1 აჰა, ყური დაუგდეთ, ჩემი ეკლესიის უხუცესნო, – ამბობს უფალი, თქვენი ღმერთი, იესო ქრისტე, თქვენი ქომაგი, რომელმაც იცის ადამიანის სისუსტე და რომელსაც შეუძლია, დაეხმაროს ცდუნებაში მყოფთ.

2 და ჭეშმარიტად, ჩემი მზერა მიპყრობილია მათზე, რომლებიც ჯერ არ მისულან სიონის მიწაზე; ამიტომ, თქვენი მისია ჯერ არ შესრულებულა.

3 ამისდა მიუხედავად, კურთხეულნი ხართ თქვენ მიერ გაზიარებული დამოწმებისთვის, რომელიც ჩაიწერა ზეცაში, რათა ანგელოზებმა უყურონ მას; და ისინი თქვენთვის ხარობენ და შეგენდოთ თქვენი ცოდვები.

4 და ახლა, განაგრძეთ თქვენი მოგზაურობა, შეგროვდით სიონის მიწაზე; ჩაატარეთ შეკრება, ერთად გაიხარეთ და უზენაესს მიუძღვენით ზიარება.

5 და შემდეგ შეგიძლიათ დაბრუნდეთ, რათა დაამოწმოთ, დიახ, ყველამ ერთად ან წყვილ-წყვილად, როგორც გენებოთ, ამას არ აქვს ჩემთვის მნიშვნელობა; მხოლოდ იყავით ერთგულნი და დედამიწის მცხოვრებთ ან ბოროტთა შეკრებებს შორის აუწყეთ სასიხარულო ამბები.

6 აჰა, მე, უფალმა, ერთად შეგკრიბეთ, რათა აღსრულდეს დაპირება, რომ ერთგულნი თქვენ შორის დაცულნი იქნებიან და ერთად გაიხარებენ მისურის მიწაზე. მე, უფალი, ვპირდები ერთგულთ და ვერ ვიცრუებ.

7 მე, უფალი, მზად ვარ, თუ რომელიმე თქვენგანს სურს ცხენებით, ჯორებით ან ეტლებით მოგზაურობა, იგი მიიღებს ამ კურთხევას, თუ ამას მიიღებს ღვთის ხელიდან მადლიერი გულით, ყოველივეში.

8 ყოველივე ეს უნდა გააკეთოთ გამჭრიახობითა და სულის კარნახით.

9 აჰა, თქვენია სასუფეველი. და აჰა, მე ერთგულებთან ვარ ყოველთვის. სწორედ ასე. ამინ.