Usitai Faatuatua
“Usitai faatuatua” o se mataupu tau i le faatuatuaina. E faigofie lava le fesili, pe tatou te faatuatuaina ea lo tatou Tama Faalelagi? Pe tatou te faatuatuaina ea o tatou perofeta?
O lenei lalolagi tatou te ola ai, e le o taimi uma e tulai mai ai mea e pei ona foliga mai ai. E i ai nisi taimi tatou te le iloa ai ‘au mamana o loo faatosinaina ai i tatou. E mafai ona matua taufaasese foliga tatou te vaai i ai.
I ni nai tausaga ua mavae, sa i ai se mea na ou oo i ai, i foliga vaaia taufaasese o ona taunuuga semanu e matautia. Sa asiasi mai ia i matou le tausoga o lo’u toalua ma lona aiga mai Iuta. O se aso toafilemu o le taumafanafana i le Talafatai o Oregon, ma sa ma fagogota i le sami. Sa manaia lava ma sa ma fiafia i le fagotaina o le samani, ma na te’i ua ou faliu i tua ma vaaia ai se galu tele e 8 futu o fati mai ia i ma’ua. Sa na o sina taimi na mafai ona ou valaau atu ai mo se lapataiga, a o le i taina lo ma vaa e le galu. Ae na tu pea le vaa, ae o Gary, le tausoga o lo’u toalua, na lafo i lalo. Sa fai uma o ma’ua ofu faaola, ma sa fai si faigata o tau faafoe le vaa, ua afa i le suasami, i le mea sa faatafetafea mai ai [Gary], ma toso mai ai i luga.
O le galu e ta’ua o le galu faapopo na ma lavevea ai. E le masani ona tupu, ma e le mafai ona vave iloa se taimi e sau ai. Mulimuli ane, sa ma iloa ai, o le talafatai o Oregon-Uosigitone, e toalima tagata na malelemo ai i lena lava aso, i faalavelave faafuasei na tutupu i vaa eseese. Na mafua uma lava i le galu faafuasei lea, e leai lava se mafuaaga manino e sau ai mai le fogatai. I le taimi na ma o ai i si vaega loloto, sa manaia ma malu lelei le sami, ma sa leai se foliga o se tulaga matautia. Peitai, na matua taufaasese le sami ma e le o foliga ia na vaaia ai.
A o tatou i ai i le tatou malaga fai o le olaga, e ao lava ona faaauau pea le puipuiga ma mataitu mea e taufaasese, ae le o foliga e pei ona vaaia ai. Afai tatou te le faaeteete, e mafai e galu faapopo o le olaga ona faataumaoi ai e pei foi ona i ai i le sami.
O se tasi o togafiti faapopo a le fili, o le faatalitonu lea o i tatou faapea o le usitai e aunoa ma se fesiligia i mataupu faavae ma poloaiga a le Atua, o se usitai tauaso lea. O lana sini, o le faatalitonuina lea o i tatou faapea, e tatau ona tatou mulimuli i o tatou lava ala faalelalolagi ma faanaunauga manatu faapito. Na te faia lea i le faatauanauina o i tatou o le mulimuli “tauaso” i perofeta, ma le usitai i poloaiga, o le le mafaufau lea mo i tatou lava. Ua ia aoao mai e le se atamai le faia o se mea, ona ua faatonuina ai i tatou e se perofeta soifua po o perofeta foi o loo tautala mai ia i tatou mai tusitusiga paia.
O lo tatou usiusitai i poloaiga a le Alii e aunoa ma le fesiligia, e le o se usitai tauaso. Na aoao mai Peresitene Boyd K. Packer, i le konafesi aoao o Aperila i le 1983, e uiga i lenei mea. “E le o usitai le Au Paia o Aso e Gata Ai ona o loo taufaatonu ia usiusitai. Ua latou usiusitai aua ua latou iloaina upumoni patino faaleagaga, ma ua tonu ia te i latou, o le faaalia lea o la latou filifiliga taitoatasi, ia usitai i poloaiga a le Atua… . Tatou te le usiusitai ona tatou te tauaso, tatou te usiusitai ona e mafai ona tatou vaai” (Boyd K. Packer, Saolotoga ma le Pulea, Liahona, Iulai 1983, 106).
E mafai ona tatou faaigoa o le “usitai faatuatua.” O le faatuatua, na usitai ai Aperaamo i le sauniaina o Isaako mo le taulaga; o le faatuatua, na usitai ai Noa i le fauina o le vaa; o le faatuatua, na usitai ai Nifae e aumai papatusi apamemea; ma o le faatuatua foi, e oso mai ai ma le usiusitai se tamaitiiti mai se mea maualuga i lima o lona tama. “Usitai faatuatua” o se mataupu tau i le faatuatuaina. E faigofie lava le fesili, pe tatou te faatuatuaina ea lo tatou Tama Faalelagi? Pe tatou te faatuatuaina ea o tatou perofeta?
O se tasi o taufaasese a le Fili, o le faatalitonuina lea o i tatou faapea, o le poto ma aoaoga i le lalolagi, ua na o le pau lea o le punavai o le malamalama e tatau ona tatou mulimuli ai. Sa malamalama Iakopo, le uso o le perofeta o Nifae, i le fuafuaga a le fili, ma sa ia lapatai mai ai ia te i tatou:
“E! togafiti poto a le ua leaga! E! o le faamaualuga, ma le vaivai, ma le valea o tagata! Pe a aoaoina i latou ua latou faapea ua popoto i latou, ua latou le faalogologo i le faatonuga a le Atua, aua ua latou tuu ese ai, ua manatu i latou ua iloa e i latou lava. O lenei, ua valea lo latou poto, ua le aoga ai ia te i latou. E malaia foi i latou” (2 Nifae 9:28).
