O Le Agavaa Patino e Faaaoga ai le Perisitua

Peresitene Gordon B. Hinckley

O a tatou amioga i nofoaga faitele, e tatau ona lelei ina ia le mafai ona faitioina. E sili atu foi ona taua o a tatou amioga i nofoaga patino. E tatau ona pasia le tulaga faatonuina ua faatuina mai e le Alii.

O’u uso pele, ou te fia tautala atu ma le matua manino i lenei afiafi e uiga i se mataupu ua ou matua lagona le popole i ai. O se fiafiaga sili ma o se luitau foi e faapopoleina ai au, lo’u tautala atu ia te outou. E maeu le matagofie o la tatou usoga, o e o loo umia le perisitua taua ma le matagofie. E mai le Atua lo tatou Tama e Faavavau, o le na toe tulei mai le lagi, faatasi ma Lona Alo Pele, i lenei tisipenisione mamalu. Sa la’ua auina mai a la auauna na tofia, e faaee mai lenei pule paia i alii.

O le agavaa patino ua avea ma tulaga faatonuina o le agavaa e maua ai ma faaaoga lenei mana paia. O le mea lena ou te fia tautala atu ai i le po nei.

Ou te amata i le faitauina atu mai le Mataupu Faavae ma Feagaiga, vaega e 121:

“O aia tatau a le perisitua e faafesootaiina e le mavavaeeseina ma mana o le lagi, … e le mafaia foi ona faatonuina pe faaaogaina ia mana o le lagi tau lava o mataupu faavae o le amiotonu.

“E moni lava e mafai ona tuuina mai ia i tatou, a e pe a tau ufiufi a tatou agasala, pe faamalie lo tatou loto maualuga, lo tatou fia sili le aoga, pe faatonuina pe pulea pe faamalosia i agaga o le fanau a tagata, i soo se faiga lava o le amioletonu, faauta, e punitia lava le lagi; e tiga le Agaga o le Alii; pe a aveeseina foi, amene i le perisitua po o le pule a lena tagata” (MFF 121:36-37).

O le afioga manino lena a le Alii e faatatau i Lana pule paia. Oka se matagofie o le matafaioi ua tuu mai ai i luga o i tatou taitoatasi. O i tatou o loo umia le perisitua a le Atua, e ao ina tatou tutu i tulaga e maualuluga a’e nai lo ala o le lalolagi. E ao ona tatou pulea a tatou amio. E le mafai ona tatou faafiaamiotonu, ae e mafai ma e tatau lava ona avea i tatou ma ni alii e faaaloalo ma faamamalu.

O a tatou amioga i nofoaga faitele, e tatau ona lelei ina ia le mafai ona faitioina. E sili atu foi ona taua o a tatou amioga i nofoaga patino. E tatau ona pasia le tulaga faatonuina ua faatuina mai e le Alii. E le mafai ona tatou faalolololo ai i le agasala, e le tatau foi ona tatou taumafai e faaufiufi a tatou agasala. E le mafai ona tatou faamalieina lo tatou faamaualuga. E le mafai ona tatou faaaogaina manatu le aoga o faanaunauga amioletonu E le mafai ona tatou faalala se tatou pule, po o le malosi, po o faatonuga i o tatou taitoalua po o fanau, po o se isi lava faiga o le amioletonu.

Afai tatou te faia se mea o nei mea, o le a aveesea mai mana o le lagi. O le a tiga le agaga o le Alii. O le a le toe aoga le mana o le perisitua. Ua le o toe i ai lana pule.

O le tulaga tatou te ola ai, o upu tatou te tautala ai, o a tatou amioga i aso taitasi, e aafia ai lo tatou lelei, o ni alii ma ni taulelea o loo umia le perisitua.

O loo ta’ua i le tatou Mataupu Faavae Lona Lima o le Faatuatua: “Matou te talitonu e ao ina valaauina le tagata e le Atua, i le valoaga, ma le faaee atu o lima, o e o i ai le pule, e talai atu ai le talalelei ma faia sauniga o i ai.”

