Balaan ng mga Kasulatan
Mosias 4


Kapitulo 4

Si Haring Benjamin nagpadayon sang iya pamulongpulong—Ang kaluwasan nagaabot tungod sang Pagbayad-Sala—Magpati sa Dios agud maluwas—Hupti ang kapatawaran sang inyo mga sala paagi sa katampad—Magpaambit sang inyo manggad sa mga imol—Himoa ang tanan nga butang sa kaalam kag kahusay. Mga 124 B.C.

1 Kag karon, natabo ini nga sang makatapos si haring Benjamin sa paghambal sang mga pulong nga ginpahayag sa iya sang anghel sang Ginuo, nagtulok sia sa palibot sa kadam-an, kag tan-awa nagkalatumba sila sa duta kay ang kahadlok sa Ginuo nag-abot sa ila.

2 Kag nakit-an nila ang ila mga kaugalingon sa ila dutan-on nga kahimtangan nga manubo pa sangsa yab-ok sang duta. Kag sila tanan nagsininggit sing mabaskog sa isa ka tingug nga nagasiling: O kaluoyi, kag gamita ang nagabayad-sala nga dugo ni Cristo agud nga makabaton kami sang kapatawaran sang amon mga sala, kag ang amon mga tagipusuon mahimo nga mangin matinlo; kay nagapati kami kay Jesucristo, ang Anak sang Dios, nga nagtuga sang langit kag duta, kag sang tanan nga butang; nga magapanaog sa mga anak sang katawhan.

3 Kag natabo ini nga pagkatapos nga mahambal nila ining mga pulong ang Espiritu sang Ginuo nag-abot sa ila, kag napuno sila sing kalipay, nga nakabaton sang kapatawaran sang ila mga sala, kag may katawhay sang konsiyensya, tungod sing tuman nga pagtuo nga may yara sila kay Jesucristo nga magakari, suno sa mga pulong nga ginhambal ni haring Benjamin sa ila.

4 Kag si haring Benjamin liwat nga nagbukas sang iya baba kag nagsugod sa paghambal sa ila nga nagasiling: Mga kaabyanan ko kag mga kauturan ko, kaliwat ko kag katawhan ko, luyag ko liwat nga tawagon ang inyo igtalupangod agud mabatian ninyo kag mahangpan ang nabilin sang akon mga pulong nga ihambal ko sa inyo.

5 Kay tan-awa, kon ang ihibalo parte sa kaayo sang Dios sa sini nga tion nakapukaw sa inyo sa isa ka balatyagon sang inyo pagkawala-wala, kag sang inyo wala’y pulos kag nalaglag nga kahimtangan—

6 Ginasiling ko sa inyo, kon nakabaton kamo sang ihibalo parte sa kaayo sang Dios, kag sang iya wala’y tupong nga gahum, kag sang iya kaalam, kag sang iya pagkamapainumuron, kag sang iya pagkamainantuson tuhoy sa mga anak sang katawhan; kag amo man, sang pagbayad-sala nga ginhanda halin pa sa pagtuga sang kalibutan, nga paagi sa sini ang kaluwasan mahimo nga mag-abot sa iya nga magabutang sang iya pagsalig sa Ginuo, kag mangin matutum sa pagtuman sang iya mga kasugoan, kag magapadayon sa pagtuo bisan tubtob sa katapusan sang iya kabuhi, ang buot ko silingon ang kabuhi sang mortal nga lawas—

7 Ginasiling ko, nga amo ini ang tawo nga nagabaton sang kaluwasan paagi sa pagbayad-sala nga ginhanda halin pa sa pagtuga sang kalibutan para sa tanan nga tawo, nga nagkabuhi halin pa sang pagkahulog ni Adan, ukon nagakabuhi subong, ukon magakabuhi pa sa palaabuton, bisan tubtob sa katapusan sang kalibutan.

8 Kag amo ini ang paagi nga sa diin ang kaluwasan magaabot. Kag wala na sing iban pa nga kaluwasan luwas sa sini nga ginpahayag; ukon wala na sing bisan ano nga mga kondisyon nga sa diin ang tawo mahimo nga maluwas kundi sa mga kondisyon nga ginsugid ko sa inyo.

9 Magpati sa Dios; magpati nga buhi sia, kag nga gintuga niya ang tanan nga butang, pareho sa langit kag sa duta; magpati nga yara sa iya ang tanan nga kaalam, kag tanan nga gahum, pareho sa langit kag sa duta; magpati nga indi mahangpan sang tawo ang tanan nga butang nga mahangpan sang Ginuo.

