “e le’i leva talu ona ou aoina le vao mago ma teu i le fale e teu ai vao mo le taumalulu, ae oo i se tasi po, ona o le tele o le vao mago, na mafua ai ona tupu se afi, ma mu uma ai le vao mago, o le lotoa, ma mea uma sa i ai . Sa ou le mautonu,” o le tala lea a Roy. “Sa ou matua leiloa po o le a sa’u mea o le a fai. Sa matuai pogisa le po, se’i vagana ai nai motumotu o le afi sa ola. Ona ou vaaia lea o loo agai mai ia te a’u i le auala, mai le nofoaga o Grand Remund, ia moli o ni palau ma masini mamafa. A o agai mai i totonu o le matou auala ia le au laveai ma feiloai mai ia te a’u ma o’u loimata, sa faapea mai ia Grant, ‘Roy, e fai si tele o lau lapisi o le a faamama. O lea ua matou o mai ma la’u fanau tama, tatou o loa e amata ona faamama.’” Sa amata loa ona latou galulue. Sa le toe vaaia e faavavau ia le tina natia lea na eseese ai i la’ua mo se taimi puupuu. Sa latou galulue i le po atoa e oo i le aso na sosoo ai, faatasi ai ma isi mai le nuu na auai atu i ai.
Na maliu ia Roy Kohler, ma ua matua foi ia Grant Remund. Sa auauna atu faatasi o la atalii i se au epikopo a le uarota lava e tasi. Ou te matuai faamemelo lava i le faauoga a nei aiga lelei e toalua.
Tau ina ia avea i tatou ma faataitaiga i o tatou aiga ma faamaoni i le tausiga o poloaiga uma, ina ia ‘aua ne’i o tatou teufatuina ni tina natia ae ia manatua le apoapoaiga a le Faaola: “O le mea lea e iloa ai e tagata uma lava o o’u soo outou, pe afai ua outou fealofani.”7
O la’u aioiga ma la’u tatalo lea, i le suafa o Iesu Keriso, amene.