E ui lava e faaee mai lima o i latou o i ai le pule i o tatou ulu ma faauuina ai i tatou, ae e mafai e a tatou amio ona faaleaogaina ma aveesea ai soo se aia tatau e faaaoga ai lenei pule paia.

O loo faapea mai foi le vaega e 121: “E le tatau ona faatumauina se mana po o se uunaiga e le pule o le perisitua, tau lava o le tauanau atu i le faapalepale, o le agalelei, ma le agamalu, ma le alofa faamaoni;

“I le agalelei, ma le malamalama mama, e matua faalauteleina ai le aga e aunoa ma le pepelo, e aunoa ma le faa’ole’ole” (MFF 121:41-42).

O lenei, uso e, o tuaoi na e tatau ona faaaoga ai lenei perisitua. E le pei o se ofutalaloa tatou te faamaulu ma toe tatala pe a tatou mananao ai. Pe a faaaogaina ma le amiotonu, e pei lava o le fausaga o o tatou tino, o se vaega o i tatou i taimi uma ma tulaga uma.

Ma e faapena foi outou alii talavou, o e o loo umia le Perisitua Arona, ua uma ona faaee atu i o outou luga lena mana, o loo i ai ki o asiasiga ma galuega a agelu. Mafaufau i lena mea mo sina minute.

E le tatau ona outou faia se mea e atia’e ai se pa i le va o outou ma le galuega a agelu mo outou.

E le mafai ona le mama a outou amio i soo se itu. E le mafai ona outou le faamaoni. E le mafai ona outou faa’ole’ole, pe talapelo, e le mafai ona outou ta’u fua le suafa o le Atua, pe faaaogaina se gagana mataga ae tumau pea ona ia te outou le aia tatau mo le galuega a agelu.

Ou te le manao ia outou faafiaamiotonu. Ou te manao ia outou faatamatane, ia outou matatiotio, ma malolosi, ma fiafia. O i latou e fia taaalo afeleti, ou te manao ia avea outou o ni tagata taaalo lelei ma taumafai ia avea ma siamupini. Ae o le faia o lena mea, e le tatau ai ona outou faia ni amioga e le talafeagai, pe faaaogaina foi upusa ma se gagana mataga.

O outou na alii talavou o loo faatalitali e o i misiona, aua nei faaleagaina o outou olaga i se mea e faaluafesasi ai lo outou agavaa e o atu o ni auauna a le Alii.

E le tatau, ma e le tatau lava i soo se tulaga ona e faia se fetuunaiga o le mana paia o loo outou tauaveina o outou o ni faifeau faauuina o le talalelei.

E ala i se taulogologo atu, ma se lapataiga, o lea ua saunia ai e le Au Peresitene Sili ma le Korama a Aposetolo e Toasefululua faatonuga nei e faasinotonu ia te outou:

“A o avea ai outou o ni faifeautalai, ua faamoemoe tou te tausisia tulaga faatonuina maualuluga o le amio, e aofia ai le tausia o le tulafono o le legavia, …

“E le tatau lava ona tuua na o oe ma se isi tagata, pe o se tane, fafine, tagata matua po o se tamaitiiti [e ese mai lau soa na tofi atu].

“E oo lava i moliaga e le sa’o e faasaga i se faifeau e ta’umamaina, e mafai ona tele ni masina e suesue ai, ma e mafai foi ona faalavelavea ai pe faamuta ai foi le auaunaga faafaifeautalai. Ia puipuia outou lava mai na ituaiga o moliaga, e ala i le aua lava nei lua o eseese ma lau soa, e oo lava i aiga lua te asiasi i ai” (saunoaga a le Au Peresitene Sili e uiga i amio a faifeautalai, 22 Mati 2002).

E te le tau popole i nei mea pe afai e te tausia i taimi uma tulafono o le galuega faafaifeautalai. Afai e te faia, o le a e maua se aafiaga matagofie, ma o le a e toe taliu atu ma le mamalu ia i latou e te alofa i ai, e aunoa lava ma se mea e faalaleaga ai pe masalomia ai foi, po o le faanoanoa.