10 Kag sa liwat, magpati nga kinahanglan gid kamo nga maghinulsol sang inyo mga sala kag talikdan ang mga ini, kag magpaubos sang inyo mga kaugalingon sa atubang sang Dios; kag magpangayo sing may sinsero nga tagipusuon nga patawaron niya kamo; kag karon, kon nagapati kamo sa tanan sining butang siguroha nga ginahimo ninyo ang mga ini.

11 Kag sa liwat ginasiling ko sa inyo pareho sang akon ginsiling sang una, nga kon nakadangat kamo sa ihibalo parte sa himaya sang Dios, ukon kon naagyan ninyo ang iya kaayo kag natilawan ang iya gugma, kag nakabaton sang kapatawaran sang inyo mga sala, nga nagatuga sinang tuman kadako nga kalipay sa inyo mga kalag, sa amo man luyag ko nga inyo dumdumon, kag dalayon nga huptan sa panumduman, ang pagkagamhanan sang Dios, kag ang inyo kaugalingon nga pagkawala-wala, kag ang iya kaayo kag pagkamainantuson tuhoy sa inyo, nga di-nagakaangay nga mga tinuga, kag ipaubos ang inyo mga kaugalingon bisan sa kadadalman sang pagkamapainubuson, nga nagapanawag sa ngalan sang Ginuo adlaw-adlaw, kag nagatindog sing malig-on sa pagtuo parte sinang magaabot, nga ginhambal sang baba sang anghel.

12 Kag tan-awa, ginasiling ko sa inyo nga kon himuon ninyo ini dalayon kamo nga magkasadya, kag mapuno sang gugma sang Dios, kag dalayon nga mahuptan ang kapatawaran sang inyo mga sala; kag magatubo kamo sa ihibalo sang himaya niya nga nagtuga sa inyo, ukon sa ihibalo parte sinang matarong kag matuod.

13 Kag indi kamo makapanghunahuna sa pagsakit sa isa kag isa, kundi magkabuhi sing may paghidaet, kag maghatag sa tagsa ka tawo suno sa sinang nagakadapat sa iya.

14 Kag indi ninyo pagtugotan ang inyo mga anak nga magutman sila, ukon mahublasan; kag indi man ninyo pagtugotan nga lapason nila ang mga layi sang Dios, kag mag-ilinaway kag magkinamog sa isa kag isa, kag mag-alagad sa yawa, nga agalon sang sala, ukon ang malain nga espiritu nga ginasiling sang aton mga amay, sia nga isa ka kaaway sang tanan nga pagkamatarong.

15 Kundi tudloan ninyo sila sa paglakat sa mga banas sang kamatuoran kag kaligdong; tudloan ninyo sila sa pagpalangga sa isa kag isa, kag sa pag-alagad sa isa kag isa.

16 Kag amo man, kamo sa inyo mga kaugalingon magabulig sinang mga nagakinahanglan sang inyo bulig; magapaambit kamo sang inyo manggad sa iya nga nagakinahanglan; kag indi ninyo pagtugotan nga ang manugpakilimos magpangayo sa inyo nga indi mahatagan, kag tabugon sia agud mapatay.

17 Ayhan masiling kamo: Ang tawo nagdala sa iya kaugalingon sang iya kalisud; gani punggan ko ang akon kamot, kag indi maghatag sa iya sang akon pagkaon, ukon magbahin sa iya sang akon manggad nga indi sia mag-antos, kay ang iya mga silot matarong—

18 Apang ginasiling ko sa inyo, O tawo, bisan sin-o nga nagahimo sini ang amo man may dako nga kabangdanan sa paghinulsol; kag luwas lang kon sia maghinulsol sinang iya ginhimo madula sia sa wala’y katapusan, kag wala sing bahin sa ginharian sang Dios.

19 Kay tan-awa, indi bala kita tanan mga manugpakilimos? Wala bala kita nagasandig sa amo man nga Persona, bisan ang Dios, para sa tanan nga manggad nga yari sa aton, para sa pagkaon kag panapton, kag para sa bulawan, kag para sa pilak, kag para sa tanan nga manggad sang tagsa ka sahi nga yari sa aton?

