O Le Tulafono o le Sefuluai
Ua faatuina ai e le Alii se tulafono o le sefuluai e fai ma tulafono o mea tau tupe o Lana Ekalesia…. O se tulafono foi e faaalia ai lo tatou faamaoni i le Alii.
O Le Fitugafulu
O le Kerisimasi talu ai na ou mauaina ai se meaalofa faapitoa mai lo’u tina. Sa ia tausia ma le faaeteete i ana ‘oa mo le tele o nei tausaga se tamai api, o se api muamua lea na ou maua mai o’u matua i le 1944, ina ua faatoa 10 o’u tausaga.
O le api lenei. O se api mo talafaamaumau, sa aoaoina au e tusi faamaumau ai i vaiaso taitasi a’u tupe maua ma a’u tupe faaalu.
Mo se faataitaiga, o le mea muamua na ou tusia mo le vaiaso i le 29 o Iulai 1944, sa amata lo’u vaiaso i le $24.05 sa i o’u lima, ma e $7.00 la’u tupe na maua i a’u galuega na fai i le faatoaga a le matou aiga. O tupe faaalu, sa ou faaaluina se 5 sene mo lole, $3.45 sene na fai ai sa’u faatauga, 20 sene le tifaga, ma le $2.37 lo’u ofu. Sa ou teuina foi le $20.00 i se teugatupe mo le taua ae 70 sene na totogi ai la’u sefuluai. E uma ifo le vaiaso o totoe la’u $4.28.
Ou te manatua lo’u fesilisili i lo’u tama pe mafai ona sii lo’u totogi e 25 sene i le itula. Ae ina ua ou manatua e 20 sene le tifaga ae na o le 5 sene le tau o le lole, ua iloa nei atonu na ova mai lo’u totogi.
A o ou matamata i lenei tusi mo faamaumauga ua silia ma le 50 tausaga talu ai, sa ou iloa ai o vaiaso uma lava o le tausaga e 1944 ma le 1945, a o ou tausia la’u tusi mo faamaumauga, sa ou totogiina ai le 10 pasene o la’u sefuluai mai au tupe maua mo lena vaiaso. I le masina o Tesema 1944, sa ou tusia ai sa ou totogia le $12.35 o la’u sefuluai i lena tausaga—o se sefuluai atoa.
O iina na ou aoao ai le totogiina o le sefuluai.
Sa ma aoaoina ma lo’u toalua le ma fanau i le taua o le tuu ese o le sefuluai i vaiaso taitasi pe a maua o latou alauni pe maua foi ni a latou tupe pe a tausitama, pe faia ni galuega faapitoa. Sa latou tuuina a latou sefuluai i se tamai pusa. A oo i Aso Sa anapogi, ona latou aveina lea o a latou sefuluai i le epikopo. Sa latou aoaoina ai foi le taua o tupe i le teuina lea o se vaega tele o le paleni o a latou tupe maua mo se misiona ma aoga i le lumanai.
Ua mulimuli nei fanau a le ma fanau i le mamanu lava lea e tasi.
Ia tatou aoao atu lenei mataupu autu i a tatou fanau, ma ia mautinoa o latou vaai mai ia i tatou o totogi a tatou sefuluai. Na saunoa Peresitene Iosefa F. Samita, “O a tatou fanau, o le taimi lava e lava ai lo latou matutua e galulue ai mo mea latou te manaomia, ua ao loa lava ona aoao i latou e totogi a latou sefuluai, ina ia mafai ona tusia o latou igoa i le tusi o le tulafono a le Alii.”1
A o ou i ai i le Peraimeri, sa matou aoaoina ai le tamai tauloto lenei:
O le a le sefuluai?
O le a ou ta’u atu ai.
Sefulu sene mai le tala
Ae pene mai le seleni.
O le mataupu faavae o le totogiina o le sefuluai, ua lalagaina e pei o se ielalaga i tusitusiga paia uma. Na totogi e Aperaamo le sefuluai ia Mekisateko.2 Sa aoaoina le fanauga a Isaraelu ina ia aumai a latou sefuluai i le Alii.3 Masalo o le mau aupito ta’ua soo e uiga i le mataupu o le sefuluai i le Feagaiga Tuai, o loo maua lea i le Malaki:
“Pe faoa e le tagata mea a le Atua? A o outou ua outou faoa a’u mea. A ua outou fai mai, Ni a ea au mea ua matou faoa? O mea e sefulu a’i ai a outou mea, atoa ma taulaga …
“Ina aumaia mea e sefulu a’i a outou mea uma lava i le fale e tuu ai mea; ina ia i ai mea e ‘ai i lo’u fale; ma ia outou tofotofo mai ai ia te au i lenei mea, ua fetalai mai ai Ieova o ‘au, pe ou te le toina pupuni o le lagi mo outou, ma sasaa atu le manuia mo outou, ina seia silisili ona tele.”4
O le aofaiga o le sefuluai tatou te totogia, o se fuafuaga aupito fetaui lelei ma talafeagai ua ou iloaina. O le tasi vaesefulu o a tatou mea uma e maua. O tagata uma lava, mai e aupito matitiva seia oo atu i e aupito sili ona mauoa, latou te totogia le pasene lava e tasi. Sa aoao mai e Keriso lena mataupu autu i le tala i le fafine mativa ua oti lana tane ma ana tupe iti:
“Sa nofo Iesu e feagai ma le mea e teu ai tupe, ua silafia foi e ia le vao tagata o lafo tupe i le mea e teu ai tupe: e toatele foi o e mauoa, ua tele a latou ua lafo i ai.
