1 Kag natabo ini nga pagkatapos nga nahimo ni Mosias ang suno sa ginsugo sang iya amay sa iya, kag nakapabantala sa bug-os nga duta, nga ang katawhan nagtililipon sang ila kaugalingon sa bug-os nga duta, agud nga mahimo sila nga makataklad sa templo sa pagpamati sa mga pulong nga igahambal ni haring Benjamin sa ila.

2 Kag dako ang ila kadamuon, bisan sa pagkadamo nga indi nila sila maisip; kay nagmuad sila sing tuman kag nagdamo sa duta.

3 Kag nagdala man sila sang mga panganay sang ila mga panong, agud makahatag sila sing halad kag mga halad-nga-sinunog suno sa layi ni Moises;

4 Kag agud man nga mahimo sila nga makahatag sing pagpasalamat sa Ginuo nga ila Dios nga nagdala sa ila pagwa sa duta sang Jerusalem, kag nagluwas sa ila halin sa mga kamot sang ila mga kaaway, kag nagpili sing matarong nga mga tawo nga mangin mga manunudlo nila, kag sing isa man ka matarong nga tawo nga mangin hari nila, nga amo ang nagpaluntad sang paghidaet sa duta sang Zarahemla, kag amo ang nagtudlo sa ila sa pagtuman sang mga kasugoan sang Dios, agud magkasadya sila kag mapuno sang gugma sa Dios kag sa tanan nga tawo.

5 Kag natabo ini nga sang nakaabot sila sa templo, nagpatindog sila sang ila mga tolda sa palibot, ang tagsa ka lalaki suno sa iya panimalay, nga nagalakip sang iya asawa, kag sang iya mga anak nga lalaki, kag sang iya mga anak nga babayi, kag sang ila mga anak nga lalaki, kag sang ila mga anak nga babayi, halin sa kamagulangan pakadto sa kamanghuran, nga ang tagsa ka panimalay napain ang isa sa isa.

6 Kag nagpatindog sila sang ila mga tolda sa palibot sang templo, nga ang tagsa ka tawo may iya tolda nga ang puwertahan sini nagaatubang sa templo, agud nga paagi sa sini mahimo sila nga magpabilin sa ila mga tolda kag makabati sang mga pulong nga ihambal ni haring Benjamin sa ila;

7 Kay sa pagkadako sang kadam-an sa bagay nga indi sila tanan matudloan ni haring Benjamin sa sulod sang mga dingding sang templo, gani nagpasugo sia nga isa ka tore ang patindugon, agud nga paagi sa sini ang iya katawhan mahimo nga makabati sang mga pulong nga iya igahambal sa ila.

8 Kag natabo ini nga nagsugod sia sa paghambal sa iya katawhan halin sa tore; kag indi tanan sa ila ang makabati sang iya mga pulong tungod sang kadakuon sang kadam-an; gani nagpasugo sia nga ang mga pulong nga iya ginhambal isulat kag ipadala sa sinang mga indi malab-ot sang iya tingug agud makabaton man sila sang iya mga pulong.

9 Kag amo ini ang mga pulong nga iya ginhambal kag ginpasulat nga nagasiling: Mga kauturan ko, tanan kamo nga nagtililipon sang inyo mga kaugalingon, kamo nga makabati sang akon mga pulong nga akon ihambal sa inyo sa sini nga adlaw; kay wala ko kamo pagsugoa sa pagtaklad diri agud ipasapayan lamang ang mga pulong nga akon ihambal, kundi nga magpamati kamo sa akon, kag buksan ang inyo mga dulunggan agud inyo mabatian, kag ang inyo mga tagipusuon agud inyo mahangpan, kag ang inyo mga kaisipan agud ang mga misteryo sang Dios mahimo nga mahumlad sa inyo panan-awan.

10 Wala ko kamo pagsugoa sa pagtaklad diri agud mahadlok kamo sa akon, ukon nga kamo magahunahuna nga ako sa akon kaugalingon mas labaw sangsa mortal nga tawo.

11 Kundi pareho ako sa inyo mga kaugalingon nga napaidalom sa tanan nga sari sang kahuyangan sa lawas kag kaisipan; apang pinili ako sining katawhan, kag ginkonsagrar sang akon amay, kag gintugotan sang kamot sang Ginuo nga ako ang mangin tagdumala kag hari sining katawhan; kag gintatap kag gin-amligan sang iya wala’y tupong nga gahum, sa pag-alagad sa inyo sa bug-os nga ikasarang, kaisipan kag kusog nga ginhatag sang Ginuo sa akon.

