O Le Auala i le Faaatoatoaina

Peresitene Thomas S. Monson

Ia faataitai i o outou olaga amiolelei patino e fa, ua faamaonia le faamanuiaina: se uiga faaalia o le faafetai, se naunautaiga mo aoaoga, se faanaunauga ia amio pulea, ma se naunautai e galue.

E matua maoae lava le galuega ua faia e le au peresitene o o tatou Tamaitai Talavaou, a ea? Ou te lagolagoina ma faamaonia mea uma ua outou faafofoga i ai mai nei tamaitai ofoofogia i le aso. O i latou moni lava o ni auauna a lo tatou Tama Faalelagi ma ua latou tuuina atu Lana afioga paia.

O le “Fiafia,” na tusia ai e le Perofeta o Iosefa Samita, “o le faamoemoega lea ma le fuafuaga o lo tatou i ai iinei; ma o le iuga foi lea, pe afai tatou te tulimatai atu i le ala e tau atu i le amioatua, amiotonu, paia, ma le tausiga o poloaiga a le Atua.”¹

Ae e faapefea ona maua e se tasi le auala, ae le gata foi i lea, e faapefea ona tumau ai le tagata i le auala e tau atu i le faaatoatoaina?

I le tusi lauiloa a Lewis Carroll O Mea na Tutupu ia Alisa i le Nuu o Matagofie, sa tau atu Alisa i se magaala, e valalua, e taufai agai uma i luma ae eseese itu e agai i ai. Sa la fetaiai ma le Pusi o Tesia, ma ia fesili atu i ai, “O fea le ala e tatau ona ou ui ai?”

Sa tali ane le pusi, “E fuafua lava i le mea e te fia alu i ai. Afai e te le iloa le mea e te fia alu i ai, e le afaina po o le fea ala e te ui ai!”²

E le pei o Alisa, aua ua tofu iloa e outou taitoatasi le mea tou te fia o i ai. E afaina, po o fea le ala e te ui ai, aua o le ala e te mulimuli ai i lenei olaga, e tau atu lea i le ala tou te ui ai i le isi.

O se fatuga o se solo, sa lauiloa i le tele o tausaga ua mavae, o loo i ai se fuaitau faatosina e faapea, “A tau lava o lou moomoo, ona moomoo ai pea lea aua e te’a ai lava lou popole” O se isi fuafaatatau o le toilalo, e maua mai le pese fou talu ai nei, “Aua le popole; ia fiafia!”

O le tatou autu i lenei afiafi o le, “Ia Outou Tumau i Mea Paia,” ua matua talafeagai lelei lava. Ou te talisapaia foi upu o loo mulimuli mai ai: “Ia outou tutu i mea paia, ma aua le liliu ese ai.”³

Sa uunaia mai e Peresitene Siaosi Alapati Samita, le Peresitene lona valu o le Ekalesia e faapea, “Ia faamausali o tatou vae i le ala maualuga e tau atu i le fiafia ma le malo selesitila, ae ia le na o ni nai taimi, ae o aso uma, ma itula uma, aua afai tatou te tutu i le itu a le Alii, afai tatou te tutumau i le faatosinaga a lo tatou Tama Faalelagi, o le a le mafai e le fili ona faaosoosoina i tatou. Ae afai tatou te o atu i le itu a le tiapolo … o le a tatou le fiafia, ma o le a faateleina le le fiafia a o gasolo mai tausaga sei vagana ai ua tatou salamo i a tatou agasala ma liliu atu i le Alii.”⁴

I au tautalaga i alii talavou o le Perisitua Arona, e faatele ona ou sii maia le fautuaga a se tama i se atalii faapelepele: “Afai e i ai se taimi e te iloa ua e i ai i se tulaga e le tatau ona e oo i ai—ia alu ese loa lava!” O le mea tonu lava foi lea e faatatau ia te outou tamaitai talavou o i ai i lenei Nofoaga Autu mo Konafesi faapea foi outou o loo aofaga potopoto i falelotu i vaega eseese o le lalolagi.