“Ua alu ane foi le tasi fafine mativa ua oti lana tane, ua lafo ane ai tupe iti e lua, o le kotane e tasi ia.
“Ona valaau atu lea o ia i ona soo, ua fetalai atu ia te i latou, E moni, ou te fai atu ia te outou, o mea a lena fafine mativa ua oti lana tane, ua lafo i le mea e teu ai tupe, ua sili ia i a latou uma na lafo i ai:
“Aua o i latou uma, ua latou lafo nisi mea mai a latou mea ua tele; a o ia ua mativa ua ia lafo ana mea uma sa ia te ia, o ana mea uma e ola ai.”5
O se kotane, o se tupe itiiti tele. O se tupe apamemea aupito laitiiti sa faaaoga e tagata Iutaia. O le tasi vae onosefulu ma le fa o se tenari Roma.
I le tisipenisione lenei, ua faatuina ai e le Alii se tulafono o le sefuluai e fai ma tulafono o mea tau tupe o Lana Ekalesia. A aunoa ma lena, e le mafai ona tatou tauaveina faamoemoega o le faavavau a le Alii. O se tulafono foi e faaalia ai lo tatou faamaoni i le Alii, ma faamaonia ai foi lo tatou agavaa mo avanoa paia, sauniga, ma faamanuiaga.
Sa ou i ai talu ai nei i Initipene, Misuri, ma sa ou lagonaina ai e tatau ona ou tietie atu mo se itula agai i Sisifo Mamao. Sa faato’aina e le Au Paia o Aso e Gata Ai ia Sisifo Mamao i le 1836, e fai ma nofoaga o le sulufaiga mai sauaga. Na avea Sisifo Mamao ma nofoaga o le malo o le itumalo, ma e tusa ma le 3,000 i le 5,000 tagata na aumau ai. Sa avea ma laumua o le Ekalesia mo se vaitaimi. Sa soifua ai foi iina o’u augatama.
Ina ua ou taunuu i Sisifo Mamao ma ou vaavaai solo, na pau lava le mea sa ou vaai i ai o le laupae mai o faatoaga mananaia ma le lauusiusi o sana, saito, hei, ma isi meaai. Sa leai se aai, leai ni auala po o ni fale. Sa na o se vaega mutia e faatu ai le malumalu sa i ai maatulimanu e fa, ua siomia i se pa laitiiti.
I le 1838, sa tutuliesea mai ai le Au Paia mai Sisifo Mamao. Sa pue faapagotaiina Iosefa Samita ma isi ma auina atu i le Falepuipui o Liperate. O iina na matua vaivai ai ona o tulaga matuia mo le ono masina. Sa matua pagatia foi o’u augatama i Sisifo Mamao ma sa toetoe ina uma ai lo latou ola.
A o ou tutu i Sisifo Mamao ma toe vaai faalemafaufau ai i le mea sa i ai i aso ua leva, sa ou susueina au tusitusiga paia ma faitau le vaega e 119 o le Mataupu Faavae ma Feagaiga. O le faaaliga lenei na aumai e ala mai i le Perofeta o Iosefa Samita i Sisifo Mamao i le aso 8 Iulai, 1838, i le taimi ogaoga o nei sauaga:
“O le a fai lenei mea ma amataga o le sefuluai a lo’u nuu.
“A mavae lea, o i latou ua faapea ona totogiina sefuluai o le a totogi atu le tasi vaesefulu o a latou mea uma e maua i tausaga taitasi; o le a faia foi lenei mea ma tulafono tumau ia te i latou e faavavau, mo lo’u perisitua, ua faapea mai ai le Alii.”6
Sa ou mafaufau ifo ia te au lava, pe mata na le mafai ona aumaia le tulafono o le sefuluai i se taimi e sili atu ona faigofie nai lo lena. Ae na latou taliaina lava, ma sa amata ai loa e tagata o le ekalesia ona ola ai i lenei tulafono fou i le taimi na faoa ai a latou meatotino, ae o nisi foi, na uma ai lo latou soifua. A o ou asiasi i Sisifo Mamao, sa ou maua ai se molimau faaleagaga sa sili atu ona malosi ma loloto e uiga i le tulafono o le sefuluai, nai lo le mea sa ou lagonaina muamua.