12 Ginasiling ko sa inyo nga tungod nga gintugotan ako sa paghinguyang sang akon mga adlaw sa pag-alagad sa inyo, bisan tubtob sa sini nga tion, kag wala naghandum sang bulawan ukon pilak ukon bisan ano nga sari sang mga manggad halin sa inyo;

13 Wala ko man pag-itugot nga mahunong kamo sa mga bilanggoan, ukon nga himuon ninyo nga mga ulipon ang isa kag isa, ukon nga magpamatay kamo, ukon magpangagaw, ukon magpangawat, ukon magpanglahi; wala ko man bisan gintugot nga maghimo kamo sing bisan ano nga sari sang kalainan, kag gintudloan ko kamo nga magtuman kamo sang mga kasugoan sang Ginuo, sa tanan nga butang nga iya ginsugo sa inyo—

14 Kag bisan ako, sa akon kaugalingon, nagpangabudlay paagi sa akon kaugalingon nga mga kamot agud nga makaalagad sa inyo, kag indi kamo mapabug-atan sang mga buwis, kag wala sing magaabot sa inyo nga mabug-at pas-anon—kag sa tanan sining butang nga akon ginhambal, mga saksi kamo sa inyo mga kaugalingon sa sini nga adlaw.

15 Apang, mga kauturan ko, wala ko paghimoa ining mga butang agud nga magpabugal ako, wala ko man pag-isugid ining mga butang agud nga paagi sa sini mahimo ko kamo nga basulon; kundi nga ginasugiran ko kamo sining mga butang agud mahibal-an ninyo nga makasabat ako nga may matinlo nga konsiyensya sa atubang sang Dios sa sini nga adlaw.

16 Tan-awa, ginasiling ko sa inyo nga tungod nagsiling ako sa inyo nga ginhinguyang ko ang akon mga adlaw sa pag-alagad sa inyo, wala ako nagahandum sa pagpabugal, kay yara lamang ako sa pag-alagad sa Dios.

17 Kag tan-awa, ginasugid ko sa inyo ining mga butang agud nga makaangkon kamo sang kaalam; agud nga inyo mahibal-an nga kon yara kamo sa pag-alagad sa inyo mga isigkatawo yara lamang kamo sa pag-alagad sa inyo Dios.

18 Tan-awa, gintawag ninyo ako nga inyo hari; kag kon ako, nga ginatawag ninyo nga inyo hari, nagapangabudlay sa pag-alagad sa inyo, gani indi bala nagakadapat nga magpangabudlay kamo sa pag-alagad sa isa kag isa?

19 Kag tan-awa man, kon ako, nga ginatawag ninyo nga inyo hari, nga naghinguyang sang iya mga adlaw sa pag-alagad sa inyo, kag sa gihapon yara sa pag-alagad sa Dios, nagakabagay sang ano man nga pagpasalamat halin sa inyo, O daw ano nga nagakadapat nga magpasalamat kamo sa inyo Hari nga langitnon!

20 Ginasiling ko sa inyo, mga kauturan ko, nga kon ihatag ninyo ang tanan nga pagpasalamat kag pagdayaw nga ang inyo bug-os nga mga kalag may gahum sa pag-angkon, sa sinang Dios nga nagtuga sa inyo, kag nagtatap kag nag-amlig sa inyo, kag nagpahanabo nga magkinasadya kamo, kag nagtugot nga magpuyo kamo sa paghidaet sa isa kag isa—

21 Ginasiling ko sa inyo nga kon magaalagad kamo sa iya nga nagtuga sa inyo halin sa ginsuguran, kag nagaamlig sa inyo adlaw-adlaw, paagi sa pagpahulam sa inyo sang ginhawa, agud nga mahimo kamo nga mabuhi kag maghulag kag maghimo suno sa inyo kaugalingon nga kabubut-on, kag nagasakdag pa sa inyo sa tagsa ka tion—ginasiling ko, bisan magaalagad kamo sa iya sa bug-os ninyo nga mga kalag apang kamo sa gihapon mangin wala’y pulos nga mga alagad.