Ou te lagona pea lava pea, afai tatou te talanoa faalauaitele, e seasea ona manuia; ae afai tatou te talanoa i tulaga patino, o le a seasea foi ona i ai lea o ni faaletonu. O le mea lea, ou te uunaia ai outou ina ia faataitai i o outou olaga, amiolelei patino e fa, ua faamaonia le faamanuiaina. O:

Se uiga faaalia o le faafetai;
Se naunautaiga mo aoaoga;
Se faanaunauga ia amio pulea; ma.
Se naunautai e galue.

Muamua, O Se Uiga Faaalia o le Faafetai. I le tusi a Luka, mataupu e 17, tatou te faitau ai i le tala i lepela e 10. A o malaga atu le Faaola agai i Ierusalema, ma ui atu ai i Kalilaia ma Samaria ma maliu atu ai i se nuu patino, sa Ia fetaiai ai i tua o le aai ma ni lepela se toasefulu, o e sa poloaiina e nonofo ese mai le nuu, ona o le tulaga na i ai o latou ma’i. Sa latou tutu mamao ma aioi mai, “Le Alii e, Iesu, ia e alofa mai ia te i matou.”

Sa fetalai atu le Faaola, o le ua tumu i le loto nutimomoia ma le alofa ia te i latou, “Ina o atu ia, ma faaali atu outou lava i faitaulaga,” ma a o latou o, sa latou vaaia ua faamaloloina i latou. O loo ta’u mai i tusitusiga paia, “O le tasi o i latou, ina ua ia iloa ua faamalolo o ia, sa toe foi atu, ma se alaga leotele e vivii atu ai i le Atua, ma faapau fao i aao o le Matai, ma faafetai atu ia te ia, o le Samaria foi o ia.”

Sa tali mai le Faaola, “E le i faamamaina ea le toatinoagafulu? A o ifea le toaiva? Ua le iloa ni e toe foi mai e vivii atu i le Atua, na o lenei tagata ese. Ua fetalai atu o ia ia te ia, Ina tulai ia, ina alu; ua e ola i lou faatuatua.”⁵

O se mea paia na tupu faafuasei, na laveaiina mai ai na lepela mai le oti matautia, ua faifai malie mai, ae toe maua se avanoa fou e ola ai. O le agaga faafetai na faaalia e le toatasi na maua ai le faamanuiaga a le Matai, a o le leai o se agaga faafetai na faaalia e le toaiva na faaalia ai Lona le fiafia.

E faapei o lepela o aso ua mavae, e faapena mala i ona po nei. E faaumiumi, e pipili ai; e faatamaia ai foi. Ua soo se mea lava ua maua ai. O lo latou salalau e leiloa ni tuaoi. Ua tatou iloa ia mea e pei o le manatu faapito, faaloloto, agaleaga, ma le solitulafono—ua na o nisi nei o mea.

I se konafesi faarisone, sa tautino mai ai e Peresitene Gordon B. Hinckley, “Ua tatou ola i se lalolagi ua matua tele naua ai le leaga. Soo se mea lava ua i ai. Ua i ai i magaala. Ua i ai i televise. Ua i ai i tusi ma mekasini. Ua pei se lologa tele, le mataga ma le palapala ma le saua, ua lofituina ai le lalolagi. E tatau ona maualuga atu le mea tatou te tutu ai… . Ua see ese atu le lalolagi mai lona tulaga mama. Ua na o le faanoanoa e maua ai. O le ala i le fiafia, o loo taoto i le toe foi i le malosi o le olaga faaleaiga, ma le tausia o tulaga mama faatonuina, ua autausaga o faamaonia lona taua.”⁶

O le mulimuli i le fautuaga a Peresitene Hinckley, e mafai ai ona tatou avea lenei taimi ma taimi matagofie e ola ai i le fogaeleele. E leai se tuaoi o o tatou avanoa. E tele mea e sa’o—e pei o faiaoga o loo aoaoina atu, o uo loto fesoasoani, o faaipoipoga manuia, ma matua o loo ositaulaga.