A e toe taliu atu i le fale, ia aua lava nei galo o oe o se toeaina O Le Ekalesia a Iesu Keriso o le Au Paia o Aso e Gata Ai.

O le a aofia ai foi i le sailiga o se soa e faavavau. O le a e manao e te faaipoipo i le maota o le Alii. O outou, e le tatau ona i ai se mea e faalavelavea ai le faaipoipo i le malumalu. Ia faaeteete, ina ia aua nei e faaleagaina lou tulaga e mafai ai ona e faaipoipo. Ia manuia ou faiva. Ae ia pulea au evaga faamasani e le amio pulea mausali. Ua tuuina mai e le Alii se poloaiga ma se folafolaga. Na Ia fetalai mai, “Ia teuteuina ou manatu i le mama e le aunoa.” Ona sosoo mai ai lea ma le folafolaga, “ona malosi ai lea o lou faatuatua fai ifo i luma o le Atua; ma…avea le Agaga Paia ma au aumea tumau” (MFF 121:45–46).

E avea foi le ava e te filifilia ma au paaga tutusa. Na tautino mai e Paulo, “E leai se tane pe a le o i ai le fafine, e leai foi se fafine pe a le o i ai le tane, i le Alii” (1 Kori. 11:11).

I le mafutaga faaulugalii i le faaipoipoga, e leai se taufaatauvaaina e leai foi se faasausili. E le muamua le fafine i le tane, e le muamua foi le tane i le fafine. La te savavali faatasi, o se atalii ma se afafine o le Atua, i se malaga e faavavau.

E le o sau tavini lau ava, po o sau meatotino, po o se isi lava mea faapena.

Oka se matautia ma le mataga o le mea o loo tupu, o le sauaina ma le faia faatautala o ava. Soo se tagata i lenei Ekalesia e saua ma fai faatautala lana ava, na te faamaina o ia, na te faatiga ia te ia, na te faaalia le pule amioletonu ia te ia, e le agavaa o ia na te umia le perisitua. E tusa lava pe ua uma ona faauuina, e punitia lava le lagi; e tiga le Agaga o le Alii; pe a aveeseina foi, amene i le perisitua po o le pule a lena tagata.

Soo se tagata lava na te faia lena amio, e le agavaa o ia na te umia se pepa faataga o le malumalu.

Ou te faanoanoa e fai atu, ua faatele naua ona ou vaai i lenei mea mataga o tupu mai. E i ai tamaloloa e masani ona fasi a latou ava, e le gata i faaupuga a o le tino. Oka se matautia pe a faamaina e se tamaloa le tina o lana fanau.

E moni e i ai ni nai fafine e saua ma fai faatautala a latou tane. Ae ou te le o tautala atu ia i latou i le po nei. O lea ou te tautala atu i tamaloloa o le Ekalesia lenei, o alii ua uma ona faaee i ai e le Silisiliese Lona perisitua paia.

O’u uso e, afai e i ai nisi o faalogo mai i lo’u leo, ma ua tausalaina i na ituaiga o amioga, ou te fai atu ia te outou, ia salamo. O ifo i o outou tulivae ma ole atu i le Alii e faamagalo outou. Tatalo atu ia te Ia mo le mana e pulea ai lou laulaufaiva, ma lou lima mamafa. Ole atu i lau ava ma lau fanau e faamagalo oe. E masani ona saunoa mai Peresitene Makei, “E leai se isi faamanuiaga e mafai ona suitulaga i le toilalo o le aiga” (sii mai le J. E. McCulloch, Home: The Savior of Civilization [1924], 42; i le Conference Report, Aperila 1935, 116). Ma sa saunoa mai foi Peresitene Lee, “O le mea aupito taua e te faia i le galuega a le Alii, o le galuega lea e te faia i totonu o puipui o lou lava fale” (Harold B. Lee, Doing the Right Things for the Right Reason, Lauga o le Tausaga i le Iunivesite o Polika Iaga [19 Ape. 1961], 5).