22 Kag tan-awa, ang iya lang gid nga ginapangayo sa inyo amo ang magtuman sang iya mga kasugoan; kag nagpromisa sia sa inyo nga kon magtuman kamo sang iya mga kasugoan magauswag kamo sa duta; kag wala gid sia nagatalikod sa sinang iya nasiling; gani, kon nagatuman kamo sang iya mga kasugoan ginapakamaayo niya kamo kag ginapauswag kamo.

23 Kag karon, una sa tanan, gintuga niya kamo, kag ginhatagan kamo sang inyo mga kabuhi nga sa sini may utang kamo sa iya.

24 Kag ika-duha, ginapangayo niya nga himuon ninyo ang suno sa iya ginasugo sa inyo; nga sa sini kon himuon ninyo, gilayon nga ginapakamaayo niya kamo; kag gani nabayaran na niya kamo. Kag nakautang pa kamo gihapon sa iya, kag may yara, kag mangin may yara pa, tubtob sa wala’y katapusan; gani, ano ang inyo mapabugal?

25 Kag karon ginapamangkot ko, may masiling bala kamo nga bisan ano parte sa inyo mga kaugalingon? Sabton ko kamo, Wala. Indi gani kamo makasiling nga katupong kamo bisan sa mga yab-ok sang duta; apang gintuga kamo halin sa yab-ok sang duta; apang tan-awa, iya ini sang nagtuga sa inyo.

26 Kag ako, bisan ako, nga ginatawag ninyo nga inyo hari, indi mas maayo sangsa inyo mga kaugalingon; kay halin man ako sa yab-ok. Kag nakita ninyo nga tigulang na ako, kag nagahana na ako nga magtugyan sining mortal nga lawas sa iya iloy nga duta.

27 Gani, pareho sang akon nasiling sa inyo nga nakaalagad ako sa inyo, nga nagalakat nga may matinlo nga konsiyensya sa atubang sang Dios, nga sa amo nga bagay nagpasugo ako nga magtililipon kamo sang inyo mga kaugalingon, agud masalapoan ako nga wala’y kabasulanan, kag ang inyo dugo indi magtupa sa akon kon magatindog ako agud hukman sang Dios tungod sang mga butang nga iya ginsugo sa akon parte sa inyo.

28 Ginasiling ko sa inyo nga nagpasugo ako nga magtililipon kamo sang inyo mga kaugalingon agud nga makakasan ko ang akon mga biste sang inyo dugo, sa sining panahon nga nagahana na ako magpanaog sa akon lulubngan, agud nga mahimo ako nga magpanaog sa paghidaet, kag ang akon wala’y kamatayon nga espiritu mahimo nga magbuylog sa mga koro sang kalangitan sa pagkanta sang mga pagdayaw sing isa ka matarong nga Dios.

29 Kag dugang pa sina, ginasiling ko sa inyo nga nagpasugo ako nga magtililipon kamo sang inyo mga kaugalingon agud nga mapahayag ko sa inyo nga indi na ako mahimo nga mangin inyo manunudlo, ukon inyo hari;

30 Kay bisan sa sini nga tion, ang akon bilog nga lawas nagapalangurog sing tuman samtang nagatinguha sa paghambal sa inyo; apang ang Ginuong Dios nagasakdag sa akon, kag nagtugot sa akon nga maghambal ako sa inyo, kag nagsugo sa akon nga ipahayag ko sa inyo sa sini nga adlaw nga ang akon anak nga si Mosias amo ang hari kag tagdumala ninyo.

31 Kag karon, mga kauturan ko, luyag ko nga himuon ninyo ang pareho sa inyo ginahimo tubtob subong. Bangod sang pagtuman ninyo sang akon mga kasugoan, kag amo man sang mga kasugoan sang akon amay, kag nag-uswag, kag napunggan nga mahulog sa mga kamot sang inyo mga kaaway, sa amo man kon tumanon ninyo ang mga kasugoan sang akon anak, ukon ang mga kasugoan sang Dios nga igapahayag niya sa inyo, magauswag kamo sa duta, kag ang inyo mga kaaway wala sing gahum sa inyo.

32 Apang, O katawhan ko, mag-andam kamo nga basi may magtuhaw nga mga pagbinaisay sa tunga ninyo, kag pilion ninyo ang magtuman sang malain nga espiritu nga ginsiling sang akon amay nga si Mosias.

