1 Kag natabo ini nga nagsugod kami liwat sa pagpasad sang ginharian kag nagsugod kami liwat sa pagpanag-iya sang duta sing matawhay. Kag ginpatuman ko nga maghimo sang mga armas sa giyera sang tagsa ka sahi agud nga sa sini may yara ako sang mga armas para sa akon katawhan sa pag-abot sang tion nga ang mga Lamanhon magsalakay liwat sa pagpakig-away batok sa akon katawhan.

2 Kag nagbutang ako sang mga bantay sa palibot sang duta agud nga ang mga Lamanhon indi makasalakay liwat sa amon nga wala sing paandam kag laglagon kami; kag sa amo nga paagi ginpabantayan ko ang akon katawhan kag ang akon mga panong, kag gin-amligan sila nga indi mahulog sa mga kamot sang amon mga kaaway.

3 Kag natabo ini nga napanag-iyahan namon ang duta sang amon mga amay sa madamo nga tinuig, huo, sa sulod sing beynte-dos ka tuig.

4 Kag ginpatuman ko nga ang mga lalaki mag-uma sang duta, kag magtanom sang tanan nga sari sang uyas kag tanan nga sari sang tagsa ka bungang-kahoy.

5 Kag ginpatuman ko nga ang mga babayi maghabul, kag magpangabudlay, kag mag-obra, kag maghimo sang tanan nga sari sang lino nga manipis, huo, kag tela sang tagsa ka sahi agud mabayoan namon ang amon pagkahublas; kag tungod sini nag-uswag kami sa duta—gani nakaangkon kami sing dalayon nga paghidaet sa duta sa sulod sing beynte-dos ka tuig.

6 Kag natabo ini nga si haring Laman napatay, kag ang iya anak nagsugod sa pagginahum bulos sa iya. Kag nagsugod sia sa pagsugyot sang iya katawhan sa pagrebelde batok sa akon katawhan; gani nagsugod sila sa paghanda para sa giyera, kag sa pagsalakay sa pagpakig-away batok sa akon katawhan.

7 Apang nakapadala ako sang akon mga espiya sa palibot sang duta sang Semlon, agud matukiban ko ang ila mga pagpanghanda, agud nga makapangaman ako batok sa ila, agud nga indi sila makasalakay sa akon katawhan kag laglagon sila.

8 Kag natabo ini nga nagsalakay sila sa norte sang duta sang Silom upod ang ila dako kaayo nga kasoldadohan, mga lalaki nga naarmasan sang mga pana, kag sang mga baslay, kag sang mga espada, kag sang mga sundang, kag sang mga bato, kag sang mga tirador; kag ginpakiskisan nila ang ila mga ulo amo kon ngaa kalbo sila; kag nawagkosan sila sing panit nga wagkos palibot sa ila mga balikawang.

9 Kag natabo ini nga ginpatuman ko nga ang mga babayi kag mga kabataan sang akon katawhan magpanago sa kamingawan; kag ginpatuman ko man nga ang tanan sang akon tigulang nga mga lalaki nga makakapot sang mga armas, kag ang tanan man sang akon mga pamatan-on nga makasarang sa pagkapot sang mga armas, magtililipon sang ila mga kaugalingon agud makig-away batok sa mga Lamanhon; kag ginplastar ko sila sa ila mga lugar, ang tagsa ka tawo suno sa iya pangidaron.

10 Kag natabo ini nga nagsulong kami sa pagpakig-away batok sa mga Lamanhon; kag ako, bisan ako, sa akon katigulangon, nagsulong sa pagpakig-away batok sa mga Lamanhon. Kag natabo ini nga nagsulong kami sa kusog sang Ginuo agud magpakig-away.

11 Karon, ang mga Lamanhon wala sing nahibal-an parte sa Ginuo, ukon sa kusog sang Ginuo, gani nagsandig sila sa ila kaugalingon nga kusog. Apang isa sila ka makusog nga katawhan, suno sa kusog sang tawo.

12 Isa sila ka mabangis, kag mapintas, kag uhaw-sa-dugo nga katawhan nga nagapati sa tradisyon sang ila mga amay, nga amo sini—Nagapati sila nga gintabog sila pagwa sa duta sang Jerusalem tungod sang mga kalainan sang ila mga amay, kag ginhimoan sila sing indi matarong sa kamingawan sang ila mga kauturan, kag ginhimoan man sila sing indi matarong samtang nagatabok sa dagat;

13 Kag sa liwat, nga ginhimoan sila sing indi matarong samtang yara sa duta nga ila una nga ginpanubli, pagkatapos nga nakatabok na sila sa dagat, kag ini tanan tungod kay si Nefi mas matutum sa pagtuman sang mga kasugoan sang Ginuo—gani ginbugayan gid sia sang Ginuo, kay ginapamatian sang Ginuo ang iya mga pangamuyo kag ginasabat ang mga ini, kag sia ang nagpanguna sang ila pagpanglakaton sa kamingawan.

14 Kag naakig sa iya ang iya mga kauturan bangod wala sila makahangop sang mga pagpakigbagay sang Ginuo; naakig man sila sa iya sa ibabaw sang mga tubig bangod ginpatig-a nila ang ila mga tagipusuon batok sa Ginuo.

15 Kag sa liwat, naakig sila sa iya sang mag-abot na sila sa duta nga ginpanaad bangod nagsiling sila nga ginkuha niya ang pagdumala sang katawhan halin sa ila mga kamot; kag gintinguhaan nila nga patyon sia.

16 Kag sa liwat, naakig sila sa iya bangod nagpanglakaton sia padulong sa kamingawan suno sa ginsugo sa iya sang Ginuo, kag gindala ang mga kasulatan nga nakurit sa mga lamina nga saway, kay nagsiling sila nga ginkawatan niya sila.

17 Kag tungod sini gintudloan nila ang ila mga anak nga dapat dumtan nila sila, kag dapat pamatyon nila sila, kag dapat kawatan kag agawan nila sila, kag himuon ang tanan nga ila masarangan sa paglaglag sa ila; gani may yara sila sing wala’y katapusan nga pagdumot sa mga anak ni Nefi.

18 Kay sa sining amo gid nga kabangdanan si haring Laman, paagi sa iya pagkatuso, kag pagkadaya, kag sa iya matahum nga mga promisa, nagpatalang sa akon, nga gindala ko ining akon katawhan pataklad sa sini nga duta agud nga malaglag nila sila; huo, nag-antos kami sining madamo nga tinuig sa duta.

19 Kag karon ako, si Zenif, pagkatapos nga ginsugid ining tanan nga butang sa akon katawhan parte sa mga Lamanhon, ginpaisog ko sila nga magsulong sa pagpakig-away sa bug-os nila nga kusog, nga nagabutang sang ila pagsalig sa Ginuo; gani, nagpakig-away kami sa ila sing atubangay.

20 Kag natabo ini nga ginpanabog namon sila liwat pagwa sa amon duta; kag ginpamatay namon sila sa isa ka dako nga pagpamatay, bisan sa pagkadamo nga wala na namon sila maisip.

21 Kag natabo ini nga nagbalik kami liwat sa amon kaugalingon nga duta, kag ang akon katawhan nagsugod liwat sa pagtatap sang ila mga panong, kag sa pag-uma sang ila duta.

22 Kag karon ako, nga tigulang na, naghatag sang ginharian sa isa sang akon mga anak nga lalaki; gani, wala na ako sing dugang pa nga mahambal. Kag kabay nga pakamaayohon sang Ginuo ang akon katawhan. Amen.