Ua ou mautinoa, pe afai tatou te tutu i luma o le nofoa faamasino o le Atua, o le a le tele se ta’ua pe fia ni au oa na faaputuputu i le olaga, po o ni mamalu na tatou maua. Peitai, o le a i ai fesili auiliili e faatatau i a tatou fegalegaleaiga faaleaiga. Ma ua ou mautinoa foi, e na o i latou lava sa savavali i le olaga ma le alofa ma le faaaloalo, ma le talisapaia o a latou soa ma fanau, o le a latou mauaina mai lo tatou faamasino e faavavau ia upu nei, “Ua lelei ia, le auauna lelei e ma le faamaoni…ina ulufale mai ia i le fiafia o lou alii” (Mataio 25:21).

Ou te fia ta’ua se isi ituaiga o saua po o faiga faatautala. O tagata matutua ia. Ou te manatu, e le o se mea tatou te masani ai. Ou te faamoemoe e leai. Ou te tatalo lava e le o tupu.

Ou te talitonu o loo tausia e o tatou tagata, toetoe lava o i latou uma, le poloaiga anamua o le” “Ia e ava i lou tama ma lou tina, ina ia faalevaleva ai ou aso i le nuu o le a foaiina mai e Ieova lou Atua ia te oe” (Esoto 20:12).

Ae e maeu foi le matautia, e maeu le mataga o le sauaina po o le faia faatautala o toeaiina ma loomatutua.

Ua faateleina pea le umi ona tatou ola, faafetai lava i vavega faasaienisi i ona po nei, ma faiga faafomai. Peitai, o le matua o le soifua e faaitiitia ai le tulaga gafatia i le faaletino, ma o nisi foi taimi o le mafaufau. Sa ou fai atu muamua, ua ou iloaina nei e tele atu pulu i tausaga ia e ta’ua o tausaga faa-auro. Ou te matua faafetai lava i le alofa ma le popole mai o la ma’ua fanau i lo latou tina ma lo latou tama. E maeu le matagofie o le ata o se atalii po o se afafine, o loo faia mea uma na te mafaia e fesoasoani ai ma le agalelei ma le faamaoni, ma le alofa i se tama po o se tina ua afu le soifua.

Ou te manao ou te tautala atu i se tasi foliga o le sauaina po o le faia faatautala, ua mamafa i ai lomiga a le au faasalalau. O le sauaina mataga ma le faatiapolo o fanau e tagata matutua, aemaise lava o tamaloloa. O lea ituaiga o faiga faatautala e le o se mea fou. Ua i ai molimau e ta’u mai ai ua autausaga. O se mea e aupito sili ona inosia ma matautia. Ou te faanoanoa lava e tau atu, e faale-tele ni manatu ua faaalia e uiga i lenei amioga faatiapolo matautia o tatou feagai. O se mea e le mafai ona taliaina. Na fetalai mai le Alii lava Ia: “Ai se na te faatausuai se tasi o i latou nei e faatauvaa o e faatuatua ia te au, e lelei i lea tagata pe ana nonoa se maaolo tele i lona ua, ma faagotoina o ia i le moana loloto” (Mataio 18:6).

O se faaupuga malosi tele lea mai le Alii o le Filemu, le Alo o le Atua.

Ou te faitauina atu mai le Tusitaulima o Faatonuga a le Ekalesia: “O le tulaga o le Ekalesia, e le mafai ona taliaina le faasaunoa i soo se ituaiga. O i latou o e faasaunoa ma faasaua … e tatau ona faia a’oa’iga faale-Ekalesia. E le tatau ona tuuina atu i ai ni valaauga o le Ekalesia ma e le mafai foi ona umiaina se pepa faataga o le malumalu. E tusa lava po o se tagata na faia ni faiga faatautala faalefeusuai pe faaletino i se tamaitiiti, na faia se a’oa’iga faale-Ekalesia ma na toefuatai mulimuli ane i le faaaumeaina atoatoa pe na toe faaulufaleina mai e ala i le papatisoga, e le tatau lava i taitai ona valaauina lea tagata i soo se tofiga e galulue ai ma tamaiti po o le autalavou se’i vagana ua faatagaina mai e le Au Peresitene Sili le aveeseina o le faailoga o loo i luga o le pepa faamaumau o le tagata.