Ia e maua le loto faafetai i lou tina, o lou tama, o lou aiga, ma au uo. Ia faaali atu lou loto faafetai i ou faiaoga o Tamaitai Talavou. Latou te alolofa ia te oe, latou te auauna atu ia te oe. E pele oe ia i latou faapea foi le silafaga a lou Tama Faalelagi. E faafofogaina e Ia au tatalo. Na te avatu ia te oe Lona filemu ma Lona alofa. Ia pipii atu ia te Ia ma Lona Alo, ona le tuua ai lea na o oe.

Lona lua, o se naunautaiga mo aoaoga.

Sa ta’u atu e le Aposetolo o Paulo ia Timoteo, “Aua nei inoino se tasi i lou taulealea, a ia fai oe ma faaaoao i e ua faatuatua.”⁷

O Peresitene Stephen L. Richards, o le sa fesoasoani i le Au Peresitene Sili i le tele o tausaga ua mavae, o ia o se tagata e loloto tele le tofa. Na ia saunoa, “O le faatuatua ma le masalosalo e le mafai ona i ai i le taimi e tasi, aua e tuliese e le tasi le isi.” O la’u fautuaga, ia saili atu i le faatuatua ae tuliese le masalosalo.

Ua apoapoai mai le Alii, “Ina saili atu ia outou i upu o le poto mai tusi sili ona lelei; ia saili i le aoao, e faapea foi i le suesue ma le faatuatua.”⁸

E mafai ona tatou maua upumoni i tusitusiga paia, o aoaoga a perofeta, o aoaoga mai o tatou matua, ma musumusuga e oo mai ia i tatou pe a tootutuli o tatou tulivae ma saili atu i le fesoasoani mai le Atua.

E tatau ona tatou faamaoni i o tatou mafaufauga, aua o o tatou mafaufauga e pei o fetu: e le mafai ona pa’i i ai ou lima, ae o le mulimulita’i i ai e te taunuu ai i lou taunuuga.⁹

O loo outou faapotopoto foi i le afiafi nei ma le toatele o outou faiaoga. Ou te talitonu e fetaui lelei lava i faiaoga taitasi le faamatalaga lea na tusia e uiga i se tasi [o faiaoga]: “Sa ia amatalia i lona potuaoga se atemosifia ua lalagaina ai faatasi le agaga o le taliaina ma le mafanafana i se mana faataulaitu; ua faamautinoa ai le tuputupu a’e ma le malamalama, o le siita’i o mafaufauga, ma le agaga o le tamaitiiti.”¹⁰

Lona tolu, sei o tatou talanoaina lava o se faanaunauga ia Amio Pulea.

Ua tuuina mai e lo tatou Tama Faalelagi ia i tatou taitoatasi se mana e mafaufau ai ma faia faaiuga. O lea mana, e avea ai le amio pulea ma se tulaga e tatau ai.

E tofu i tatou ma le tiutetauave e filifili ai. Atonu o le a e fesili, “Pe taua moni ea ia faaiuga?” Ou te fai atu ia te outou, o faaiuga e fuafua ai le taunuuga. E le mafai ona e faia ni faaiuga faavavau e aunoa ma taunuuga e faavavau.

Sei ou saunia atu lava se fuafaatatau e mafai ona fua i ai au faaiuga lua te fetaiai. E faigofie lava ona manatua: “E le mafai ona e sa’o i le faia o le mea e sese; e le mafai foi ona e sese i lou faia o le mea e sa’o.” E muamua ona lapata’ia oe e le aunoa e lou loto fuatiaifo e pei o sau uo ae na te le’i faasalaina oe e pei o se faamasino.

Na apoapoai mai le Alii, i se faaaliga na tuuina atu i le Perofeta o Iosefa Samita, “O mea foi e le faamanuiaina, e le mai le Atua a o le pouliuli. O mea mai le Atua o le malamalama lava ia.”¹¹

O nisi tagata valea ua le amanaiaina le atamai o le Atua ma mulimuli atu i faatosinaga fesuisuiai taufaasese, o le faatosina mai o tulaga lauiloa faa’ole’ole ma le faamalieina i lena taimi. E manaomia le lototetele e mafaufau tonu ai, filifili le mea tonu, ma fai le mea tonu, aua e seasea ona faigofie lea ona mulimuli ai.