20 Kag tan-awa, bisan sa sini nga tion, nagapanawag kamo sa iya ngalan, kag nagapakitluoy para sa kapatawaran sang inyo mga sala. Kag gintugotan bala niya nga mangin wala’y kapuslanan ang inyo pagpakitluoy? Wala; ginbubo niya ang iya Espiritu sa inyo, kag ginpahanabo nga ang inyo mga tagipusuon mapuno sing kalipay, kag ginpahanabo nga ang inyo mga baba magkipot agud nga indi kamo makahambal, sa pagkadako sang inyo kalipay.

21 Kag karon, kon ang Dios, nga nagtuga sa inyo, nga kay sin-o kamo nagasandig para sa inyo mga kabuhi kag para sa tanan nga yara sa inyo kag kon ano kamo, nagahatag sa inyo sing bisan ano nga inyo ginapangayo nga husto, nga may pagtuo, nga nagapati nga magabaton kamo, O gani, daw ano nga dapat kamo maghatag sang manggad nga yara sa inyo sa isa kag isa.

22 Kag kon hukman ninyo ang tawo nga nagapangayo sa inyo sang inyo manggad agud indi sia mapatay, kag kondenahon sia, daw ano pa gid ka mas matarong ang pagkondenar sa inyo tungod sang inyo pagdalok sang inyo manggad, nga indi man inyo kundi iya sang Dios, nga sia man ang tag-iya sang inyo kabuhi; apang wala kamo nagapakitluoy, ukon nagahinulsol sang butang nga inyo nahimo.

23 Ginasiling ko sa inyo, kalisud sa sina nga tawo kay ang iya manggad madula upod sa iya; kag karon, ginasiling ko ining mga butang sa ila nga manggaranon parte sa mga butang sining kalibutan.

24 Kag sa liwat, ginasiling ko sa mga imol, kamo nga wala apang may bastante agud nga makapadayon kamo sa adlaw-adlaw; ang buot ko silingon tanan kamo nga nagabalibad sa manugpakilimos tungod wala kamo; luyag ko nga magsiling kamo sa inyo mga tagipusuon nga: Wala ako nagahatag tungod wala ako, apang kon may ara ako mahatag ako.

25 Kag karon, kon magsiling kamo sini sa inyo mga tagipusuon magapabilin kamo nga wala’y sala, kay kon indi ginakondenar kamo; kag ang pagkondenar sa inyo matarong kay nagakaibog kamo sinang wala ninyo nabaton.

26 Kag karon, sa katuyoan sining mga butang nga ginhambal ko sa inyo—nga amo ang maghupot sang kapatawaran sang inyo mga sala sa adlaw-adlaw, agud nga maglakat kamo nga wala’y sala sa atubang sang Dios—luyag ko nga maghatag kamo sang inyo manggad sa mga imol, ang tagsa ka tawo suno sa sinang yara sa iya, pareho sang pagpakaon sang mga ginagutom, pagpabiste sang mga hublas, pagbisita sa mga masakiton kag pag-ayuda para sa ila kaumpawan, pareho nga espirituhanon kag dutan-on, suno sa ila mga kakulang.

27 Kag sigurohon nga ining tanan nga butang ginahimo sa kaalam kag sa kahusay; kay wala ginapangayo nga ang isa ka tawo magdalagan sing mas madasig sangsa iya kusog. Kag sa liwat, ginakinahanglan nga mangin matutum sia, agud nga paagi sa sini mahimo niya nga maangkon ang padya; gani, ang tanan nga butang kinahanglan gid nga himuon sa kahusay.

28 Kag luyag ko nga inyo dumdumon nga kon sin-o man sa inyo ang nagapanghulam sa iya isigkatawo dapat nga mag-uli sang butang nga iya ginhulam, suno sa iya ginkasugtan, kay kon indi makasala kamo; kag basi mahatagan ninyo ang inyo isigkatawo sang kabangdanan nga makasala man.

29 Kag sa katapusan, indi ko masugid sa inyo ang tanan nga butang nga sa diin mahimo kamo nga makasala; kay may lain-lain nga mga paagi, bisan sa pagkadamo nga indi ko maisip ang mga ini.

30 Apang ini lamang ang masiling ko sa inyo, nga kon indi ninyo pagbantayan ang inyo mga kaugalingon, kag ang inyo mga panghunahuna, kag ang inyo mga pulong, kag ang inyo mga buhat, kag pagtumanon ang mga kasugoan sang Dios, kag pag-ipadayon sa pagtuo ang inyo nabatian parte sa pagkari sang aton Ginuo, bisan tubtob sa katapusan sang inyo mga kabuhi, pat-od gid nga madula kamo. Kag karon, O tawo, dumduma, kag indi madula.