Ou te fia tuuina atu se fautuaga i le faitau afe ma afe o tagata ua auai i le Ekalesia i le taimi nei, ona o taumafaiga filiga a o tatou faifeautalai. Ia faaaoga lo outou faatuatua. Totogi a outou sefuluai. Atonu e ese lenei tulafono mai lo tulafono ua e masani i ai ae e te le i papatiso. Ae e leai se mea e te faia, e oe le tagata faatoa liliu mai, e saunia atoatoa ai oe ina ia e olioli i faamanuiaga o loo faatalitali mai mo oe—o faamanuiaga o le malumalu—nai lo le totogiina o lau sefuluai.
O le taimi nei, o sina fautuaga puupuu i faifeautalai. Aoao atu le sefuluai i tagata sailiili, i se auala latou te maua ai se molimau i lenei mataupu autu matagofie o le talalelei.
O le tina o Iosefa F. Samita, sa lauiloa i le igoa, “Tina Samita ua Oti Lana Tane.” O ia o le faletua o Ailama Samita, o le sa tagatavaleina faatasi ma le Perofeta o Iosefa. Sa ia otegiaina i se taimi le failautusi sa vaaia le sefuluai, o le na faapea mai, e le tatau ona ia totogia se sefuluai ona o lona mativa. Na saunoa lea tina, “E te manao e taofia o’u faamanuiaga? Afai ou te le totogia la’u sefuluai, e tatau foi ona taofia e le Alii ana faamanuiaga mai ia te au. Ou te totogia la’u sefuluai, e le gata ona o se tulafono a le Atua, ae ou te faamoemoe foi e maua ai so’u faamanuiaga ona o le faia. O le tausia o lenei tulafono faapea foi ma isi, ua ou faamoemoe ai ia ou maua le tamaoaiga, ma mafai ona ou tausia lo’u aiga.”7
Pe na faatamaoaigaina ea o ia? A o avea lana tama tama ma le atalii o lana tama ma peresitene o le Ekalesia, ma o le taimi nei, o e na tupuga mai ia te ia e aofia ai ma se uso o le Korama a Aposetolo e Toasefululua ma le tele o taitai iloga o le Ekalesia.
Sa ta’ua e Iosefa F. Samita i se tasi taimi e uiga i lona tina e faapea, sa ia “totogiina sefuluai o ana mamoe ma povi, o le pauna lona sefulu o ana pata, o le moa lona sefulu o ana moa, o le lona sefulu o ana fuamoa, o le lona sefulu o ana mea i tuaolo, o le lona sefulu o ana tamai povi, o le lona sefulu o ana tamai solofanua—o le lona sefulu o mea uma lava sa ia fafaga ma totoina.”8
Sa ou aoao atu i se tasi taimi le tulafono o le sefuluai i taitai o le Ekalesia i Aferika. Sa faapea mai se tasi uso, “Elder Tingey, e mafai faapefea ona ou totogiina le sefuluai ae leai sa’u tupe maua?” Sa ou sailiilia ma iloa ai e toafitu pe toavalu tamaiti i lona aiga ma e le faigaluega. Sa ou fesili pe faapefea ona fafafaga lona aiga. Sa ia fai mai, e i ai si ana faatoaga laitiiti ma e fai lana lafu kusi. Sa ou fesili, “O a mea a kusi e fai?” Na ia tali mai, “E tau tuufua.” Sa ou tali atu, “E faapefea pe a e alu atu i se isi taeao o i ai ni fuakusi se 10 i moega o au kusi?” Sa ‘emo si malamalama i lona mafaufau. “E mafai ona ou aveina se fuakusi se tasi ma tuu i lo’u peresitene o le paranesi,” o lana tali lea. Sa malamalama o ia, ma e mafai ona avea o ia ma se tasi e totogi atoa le sefuluai.
A tatou totogia ma aoao a tatou fanau e totogi sefuluai, ua tatou atinaeina se aiga ua faavae mau i le osiga ma le tausia o feagaiga o le malumalu. O faamanuiaga aupito viia o faamanuiaga uma tatou te mauaina i le olaga ma le faavavau, o faamanuiaga e maua mai i le iloaina lea ua faamauina o tatou aiga mo le faavavau atoa. O le taimi nei, ua i ai nisi ua latou iloa ua latou taofia i latou lava mai nei avanoa paia ona o lo latou le totogiina o sefuluai. Mo i latou ua i ai i lea tulaga, o la’u apoapoaiga ia te outou, ia faaaoga lo outou faatuatua, ia outou tofotofo atu i le Alii, ma totogi a outou sefuluai.
O le a oo mai se manuia faapitoa e silisili i mea uma i lou aiga pe a outou totogi se sefuluai atoa. O le a lagonaina Na te silafia oe, ma taliaina lau saofaga. O le a iloa ai, o popolega uma lava e faatatau i mea tau tupe, lagolago, ma le tausiga o oe lava ia ma le aiga, o le a faaitiitia. O le a e iloa ai e alofa lou Tama Faalelagi ia te oe.
Ou te faafetai lava aua sa aoaoina au e o’u matua e totogi le sefuluai. Ou te tuuina atu la’u molimau lotomaualalo, o le totogiina o sefuluai, o se mataupu autu moni o le talalelei a Iesu Keriso. I le suafa o Iesu Keriso, amene.