O le taua o le pulea e le tagata o ia lava, e mafai ona tuu manu’anu’a ma lavelavea ai le tagata, ae le aunoa lava ona avea ai o ia ma se alii po o se tamaitai sili atu. O le pulea e le tagata o ia lava, o se taumafaiga lelei; ua toatele naua i tatou e mananao ia le alu ai ni taumafaiga ma ia le tigaina ai. Pe afai tatou te mafatia i ni toatuga e le tumau, o se vaega taua tele o a tatou tauiviga mo le amio pulea, o le naunautai ma le lototele e toe taumafai ai.

O’u tuafafine talavou e, ou te le iloaina se isi faamatalaga e moni atu nai lo lea na tulei saunoa i ai le Au Peresitene Sili i le aso 6 o Aperila 1942: “E mamalu ma pito atu i agelu se talavou e mama; o lena talavou ua maua le olioli e le mafaamatalaina i lenei olaga ma le fiafia e faavavau i le olaga a sau.”¹²

O le ola faavavau i le malo o lo tatou Tama, o lau sini lena, ma o le amio pulea e matua manaomia pe afai e te manao ia ausia.

O le mea mulimuli, ia taitasi i tatou ma atinae se naunautai e galue. E tele tausaga ua mavae, na saunoa ai Peresitene J. Reuben Clark, o se fesoasoani i le Au Peresitene Sili e faapea: “Ou te talitonu ua tatou o mai iinei e galulue, ma ou te talitonu foi e leai lava se isi e sola ese mai ai. E ao ona tatou vave iloa le taua o le galue. E tatau ona tatou galulue pe afai tatou te mananao ia manuia pe alualu foi i luma. E leai lava se isi ala.”¹³

“Uunai atu ia, ma tulei”¹⁴ ua le na o se laina mai se viiga ua lauiloa; ae e sili atu, o se poloaiga ia galulue.

Atonu o le a fesoasoani tele se faataitaiga. O le faatuutuu, o se faomea moni lava o le taimi—aemaise lava pe afai tatou te oo mai i le mea moni e ta’u o le galue malosi. Ou te tautala atu i le tulaga manaomia o lo outou suesue ma le filiga, a o outou sauniuni mo suega i le aoga, ma faapena foi a outou suega o le olaga.

Ou te iloaina se tamaitai iunivesite, sa matua pisi lava i mea faafiafia o le olaga faateine aoga, ma o lea sa ia tolopoina ai ana sauniuniga mo suega. O le po a o lumanai suega, na ia iloa ai ua leva le po ae le’i faia sana sauniuniga. Sa ia fetuutuuna, Pe o le a le mea e sili ona taua—o lo’u ola maloloina, lea ua tatau ai ona ou moe, po o le galue malosi e suesue? Ia, atonu ua mafai ona outou mate maia lona taunuuga. Sa manumalo le moe, sa le i faia ana suesuega, ma na mafatia ai lava ia i lana suega. E tatau ona tatou galulue.

Ma o le fuafaatatau fautuaina lenei:

Se uiga faaalia o le faafetai;
Se naunautaiga mo aoaoga;
Se faanaunauga ia amio pulea; ma.
Se naunautai e galue.

O le a oo mai i soo se tagata taimi faanoanoa, ma le manaomia o se taitaiga mai le punavai paia—e oo lava i se aioiga le leoa mo se fesoasoani. Ou te tautino atu ia te outou ma lo’u loto ma lo’u agaga atoa, e alofa lo tatou Tama Faalelagi ia te outou, e manatu tele mai ia te outou ma o le a le tuulafoaiina lava outou.

Sei ou faapupulaina atu i se aafiaga patino ma le faapelepele ia te au. E tele tausaga na ou oo atu ai i ni o’u valaauga i le vaega o Siamani, lea sa ta’ua o le Pupuni Uamea. I lalo o le puleaga a Komunisi, sa toetoe ina faoa uma ai le saolotoga o tagata sa nonofo ai i lena vaega o Siamani. Sa faasa ni gaoioiga a o tatou tupulaga talavou; sa mata’ituina lelei mea uma e fai.

