1 Kag karon natabo ini nga sang nakatapos si Abinadi sining mga ginpanghambal, nagsugo ang hari nga dal-on sia sang mga pari kag ipapatay sia.

2 Apang may isa sa tunga nila nga ang iya ngalan amo si Alma, sia nga isa man sa kaliwat ni Nefi. Kag isa sia ka pamatan-on, kag nagpati sia sa mga pulong nga ginpanghambal ni Abinadi kay nakahibalo sia parte sa kalainan nga ginpamatuod ni Abinadi batok sa ila; gani nagsugod sia sa pagpakitluoy sa hari nga indi sia maakig kay Abinadi, kundi nga tugotan nga maglakat sia sing matawhay.

3 Apang mas naakig ang hari, kag nagsugo nga tabugon si Alma halin sa ila, kag nagpadala sang iya mga alagad sa pagsunod sa iya agud patyon nila sia.

4 Apang nalagyo sia halin sa ila atubang kag nagpanago sia sa bagay nga wala nila sia makita. Kag sia nga nagapanago sa sulod sang madamo nga inadlaw nagsulat sang tanan nga pulong nga ginpanghambal ni Abinadi.

5 Kag natabo ini nga ang hari nagsugo nga likupan sang iya mga bantay si Abinadi kag dakpon sia; kag gingapos nila sia kag ginhunong sa bilanggoan.

6 Kag pagkatapos sang tatlo ka adlaw, sang makakonsulta sa iya mga pari, nagsugo sia nga dal-on ini liwat sa iya atubang.

7 Kag nagsiling sia sa iya: Abinadi, nakakita kami sang kaso batok sa imo, kag nagakaangay ikaw sang kamatayon.

8 Kay ikaw nagsiling nga ang Dios mismo magapanaog sa tunga sang mga anak sang katawhan; kag karon, sa sini nga kabangdanan mapatay ka luwas lang kon bawion mo ang tanan nga pulong nga malain nga ginpanghambal mo parte sa akon kag sa akon katawhan.

9 Karon si Abinadi nagsiling sa iya: Ginasiling ko sa inyo, indi ko pagbawion ang mga pulong nga akon ginpanghambal sa inyo parte sa sining katawhan kay matuod ang mga ini; kag agud mahibal-an ninyo ang kapat-uran sang mga ini gintugotan ko ang akon kaugalingon nga mahulog ako sa inyo mga kamot.

10 Huo, kag pagaantoson ko bisan tubtob sa kamatayon, kag indi ko pagbawion ang akon mga pulong, kag magatindog ang mga ini bilang testimonya batok sa inyo. Kag kon patyon ninyo ako magapaagay kamo sang inosente nga dugo, kag magatindog man ini bilang testimonya batok sa inyo sa ulihing adlaw.

11 Kag karon si haring Noe naghana nga buy-an sia kay nahadlok sia sang iya pulong; kay nahadlok sia nga ang mga paghukom sang Dios magtupa sa iya.

12 Apang ang mga pari nag-alsa sang ila mga tingug batok sa iya, kag nagsugod sa pag-akusar sa iya nga nagasiling: Ginpasipalahan niya ang hari. Gani napukaw sa kaakig ang hari batok sa iya, kag gintugyan niya sia agud mapatay sia.

13 Kag natabo ini nga gindala nila sia kag gingapos sia, kag ginbunal ang iya panit sang mga kahoy nga inuggatong, huo, bisan tubtob sa kamatayon.

14 Kag karon sang ang mga dabadaba nagsugod sa pagpaso sa iya, nagsinggit sia sa ila nga nagasiling:

15 Tan-awa, bisan pareho sang inyo ginhimo sa akon, sa amo man matabo ini nga ang inyo kaliwatan mangin kabangdanan nga madamo ang magaantos sang mga kasakit nga akon ginaantos, bisan pa ang mga kasakit sang kamatayon paagi sa kalayo; kag ini bangod nagapati sila sa kaluwasan sang Ginuo nga ila Dios.

16 Kag matabo ini nga paantoson kamo sang tanan nga sari sang mga balatian tungod sang inyo mga kalainan.

17 Huo, kag pagasakiton kamo sa tanan nga bahin, kag panabugon kag palaptahon diri kag didto, bisan pareho sing isa ka maila nga panong nga ginatabog sang maila kag mapintas nga mga sapat.

18 Kag sa sina nga adlaw pangitaon kamo, kag pangdakpon kamo sang kamot sang inyo mga kaaway, kag dayon magaantos kamo, pareho sang akon pag-antos, sang mga kasakit sang kamatayon paagi sa kalayo.

19 Gani ang Dios magahikot sang pagtimalus sa ila nga nagapamatay sang iya katawhan. O Dios, batona ang akon kalag.

20 Kag karon, sang nahambal ni Abinadi ining mga pulong, natumba sia, nga nag-antos sang kamatayon paagi sa kalayo; huo, nga ginpatay bangod indi niya pag-isikway ang mga kasugoan sang Dios, nga gintakpan ang kamatuoran sang iya mga pulong paagi sa iya kamatayon.