Balaan ng mga Kasulatan
Mosias 25


Kapitulo 25

Ang mga kaliwat ni Mulek sa Zarahemla nangin mga Nefinhon—Natun-an nila ang parte sa katawhan ni Alma kag ni Zenif—Ginbunyagan ni Alma si Limhi kag ang tanan niya nga katawhan—Gin-awtorisar ni Mosias si Alma nga magpahamtang sang Simbahan sang Dios. Mga 120 B.C.

1 Kag karon si haring Mosias nagsugo nga ang tanan nga katawhan magtililipon.

2 Karon indi tuman kadamo ang mga anak ni Nefi, ukon indi tuman kadamo sadtong mga kaliwat ni Nefi sangsa katawhan ni Zarahemla, nga isa sang mga kaliwat ni Mulek, kag sadtong mga nag-upod sa iya padulong sa kamingawan.

3 Kag indi tuman kadamo ang katawhan ni Nefi kag ang katawhan ni Zarahemla sangsa mga Lamanhon; huo, wala sing katunga ang ila kadamuon.

4 Kag karon ang tanan nga katawhan ni Nefi nagtililipon, kag amo man ang tanan nga katawhan ni Zarahemla, kag nagtililipon sila sa duha ka grupo.

5 Kag natabo ini nga si Mosias nagbasa, kag nagsugo nga basahon ang mga kasulatan ni Zenif sa iya katawhan; huo, ginbasa niya ang mga kasulatan sang katawhan ni Zenif halin sa tion nga nagbiya sila sa duta sang Zarahemla tubtob nga nakabalik sila liwat.

6 Kag ginbasa man niya ang kasaysayan ni Alma kag sang iya mga kauturan, kag ang tanan nila nga pag-antos, halin sa tion nga nagbiya sila sa duta sang Zarahemla tubtob sa tion nga nakabalik sila liwat.

7 Kag karon, sang nakatapos si Mosias sa pagbasa sang mga kasulatan, ang iya katawhan nga nagpabilin sa duta natingala kag nakibot.

8 Kay indi sila kahibalo kon ano ang hunahunaon; kay sang nakita nila yadtong mga nahilway halin sa pagkaulipon napuno sila sing tuman kadako nga kalipay.

9 Kag sa liwat, sang mahunahuna nila ang ila mga kauturan nga ginpamatay sang mga Lamanhon napuno sila sing kasubo, kag nagpaagay pa gani sang madamo nga luha sang kasubo.

10 Kag sa liwat, sang mahunahuna nila ang gilayon nga kaayo sang Dios, kag ang iya gahum sa paghilway kay Alma kag sa iya mga kauturan halin sa mga kamot sang mga Lamanhon kag sa pagkaulipon, nagbayaw sila sang ila mga tingug kag naghatag sing mga pagpasalamat sa Dios.

11 Kag sa liwat, sang mahunahuna nila ang mga Lamanhon, nga ila mga kauturan, parte sang ila makasasala kag mahigko nga kahimtangan, napuno sila sang kasakit kag kalisud para sa kaayohan sang ila mga kalag.

12 Kag natabo ini nga yadtong mga anak ni Amulon kag sang iya mga kauturan, nga nagpalangasawa sang mga anak nga babayi sang mga Lamanhon, wala nalipay sa mga paggawi sang ila mga amay, kag indi na sila maluyag nga tawgon sa mga ngalan sang ila mga amay, gani gindala nila sa ila mga kaugalingon ang ngalan ni Nefi agud nga tawgon sila nga mga anak ni Nefi kag maisip sa sinang mga ginatawag nga mga Nefinhon.

13 Kag karon ang tanan nga katawhan ni Zarahemla gin-isip upod sa mga Nefinhon, kag ini bangod ang ginharian wala ginhatag sa bisan sin-o kundi sa ila nga mga kaliwat ni Nefi.

14 Kag karon natabo ini nga sang nakatapos si Mosias sa paghambal kag pagbasa sa iya katawhan, ginpangabay niya nga si Alma maghambal man sa katawhan.

15 Kag si Alma naghambal sa ila, sang nagtililipon sila sa dalagko nga mga grupo, kag nagkadto sia sa isa ka grupo pakadto sa isa nga nagawali sa katawhan sang paghinulsol kag pagtuo sa Ginuo.

16 Kag ginlaygayan niya ang katawhan ni Limhi kag ang iya mga kauturan, ang tanan sinang mga nahilway halin sa pagkaulipon, nga dapat nila dumdumon nga ang Ginuo amo ang naghilway sa ila.

17 Kag natabo ini nga pagkatapos nga natudloan ni Alma ang katawhan sang madamo nga butang, kag nakatapos sa paghambal sa ila, nga si haring Limhi luyag nga mabunyagan sia; kag ang tanan niya nga katawhan luyag nga mabunyagan man sila.

18 Gani, si Alma naglusong sa tubig kag ginbunyagan sila; huo, ginbunyagan niya sila suno sa paagi nga iya ginhimo sa iya mga kauturan sa mga tubig sang Mormon; huo, kag ang tanan nga iya ginbunyagan nangin miyembro sang simbahan sang Dios; kag ini tungod sang ila pagpati sa mga pulong ni Alma.

19 Kag natabo ini nga si haring Mosias nagtugot kay Alma nga magpahamtang sang mga simbahan sa bug-os nga duta sang Zarahemla; kag ginhatagan sia sing gahum sa pag-ordin sang mga pari kag mga manunudlo sa tagsa ka simbahan.

20 Karon ginhimo ini bangod madamo kaayo ang katawhan nga indi tanan madumalahan sing isa ka manunudlo; kag indi man tanan sa ila makabati sang tanan nga pulong sang Dios sa isa ka pagtipon;

21 Gani nagtililipon sila sang ila mga kaugalingon sa nagkalain-lain nga mga grupo nga ginatawag nga mga simbahan; ang tagsa ka simbahan nga may ila mga pari kag ila mga manunudlo, kag ang tagsa ka pari nagawali sang pulong suno sa pagkapahayag sini sa iya paagi sa baba ni Alma.

22 Kag gani, bisan pa nga madamo ang mga simbahan isa lang sila tanan ka simbahan, huo, bisan ang simbahan sang Dios; kay wala sing bisan ano nga ginwali sa tanan nga simbahan luwas sa paghinulsol kag pagtuo sa Dios.

23 Kag karon may pito ka simbahan sa duta sang Zarahemla. Kag natabo ini nga kon sin-o man ang luyag nga magdala sa ila mga kaugalingon sang ngalan ni Cristo, ukon sang Dios, nagbuylog sila sa mga simbahan sang Dios;

24 Kag gintawag sila nga katawhan sang Dios. Kag ginbubo sang Ginuo ang iya Espiritu sa ila, kag ginpakamaayo sila, kag nag-uswag sila sa duta.