E le’i leva ona ta’u mai o’u tiutetauave mo lena eria, ae ou auai i se konafesi sa ese le faagaeetia loto i lena vaega o Siamani. Ina ua maea pese musuia ma lauga, sa ou maua le uunaiga matou te feiloai mo sina taimi puupuu ma le tupulaga talavou faapelepele, i fafo atu o le fale tuai. Sa matua toaitiiti i latou, ae sa faalogologo i upu uma sa ou tautala i ai. Sa latou matelaina i le fiaaai i le upu ma le faamalosiauga a se Aposetolo a le Alii.

Ae ou te le i auai atu i le konafesi, ma ae ou te le’i tuua le Iunaite Setete, sa ou maua se uunaiga e faatau ni pusa pululole se tolu. Sa ou faatauina ituaiga eseese se tolu: Paepae, Lanumeamata, ma le Samasama. Ina ua maea le faatasiga ma le autalavou, sa ou tufatufaina ma le faaeteete i talavou taitasi, pulu tai lua—o se mea latou te le’i tofo i ai muamua. Sa latou taliaina le meaalofa ma le olioli tele.

Sa mavae ni tausaga Sa ou toe foi atu i Dresden—i le mea na fai ai le matou konafesi na ta’ua. Ua i ai nei o tatou falelotu; ua i ai nei le saolotoga i tagata. Ua le toe tavavaeina nei Siamani i ni tuaoi faaupu fai, ae ua avea ma malo e tasi. Ua avea nei na talavou ma tagata matutua, ua fai foi a latou lava fanau.

Ina ua mavae se konafesi tele ma le musuia, sa sueina au e se tina ma sana tama teine matou te talanoa. Sa fai mai lana tama teine, e pei foi o lo outou matutua, i nai Igilisi pagupagu, “Peresitene Monson, e te manatua aso la ua leva lea na potopoto ai le autalavou ina ua maea se konafesi faale-itu, lea na e tufatufaina ai e tofu le tama ma le teine ma pululole tailua?”

Sa ou tali atu, “Ioe, ou te manatuaina lelei.”

Sa faaauau lana tala, “O lo’u tina, o se tasi lea na e tuu i ai lena meaalofa. Na ia faamatala mai, na ia vaevaeina i ni nai fasi pulu laiti le isi pululole. Sa ia fai mai e ese le suamalie ma sa matua pele lava ia te ia.” Ona ia tuuina mai ai lea ia te au o se tamai atigipusa, a o ataata si ona tina pele. Ina ua ou tatalaina le pusa, sa ou vaaia ai le isi pululole, o la lava e afifi ae ua toeitiiti atoa le 20 tausaga. Ona ia fai mai lea, “Ma te mananao ma lo’u tina e avatu ia te oe le mea lenei,” o lana tala lea.

Sa maligi loimata, ma matou feopoai ai.

Ona fai mai lea o le tina: “Ae e te le’i malaga mai i le konafesi i le tele o tausaga ua mavae, sa ou tatalo i lo’u Tama Faalelagi ina ia ou iloa pe moni e alofa o Ia ia te au. Sa ou teuina lena meaalofa ina ia mafai ai ona ou manatua ma aoao la’u tama teine e faafofogaina e le Tama Faalelagi a tatou tatalo.”

O loo ou taulimaina lena meaalofa i lenei po—o se faailoga o le faatuatua ma se faamautinoaga o le fesoasoani faalelagi a lo tatou Tama ma Lona Alo, o Iesu Keriso, o le a aumaia mo outou.

I lenei taimi o le Eseta, talosia ia liliu atu o tatou manatu ia te Ia o le na togiolaina a tatou agasala, o le na faaalia mai ia i tatou le ala e ola ai, o le ala e tatalo ai, ma o le foi na faaalia i Ana lava faatinoga le ala tatou te mafai ai. Na soifua mai i se fale o manu, sa faataoto i se moega vaovao, o le Alo lenei o le Atua—o Iesu Keriso le Alii—o loo talo mai ia i tatou taitoatasi ina ia mulimuli atu ia te ia. “O lea ua ou olioli ai: ‘Ua ou iloa o Ia soifua mai!’”¹⁵ I le suafa o Iesu Keriso, amene.