“I tulaga o le faasaunoa po o le faatautala, o le tiutetauave muamua lava o le Ekalesia o le fesoasoani lea ia i latou o e ua sauaina ma ia puipuia i latou o e e ono mafai ona toe sauaina foi i le lumanai” (Tusi 1: Au Peresitene o Siteki ma Au Epikopo [1998], 157–58).

Ua loa ona tatou galulue i lenei faafitauli. Ua matou uunaia epikopo, o peresitene o siteki, ma isi ina ia fesoasoani atu ia i latou ua aafia ai fua, ia faamafanafanaina i latou, ia faamalolosia foi i latou, ma ta’u atu ia i latou e sese le mea ua tupu, ma e le o latou na mafua ai ona tupu, ma e le tatau lava ona toe tupu.

Ua uma ona matou auina atu lomiga, ua faatu se laina telefoni e mafai ai e taitai o le Ekalesia ona maua fautuaga mo le taulimaina o ia mataupu, ma ofoina atu ai le fesoasoani faapolofesa e ala i le Auaunaga Faale-Aiga o le AAG.

O ia faiga e masani ona faasolitulafono lo latou natura. E mafai ona faasalaina i lalo o le tulafono. E avanoa le au faufautua faapolofesa, e aofia ai loia ma tagata galulue mo tagata lautele, i le telefoni mo fesoasoani, e fautuaina ai epikopo ma peresitene o siteki e faatatau i a latou matafaioi i nei tulaga. O i latou i isi atunuu, e ao ona valaau atu i peresitene o o latou eria.

O le galuega a le Ekalesia, o le galuega o le faaolataga. O se galuega mo le laveaiina o agaga. Matou te mananao e fesoasoani atu i le tagata e aafia ai fua, faapea foi le tagata na faia le solitulafono. Matou te alolofa i le tagata e aafia ai fua, ma e tatau ona tatou gaioi e fesoasoani ia te ia. Matou te alolofa foi i le tagata e faia le solitulafono, ae e le mafai ona tatou taliaina le agasala ua ta’usalaina ai o ia. Afai na faia le solitulafono, e i ai se faasalaga. O le a fai lava le faaiuga a le tulafono faalemalo. O le a faia foi le faaiuga faale-Ekalesia, ae o le mea masani lava o le tape o le igoa mai le Ekalesia. O se mataupu maaleale ma le matuia.

Ae peitai, ua matou iloa, ma e tatau lava ona iloa e le aunoa, pe a fai ua totogi le sala ma ua uma foi ona faataunuu le poloaiga a le faamasinoga tonu, o le a i ai se lima fesoasoani ma le agalelei [i le vaega a le Ekalesia], e aapa atu ma fesoasoani i ai. Atonu o le a faaauau lava ni mea e faasa, ae e tatau lava ona i ai ma le agalelei.

O lenei, uso e, e pei ua le fiafia lo’u leo. Ou te le o manao ai. Ae, ou te manao e sii a’e le leo o le lapataiga i le au perisitua o lenei Ekalesia i le lalolagi atoa.

Ua tuuina mai e le Atua ia i tatou se meaalofa e aupito sili ona taua ma matagofie. O loo i ai faatasi ma le pule e puipuia ai le Ekalesia, e pulea ai ana mataupu, e tautala atu ai ma le pule i le suafa o le Alii o Iesu Keriso, e galulue ai o Ana auauna ua tofia, e faamanuia ai e ua mama’i, e faamanuia ai o tatou aiga ma le tele o isi. E avea ma se taiala e tatau ona tatou ola ai. I lona atoaga, e oo atu ai lana pule i talaatu o le veli o le oti e oo i le faavavau o loo faatalitali mai.

E leai se isi mea e faatusalia i ai i lenei lalolagi atoa. Puipui malu i ai, faapelepele i ai, ia alofa i ai, ia ola agavaa mo lena.

“Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi” (Mataio 5:16), o la’u tatalo lea ma le lotomaualalo, a o ou tuuina atu a’u faamanuiaga i o outou luga ma o’u alofaaga, i le suafa o Iesu Keriso, amene.