O le a Ou Alu i Mea E te Finagalo Ou te Alu i Ai
Ou te alofa ia te Ia. Ou te fia faia mea uma ou te mafaia e auauna atu ai e pei ona Ia finagalo ai ia te au ou te auauna atu ai.
Ou uso e, ma tuafafine pele, ou te tulai ma lou agaga maualalo ma le agaga faafetai tele i lenei nofoaga paia. Ao ou tuputupu ae o se tamaitiiti i totonu o Raymond, Alberta, i Kanata, ou te fiafia tele i taimi uma matou te peseina ai le pese, “Ou te Alu i Mea e te Tofia” (tagai Viiga, itulau 169). O na upu, i soo se taimi matou peseina ai i sauniga faamanatuga po o le Aoga Sa, e faamuina ai se tautinoga i lou loto ma lou agaga, ma ou manao ai i taimi uma ou te alu i le mea e finagalo le Alii ou te alu i ai, ma tautala atu i mea ua Ia finagalo ou te tautala atu ai—“Avea au pei na e tofia,” le Alii pele. O lea tautinoga ua alagatatau ona toe taua i lenei aso.
Ou te faafetai i la outou palota taliaina o au i le aso ananafi, ma faatasi ai ma outou ou te lagolagoina ai Peresitene Gordon B. Hinckley ma ona fesoasoani, Peresitene Monson ma Peresitene Faust, ma Peresitene Packer ma le Toasefululua o ni perofeta, tagata vaai ma tali faaaliga. Ou te molimau atu o i latou moni o ni perofeta, tagata vaai, ma tali faaaliga.
Ou te alofa i le Alii. Ou te alofa i lenei Ekalesia. Ou te alofa i le Au Paia maoae ma le faatuatua i le lalolagi atoa o latou faia mea uma latou te mafaia e faamamaluina ai a latou tautinoga ma ola ai i o latou talitonuga. Ou te molimau atu o loo soifua le Atua, ma o Iesu Keriso, o Lona Alo, o lo tatou Faaola ma lo tatou Togiola. Ou te alofa ia te Ia. Ou te fia faia mea uma ou te mafaia e auauna atu ai e pei ona ia finagalo ai ia te au ou te auauna atu ai, ma ou te faia ai nei upu ma ou molimau atu ai i le faamaoni o nei mea uma i le suafa o Iesu Keriso, amene.