E le o faapea mai Iakopo, e le tatau ona tatou aoaoina. Sa ia toe ta’uina mai, e lelei ona aoaoina, pe afai tatou te faalogologo i faatonuga a le Atua.
Ua i ai nisi ua talitonu faapea, e mafai ona e pikiina ma filifili po o fea poloaiga a le Atua e mulimuli ai. E faigofie lava ona latou faaigoaina le tele o poloaiga o ni mea laiti e mafai ona le amanaiaina, ma e le o ni mea e oti ai se isi pe le taua tele foi. O mea e pei o le faia o a tatou tatalo, faamamaluina o le Sapati, fai atu i a tatou fanau tatou te alolofa ia i latou, faitauina o tusitusiga paia, totogiina o a tatou sefuluai, auai i sauniga, ma le anonanoai o isi mea ua le mafai ona tolaulau atu.
E fesootai mai lo tatou Tama Faalelagi i se ala manino lelei i lana fanau. I aoaoga o le talalelei, e leai se leo e le mautinoa e pei ona tautala i ai le Aposetolo o Paulo (tagai 1 Kori. 14:8). E le i tuulafoaiina i tatou e aunoa ma se taitaiga. Ua i ai a tatou tusitusiga paia, o perofeta, o matua ma taitai alolofa.
Aisea tatou te tuua ai le ala sa’o i nisi taimi? Aisea tatou te faatagaina ai i tatou lava, e tosina atu i le taufaasese o le fili? E faigofie lava le tali i le vaifofo o ana taufaasese, ae o nisi taimi e faigata ona faatino. Sa saunoa Peresitene Harold B. Lee i le konafesi o Oketopa i le 1970 e faatatau i le Alii, o le fili ma le vaifofo i le mana taufaasese o le fili.
“E i ai ni tofotofoga faigata tatou te feagai, a o le’i maea fuafuaga a le Alii i lenei ekalesia ma le lalolagi i lenei tisipenisione, … O le a faateleina le malosi o le mana o Satani; ua tatou vaaia i soo se mea… . O le taimi nei, na pau le mea tatou te saogalemu ai, tatou o uso o lenei ekalesia, o lo tatou faia lea o mea tonu na fetalai ai le Alii i le ekalesia i aso na faatulagaina ai le ekalesia. E ao ona tatou aoao e faalogo ma talia afioga ma poloaiga e tuuina mai e le Alii e ala mai i Lana perofeta… . E i ai nisi mea e manaomia ai le onosai ma le faatuatua” (in Conference Report, Oct. 1970, 152).
Ona faaopoopo mai ai lea e Peresitene Lee se lapataiga, ina ua ia saunoa mai, atonu tatou te le fiafia i taimi uma i mea e ta’u mai e taitai o le ekalesia aua atonu e feteenai ma o tatou manatu faaletagata, pe faalavelave foi i mea faafiafia o o tatou olaga. Peitai, afai tatou te faalogo ma faia nei mea e faapei o loo pau mai i le fofoga o le Alii lava ia, o le a le faaseseina lava i tatou ma o le a tele foi o tatou faamanuiaga.
O le faalogo i taitai o le ekalesia, tatou te toe foi ai i le usitai. E tatau lava ona tatou usiusitai e le aunoa. O se vaega lea o le fuafuaga o le Fiafia e Faavavau. Ou te le iloa se isi mataupu faavae, e sili atu ona taua mo lo tatou soifua solo lelei i lenei olaga ma le olaga a sau. O loo aoao mai e tusitusiga paia uma le usiusitai, ma e leai se aposetolo poo se perofeta sa soifua, na te le i aoao maia le mataupu faavae o le usiusitai.
O nisi taimi, e tatau ai ona usiusitai tusa lava pe tatou te le malamalama i le mafuaaga o se tulafono. E manaomia le faatuatua ina ia usiusitai. Na saunoa mai le Perofeta o Iosefa Samita, ina ua aoao mai e uiga i le usiusitai, soo se mea lava e finagalo mai ai le Atua, e sa’o, e ui lava atonu tatou te le iloa le mafuaaga sei vagana se taimi mulimuli ane (tagai Teachings of the Prophet Joseph Smith, sel. Joseph Fielding Smith [1976], 256).
Ou te faafetai lava aua sa ofu o ma ofu faaola i lena aso o le taumafanafana i le sami. Ou te faafetai aua sa mafai ona ma sao mai i le tulaga matautia sa feagai ma nisi ona o lena galu faapopo. Ou te tatalo ia tatou ofuina pea lava pea o tatou ofu faaola o le usiusitai, ina ia faasaoina mai ai i tulaga matautia o le a oo mai pe afai e faaseseina i tatou ma mulimuli ai i faatosinaga a le fili.
Ou te molimau atu ia te outou o loo soifua lo tatou Tama i le Lagi, e alofa o Ia ia te i tatou, ma o le usitai i Ana poloaiga e aunoa ma le tuufesili, e mafai ai ona tatou toe mau faatasi ma Ia ma Lona Alo o Iesu Keriso lo tatou Faaola ma le Togiola, i le suafa o Iesu Keriso, amene.