1 Kag karon, natabo ini nga sang nakahambal si haring Benjamin sa iya katawhan, nagpasugo sia sa tunga nila nga luyag mahibal-an halin sa iya katawhan kon nagapati sila sa mga pulong nga ginhambal niya sa ila.

2 Kag sila tanan nagsinggit sa isa ka tingug nga nagasiling: Huo, nagapati kami sa tanan nga pulong nga imo ginhambal sa amon; kag amo man, nahibal-an namon ang kapat-uran kag kamatuoran sang mga ini, tungod sang Espiritu sang Ginuo nga Makagagahum, nga naghikot sing isa ka dako nga pagbag-o sa amon, ukon sa amon mga tagipusuon, sa bagay nga wala na kami sing huyog nga maghimo sing malain, kundi dalayon nga maghimo sing maayo.

3 Kag kami, sa amon man mga kaugalingon, paagi sa wala’y dulonan nga kaayo sang Dios, kag sang mga pagpahayag sang iya Espiritu, may dalagko nga mga panglantaw sinang magaabot; kag kon nagakadapat, makapropesiya kami sang tanan nga butang.

4 Kag ini ang pagtuo nga amon naangkon sa mga butang nga ginhambal sa amon sang amon hari nga nagdala sa amon sa sining dako nga ihibalo, nga tungod sini nagakasadya kami sa sinang tuman kadako nga kalipay.

5 Kag nakahanda kami sa pagsulod sa isa ka kasugtanan upod sa amon Dios sa paghimo sang iya pagbuot, kag mangin matinumanon sa iya mga kasugoan sa tanan nga butang nga iya isugo sa amon, sa bug-os nga nabilin namon nga mga adlaw, agud nga indi namon madala sa amon mga kaugalingon ang isa ka di-matapos nga pag-antos, suno sa ginhambal sang anghel, agud nga indi kami makainom halin sa ilimnan sang kaakig sang Dios.

6 Kag karon, amo ini ang mga pulong nga luyag mabatian ni haring Benjamin sa ila; kag gani nagsiling sia sa ila: Naghambal kamo sang mga pulong nga luyag ko mabatian; kag ang kasugtanan nga inyo ginhimo isa ka matarong nga kasugtanan.

7 Kag karon, tungod sang kasugtanan nga ginhimo ninyo pagatawgon kamo nga mga anak ni Cristo, iya mga anak nga lalaki, kag iya mga anak nga babayi; kay tan-awa, sa sini nga adlaw gin-anak niya kamo sing espirituhanon; kay nagsiling kamo nga ang inyo mga tagipusuon ginbag-o paagi sa pagtuo sa iya ngalan; gani, ginbun-ag niya kamo kag nangin iya mga anak nga lalaki kag iya mga anak nga babayi.

8 Kag sa idalom sini nga ngalan ginhimo kamo nga hilway, kag wala na sing iban pa nga ngalan nga sa diin sarang kamo nga mahilway. Wala na sing iban pa nga ngalan nga ginhatag nga sa diin ang kaluwasan magaabot; gani, luyag ko nga dal-on ninyo sa inyo mga kaugalingon ang ngalan ni Cristo, tanan kamo nga nagsulod sa kasugtanan upod sa Dios nga mangin matinumanon kamo tubtob sa katapusan sang inyo mga kabuhi.

9 Kag matabo ini nga kon sin-o man ang magahimo sini makit-an sa tuo nayon nga kamot sang Dios, kay mahibal-an niya ang ngalan nga igatawag sa iya; kay pagatawgon sia sa ngalan ni Cristo.

10 Kag karon matabo ini, nga kon sin-o man ang indi magdala sa iya kaugalingon sang ngalan ni Cristo kinahanglan gid nga tawgon sa iban nga ngalan; gani, makit-an niya ang iya kaugalingon sa wala nayon nga kamot sang Dios.

11 Kag luyag ko nga inyo man dumdumon nga amo ini ang ngalan nga akon ginsiling nga indi gid mapanas, luwas lang kon ini paagi sa kalapasan; gani, mag-andam nga indi kamo makalapas agud nga ang ngalan indi mapanas sa inyo mga tagipusuon.

12 Ginasiling ko sa inyo, luyag ko nga inyo dumdumon nga huptan ang ngalan nga dalayon nga nakasulat sa inyo mga tagipusuon agud indi kamo makit-an sa wala nayon nga kamot sang Dios, kundi nga mabatian ninyo kag makilal-an ang tingug nga magatawag sa inyo, kag amo man, ang ngalan nga iya itawag sa inyo.

13 Kay paano makilal-an sing isa ka tawo ang amo nga wala niya maalagaran, kag isa ka estranghero sa iya, kag malayo sa mga panghunahuna kag mga tinutuyo sang iya tagipusuon?

14 Kag sa liwat, ginakuha bala sing isa ka tawo ang asno nga ginapanag-iyahan sang iya isigkatawo, kag taguon ini? Ginasiling ko sa inyo, Wala; indi gani sia magtugot nga magahalab ini sa tunga sang iya mga panong, kundi nga tabugon niya ini, kag pagwaon ini. Ginasiling ko sa inyo, nga amo man ang matabo sa inyo kon indi ninyo mahibal-an ang ngalan nga itawag sa inyo.

15 Gani, luyag ko nga mangin malig-on kag mabakod kamo, nga dalayon nga bugana sa maayo nga mga buluhaton, agud si Cristo, ang Ginuong Dios nga Makagagahum, mahimo nga mamarkahan niya kamo nga iya, agud nga mahimo kamo nga madala sa langit, agud nga maangkon ninyo ang wala’y katubtuban nga kaluwasan kag kabuhi nga wala’y katapusan, paagi sa kaalam, kag gahum, kag hustisya, kag kaluoy niya nga nagtuga sang tanan nga butang, sa langit kag sa duta, nga amo ang Dios nga labaw sa tanan. Amen.