33 Kay tan-awa, may isa ka silot nga ipamatbat sa iya nga magpili sa pagtuman sina nga espiritu; kay kon magpili sia sa pagtuman sa iya, kag magpabilin kag mapatay sa iya mga sala, ang amo man magainom sang silot sa iya kaugalingon nga kalag; kay magabaton sia bilang iya mga suhol sing isa ka wala’y katubtuban nga silot sa paglapas sang layi sang Dios nga wala nagasanto sa iya kaugalingon nga ihibalo.

34 Ginasiling ko sa inyo, nga wala sing bisan isa sa tunga ninyo, luwas lang nga ini magagmay ninyo nga mga kabataan nga wala matudloi parte sining mga butang, nga wala makahibalo nga kamo wala’y katapusan nga may utang sa inyo Amay nga langitnon, sa paghatag sa iya sang tanan nga yara sa inyo kag sang inyo mga kaugalingon; kag natudloan man parte sang mga kasulatan nga nagaunod sang mga propesiya nga ginhambal sang balaan nga mga propeta, bisan tubtob sa tion nga ang aton amay nga si Lehi nagbiya sa Jerusalem;

35 Kag amo man, sang tanan nga ginhambal sang aton mga amay tubtob subong. Kag tan-awa, naghambal man sila sinang ginsugo sa ila sang Ginuo; gani, ang mga ini matarong kag matuod.

36 Kag karon, ginasiling ko sa inyo, mga kauturan ko, nga pagkatapos nga nakahibalo kamo kag natudloan sining tanan nga butang, kon magalapas kamo kag magagawi batok sa sinang ginhambal, ginapalayo ninyo ang inyo mga kaugalingon sa Espiritu sang Ginuo nga wala na ini sing lugar sa inyo sa paggiya sa inyo sa mga banas sang kaalam agud mahimo kamo nga mabugayan, mapauswag kag maamligan—

37 Ginasiling ko sa inyo, nga ang tawo nga nagahimo sini, ang amo man nagagwa sa hayag nga pagrebelde batok sa Dios; gani ginapili niya ang magtuman sang malain nga espiritu, kag nangin isa ka kaaway sa tanan nga pagkamatarong; gani, ang Ginuo wala sing lugar sa iya kay wala sia nagapuyo sa di-balaan nga mga templo.

38 Gani kon ina nga tawo indi maghinulsol, kag magapabilin kag mapatay nga isa ka kaaway sang Dios, ang mga ginapangayo sang diosnon nga hustisya nagapukaw sang iya wala’y kamatayon nga kalag sa isa ka mabaskog nga balatyagon sang iya kaugalingon nga kabasulanan, nga amo ang mangin rason agud nga magpalangupos sia sa atubang sang Ginuo, kag magpuno sang iya dughan sang kabasulanan, kag kahapdi, kag kasakit, nga pareho sang di-mapalong nga kalayo, nga ang iya dabadaba nagapasaka tubtob sa wala’y katapusan.

39 Kag karon ginasiling ko sa inyo, nga ang kaluoy indi makaangkon sina nga tawo; gani ang iya katapusan nga kapalaran amo ang magbatas sing isa ka di-matapos nga pagpaantos.

40 O, tanan kamo nga tigulang nga mga lalaki, kag kamo man nga mga pamatan-on, kag kamo nga magagmay nga kabataan nga makahangop sang akon mga pulong, kay naghambal ako sing maathag sa inyo agud nga mahangpan ninyo, ginapangamuyo ko nga magbugtaw kamo sa isa ka panumduman sang makahaladlok nga kahimtangan sinang mga nahulog sa kalapasan.

41 Kag dugang pa sina, luyag ko nga binag-binagon ninyo ang bulahan kag malipayon nga kahimtangan sinang mga nagatuman sang mga kasugoan sang Dios. Kay tan-awa, ginapakamaayo sila sa tanan nga butang, pareho nga dutan-on kag espirituhanon; kag kon magpabilin sila nga tampad tubtob sa katapusan pagabatonon sila sa langit, agud nga paagi sa sini mahimo sila nga magpuyo upod sa Dios sa isa ka kahimtangan sang di-matapos nga kalipayan. O dumduma, dumduma nga ining mga butang matuod; kay ang Ginuong Dios ang naghambal sini.